//rgya gar skad du/ AR+Ya rat+na rA shi nA ma mahA yA na sU tra/ bod skad du/ 'phags pa rin po che'i phung po zhes bya ba theg pa chen po'i mdo/ /bam po dang po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong brgyad stong tsam gyi dge slong gi dge 'dun chen po dang / sangs rgyas kyi zhing sna tshogs nas 'dus pa'i byang chub sems dpa' khri drug stong 261a @#/ /dang thabs gcig tu bzhugs te/ thams cad kyang 'di lta ste/ bla na med pa yang dag par rdzogs pa'i byang chub tu skye ba gcig gis thogs pa phyir mi ldog pa'i bzod pa thob pa sha stag go/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das dge sbyong dge sbyong zhes bgyi ba ji tsam gyis na dge sbyong dge sbyong zhes bgyi ba lags/ de skad ces gsol pa dang / bcom ldan 'das kyis tshe dang ldan pa 'ong srung chen po la 'di skad ces bka' stsal to/ /'od srung / dge sbyong dge sbyong zhes bya ba ni zhi ba dang / dul ba dang / cang shes pa dang / tshul khrims kyi phung po yongs su dag pa dang / ting nge 'dzin la 'jug pa shes pas dge sbyong zhes bya ste/ shes rab dang ldan pa dang / rnam par grol ba'i snying po lhur len pa dang / rnam par thar pa'i sgo gsum la som nyi med cing the tshom mi za ba dang / 'phags pa'i spyod yul la gnas pa dang / dran pa nye bar gzhag pa bzhi la gnas pa dang / yang dag par spong ba bzhi la gnas pa dang / rdzu 'phrul gyi rkang pa bzhi bsgom pa bsgoms pa dang / dad pa'i dbang po dang ldan pa dang / sangs rgyas la dad pa mi phyed pa dang / chos la dad pa mi phyed pa dang / dge 'dun la dad pa mi phyed pa dang / sangs rgyas dang chos dang dge 'dun la shes nas dad pa dang 261b ldan pa dang / gzhan gyi dring la mi 'jog pa'i shes rab dang ldan pa dang / dge ba'i chos rnams la brtson 'grus brtsams pa dang / srid pa bcom pa dang / yang dag par zhugs pa dang / dran pa dang shes bzhin la mkhas pa dang / sems rtse gcig pa dang / shes rab kyis lhag mthong la mkhas pa dang / stobs lnga dang ldan pa dang / nyon mongs pa thams cad kyis mi brdzi ba dang / byang chub kyi yan lag bdun la bsam gtan pa dang / chos rnams kyi brten pa shes pa la mkhas pa dang / lam shes pa dang / lam la mkhas pa dang / yang dag pa'i lta ba dang / yang dag pa'i ting nge 'dzin dang / zhi gnas lhag mthong bsgom pa la mkhas pa dang / so so yang dag par rig pa bzhi la gzhan gyi dring mi 'jog pa'i shes rab dang ldan pa dang / don la rton gyi tshig 'bru la mi rton pa dang / ye shes la rton gyi rnam par shes pa la mi rton pa dang / nges pa'i don gyi mdo sde la rton gyi drang ba'i don gyi mdo sde la mi rton pa dang / chos nyid la rton gyi gang zag la mi rton pa dang / bdud bzhi'i lam las shin tu 'das pa dang / phung po yongs su shes pa bsrung ba dang / nyon mongs pa bsal ba dang / tha ma'i lus 'dzin pa dang / 'chi bdag gi lam las yang dag par 'das pa dang / sdug bsngal ba yang dag par yongs su shes pa dang / kun 'byung ba thams cad spangs pa dang / 262a @#/ /'gog pa mngon sum du bya ba la zhugs pa dang / lam bsgom pa'i rnal 'byor gyi rjes su zhugs pa dang / 'phags pa'i bden pa bzhi mthong ba dang / gzhan gyi dring la mi 'jog pa dang / ston pa'i bstan pa la bya ba byas pa dang / byed pa byas pa dang / zag pa zad pa dang / rnam par thar pa brgyad la bsam gtan pa dang / brgya byin dang / tshangs pa dang / 'jig rten skyong bas bsu ba dang / sngon gyi spyod pa dang bsam pa phun sum tshogs pa dang / dgon pa la gnas par mngon par dga' ba dang / 'phags pa'i rigs la gnas pa dang / sbyangs pa'i yon tan la gnas pa dang / blo gya gyu med pa dang / rab tu byung nas khyim gyi gnas dang mi 'dre ba dang / bse ru ltar gcig pur rgyu ba dang / 'du 'dzis 'jigs skrag pa dang / khams gsum las rnam par grol ba dang / rtag tu 'jigs pa'i yid dang ldan pa dang / yang dag pa'i dge sbyong gi tshul la gnas pa dang / thams cad la 'dod pa med pa dang / 'jig rten gyi chos brgyad po rnyed pa dang / ma rnyed pa dang / grags pa dang / ma grags pa dang / bde ba dang / sdug bsngal ba dang / bstod pa dang / smad pa rnams las yang dag par 'das pa dang / sa dang mtshungs pa'i sems kyis nye bar bsgrubs te gnas pa dang / bdag dang gzhan rjes su bsrung ba dang / 262b 'khrul pa med pa dang / 'khrug pa med pa dang / yang dag par zhugs pa dang / nam mkha' dang mtshungs pa'i sems kyis nye bar bsgrubs te gnas pa dang / mtshan ma thams cad la de'i sems mi chags/ mi 'ching ste/ dper na/ nam mkha' la lag mthil bzhin du mi chags/ mi 'ching ba yin te/ 'od srung / dge sbyong gi chos rnam pa de lta bu de dag dang ldan na dge sbyong dge sbyong zhes bya'o/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das/ 'di ltar de bzhin gshegs pa dgra bcom pa yang dag par rdzogs pa'i sangs rgyas kyis yang dag pa'i dge sbyong gi yon tan 'di dag yang dag par rab tu bstan pa ni ngo mtshar to/ /bcom ldan 'das/ ma mchis pa'i dus na gang dag de bzhin gshegs pa'i byang chub bskal pa grangs ma mchis par yang dag par bsgrubs pa nub par bgyid pa/ dge sbyong ma lags pa la dge sbyong du mchid kyis 'che zhing| tshangs par spyod pa ma lags par tshangs par spyod par mchid kyis 'che ba'i dge slong la la dag 'byung bar 'gyur lags sam/ bcom ldan 'das kyis bka' stsal pa/ 'od srung| nga dang / khyod dang / nyan thos chen po 'di dag kyang yongs su mya ngan 'das shing / byang chub sems dpa' 'di dag kyang sangs rgyas kyi zhing gzhan du dong nas bstan pa 'di rab tu 263a @#/ /'jig par 'gyur ba ni/ tshig gis bstan par mi nus so/ /'od srung / de la dge slong lus ma bsgoms pa/ tshul khrims ma bsgoms pa/ sems ma bsgoms pa/ shes rab ma bsgoms pa/ byis pa/ dman pa/ glen pa/ rmongs pa/ rab tu ma zhi ba/ ma dul ba kha cig 'byung bar 'gyur te/ de dag gi g.yo dang / sgyu dang / mi drang ba dang / gya gyu dang / dge sbyong gi dri ma dang / dge sbyong gi skyon rnams brjod par bya'o/ /'od srung / de la dge sbyong gi dri ma rnams gang zhe na/ 'od srung / sum cu rtsa gnyis bo 'di dag ni dge sbyong gi dri ma ste/ de dag spangs na dge sbyong dge sbyong zhes bya'o/ /sum cu rtsa gnyis gang zhe na/ 'dod pa la rnam par rtog pa dge sbyong gi dri ma dang / gnod sems kyi rnam par rtog pa dge sbyong gi dri ma dang / rnam par 'tshe ba'i rnam par rtog pa dge sbyong gi dri ma dang / bdag la bstod pa dge sbyong gi dri ma dang / gzhan la brnyas pa dge sbyong gi dri ma dang / mi mthun pa'i rnyed pa kun du tshol ba dge sbyong gi dri ma dang / rnyed pas rnyed par byed 'dod pa dge sbyong gi dri ma dang / dad pas byin pa chud son pa dge sbyong gi dri ma dang| ltung ba 'chab pa dge sbyong gi dri ma dang / khyim pa la brten pa dge sbyong gi dri ma dang / rab tu byung ba dang brten pa dge sbyong gi dri ma dang / 'du 'dzi la mngon par dga' ba dge 263b sbyong gi dri ma dang / rnyed pa yongs su ma grub par rtog pa dge sbyong gi dri ma dang / bdag gi rnyed pas chog par mi 'dzin pa dge sbyong gi dri ma dang / pha rol bsod snyoms rnyed pa la phrag dog dang ser sna byed pa dge sbyong gi dri ma dang / pha rol gyi rnyed pa la 'dod pa dge sbyong gi dri ma dang / bdag gi 'khrul pa la mi rtog pa dge sbyong gi dri ma dang / gzhan gyi 'khrul pa yongs su tshol ba dge sbyong gi dri ma dang / so sor thar pa dang 'dul ba mi srung ba dge sbyong gi dri ma dang / khwa ltar mu cor smra ba dge sbyong gi dri ma dang / ma gus pa dang rgod pa dang khengs pa dge sbyong gi dri ma dang / lta bas kun nas dkris pa dge sbyong gi dri ma dang / rten cing 'brel par 'byung ba dang 'gal ba dge sbyong gi dri ma dang / mthar lta ba la gnas pa dge sbyong gi