//rgya gar skad du su pra ti Sh+tha ta n+t+ra saM gra ha/ bod skad du/ rab tu gnas pa mdor bsdus pa'i rgyud/ dpal rdo rje sems dpa' la phyag 'chal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi dam tshig rdo rje byin gyis rlob pa zhes bya ba'i ting nge 'dzin la snyoms par zhugs nas/ brdungs pa dang / bris pa dang / 'bur du byas pa la sogs 90a @#/ /pa rab tu gnas pa'i cho ga gsungs pa/ slob dpon de nyid bcu shes shing / /mtshan nyid kun dang yang dag ldan/ /phyag rgya sngags dang cho ga shes/ /las rnams kun la mkhas pas so/ /sku gzugs mtshan nyid ldan pa ste/ /zhi ba la sogs ro yis ldan/ /tshad kyis tshad la phab cing bzang / /de 'dra rab tu gnas par 'gyur/ /yang thog mchod rten sogs gnas dang / /khyim dang lha yi gnas rnams su/ /sangs rgyas la sogs rab gnas ni/ /cho ga dag dang ldan pas bya/ /cho ga dman pas mi bya ste/ /rab gnas rtag par bkra mi shis/ /'jig rten 'dir yang sdug bsngal la/ /'jig rten pha rol 'jigs pa che| |de bas 'bad pa thams cad kyis/ /dngos grub 'dod pas nan tan bya/ /cho ga bdag nyid nus pa yis/ /brtag pa las gsungs tshul legs pas/ /de byas bsod nams che ba ni/ /mthong dang mi mthong rnams su skye/ /sku gzugs sngags kyi mtshan nyid kyis/ /de la byin rlabs 'jug par 'gyur/ /gang du sku gzugs rdzogs pa la/ /byin ma brlabs par ring gnas na/ /de la bkra mi shis 'byung zhing / /ji srid mchod par de mi 'os/ /dper na skyes bu la la zhig 90b rig pa'i mtshan nyid spangs pa na/ /'jig rten dun gyi mchod mi byed/ /de de bzhin du gzugs brnyan de/ /rab gnas ma byas gzugs brnyan la/ /gang gis mchod cing phyag bed pa/ /dam tshig bral zhing sngags dman pas/ /sbyin sreg thal ba 'bras med mtshungs/ /de bzhin du yang sngags gnas pas/ /chos ldan mchod pa byed pa gang / /de yi las kyi rnam smin gyis/ /skye pa ru ni mchod par 'gyur/ /byang chub sems dpa' rnams kyis gsol ba/ bcom ldan 'das/ chos thams cad rab tu mi gnas pa lags na/ ji ltar na rgyal ba rnams kyis rab tu gnas pa lags/ bcom ldan 'das kyis bka' stsal pa/ sangs rgyas kun ni rab tu bzhugs/ /rab tu gnas pa gang na'ang med/ /kun tu mkha' ltar gnas pa la/ /gcig shos kyis ni rab tu brtags/ /'jig rten kun rdzob la brten nas/ /rab tu gnas par rab tu brtags/ /dam pa'i don du dpyad pa na/ /gang zhig gang gis gang du brlab/ /gzod ma nas ni skye med pa/ /ci 'dras ji ltar rab tu gnas/ /dang po'i las can sems can rnams/ /rtogs pa'i rgyu ru bshad par zad/ /dang por re zhig yongs su brtags pa'i gnas yongs su sbyangs pa dang / gdugs dang / rgyal mtshan dang 91a @#/ /bla re dang / ba dan bsgreng ba rnams su mchog tu gsol ba 'debs pas gsol ba btab pa'i bla ma spos dang / me tog la sogs pa dang ldan pas tshes dang / rgyu skar shis pa la slob dpon legs par mnyam par gzhag pas rab tu gnas pa'i sar 'khod de/ sangs rgyas dang / byang chub sems dpa' la sogs pa rigs lnga dang rab tu 'brel ba yin la/ de bzhin du rab tu 'brel ba'i dkyil 'khor gyi tshogs sa yongs su gzung zhing thig gdab pa dang / rdul tshon gyi las dang / gsol ba gdab pa la