dri ma dang / 'khor ba la mngon par dga' ba dge sbyong gi dri ma dang / mya ngan las 'das pa la mngon par mi dga' ba dge sbyong gi dri ma dang / 'jig rten rgyang pan pa'i gsang tshig 'dzin pa dge sbyong gi dri ma dang / sgrib pas kun nas dkris pa dge sbyong gi dri ma dang / las kyi rnam par smin pa dang 'gal ba dge sbyong gi dri ma dang / rnam par thar pa'i sgo gsum gyis skrag pa dge sbyong gi dri ma dang / chos zab mo spong ba dge sbyong gi dri ma dang / chos dang 'gal bar gnas pa dge sbyong gi dri ma dang / dkon mchog gsum la mi gus pa dge sbyong gi dri ma ste/ 'od 264a @#/ /srung| sum cu rtsa gnyis po de dag ni dge sbyong gi dri ma ste/ de dag spangs na dge sbyong dge sbyong zhes bya'o/ /'od srung / brgyad po 'di dag ni dge sbyong gi chos kyi sgrib pa ste/ brgyad gang zhe na/ 'di lta ste/ bla ma rnams la mi gus pa dang / chos rnams la rim gro med pa dang / tshul bzhin ma yin pa yid la byed pa dang / ma thos pa'i mdo sde spong pa dang / bdag med pa dang / sems can med pa dang / srog med pa dang / gang zag med pa'i chos kyis skrag pa dang / 'dus ma byas kyi chos bstan pa la mi 'jug gi 'dus byas nyid kyi rjes su snyeg pa dang / 'du byed rnams ma skyes pa zhes thos nas skrag pa dang / chos rnams rang bzhin gyis ma skyes pa thos na g.yang sa chen por lhung ba bzhin du ltung ba ste/ 'od srung / brgyad po 'di dag ni dge sbyong gi chos kyi sgrib pa ste/ rab tu byung bas de dag yongs su spang bar bya'o/ /'od srung / dge sbyong gi kha dog dang rtags kyi dbyibs kyis dge sbyong zhes nga mi 'chad kyi/ yon tan gyi chos la nan tan byed pa'i dge sbyong ni dge sbyong zhes ngas bshad do/ /'od srung / dge sbyong gis ni rnyog pa med pa'i sems kyis lus la ngur smrig dag bcang bar bya'o/ /de ci'i phyir zhe na/ 'od srung / rnyog pa med pa la ngas ngur smrig gnang gi/ 'od srung / rnyog pa dang bcas pa'i 264b lus la ngur smrig dag 'chang ba de dag thams cad ni ngur smrig tshig pa'o zhes bshad de/ bsam pas mos pa rnams ni ma gtogs so/ /de ci'i phyir zhe na/ 'di ni 'phags pa rnams kyi rgyal mtshan yin pa'i phyir te/ skyo zhing 'dod chags dang bral bar spyod pa rnams kyis gos 'di dag ni nye bar zhi ba'i rjes su mthun pa byams pa'i rjes su zhugs pa'o/ / 'od srung / de la 'phags pa rnams kyi rgyal mtshan gang zhe na/ 'od srung / bcu gnyis po 'di dag ni 'phags pa rnams kyi rgyal mtshan te/ bcu gnyis gang zhe na/ 'od srung / tshul khrims 'phags pa rnams kyi rgyal mtshan dang / ting nge 'dzin 'phags pa rnams kyi rgyal mtshan dang / shes rab 'phags pa rnams kyi rgyal mtshan dang / rnam par grol ba 'phags pa rnams kyi rgyal mtshan dang / rnam par grol ba'i ye shes mthong ba 'phags pa rnams kyi rgyal mtshan dang / bden pa la 'jug pa 'phags pa rnams kyi rgyal mtshan dang / rten cing 'brel par 'byung ba la 'jug pa 'phags pa rnams kyi rgyal mtshan dang / bsam gtan bzhi 'phags pa rnams kyi rgyal mtshan dang / tshad med pa bzhi 'phags pa rnams kyi rgyal mtshan dang / gzugs med pa'i snyoms par 'jug pa bzhi 'phags pa rnams kyi rgyal mtshan dang / skyon med pa la 'jug pa 'phags pa rnams kyi rgyal mtshan dang / 265a @#/ /zag pa zad pa 'phags pa rnams kyi rgyal mtshan te/ 'od srung / bcu gnyis po 'di dag ni 'phags pa rnams kyi rgyal mtshan no/ /'od srung / gang la la rgyal mtshan 'di dag dang mi ldan par 'phags pa'i rigs gos ngur smrig dag 'chang ba de ni nor ba'i chos la zhugs pa'o zhes ngas bshad do/ /chos dang 'gal bar gnas pa zhes bshad do/ /de bzhin gshegs pa'i bstan pa las ring du gnas pa zhes bshad do/ /mya ngan las 'das pa'i phyogs kyi mi mthun pa'i phyogs la gnas pa zhes bshad do/ /'khor ba'i phyogs dang mthun pa zhes bshad do/ /nga rgyal gyi mchil pas zin pa zhes bshad do/ /snying po ma blangs pa zhes bshad do/ /chos las nyams pa zhes bshad do/ /nyam nga ba'i lam la gnas pa zhes bshad do/ /'od srung / de lta bas na dge sbyong gi lus la ngur smrig dag 'chang ba na rnyog pa med pa'i sems su bya'o/ / gal te des 'bras bu thob par ma gyur na/ de la gus pa brgyad kyis lus la ngur smrig dag bcang bar bya ste/ brgyad gang zhe na/ mchod rten gyi 'du shes dang / ston pa'i 'du shes dang / nye bar zhi ba'i 'du shes dang / byams pa'i 'du shes dang / sangs rgyas la gus pa'i 'du shes dang / ngo tsha shes pa'i 'du shes dang / khrel yod pa'i 'du shes 265b dang| rnyog pa med par bya'o snyam pa ste/ dge sbyong gi tshul dang mthun pa'i gus pa brgyad po de dag gis lus la ngur smrig dag bcang bar bya'o/ /'od srung / gang dag lhod cing yang dag par mi sdom pa dang / dge sbyong gi yon tan gyi chos 'di dag las nyams par lus la ngur smrig dag 'chang ba rnams mi gus pa 'di dag mi bskyed do/ /'od srung / dge sbyong gi kha dog dang gzugs can la gnod pa byed pa zhes bya ba nyi tshe ba'i sems can dmyal ba yod de/ 'od srung / nyi tshe ba'i sems can dmyal ba der dge sbyong gi gzugs su gyur bzhin du| gos 'bar ba dag dang / mgo 'bar ba dag dang / lhung bzed 'bar ba dag dang / stan 'bar ba dag dang / mal cha 'bar ba dag gnod par byed de/ de dag gi longs spyod dang / yongs su spyad pa gang ci yod pa de dag thams cad 'bar/ rab tu 'bar te/ kun du rab tu mched cing 'bar ba de mer gyur te/ dge sbyong kha dog dang gzugs kyis gnod pa de dag myong bar 'gyur ro/ /de ci'i phyir zhe na/ 'di ltar lus dang ngag dang yid kyi las yongs su ma dag pa dang ldan pa'i phyir te/ lus dang ngag dang yid kyi las yongs su ma dag pa dang ldan pa de dag gi 'gro ba yongs su ma dag pa nyid du 'gyur ro/ /'od srung / dge sbyong ma yin pa la dge sbyong du khas 'che ba dang / tshangs par spyod pa ma yin pa la tshangs par spyod par khas 266a @#/ /'che ba gang zhig tshul khrims dang ldan pa rnams dang / yon tan dang ldan pa rnams kyis phyag byas pa bdag gir byed na de mi dge ba'i las des brnyas pa brgyad 'thob ste/ brgyad gang zhe na/ bems po lta bur 'gyur ba dang / go dka' zhing le lo can du 'gyur ba dang / skye bo mang pos brgal ba'i bud med du 'gyur ba dang| rang dbang med cing bran du 'gyur ba dang / mdog ngan cing mi sdug par 'gyur ba dang / mdog ngan cing dbang chung grags par 'gyur ba dang / de la su yang bsu bar mi 'gyur ba dang / sbyin gnas rnams la mgu bar mi byed pa ste/ brnyas pa brgyad po 'di dag 'thob bo/ /'od srung / de lta bas na bzang po ma yin pa'i chos 'di lta bu 'di dag thos nas dge sbyong sdig pa can gyis gzhan gyis phyag byas pa bdag gir mi bya'o/ /'od srung / dge sbyong ma yin pa la dge sbyong du khas 'che ba dang / tshangs par spyod pa ma yin pa la tshangs par spyod par khas 'che ba ni tha na sa chen po 'di la mchil ma'i thal ba tsam 'dor ba de yang rnyed par mi 'gyur na/ gom pa 'debs pa dang / 'jog pa lta ci smos/ de ci'i phyir zhe na/ 'od srung chen po/ 'di ni sngon gyi rgyal po rnams kyis tshul khrims dang ldan pa rnams dang / yon tan dang ldan pa rnams dang / sbyin gnas rnams 266b la kun du spyad pa'i don du phul ba'i phyir ro/ /'od srung / de la mi blun po de ni gom pa 'jog pa dang 'dor ba gang yin pa de dag thams cad kyang dad pas byin pa la mi dbang bzhin du gom pa 'dor zhing 'jog pa yin na/ dge 'dun gyi'am/ phyogs bzhi'i dge 'dun gyi khri'am/ khri'u 'am/ 'chag sa'am/ gding ba'am/ gnas khang 'am/ gtsug lag khang ngam/ kun dga'i ra ba'am/ kun dga'i ra ba'i gzhi'am/ yongs su spyad pa'am/ lhung bzed dam/ chos gos sam/ bsod snyoms sam/ mal cha'am/ na ba'i gsos sman nam/ yo byad kyang rung ste/ thams cad dad pas byin pa la mi dbang bar spyod pa yin pa lta ci smos/ 'od srung / khyod mos par bya'o/ /khyod