sogs pa byas la/ rtsa ba'i sngags sam/ rgyud kyi dgongs pas sa'i gter du nor bu'am/ sor gdub bcug la/ de nas lha'i khang par rang gi slob ma dang por bcug ste/ rnam pa kun gyi mchog dang ldan pa'i de bzhin gshegs pa la sogs pa'i skur bltas la/ lha la mngon par phyogs te phyag 'tshal zhing / /ji ltar 'byor ba'i me tog thal mo dang / /dri chu gtsang mas cho ga bzhin brtags la/ /ting nge 'dzin la legs gnas pas/ /zhabs bsil me tog spos sogs ldan/ /rnam par mi rtog sems kyis ni/ /mchod yon rnams ni phul byas la/ /mnyam par gzhag pas sngags 'di yis/ /lan 91b gsum par du brjod par bya'o/ /oM sa ma ya s+t+waM sa ma ya ho a haM/ ji ltar sangs rgyas thams cad ni/ /dga' ldan du ni gnas pa las/ /lha mo sgyu 'phrul lhums zhugs ltar/ /de bzhin gzugs brnyan 'dir bzhugs shig /'di ru mgon po rtag bzhugs nas/ /byang chub sems ni bskyed pa dang / /'di zhes bya ba'i don slad du/ / bdag gi 'byor pa nyid kyis ni/ /ci 'byor pa yi mchod pa rnams/ /me tog la sogs 'di bzhes shig /bdag dang sleb mar bcas pa la/ /rjes su brtse bas dgongs su gsol/ /kun gyis 'di la byin brlab cing / /de nyis du ni bzhugs par rigs/ /sku gzugs sta gon legs byas la/ /de nas rtag par mnyam par brtsam/ /slob ma smyung bar gnas pa yi/ /de ltar thams cad spyad byas la/ /sngags pas mchod pa'i cho ga sogs/ /bla ma yis ni gang bsgo ba/ /ma tshogs pa kun bsgrub par bya/ /mchod sbyin 'bras bu chen po 'gyur/ /de nas sngags pas snyan gsan dbab/ /gdan la bstim byas mchod yon dang / mchod pa gtor ma spos me tog /de bzhin du ni mar me dag /sngags dang ldan pas dbul bar bya/ /sku gzugs mdun du phyag byas la/ /na bza' ser pos g.yogs bya zhing / /de nas sngags pas 'du bya ba/ /khyad par du ni bdug 92a @#/ /par bya/ /de nas bsgrub phyir de la ni/ /de la lan gcig gtor bya ba/ /de nas de la sngags 'dis na/ /me dang de nas chu la gtor/ /oM sarba pA baM da ha na b+dz+rA ya swA hA/ zhes bya bas so/ /de nas/ rnam pa kun gyi mchog ldan pa'i/ /don bzhin du ni bsgom bya ste/ /de nas gnas gsum rnams su bstim/ /oM hUM AH yi yi ge gsum/ /oM yig sbyin bor bstim bya zhing / /snying gar hUM gi yi ger 'gyur/ /ngag gi phyogs su AH yig go /sku gsung thugs ni bsgrub par bya/ /yang na/ gang gi sa bon gang yin pa/ /de yi thugs gar de dgod do/ /phyag rgya sngags kyis rab bskul zhing / /ci rigs pa ni snyan gsan dbab/ /gser ram dngul lam zangs ma'am/ /rdo dang de bzhin shing dang ni/ /sa 'am dung chos de bzhin te/ /yang na shing lo'i 'dab ma rnams/ /mchod yon snod du sbyar bar bya/ /de bzhin bum pa gser la sogs/ /zangs ma'i snod kyi mchod yon ni/ /mchod yon snod la rab tu shis/ /gal te nus pas ma rnyed na/ /ji ltar rnyed pas kun tu bya/ /de nas dri yi til mar sogs/ /dUr ba'i phon gyi pir gyis sbyang / /bkra shis rnga la sogs pa'i sgras/ /na chung rnams kyis de bzhin brjod/ /til mar la sogs sngags kyis ni// 92b oM sarba ta thA ga ta kA ya bi sho d+ha ni swAhA/ bum lnga 'am yang na brgyad/ /tsan+dan la sogs rnams kyis byug /sna tshogs dri chus dgang ba dang / /'khor lor byas la mngon par bsngags/ /bu mos bkal ba'i srad bu 'am/ /yang na ras bal skud pa'ang rung / /tshon chen po yis bsgyur byas la/ /de la sngags kyis dkri bar bya/ /sman lngag \?