kyis khong du chud par bya'o/ /'od srung / dge sbyong ma yin pa la dge sbyong du khas 'che ba dang / tshangs par spyod pa ma yin pa la tshangs par spyod par khas 'che bas ni dad pas byin pa skra'i rtse mo'i cha tsam yang yongs su dag par bya mi nus so/ / de ci'i phyir zhe na/ 'od srung / 'phags pa'i dge 'dun ni ngas rgya mtsho chen po lta bu dang / bsod nams kyi zhing dang / sbyin gnas rnams kyi mchog tu bstan pa'i phyir ro/ /'od srung / bram ze'am khyim bdag dad pa gang dag de la yon 'bul ba de dag tshad med pa'i 'du shes kyis 'bul ba de la/ 'od srung / mi blun po tshul khrims 'chal pas tha na skra'i rtse mo brgyar 267a @#/ /gshags pa'i cha tsam zhig dad pas byin pa yongs su spyad na yang sbyin pa po dang / sbyin pa dag de'i yongs su sbyang ba'i phyir dad pas byin pa skra'i rtse mo'i cha tsam ji snyed la spyad pa de snyed kyi las kyi rgya mtsho chen po gsog par 'gyur ro/ /'od srung / de lta bas na tshul khrims yongs su dag pas dad pas byin pa yongs su spyad par bya'o/ / zhes khyod kyis de ltar bslab par bya'o/ /bstan pa 'di bshad pa na rnal 'byor spyod pa'i dge slong nyis brgyas bstan pa 'di thos nas rab tu ngus te mchi ma zag cing tshig 'di skad ces bdag cag ni gum yang rung ste/ 'bras bu ma thob kyi bar du dad pas stsal pa'i bsod snyoms gcig tsam yang yongs su spyad par mi bgyi'o zhes smras so/ /bcom ldan 'das kyis bka' stsal pa/ skyes bu dam pa dag /legs so/ /legs so/ /ngo tsha shes pa dang / 'gyod pa dang ldan pa dang / 'jig rten pha rol tu kha na ma tho bas 'jigs par lta ba rnam pa 'di lta bu dag gis gsung rab 'di mdzes so/ /'od srung / ngas dge slong gnyis la dad pas byin pa gnang ste/ gnyis gang zhe na/ ldan pa dang / grol ba'o/ / yang gnyis te/ gang 'du byed thams cad la mi rtag par lta ba dang / gang yang sems rnam par grol ba byams pa la snyoms par 'jug pa'o/ /dge slong dag /de la dge 267b slong ldan pa rnal 'byor spyod pa nga'i bstan pa la zhugs pa gang zhig sbyin pa po dang / sbyin bdag las chos gos dang / bsod snyoms dang / mal cha dang / na ba'i gsos sman dang / yo byad rnams yongs su spyad nas 'khor pa'i skyon mthong / 'du byed thams cad ni mi rtag par mthong / 'du byed thams cad sdug bsngal bar rig /chos thams cad la bdag med par mos/ mya ngan las 'das pa zhi bar rtogs pas ni ri rab tsam gyi kham dag gi dad pas byin pa yongs su spyad kyang / de'i yon shin tu yongs su dag par 'gyur ro/ /sbyin pa po dang / sbyin bdag gang dag las dad pas byin pa yongs su spyad pa de las de dag gi bsod nams kyi rnam par smin pa 'byor pa chen po dang / phan yon chen por 'gyur ro/ /de ci'i phyir zhe na/ dge slong dag /rdzas las byung ba'i bsod nams bya ba'i dngos po rnams las/ gang byams pa'i sems la snyoms par 'jug pa de mchog yin pa'i phyir ro/ / dge slong dag /dge slong gang zhig sbyin pa po sbyin bdag gi chos gos dang / bsod snyoms dang / mal cha dang / yo byad rnams yongs su spyad nas sems rnam par grol ba tshad med pa la snyoms par 'jug na sbyin pa po dang sbyin bdag de'i rnam par smin pa yang tshad med par shes par bya'o/ /'od srung / stong gsum gyi stong chen po'i 'jig rten gyi khams na 268a @#/ /yod pa'i rgya mtsho chen po rnams ni yongs su zad par 'gyur yang srid kyi/ de'i bsod nams kyi rgyu mthun pa ni yongs su zad par gang yang mi 'gyur ro/ /'od srung| gang zhig sbyin pa po dang / sbyin bdag gi dad pas byin pas yongs su spyad nas 'chal ba'i tshul khrims kyis log par ltung ba byed na/ mi gti mug pa de gnod pa ji tsam gyi phyir zhugs pa la ltos/ 'od srung / de bas na dge sbyong gi dri ma dang / dge sbyong gi skyon dang / dge sbyong gi mi drang ba dang / dge sbyong gi g.yo dang / dge sbyong gi sgyu dang / dge sbyong gi gya gyu rnam pa de lta bu de dag ni dge sbyong bsam pa dag pas yongs su spang bar bya'o/ /'od srung / dge sbyong dge sbyong zhes bya ba ni/ gang mi gnas mi zag cing / rna ba nas ma yin/ sna nas ma yin/ lce nas ma yin/ lus nas ma yin/ yid nas kyang ma zag pa ste/ de'i phyir dge sbyong dge sbyong zhes bya'o/ /skye mched drug rig pa dang / mngon par shes pa drug dang / rjes su dran pa drug dang ldan pa dang / dam pa rnams la gus par gnas pa dang / pha rol tu 'gro ba'i chos drug la gnas pa ste/ de'i phyir dge sbyong dge sbyong zhes bya'o/ /dge sbyong gi le'u ste dang po'o// //'od srung / dge slong dge slong zhes bya ba ni nyon mongs pa bcom pa'i phyir dge slong zhes bya'o/ /bdag tu 'du shes 268b pa bcom pa dang / sems can du 'du shes pa dang / srog tu 'du shes pa dang / gso bar 'du shes pa dang / gang zag tu 'du shes pa dang / skyes par 'du shes pa dang / bud med du 'du shes pa dang / khye'ur 'du shes pa dang / bu mor 'du shes pa bcom pa ste/ de'i phyir dge slong dge slong zhes bya'o/ /lus bsgoms pa dang / tshul khrims bsgoms pa dang / sems bsgoms pa dang / shes rab bsgoms pa dang / 'jigs skrag pa med pa dang / srid pa'i chu bo las brgal ba dang / 'byung ba dang 'jig pa la lta ba dang / 'jigs pa thams cad las bral ba dang / 'jigs pa med pa'i lam la gnas pa ste/ de'i phyir dge slong dge slong zhes bya'o/ /'od srung / gang la la zhig chos 'di dag dang mi ldan la bdag ni dge slong dge slong ngo snyam du khas 'che na/ bsam pas mos pa ma gtogs par nga yang de'i ston pa ma yin la/ de yang nga'i nyan thos ma yin no/ /'od srung / sdig pa can gyi dge slong dag phal cher nga'i bstan pa 'di nub par byed par 'gyur te/ 'od srung / ya mtshan can dgu bcu rtsa lnga dang / phas kyi rgol ba thams cad kyis ni nga'i bstan pa 'di nub par byed mi nus so/ / gzhan du na nga'i bstan pa 'di las mi gti mug pa nges par mi sems pa gang dag 'byung ba de dag gis nga'i bstan pa nub bar byed par 'gyur ro/ /'od srung / 'di lta ste/ dper na/ 269a @#/ /ri dwags kyi rgyal po seng ge shi ba'i sha la gcan gzan nam/ bya gang gis kyang za bar mi nus kyi/ seng ge'i ro de nyid las srin bu gang dag 'byung ba de dag ri dwags kyi rgyal po seng ge'i sha la za'o/ /'od srung / de bzhin du nga'i bstan pa 'di nyid las mi blun po brkam pa chags pa'i zil gyis non pa chos ma yin pa la lta ba/ nges par mi sems pa/ lhod pa/ brdzun du smra ba gang dag 'byung ba de dag nga'i bstan pa nub par byed par 'gyur ro/ /'od srung / chos bzhi dang ldan na sdig pa can gyi dge slong du rig par bya ste/ bzhi gang zhe na/ chags pa dang / zhe sdang dang / gti mug dang / nga'o snyam pa'i nga rgyal te/ bzhi po de dag go /gzhan yang bzhi ste/ bzhi gang zhe na/ khengs pa dang / mu cor smra ba dang / bya khwa ta lta bu dang / tshig 'chal pa ste/ bzhi po de dag go /gzhan yang bzhi ste/ bzhi gang zhe na/ rgod pa dang / po \ PHO?\ theg can dang / rnyed pa 'dod pa dang / chos ma yin pa 'dod pa ste/ bzhi po de dag go /gzhan yang bzhi ste/ bzhi gang zhe na/ g.yo can dang / sgyu can dang / mi mthun pas 'tsho ba dang / mi gtsigs par smra ba yin te/ bzhi po de dag go| gzhan yang bzhi ste/ bzhi gang zhe na/ byas pa mi gzo ba dang / byas pa la smod pa dang / sngon byas pa mi dran dang / mdza' bo la 'khu ba yin te/ bzhi po de dag go/ gzhan yang 269b bzhi ste/ bzhi gang zhe na/ dad pas byin pa log par ltung bar byed pa dang / tshul khrims mi srung ba dang / so sor thar pa khyad du gsod pa dang / 'dul ba mi srung ba ste/ bzhi po de dag go /gzhan yang bzhi ste/ bzhi gang zhe na/ bdag tu smra ba yin/ sems can du smra ba yin/ srog tu smra ba yin/ gang zag tu smra ba yin te/ bzhi po de dag go /gzhan yang bzhi ste/ bzhi gang zhe na/ sangs rgyas la mi gus pa yin/ chos la mi gus pa yin/ dge 'dun la mi gus pa yin/ bslab pa rnams la mi gus pa yin te/ bzhi po de dag go /gzhan yang bzhi ste/ bzhi gang zhe na/ dge 'dun mthun pa la mi dga' ba yin/ gtsug lag khang la dga' ba mi rnyed pa yin/ 'du 'dzi la mngon par dga' pa yin/ 'jig rten rgyang pan ba'i gsang tshig brjod pa yin te/ bzhi po de dag go /gzhan yang bzhi ste/ bzhi gang zhe na/ rnyed pa 'dod pa yin/ grags pa 'dod pa yin/ gnyen bshes 'dod pa yin/ chos la mchog tu dga' ba mi rnyed pa yin te/ bzhi po de dag go /gzhan yang bzhi ste/ bzhi gang zhe na/ bdud kyis zin pa yin/ bdud kyis non pa yin/ rmugs pa dang gnyid mang pa yin| 'phags pa'i rigs rnams la mi gnas pa yin te/ bzhi po de dag go/ gzhan yang bzhi ste/ bzhi gang zhe na/ lus rul cing brgyan pa dang / nyon mongs pas snad pa dang / mya 270a @#/ /ngan las 'das pa la rgyab kyis bltas pa dang / 'bras bu thob pa med pa yin te/ bzhi po de dag go /gzhan yang bzhi ste/ bzhi gang zhe na/ 'dod chags kyi yongs su gdung bas yongs su gdungs pa dang / zhe sdang gi yongs su gdung bas yongs su gdungs pa dang / gti mug gi yongs su gdung bas yongs su gdungs pa dang / nyon mongs pa thams cad kyis yongs su gdungs pas yongs su gdung ba ste/ bzhi po de dag go /gzhan yang bzhi ste/ bzhi gang zhe na/ lam ngan pa la gnas te 'byung ba mi mthong ba yin/ ser sna can du gyur te kun mi 'gyed pa'i ngang tshul can yin/ thams cad yongs su 'dzin par 'dod cing chog mi shes pa yin/ ngoms mi myong zhing thos pa'i nan tan dang bral ba yin te/ bzhi po de dag go /gzhan yang bzhi ste/ bzhi gang zhe na/ mun par gzhol bas mun par gyur pa yin/ rmongs pa la gzhol bas rmongs par gyur pa yin/ log pa'i chos kyis dkris pas chos ma yin pa mthong ba yin/ mya ngan las 'das pa'i sgo bcad pas 'khor ba'i bcing bas bcings pa yin te/ bzhi po de dag go |gzhan yang bzhi ste/ bzhi gang zhe na/ lus kyi tshul 'chos pa yin/ ngag gi tshul 'chos pa yin/ sems kyi tshul 'chos pa yin/ spyod lam gyi tshul 'chos pa yin 270b te| bzhi po dag go /de la lus kyi tshul 'chos pa ni dal gyis 'gro bar tshul 'chos pa yin/ mgo smad par tshul 'chos pa yin/ gnya' shing gang tsam du lta zhing tshul 'chos pa yin| gos tshags legs par gyon par tshul 'chos pa yin/ dgon pa la gnas pa'i yon tan mi tshol bar dgon pa la gnas pa ltar tshul 'chos pa yin/ gong bur 'du shes pa mi sel bar bsod snyoms len pa ltar tshul 'chos pa yin/ ngo tsha shes pa dang khrel yod pa'i rjes su mi 'jug par phyag dar khrod 'chang ba ltar tshul 'chos pa yin/ rten cing 'brel par 'byung ba la mi 'jug par ri drung dang shing drung du gnas pa ltar tshul 'chos pa yin/ chos bdud rtsi'i sman mi tshol bar bkus te bor ba'i sman tshol ba ltar tshul 'chos pa yin te/ 'di ni lus kyi tshul 'chos pa zhes bya'o/ /de la ngag gi tshul 'chos pa gang zhe na/ che ge mo zhes bya bas kho bo shes shing che ge mo zhes bya bas kho bo mgron du bos te/ kho bos gang 'dod pa rnyed cing / bsti stang du byas nas rnyed/ kho bos bzang po rnyed/ kho bos mang du rnyed/ kho bos mang du thos/ kho bo tshul khrims ldan zhing dge ba'i chos can yin/ kho bo ni bod par 'os pa yin/ kho bo ni slar lan gdab pa'i 'os yin/ kho bo ni nus pa dang ldan zhing skal ba yod la mthu yod pa yin/ kho bo ni don rnam par nges pa 271a @#/ /bstan pa la mkhas pa yin/ gang che ge mo zhes bya ba kho bo la 'di skad ces smras te/ kho bos de la 'di skad smras nas tshar bcad de spobs pa med par byas| kho bos 'khor mgu bar byas/ kho bos legs so zhes bya ba thob/ kho bos de la bgo ba thob/ yang 'ong bar bya ba'i phyir kho bo mgron du gnyer ces bya ba ste/ 'od srung / nges par mi sems pa'i sems dang ldan pa las tshig 'chal ba de lta bu gang ci byung ba de thams cad ni ngag gi tshul 'chos pa ste/ mi rigs pa rnams kyi yin gyi rigs pa rnams kyi ma yin te/ 'di ni ngag gi tshul 'chos pa zhes bya'o/ /'od srung / de la sems kyi tshul 'chos pa gang yin zhe na/ gang sems kyis chos gos dang / bsod snyoms rnyed kyang rung bar yongs su rtog la/ tshig gis bdag la ci yang mi dgos so zhes zer ba dang / gang sems kyis rnyed par 'dod la 'dod pa nyung ba skad du smra ba 'di ni sems kyis tshul 'chos pa zhes bya'o/ /de la 'di skad ces bya ste/ sems kyis rnyed kyang ci ma rung snyam sems/ /tshig tu bdag la ci yang dgos med smra/ /med pa'i ngo bo'i yid kyis de smras te/ /nam yang bde ba rnyed par 'gyur ma yin/ /sems kyis tshul 'chos bsam pas lha rnams dang / /klu dang lha mig can rnams slu bar byed/ /smras pa'i sems kyis nam yang dag mi 'gyur// 271b de bzhin gshegs pa kun gyis de mkhyen to/ /'od srung / de ltar na dge slong chos ma yin pa dang ldan pa sdig pa can rnams kyi cho ga ma yin pa'i spyod yul la spyod pa 'di lta bu gang yin pa 'di ni sems can dmyal ba dang / dud 'gro'i skye gnas dang / gshin rje'i 'jig rten du 'gro bar 'gyur ro/ /dge slong gi le'u ste gnyis pa'o// //'od srung / de la dge sbyong gdol pa lta bu gang zhe na/ 'od srung / 'di lta ste/ dper na/ gdol pa ni/ rtag tu dur khrod spyod yul ba yin te/ shi ba la re ba dang / byams pa med pa'i mig gis 'gro ba la lta ba dang / shi ba la dga' ba yin no/ /'od srung / de bzhin du dge sbyong gdol pa lta bu yang rtag tu mdza' bshes kyi khyim dang / slong ba ster ba'i khyim la gdu ba yin te/ de nas rnyed pa dang bkur stis nye bar 'tsho zhing khyim pa de dag chos sam 'dul ba yang dag par 'dzin du mi 'jug pa dang / de rnyed pa'i ched du 'dris par byed kyi/ don gyi ched du ma yin pa dang / mdza' ba'i sems med cing rtag tu rnyed pa la re ba yin te/ 'od srung / 'di ni dge sbyong gdol pa lta bu zhes bya'o/ /'od srung / 'di lta ste/ dper na/ gdol pa ni tshong dpon dang / khyim bdag dang / blon po dang / khams kyi rgyal po dag dang / bram ze dang / rgyal rigs dang / grong rdal gyi mi dang / yul gyi mi rnams kyis rtag tu yongs su 272a @#/ /spang bar bya ba'i 'os yin te/ gdol par rig nas thag ring po bas kyang ring por yongs su spang ngo / /'od srung / de bzhin du dge sbyong gdol pa lta bu yang| dge slong dang / dge slong ma dang / dge bsnyen dang / dge bsnyen ma tshul khrims dang ldan pa/ yon tan dang ldan pa rnams kyis yongs su spong bar bya ba'i 'os yin te/ dge sbyong gdol pa lta bu'i sdig pa'i chos kun du spyod cing tshul khrims 'chal par rig nas/ thag ring po bas kyang ring por yongs su spong ngo / /'od srung / 'di lta ste/ dper na/ gdol pa'i kha phyis sam/ gos sam/ yongs su spyad pa de dag thams cad la ni skye bo ya rabs rnams mi reg cing yongs su mi spyod do/ /'od srung / de bzhin du dge sbyong gdol pa lta bu'i lhung bzed dam/ chos gos sam/ yongs su spyad pa thams cad ni mi mthun pa'i 'tsho bas yongs su btsal ba/ lus dang / sems smras pas yongs su btsal ba yin pas/ tshul khrims dang ldan pa/ yon tan dang ldan pa dag de la mi reg cing mi spyod do/ /'od srung / 'di lta ste/ dper na/ gdol pa ni kha phyis thogs te/ zhum zhum por byas nas gzhan gyi khyim du 'gro'o/ /'od srung / de bzhin du dge sbyong gdol pa lta bu yang zhum zhum por byas nas/ de bzhin gshegs pa'i mchod rten 272b la phyag 'tshal lo/ /zhum zhum por byas nas 'khor gyi nang du 'gro'o/ /zhum zhum por byas nas gtsug lag khang dang / gnas khang dang / gzhan gyi khyim du 'gro'o/ /zhum zhum por byas nas 'gro ba dang / 'dug pa dang / nyal bar byed do/ /'od srung / de ltar na zhum zhum por byas pa/ sdig pa 'chab pa/ de'i spyod lam gang yin pa de dag thams cad ni rung ba ma yin pa las yongs su brtags pa'o/ /'od srung / 'di lta ste/ dper na/ gdol pa'i sems ni bde 'gro'i skye ba la mi gnas so/ /de ci'i phyir zhe na/ 'di ltar de rang gi las