\ ni chen lnga dang ni/ /me tog 'bras bur ldan pa ste/ /sku gsum pa dang yungs kar ldan/ /bum pa mngon par bsngags par bya/ /gtsug tor rnam rgyal zhes bya dang / /gzi brjid gzhan gyis mi rji dang / /bkra shis zhi rnams sngags kyis ni/ /khrus kyi tshad du mngon par bsngags/ /'jam pa'i til mar dag dang ni/ /u du ma wA ra'i lcug \?\ ma bzang / /'khar ba'i snod kyi nang dag tu/ /bkod la rab tu dbul bar bya/ /dri lnga yis ni de dag byug /sa bon lnga ni gtor bar bya/ /slob ma tshogs dang bcas pa yis/ /sngags kyi gtsang sbras bkru bar bya/ /bkra shis zhes bya yid 'ong ba'i/ /blo dang ldan pas tshigs bcad brjod/ /rig ma spyan ma ji bzhin du/ /cho ga bzhin du mngon dbang bskur/ /sngags ni/ ji ltar bltams pa tsam gyis ni/ /lha yi chu ni dag pa yis/ /de bzhin gshegs kun khrus gsol ltar/ /de bzhin bdag gis 93a @#/ /khrus gsol lo/ /zhes bya ba la sogs pas so/ /oM sarba ta thA ga ta a b+hi She ka ta sa ma ya shri ye hUM/ lugs ma rnams ni dngos su bkru/ / ri mo rnams ni me long la'o/ /dag byed lngas ni sngon du bsgo/ /dUr ba yis ni mnye bar bya/ /ras sam lag pa dag gis ni/ /blo dang ldan pas sku lus phyi/ /gur gum mar dang bcas pas bsku/ /gos zung dag kyang sku la gsol/ /blo dang ldan pas sngags 'di yis/ /dkyil 'khor dbus su bzhugs su gsol/ /oM d+hi b+dz+ra wA sa se swAhA/ oM b+dz+ra gan+d+he swAhA/ oM b+dz+ra A ba ra Na bi shud+d+he swAhA/ blo ldan gyis rang dam tshig bskul/ /phyag rgya sngags kyi dbang bskur ba/ /ji ltar 'os par mngon dbang bskur/ /oM hUM aM dz+riM khaM/ de ltar cod pan bcing byas la/ /gdan la legs par bzhugs gsol te/ /brtag pa las gsungs tshul gyis so/ / mdun phyogs su ni ma bub cing / /yo ba min zhing drang ba yis/ /de ltar sku gzugs mdzes par dgod/ /de ltar min na skyon 'byung 'gyur/ /me tog spos dang de bzhin dri/ /mar me na bza' sogs 'byor gang / /de kun sngags dang ldan pa yis/ /lha rnams la ni dbul bar bya/ /oM b+dz+ra puSh+pe AH hUM/ zhes bya ba 'di dag la 93b sogs pas so/ /mchog gi me tog 'di dag ni/ /chu dang thang las de bzhin skyes/ /mchog tu dad pas khyod la 'bul/ /ci bde bar ni so sor bzhes/ /lhan cig skyes dang sbyar las byung / /mchog gi bdug pa 'di dag ni/ /bdag gi dad pas 'bul lags kyis/ /ci bde bar ni bzhes su gsol/ /lhan cig skyes dang sbyar las byung / / mchog tu gyur pa'i dri 'di ni/ /mchog gi dad pas 'bul lags kyis/ /ci bde bar ni so sor bzhes/ /mun pa 'joms byed snang ba'i mchog /mar dang til gyi mar me 'di// yang dag ye shes spyan dbye phyir/ /dad pas bdag gis dbul bar bgyi/ /bza' dang bca' ba phun sum tshogs/ /kha dog dri ro rnams dang ldan/ /thams cad ldan pa'i lha yi bshos/ /bdag gis dbul gyis so sor bzhes/ /de la sogs pa gang yang yung / /cung zad ci 'byor sku gzugs la/ /de dag thams cad 'di nyid kyis/ rim pa yis ni dbul bar bya/ /sngags kyi gtsang sbra tsA ru bya/ /der ni