kyi nyes pa'i phyir ro/ /'od srung / de bzhin du dge sbyong gdol ba lta bu'i sems kyang bde 'gror 'gro bar bya ba'i phyir mi gnas shing / de'i 'jig rten pha rol rnam par zhig la| de ngan 'gro gsum du gnas par sgrib pa med de/ 'od srung / 'di ni dge sbyong gdol pa lta bu zhes ba'o/ /'od srung / de la dge sbyong rul pa gang zhe na/ 'od srung / 'di lta ste/ dper na/ rgyal po la 'os pa'i btung ba ro mchog dang ldan pa las gang snying gu'i mchog bcus pa de'i lhag ma ni rul cing mi gtsang bar gyur pa ste/ myang bar bya ba ma yin no/ /'od srung / de bzhin du dge sbyong rul pa yang chos kyi mchog gi snying gu'i ro bro ba dang bral ba yin te/ dri nga ba dang / yongs su spang bar bya ba'i 'os yin te/ nyon mongs pa dang / g.yo sgyu 'dzin 273a @#/ /pa dang / 'chal pa'i tshul khrims kyi dri mi zhim pa dang ldan zhing tshul khrims kyi dri dang bral ba yin/ nyon mongs pa'i dris bsgos pa yin te/ de gang dang gang du 'gro ba de dang de nyid du yang bdag la phan pa'i phyir zhugs kyi/ gzhan la phan pa'i phyir ma yin te/ 'od srung / 'di ni dge sbyong rul ba zhes bya'o/ /'od srung| 'di lta ste/ dper na/ rul pa zhes bya ba ni gang zos pa dang / 'thungs pa dang / 'chos pa gzags pa de ni rul cing dri nga ba yin te/ skye bo ya rabs thams cad kyis yongs su spang bar bya ba'i 'os yin no/ /'od srung / de bzhin du dge sbyong rul pa yang gzags pa dang mtshungs te/ lus dang ngag dang sems kyi kun tu spyod pa yongs su ma dag pas/ 'phags pa'i skye bos yongs su spang bar bya ba yin te/ 'di ni dge sbyong rul pa zhes bya'o/ /'od srung / 'di lta ste/ dper na/ sa bon rul pa gang yin pa de ni sa chen po las skyer mi rung ngo / /'od srung / de bzhin du dge sbyong rul pa dang / sangs rgyas kyi bstan pa 'di la mi skye zhing / 'phags pa'i chos rnam par grol ba'i sa bon nus pa ma yin la/ 'bras bu thob par mi 'gyur te/ 'od srung / 'di ni dge sbyong rul ba zhes bya'o/ /'od srung / de la dge sbyong za ma tog lta bu gang zhe na/ 'od srung / 'di 273b lta ste/ dper na/ za ma tog phyi rol shin tu byi dor byas la/ nad mi gtsang ba sna tshogs kyis gang ba zhig yod pa de bzhin du dge sbyong za ma tog lta bu yang dge sbyong ltar bcos shing phyi rol gtsang sbra spyod par gyur la/ nang 'dod chags dang / zhe sdang dang / gti mug gis yongs su gang ba yin te/ 'od srung / 'di ni dge sbyong za ma tog lta bu zhes bya'o/ /'od srung / de la dge sbyong ku ran da ka lta bu gang zhe na/ 'od srung / 'di lta ste/ dper na/ ku ran da ka zhes bya ba'i me tog ni kha dog blta na sdug la reg na rtsub pa lci ba'i sbrang ma'i dri mnam zhing shi la bar ka'i rtsa ba'i dri mnam ste/ mkhas pa mdzangs pa rnams ni me tog de lta bu la mi reg/ mi len/ mi snom gyi/ gang dag byis pa'i rang bzhin can du gyur pa de'i skyon mi shes pa de dag ni me tog de lta bu len cing snom mo/ /'od srung / de bzhin du dge sbyong ku ran da ka lta bu yang dge sbyong gi kha dog dang / gzugs dang ldan par gyur kyang mi nges pa yin/ tshig brlang ba yin/ 'chal pa'i tshul khrims kyi dri mi zhim pa yin/ 'tsho ba nyams pa yin/ spyod pa nyams pa yin/ lta ba nyams pa yin te/ mdzangs pa mkhas pa rnams ni ku ran da ka lta bu'i dge sbyong de lta bu la sten pa'am/ snyen pa'am/ bsnyen bkur mi byed kyi/ de'i tshul rig pas thag ring po pas kyang ring por yongs su spong ngo / /gang dag byis pa'i 274a @#/ /rang bzhin can du gyur pa de dag ni ku ran da ka lta bu'i dge sbyong de lta bu la sten cing snyen la bsnyen bkur byed de/ ku ran da ka'i me tog byis pa'i lag na 'dug pa bzhin du/ de dang mthun pa nyid du 'gyur te/ 'od srung / 'di ni ku ran da ka lta bu'i dge sbyong zhes bya'o/ /'od srung / de la chom rkun lta bu'i dge sbyong gang zhe na/ 'od srung / 'di lta ste/ dper na/ mi g.yon can gyi rang bzhin can rtag tu brkam pa/ chags pa'i zil gyis non pa/ bdag gi rnyed pas chog par mi 'dzin pa/ gzhan gyi nor la re ba drag shul can/ dbyug pa dang / mtshon cha dang / dgra cha thogs pa/ ngo tsha med pa/ snying rje med pa/ rtag tu gdug cing rab tu gdug pa'i sems dang ldan pa ni/ de gang gi tshe/ grong bar ram/ grong ngam/ grong khyer ram/ grong rdal lam/ yul du 'jug pa de'i tshe/ de 'di snyam du gzhan dag gi nor gyi phung po gang yin pa de bdag gir gyur na/ re stes snyam du sems shing / de zin du 'ong zhes mkhyun bu mkhyun bur rgyu ba yin no/ /'od srung / de bzhin du chom rkun lta bu'i dge sbyong yang rtag tu brkam pa/ chags pa'i zil gyis non pa/ bdag gi rnyed pas chog mi shes pa/ gzhan gyi rnyed pa la re ba yin te/ de gang gi tshe/ grong bar ram/ grong ngam/ grong khyer ram/ 274b grong rdal lam/ yul du 'jug pa de'i tshe/ de rnyed pa'i phyir 'jug gi /chos kyi phyir ma yin te/ spyod lam thams cad kyang chom rkun lta bur ston pa yin/ 'chab cing sbod pa yin te/ bdag dge slong gzhan gyis tshul khrims 'chal par shes na mi rung ste/ shes par gyur na/ so sor thar pa'i mdo 'don pa las bskrad par 'gyur ro/ /snyam nas rtag tu skrag cing rtag tu 'jigs te/ spyod lam thams cad kyang g.yos spyod pas lha dang / klu dang / gnod sbyin dang / dri za dag gis chom rkun 'ong ngo / /chom rkun 'gro'o/ /chom rkun 'greng ngo / /chom rkun 'chag go /chom rkun 'dug go /nyal lo/ /chos gos len to/ /chom rkun grong du 'gro'o/ /grong nas 'byung ngo / /chom rkun za'o/ /chom rkun 'thung ngo| |chom rkun skra 'dreg go zhes rig par 'gyur ro/ /'od srung / de lta na lha dang / klu dang / gnod sbyin dang / dri za rnams kyis de'i spyod lam gang yin pa de thams cad rung ba ma yin la/ yongs su brtags pa ma yin par rig par 'gyur te/ rig nas kyang de la snying rje chen po skyed cing / kye ma 'di mtshar cig sdig pa can gyi dge slong 'di lta bu dag gis/ bcom ldan 'das shAkya thub pa'i bstan pa nub par byed par 'gyur ro zhes 'phya zhing mi snyan par zer ro/ /tshul khrims dang ldan pa/ yon tan dang ldan pa 275a @#/ /rnams la ni lha dang / klu dang / gnod sbyin dang / dri za rnams kyang 'di dag ni bstan pa yongs su 'dzin pa'o zhes gus pa cher skyed do/ /'od srung / chom rkun lta bu'i dge sbyong bstan pa 'di la rab tu byung ba ni skyo ba dang / 'dod chags dang bral ba'i sems gcig kyang mi skyed na/ 'bras bu 'thob pa lta ci smos kyi/ de ni gnas med do/ /'od srung / 'di ni chom rkun lta bu'i dge sbyong zhes bya'o/ /'od srung / de la dge sbyong shin te ma gang zhe na/ 'od srung / 'di lta ste/ dper na/ 'bru'i nang na gang dag ma smin pa dang / mi grung pa dang / 'ongs med cing 'bru 'dra ba de dag ni shin te ma zhes bya'o/ /'od srung / de bzhin du dge sbyong shin te ma yang / yang zhing mthu chung la bdud kyis zin pa/ bdud kyis non pa/ nyon mongs pa thams cad kyis 'phrogs pa/ rlung gi g.yengs pa lta bu ste/ 'od srung / dge sbyong shin te ma zhes bya ba de ni/ dge sbyong tshul khrims 'chal ba/ sdig pa can rnams kyi tshig bla dwags te/ de dag ni ngas dge sbyong shin te ma zhes btags so/ /'od srung / de la dge sbyong sun par byed pa gang zhe na| 'od srung / 'di lta ste/ dper na/ nas kyi ljang bu phun sum tshogs pa'i nang na/ nas la gnod pa zhig skyes nas/ de ljang bu'i kha dog 'dra zhing rtags dang 275b dbyibs kyang 'dra bas/ de la nas kyi bdag po de dag 'di snyam du 'di dag thams cad ni nas yin no snyam pa'i 'du shes skyed skyed pa las/ gang gi tshe nas kyi ljang bu las snye ma byung bar gyur pa de'i tshe/ nas la gnod pa de la nas kyi 'du shes mi 'byung ngo / /'od srung / de bzhin du dge sbyong sun par byed pa'i dge slong / dge slong gi dge 'dun gyi nang na 'dug pa yang tshul khrims dang ldan pa/ yon tan dang ldan pa/ sbyin pa'i gnas su gyur pa rnams dang / kha dog dang rtags kyi dbyibs 'dra bas/ de la sbyin pa po dang / sbyin bdag de dag dge slong ngo snyam pa'i 'du shes skyed cing / sbyin gnas su 'du shes bskyed pa las/ de nas gal te/ mi gti mug pa/ dge sbyong ma yin la dge sbyong du khas 'che ba/ tshangs par spyod pa ma yin la tshangs par spyod par khas 'che ba/ nang rul cing zag pa de 'khor gyi nang nas byung ste/ shi 'phos shing 'chi ba'i dus byas nas/ sems can dmyal bar 'gro bar 'gyur te/ lha dang / klu dang / gnod sbyin dang / dri za lha'i mig dang ldan pa rnams kyis/ de sems can dmyal bar skye bar mthong ste/ mthong nas kyang mi gti mug pa 'di ni sngon dge sbyong gi kha dog dang / gzugs kyis sdig pa'i las byas pas de sems can dmyal ba chen por skyes te/ nas la gnod pa la nas 276a @#/ /kyi yon tan med pa ltar 'di la yang dge sbyong gi yon tan gyi 'bras bu med do/ /zhes snying rje chen po skyed de/ 'od srung / 'di ni dge sbyong sun par byed ba zhes bya'o/ /'od srung / de la dge sbyong ltar bcos pa gang zhe na/ 'od srung / 'di lta ste/ dper na/ ra gan chen po zhes bya ba'i lcags shig yod/ shin tu yongs su sbyang bar byang shing / shin tu yongs su dag par byas na/ gser 'dra bar gyur te/ 'on kyang gser gyi rin thang dang / gser gyi kha dog dang / bdar 'phro dang / srang la gzhal ba'i ljid 'dra ba ni ma yin no/ /'od srung / de bzhin du dge sbyong ltar bcos pa'i dge slong yang lus shin tu bkrus shing gos bzang po mdzes pa gyon la/ dge slong gi phyi rol gyi spyod pa thams cad yongs su dag ste/ 'gro ba dang / 'ong ba dang / mdun du lta ba dang / g.yas g.yon lta ba dang / bskum pa dang / brkyang ba dang / chos gos snam sbyar dang / lhung bzed dang / chos gos 'dzin pa shes bzhin du spyod kyang / de 'dod chags kyis bcom pa dang / zhe sdang gis bcom pa dang / gti mug gis bcom pa dang / nyon mongs pas bcom pa dang / rnyed pa dang / bkur stes bcom pa dang / nga rgyal dang / che ba'i nga rgyal dang / nga rgyal las kyang nga rgyal dang / nga'o snyam pa'i nga rgyal dang / mngon 276b pa'i nga rgyal dang / cung zad snyam pa'i nga rgyal dang / log pa'i nga rgyal gyis bcom pa dang / nyon mongs pas 'khol ba dang / bsnyen bkur lhur len gyi/ chos lhur mi len pa dang / lus che bar sbyor ba la brtson gyi/ tshul khrims kyi che bar sbyor ba la mi brtson pa dang / zas dang gos lhur len gyi/ 'phags pa'i chos lhur mi len pa dang / 'jig rten pha rol du kha na ma tho bas 'jigs par mi lta ba dang / tshe 'di lhur len gyi/ tshe phyi ma lhur mi len pa dang / lus gsob dang / rnyed pa dang / bkur sti dang / grags pa la rten gyi/ chos la rim gror bya ba la mi rten pa dang / spags pa sna tshogs kyis spags pa dang / sdig pas bsgos pa dang / khyim gyi las kyi mtha' la mngon par brtson pa dang / khyim pa dang mtshungs pa'i sems dang ldan pas/ bde ba dag gis kyang bde zhing / sdug bsngal dag gis kyang sdug bsngal ba dang / rjes su chags pa dang / khong khro bas bcom pa yin te/ de'i dge sbyong gi cho ga dang / spyod lam thams cad dang / sems dang sems las byung ba'i chos thams cad ni/ sems can dmyal ba dang / dud 'gro'i skye gnas dang / gshin rje'i 'jig rten du gzhol ba yin zhing / de dge sbyong gi rin thang dang / ri ba dang / dge sbyong gi srang kha dang mi mnyam pa ste/ 'od srung / 'di ni dge sbyong ltar bcos pa zhes bya'o/ /'od 277a @#/ /srung| de la ci ltar na dge sbyong gzi 'phrogs pa yin zhe na/ 'od srung / 'di lta ste/ dper na/ skyes pa'am/ bud med dam/ khye'u 'am/ bu mo gang la la zhig mi ma yin pas gzi 'phrogs par gyur na/ de dbang chung bar grags shing / mdog ngan la/ mi sdug par 'gyur te/ de ltar mdangs 'phrogs pa rnams la ni sman tam| gsang sngags sam/ rig sngags rnams kyis mi slon te/ de 'chi bar 'gyur ba ma gtogs par tha mar gzhan du mi 'gyur ro/ /'od srung / de bzhin du dge slong gang la la tshul khrims kyi gzi med pa dang / ting nge 'dzin gyi gzi med pa dang / shes rab kyi gzi med pa dang / rnam par grol ba'i gzi med pa dang / rnam par grol ba'i ye shes mthong ba'i gzi med pa dang / byams pa'i gzi med pa dang / snying rje'i gzi med pa dang / dga' ba'i gzi med pa dang / btang snyoms kyi gzi med pa dang / sbyin pa dang yang dag par sdom pa dang / nges pa'i gzi med pa dang / dge sbyong gi yon tan gyi gzi med pa dang / 'phags pa'i rigs la gnas pa'i gzi med pa dang / sbyangs pa'i yon tan dang / yo byad bsnyungs pa'i gzi med pa dang / lus dang / ngag dang / sems yongs su dag pa'i gzi med pa 'di ni/ 'od srung / dge 277b slong gzi 'phrogs pa zhes bya ba ste/ 'od srung / gzi 'phrogs pa de lta bu rnams la ni de bzhin gshegs pas sbyar ba'i sman gyis mi tshugs te/ 'di lta ste/ 'dod chags la mi sdug pa'i sman dang / zhe sdang la byams pa dang / gti mug la rten cing 'brel par 'byung ba dang / nyon mongs pa rnams la tshul bzhin yid la bya ba dang / 'du 'dzi la dben par dga' ba dang / 'dzin pa thams cad spang ba'i phyir dgon par gnas pa dang / gsum bsdam pa'i phyir lus dang / ngag dang / sems yongs su dag pa dang / sems las su rung bar bya ba'i phyir ting nge 'dzin yongs su dag pa'i sman de bzhin gshegs pas sbyar ba 'di lta bu 'di dag gis de la mi tshugs te/ de shi nas sems can dmyal ba nyid du 'gyur gyi/ de'i tha ma gzhan du mi 'gyur ro/ /gang dag yang 'jig rten las 'das pa'i sman 'di lta ste/ phung po shes pa dang / khams shes pa dang / skye mched shes pa dang| rten cing 'brel par 'byung ba shes pa dang / stong pa nyid dang / mtshan ma med pa dang / smon pa med pa shes pa/ 'jig rten las 'das pa'i sman 'di lta bu 'di dag gis kyang de la mi tshugs te/ de shi nas sems can dmyal ba nyid du 'gyur gyi/ de'i tha ma gzhan du mi 'gyur ro/ /bstan pa 'di bshad pa na/ dge slong rnal 'byor spyod pa lnga 278a @#/ /brgyas bdag cag tshul khrims yongs su ma dag bzhin du dad pas byin pa spyad par gyur na/ mi rung zhes nyams par byas te/ slar khyim du dong ngo / / de la dge slong gzhan dag cig 'di skad du/ dge slong che ba'i bdag nyid can rnal 'byor spyod pa 'di dag bstan pa las nyams pa ni shin tu ma legs so zhes 'phya'o/ /bcom ldan 'das kyi dge slong de dag la 'di skad ces bka' stsal to/ /dge slong dag /khyod 'di skad du dge slong che ba'i bdag nyid can 'di dag 'di ltar bstan pa las shin tu nyams pa 'di ni shin tu ma legs so zhes ma smra zhig /de ci'i phyir zhe na/ dge slong dag /mngon par mi dga' nas/ khyim na gnas pa 'di ni dad pa can rnams kyi chos yin te| dge slong dad pa dang / mos pa mang ba/ 'gyod pa dang ldan pa 'di dag gis bstan pa 'di thos nas/ bdag cag tshul khrims yongs su ma dag bzhin du dad pas byin pa yongs su spyad na/ mi rung ngo zhes nyams par gyur to/ /'od srung / nga lung ston te/ dge slong 'di dag ni 'di nas shi 'phos nas dga' ldan gyi lha'i ris su skye bar 'gyur te/ de dag de bzhin gshegs pa byams pa'i nyan thos thog mar 'dus pa'i grangs su chud par 'gyur ro/ /dge sbyong gdol pa lta bu'i le'u ste gsum pa'o// //bam po gnyis 278b pa ste tha ma/ de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das/ dge slong ci lta bus zhal ta bgyi ba lags/ bcom ldan 'das kyis bka' stsal pa/ 'od srung / ngas zhal ta bya bar gnang ba'i dge sbyong gnyis te/ gnyis gang zhe na/ dge slong yongs su dag pa/ 'jig rten pha rol tu kha na ma tho bas 'jigs par lta ba las kyi rnam par smin pa la rton pa/ mdzem pa dang ldan zhing 'gyod pa dang ldan pa dang / gang yang zag pa zad pa/ dgra bcom par gyur pa ste/ 'od srung / dge slong ma nyams pa 'di gnyis zhal ta byed par ngas gnang ngo / /de ci'i phyir