gser gyi rang bzhin gyi/ /thur mas spyan ni dbye bar bya/ /zhal zas der dbul blo ldan pas/ /oM tsak+ShuH tsak+ShuH sa man+ta tsak+Shu bi sho d+ha ni swAhA/ oM d+h+yA na sa mA d+hi pri Na ne swA hA/ de ltar bzlas te de nas yang / /slob ma rab tu bcug byas la/ /khyod kyis nga la gang gsol ba'i/ /sku 94a @#/ /gzugs dag ni khyad par du/ /ji ltar gsungs pa'i rab gnas par/ /de dag don ni nges byas te/ /de rnams don ni grub zin gyi/ /ci bde bar ni mchod par byos/ /de nas dam tshig dbang bskur bar/ /khyod la byas kyis sreg blugs ni/ /stong ngam yang na de yi phyed/ /sngar gsungs par mas 'bru rnams kyis/ 'o ma can gyi bud shing la/ /sreg khung gru bzhir sreg blugs bya/ /de nyid mar dang 'o ma yis/ /lhag ma tsA rur phul byas la/ /bdag dang slob ma thams cad ni/ /zhi dang rgyas pa 'phel bar bya/ /oM b+dz+ra A yu She swAhA/ A gats+tsha ha ri pad+gi le te dza te dza ha lo gi ta k+Sha de hi da ba ya i daM tsa l+ye kAR+Yan ku ru swAhA/ oM b+dz+ra puSh+Ta ya swAhA/ de ltar byas la 'bad pa yis/ /khri yi steng du bzhugs par bya/ /sku gzugs kyi ni sum 'gyur cha'i/ /tshad tsam du ni rab tu brtag /oM su pra tiSh+Tha b+dz+re swAhA/ me tog spos sogs sngon 'gro bas/ /phyogs skyong rnams kyang mchod par bya/ /oM in+d+ra ya swAhA/ zhes bya bas dbang ldan la thug gi bar du rol mo'i sgra la sogs pas yang dag par mchod de gshegs su gsol bar bya ba ni/ rdzogs sangs rgyas dang de yi sras/ /tshangs sogs lha yi tshogs rnams dang / /gang dag chog ga ma tshang ba/ /de dag bzod pa mdzad 94b bar rigs/ /kun tu zhi dang rgyas pa ru/ /yon bdag tshe la rab mdzad nas/ /sangs rgyas yul du gshegs nas ni/ /slar yang 'byon par mdzad du gsol/ /sa dang chu dang me rlung gi /lha rnams kun gyi sku gzugs la/ /bskal ba brgya ru bsrung gnas mdzod/ /dgyes shing yid bzang gyur nas su/ /slob dpon slob mar bcas pa yi/ /bu dang tsha po bsrung mdzad nas/ /rang gnas bde bar gshegs su gsol/ /dpyid zla ra ba'am dpyid zla 'bring / /dgun dang dpyid kyi tha chungs sam/ /dbyar ra de bzhin dbyar 'bring po/ /nyi ma byang du gnas pa yi/ /dkar po'i phyogs kyi gnyis pa'am/ /rim bzhin de ltar gsum pa 'am/ /gang tshe gza' dang rjes mthun/ /nag po'i phyogs la'ang brtsam par bya/ /gang tshe thams cad mthun gyur na/ /mi rnams yun du 'phel bar byed/ /bco lnga de bzhin brgyad pa dang / /bcu gsum pa yang de bzhin no/ / gnam stong dang ni de bzhin du/ /bcu bzhi pa la'ang bya ba min/ /thams cad du ni chu smad dang / snar ma gro zhun de bzhin te/ /lag pa snubs dang snron dang ni/ /rgyal dang chu smad de bzhin no/ /khrums smad dag kyang de bzhin te/ /rgyu skar 'di rnams thams cad du/ /skye dgu 'phel zhing de yi ni/ /rab tu gnas pa'i mchog tu byed/ /skar ma 95a @#/ /dbo la rab gnas bya/ /des ni shes rab chen por 'gyur/ /yid la 'dod pa ci yang rung / /dngos grub me bzhis ster bar 'gyur/ /lus las shes pa yang dag pa/ /khrums sam yang na gro bzhin gyis/ /lag gis skal bzang snar mas ni/ /gzhan dag las ni rgyal bar byed/ /mgo yis zhi ba nye bar ston/ / chu stod kyis