zhe na/ 'od srung / legs par gsungs pa'i chos 'dul ba 'di la rigs sna tshogs las rab tu byung ba/ sems kyis mos pa sna tshogs dang ldan pa/ spong ba'i phyir rnal 'byor sna tshogs la gnas pa/ kha cig ni dgon pa pa zhi ba'i mal stan la mngon par dga' ba/ kha cig ni bsod snyoms pa/ kha cig ni grong 'dab na gnas pa/ kha cig ni 'tsho ba yongs su dag pa/ kha cig ni mang du thos pa la mngon par brtson pa/ kha cig ni chos smra ba/ kha cig ni 'dul ba 'dzin pa/ kha cig ni ma mo 'dzin pa/ kha cig ni grong dang / grong khyer dang / grong rdal dang / yul 'khor dang / pho brang 'khor dag tu zhugs nas chos ston pa ste| sems can gzhan dag gi sems kyi spyod 279a @#/ /pa rnams bsrung dka' ba'i phyir ro/ /'od srung / de la dge slong zhal ta byed pas/ dge slong gi dge 'dun thams cad kyi sems mgu bar bya'o/ /'od srung| de la dge slong dgon pa pa bas mtha'i mal stan pa gang yin pa de dag ni/ dge slong zhal ta byed pas yongs su las su bsko bar mi bya'o/ /zhal ta byed pas dge slong dgon pa ba de dag bsrung bar bya ste/ dus ma yin par gsol ba mi bya/ dus ma yin par gtang bar mi bya'o/ /'od srung / gal te dge slong dgon pa pa la dge 'dun gyi bya bar gtogs pa slob pa'i las res bab na/ dge slong zhal ta byed pa des las de bdag nyid kyis bya'o/ /yang na dge slong gzhan zhig bskos la las de byed du gzhug ste/ dge slong dgon pa pa la gnod par mi bya'o/ /'od srung / de la dge slong bsod snyoms spyod pa gang yin pa de la dge slong zhal ta byed pa des kha zas bsod pa bgo bsha' bya'o/ /'od srung / de la dge slong rnal 'byor spyod pa gang yin pa de dag la/ dge slong zhal ta byed pas mthun pa'i 'tshogs chas dang / na ba'i gsos sman dang / yo byad rnams sbyin par bya'o/ /dge slong rnal 'byor spyod pa de sa phyogs gang la gnas pa'i sa phyogs der dge slong zhal ta byed pa des/ sgra chen po dang / skad drag po mi 'byung zhing / byed du yang mi gzhug go /dge slong zhal ta byed pas dge slong rnal 'byor 279b spyod pa de bsrung zhing / mal cha yang sbyar bar bya'o/ /kha zas bsod pa dang / yi gar 'ong ba dang / rnal 'byor spyod pa'i sa dang mthun pa'i bza' ba dang / bca' ba rnams sbyin par bya'o/ / dge slong de la dge slong 'di ni de bzhin gshegs pa'i bstan pa rton pa'i phyir gnas pa yin te| de la bdag gis rjes su mthun pa'i yo byad thams cad mang du sbyar bar bya'o snyam du shin tu phangs pa'i 'du shes bskyed par bya'o/ /'od srung / de la dge slong mang du thos pa la mngon par brtson pa gang yin pa de dag la dge slong zhal ta byed pas lung nos shig /lhogs shig| kha ton gyis shig /kho bo ni khyod kyi rim gro byed pa yin gyi/ khyod ji lta ji lta bur mang du thos par gyur pa de lta de lta bur dge slong gi dge 'dun mdzes par 'gyur bar gyis shig / 'dug la brjod pas mdzes par gyis shig /bdag nyid kyi shes rab kyang mchog tu 'gyur bar gyis shig ces spro ba bskyed par bya'o/ /'od srung / de la dge slong zhal ta byed pas de dag dus ma yin par gtang bar mi bya/ las su bsko bar mi bya'o/ /dge slong zhal ta byed pa des dge slong mang du thos pa de dag bsrung bar bya'o/ /'od srung / de la chos smra ba'i dge slong gang yin pa de dag dge slong zhal ta byed pas las su mi bsko bar bya'o/ /grong dang / grong khyer dang / grong rdal dang / yul 'khor dang / rgyal po'i pho brang 'khor dag tu 'jug tu bcug la chos 280a @#/ /'chad du gzhug go /chos nyan pa dag bsko bar bya'o/ /'khor gyi dkyil 'khor rnam par dag par bya'o/ /'bel ba'i chos kyi gtam gyi phyir/ dkyil 'khor du gzhag par bya'o/ /chos smra ba'i dge slong la dge slong gang dag gnod pa byed pa'i dge slong de dag dge slong zhal ta byed pas bzlog par bya'o/ /dge slong zhal ta byed pas chos smra ba'i dge slong la rtag tu bsu bar bya/ legs so zhes bya ba mang du bya'o/ /'od srung / de la dge slong gang dag 'dul ba 'dzin pa dang / ma mo 'dzin par gyur pa de dag gi gan du dge slong zhal ta byed pa de song la/ ji ltar na bdag rma med cing ma nyams pa dang / ji ltar na bdag ltung ba med pa'i chos kyis zhal ta bya zhes yongs su dri bar bya'o/ /de nas 'dul ba 'dzin pa dang / ma mo 'dzin pa'i dge slong de dag gis dge slong zhal ta byed pa de'i bsam pa rig nas/ de'i bya ba dang / 'byung ba gang yin pa dang / byed pa gang yin pa de bstan par bya'o/ /dge slong zhal ta byed pas 'dul ba 'dzin pa dang / ma mo 'dzin pa'i dge slong de dag la phangs bar bya ba dang / dad pa dang / gus pa dang / zhe sa rab tu bskyed par bya'o/ / dge 'dun gyi rnyed pa gang yin pa de dge slong zhal ta byed pas dus dus su dge slong gi dge 'dun la 'bul bar bya'i/ dge 'dun gyi rnyed pa bsags shing sba bar mi bya ste/ ji ltar 280b rnyed pa bzhin du sbyin par bya/ ma bskul bar sbyin par bya/ gnod pa med par sbyin par bya'o/ /des 'dun pa dang / zhe sdang dang / gti mug dang / 'jigs pas 'gro bar mi bya'o/ /dge slong gi dge 'dun la rton par bya'i/ khyim pa'i phyogs la rton par mi bya'o/ /dge 'dun gyi bya ba la rton par bya'i/ bdag gi bya ba la rton par mi bya'o/ /dngos po gang la yang dbang bya ba'i 'du shes bskyed par mi bya'i/ bya ba ci tsam du chung ba yang dge 'dun gyi gros bzhin bya zhing rang dgar mi bya'o/ /dge 'dun gyi'am/ phyogs bzhi'i dge 'dun gyi'am/ mchod rten gyi yo byad gang ci yang rung ste/ ci lta ba bzhin du gzhag par bya ste/ dge 'dun gyi phyogs bzhi'i dge 'dun gyi dang bsre bar mi bya'o/ /phyogs bzhi'i dge 'dun gyi rnyed pa yang dge 'dun gyi dang bsre bar mi bya'o| |dge 'dun gyi dang phyogs bzhi'i dge 'dun gyi rnyed pa mchod rten gyi dang bsre bar mi bya'o/ /mchod rten gyi rnyed pa yang dge 'dun gyi dang / phyogs bzhi'i dge 'dun gyi dang bsre bar mi bya'o| |gal te phyogs bzhi'i dge 'dun la brel phongs su gyur la/ dge 'dun gyi rnyed pa che bar gyur na/ dge slong zhal ta byed pas dge slong gi dge 'dun bsdus la/ gros mthun par bgyis te/ dge 'dun gyi rnyed pa de las phyogs bzhi'i dge 'dun la shugs par bya'o/ /gal te de bzhin gshegs pa'i mchod rten zhig ral du gyur la/ dge 'dun gyi dang / phyogs bzhi'i 281a @#/ /dge 'dun gyi rnyed pa che bar gyur na/ dge slong zhal ta byed pas dge slong gi dge 'dun thams cad bsdus la/ gros mthun par bgyis te/ 'di skad ces de bzhin gshegs pa'i mchod rten 'di ni zhig ral du gyur la/ dge 'dun gyi dang / phyogs bzhi'i dge 'dun gyi rnyed pa ni che bar gyur na/ gal te tshe dang ldan pa rnams gnod pa med cing / dad pa dang ldan la/ bzod cing gnang na bdag gis dge 'dun gyi dang / phyogs bzhi'i dge 'dun gyi rnyed pa 'di las dngos po cung zad cig khyer te/ de bzhin gshegs pa'i mchod rten 'di bcos par bya'o zhes brjod par bya'o/ /gal te dge 'dun gyis gnang na/ dge slong zhal ta byed pa des de bzhin du bya'o/ /ci ste dge 'dun gyis ma gnang na/ dge slong zhal ta byed pa des sbyin pa po dang / sbyin bdag rnams la gsol ba thob la/ de bzhin gshegs pa'i mchod rten gso bar bya'o/ /'od srung / gal te mchod rten gyi rnyed pa ji ltar mang du gyur du zin kyang / dge slong zhal ta byed pas dge 'dun dang / phyogs bzhi'i dge 'dun la bshugs par mi bya'o/ /de ci'i phyir zhe na/ dad cing dang ba mang po dag gis mchod rten la phul ba ni tha na ras kyi kha tsar gcig tsam gang yin pa de yang lha dang bcas pa'i 'jig rten gyi mchod rten yin na/ rin po che'am/ rin po cher smos pa dag lta smos kyang ci dgos/ mchod 281b rten la gos phul ba gang yin pa de ni de bzhin gshegs pa'i mchod rten de nyid du rlung dang nyi ma dang / char pas dengs kyang bla'i/ mchod rten la phul ba'i gos dbyig gam/ dbyig gi rin du bsgyur bar mi bya'o/ /de ci'i phyir zhe na/ mchod rten gyi ni rin