ni bu dag gson/ /rtag par dngos grub khrums smad kyis/ /rgyal gyis rtag par tshe ring 'gyur/ /snron gyis mchog tu ba de bar byed/ /lha mtshams kyis ni mchog ster 'gyur/ /phur bu lag dang pa ba sangs/ /zla ba gza' sogs shes bya ste/ /'di rnams bzang ldan la byas na/ /rab tu gnas pa mchog tu dge /gsum pa drug pa bdun pa la/ /bcu dang bcu gcig la zla ba/ /gnyis pa bzhi pa de bzhin brgyad/ /bcu dang bcu gcig rnams la lag/ /gnyis dang bdun dang de bzhin dgu /de bzhin phur bu bcu gcig pa/ /dus sbyor zhi ba las brten nas/ /de la lhag par gnas par bya/ /drug bdun bcu pa dor ba yis/ /pa ba sangs nyid dge ba yin/ /de ltar gza' rnams thams cad kyi/ /stobs ldan mi ldan der shes bya/ /gang tshe zhi ba'i gza' rnams dang / /zhing rnams zhi ba dge ba yin/ /dang po lnga pa gsum de bzhin/ /nor 95b rnams 'joms pa spang bar bya/ /rjes su mthun par byed pa pos/ /skad cig de la yongs 'grub cing / /ji ltar gsungs bzhin kun byas na/ /rab tu gnas pa mchog 'gyur zhing / /'khor los bsgyur rgyal dbang phyug ni/ /thob 'gyur de la the tshom med/ /gza' dang rgyu skar der med de/ /bgegs dang log par 'dren pa'ang med/ /gza' rnams thams cad rjes mthun zhing / /bgegs dang rgyu skar lha rnams nyid/ /de ru grub par kun gnas shing / /gzugs brnyan mchod rten la sogs kyi/ /dngos grub dag ni ster bar mdzad/ /yid kyis cung zad gang bsams pa/ /skye dang skye ba 'grub bar 'gyur/ /rgyan rnams ma lus pa yis ni/ /phyi nas bzo bo rnams la mchod/ /gang dag de la grogs byed pa/ /gzhan dag kyang ni mchod par bya/ /de nas de dag thams cad la/ /dga' bas 'di skad brjod par bya/ /ji ltar gsungs pa'i mchod pa rnams/ /bdag la mthun pa'i nus pa med/ /de phyir khyod la bdag bzod gsol/ /sngags kyis gtsang sbra'i bza' bca' dag /gzugs brnyan dag la sbyin bya ste/ /bder gshegs lhag ma 'di dag ni/ /zo zhig sdig pa byang bar 'gyur/ /zhes bya bas so/ /glang po rta glang shing rta nor/ /yon gyi dam pa dbul bar bya/ /de nas de la nan tan gyis/ /longs 96a @#/ /spyod g.yo ba dbul bar bya/ /gal te lha nyid dgyes 'dod na/ /bla ma gus pas dgyes bya zhing / /de ltar rnam pa thams cad du/ /bla ma yang dag mnyes par bya/ /de nas yang dag brtul zhugs can/ /dge slong dge bsnyen dge slong ma/ /mchog tu gus pas mchod byas la/ /ji ltar 'os pa'i yon yang dbul/ /dung ngam rol mo sgra la sogs/ /bzang po'i glu dang gar rnams kyis/ /gnyen dang rigs rgyud 'khor rnams kyis/ /rol mo chen po mtshan mo dbul/ / de ltar thams cad phul zin nas/ /gang rung mchod sbyin dkyil 'khor la/ /phul lam 'bul bar byed pa rnams/ /slob dpon la ni dbul bya yi/ /bzo bo la ni mi sbyin zhing / /dge slong rnams la'ang sbyin mi bya/ /slob dpon mchog gi lha yin te/ /nor rnams thams cad de la dbul/ /de nas dkyil 'khor byug bya ste/ /ba yi lci bas byugs bya zhing / /rdul tshon chu bor rab dor ro/ /de yis yang dag legs par 'gyur/ /rab tu gnas pa mdor bsdus pa'i rgyud rdzogs so// // kha che'i paN+Ti ta chen po dz+nyA na badz+ra dang / lo tsA ba 'bro dge slong shes rab grags pas bsgyur ba'o// |