thang cung zad kyang med la mchod rten ni cis kyang brel ba med pa'i phyir/ 'od srung / dge slong zhal ta byed pas de ltar yongs su dag par bya ste/ des dkon mchog gsum gyi dang ma sbags par bya'o/ /bdag gi rnyed pas chog shes par bya'o/ /dkon mchog gsum gyis byin gyis brlabs pa'i dngos po rnams la bdag gi 'du shes mi bya'o/ /'od srung / dge slong zhal ta byed pa rab tu sdang ba'i sems dang ldan pa gang la la zhig gis tshul khrims dang ldan pa/ yon tan dang ldan pa/ spyin gnas rnams la sems khros sam/ dbang byed cing bsgo blag byed na/ de mi dge ba'i las des sems can dmyal bar 'gro bar 'gyur ro/ /gal te mi'i 'jig rten du 'ongs na yang bran dang gzhan gyi las byed par 'gyur ba dang / khu tshur dang / thal lcags dang / lag cha snyems pas brdegs pa dang phrad par 'gyur ro/ /'od srung / gzhan yang dge slong zhal ta byed pa dge 'dun gyi bya ba las 'das te/ rang dgar dge slong rnams la dbang byed cing / bsgo ba dang / chad pas gcod pa dang / 'jigs par byed pa dang / bsdigs pa dang / dus 282a @#/ /ma yin par mngag pa dang / dus ma yin par bsgo ba byed na de mi dge ba'i las des nyi tshe ba'i sems can dmyal ba phur pa mang po zhes bya ba der skye bar 'gyur te/ der skyes nas lus la lcags phur brgya stong zug cing / de dag 'bar/ rab tu 'bar la/ kun du rab tu mched cing 'bar 'gyur ro/ /des tshul khrims dang ldan pa/ yon tan dang ldan pa/ sbyin gnas rnams la bsdigs shing / ngag gi las gdug pa smras par gyur pa gang yin pa des/ de der skyes nas/ lce'i dbang po'i khyon dpag tshad brgya par 'gyur zhing / de'i lce'i dbang po de la lcags phur brgya stong rab tu 'bab cing de dag kyang 'bar/ rab tu 'bar/ kun du rab tu 'bar la/ kun tu rab tu mchod cing 'bar te mer 'gyur ro/ /de ci'i phyir zhe na/ 'di ltar des bsdigs shing / ngag gi las gdug pa smras par gyur pa'i phyir ro/ /'od srung / dge slong zhal ta byed pa gang la las dge 'dun gyi rnyed pa 'dus shing 'dus pa bzhag ste| dus dus su mi sbyin zhing tho btsams la gtses nas sbyin pa dang / kha cig byin/ kha cig ma byin/ kha cig la byin/ kha cig la ma byin na/ de mi dge ba'i las des yi dwags kyi skye gnas skyag 'jim byin pa nub ces bya ba der skye bar 'gyur ro/ /de der skyes nas yi dwags gzhan gyi kha zas bslangs te/ de la bstan na de bstan pa'i tshe mig gnyis ka mi 282b 'dzums par zas de la lta zhing / bkres pa dang / skom pas nyen pa'i sdug bsngal tshor ba myong gi /lo brgya stong du yang zas de ni thob par mi 'gyur ro/ /ci ste brgya la brgya lam na zas de thob kyang ngan skyugs dang / rnag khrag tu 'gyur ro/ /de ci'i phyir zhe na/ 'di ltar des tshul khrims dang ldan pa/ yon tan dang ldan pa/ sbyin gnas rnams mgu bar ma byas shing / rang gi rnyed pas chog mi shes par gyur pa'i phyir ro/ /'od srung / dge slong zhal ta byed pa gang la las dge 'dun gyi'am/ phyogs bzhi'i dge 'dun gyi'am/ mchod rten gyi tshol bar byas na/ de'i rnam par smin pa ni ngas bskal pa bgrangs pas kyang brjod kyi mi lang ngo / /'od srung / dge slong zhal ta byed pa gang la las nyes dmigs kyi gnas 'di lta bu 'di dag thos nas/ khro'am/ gshe'am/ gnod par sems sam/ khong khro ba skyed na/ de ni gsor mi rung ngo / /zhes ngas bshad do/ /'od srung / de lta bas na dam pa'i chos 'di lta bu 'di thos nas/ dge slong zhal ta byed pas lus dang / ngag dang / yid yongs su dag par bya'o/ /bdag dang gzhan bsrung bar bya'o/ / 'od srung / dge slong zhal ta byed pa rang gi sha la za yang bla'i/ dkon mchog gsum gyis byin gyis brlabs pa'i lhung bzed dam/ chos gos sam/ bsod snyoms sam/ na 283a @#/ /ba'i gsos sman nam/ yo byad yongs su spyad par ni mi bya'o/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das kyis lhod pa rnams kyi lhod pa'i chos dang / 'dzem dogs mchis pa rnams kyi 'dzem dog gi chos rnams bka' stsal to/ /zhal ta byed pa'i le'u ste bzhi pa'o// //bcom ldan 'das/ dge slong dgon pa pa gang dag bdag dgon pa pa zhes mchis kyis 'che na/ bcom ldan 'das/ ci tsam gyis na dge slong dgon pa pa lags/ ci tsam gyis na dge slong bsod snyoms pa lags/ ci tsam gyis na dge slong phyag dar khrod pa lags/ de skad ces gsol pa dang| bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung / 'di la dge slong dgon pa pas dgon pa dang / nags tshal gyi gnas dang / bas mthar gnas mal bca' bar bya'o/ /chom rkun dang / gnag rdzi dang / phyug rdzi med pa/ sdigs sbrul med pa ri dwags dang / bya mang po med pa/ sbrang bu dang / sha sbrang nyung ba/ sgra nyung ba/ ca co nyung ba de lta bu'i dgon pa bas mtha' dag tu gnas par bya'o/ /de dgon pa'i gnas de na gnas pa na/ yid la byed 283b pa brgyad bskyed par bya ste/ brgyad gang zhe na/ lus la mi lta bar bya ba dang / srog la mi lta bar bya ba dang / rnyed pa dang / bkur sti la mi lta bar bya ba dang / 'du 'dzin thams cad la mi lta bar bya ba dang / dgon pa dag tu ri dwags mchi ba ltar khas blang bar bya ba dang / dgon par dgon pa'i yon tan yang dag par blangs te gnas par bya ba dang / chos kyi 'tsho bas 'tsho'i/ log pa'i 'tsho bas 'tsho ba ma yin par bya ba dang / zang zing dang nyon mongs nga med pa'i 'tsho bas 'tsho bar bya ba ste/ yid la bya ba brgyad po de dag bskyed nas/ dgon pa'i gnas su gnas par bya'o/ /de dgon pa'i gnas de na gnas pa na/ sems can thams cad la byams pa rnam pa brgyad bskyed par bya ste/ brgyad gang zhe na/ phan pa'i byams pa dang / bde ba'i byams pa dang / gnod pa med pa'i byams pa dang / yang dag pa'i byams pa dang / tha dad pa med pa'i byams pa dang / zhi gnas kyi byams pa dang / chos la nges par sems pa'i byams pa dang / bsam pa yongs su dag pa'i byams pa ste/ sems can thams cad la byams pa brgyad po de dag bskyed par bya'o/ /de dgon pa'i gnas de na gnas pa na/ 'di ltar sems bskyed par bya ste/ 'di ltar bdag ni lam ring po nas 'dir 'ongs 284a @#/ /la| gcig pu gnyis su med pa ste/ legs par byas pa'am/ nyes par byas pa skul ba'i grogs ni gang yang med kyi/ lha dang / klu dang / gnod sbyin dang / dri za dang / sangs rgyas bcom ldan 'das gang dag bdag gi sems kyi bsam pa shes pa dag yod de/ bdag dgon pa'i gnas na gnas la/ mi dge ba'i sems kyi dbang du song na/ de dag dbang du 'gyur ro/ /bdag lam ring po nas 'ongs shing gcig pu gnyis su med de/ rten pa med/ bdag gi med/ yongs su 'dzin pa med la/ gal te 'dod pa la rnam par rtog pas rnam par rtog /gnod sems kyi rnam par rtog pas rnam par rtog /'tshe ba'i rnam par rtog pas rnam par rtog /mi dge ba gzhan la rnam par rtog pas rnam par rtog par gyur na/ bdag tu 'dzin pa dang / 'du ba la mngon par dga' ba'i sems can rnams dang bye brag med par 'gyur te/ bdag gis lha dang / klu dang / gnod sbyin dang / dri za rnams la bslus par 'gyur zhing / sangs rgyas bcom ldan 'das rnams kyang mi ma nyes par byas par 'gyur gyi/ ci nas kyang bdag la lha rnams 'phya bar mi 'gyur ba dang / sangs rgyas bcom ldan 'das rnams kyang dgyes par 'gyur ba de 284b ltar bya'o/ /snyam du sems bskyed par bya'o/ /de dgon pa'i gnas de na gnas pa na/ so sor thar pa'i sdom pas bsdam par bya/ tshul khrims kyi phung po shin tu kun bsrung bar bya/ lus dang / ngag dang / sems yongs su dag pa dang / tshul 'chos pa med pa dang / kha gsag med pa dang / 'tsho ba yongs su dag pa dang / ting nge 'dzin gyi sems mngon du bya ba dang / ci ltar thos pa'i chos la rten pa dang / tshul bzhin yid la bya ba dang rab tu ldan pa dang / yid byung ba dang / 'dod chags dang bral ba dang / 'gog pa dang / mya ngan las 'das pa la gzhol ba dang / 'khor bas 'jigs skrag pa dang / phung po ni gshed ma ste/ phyir rgol bar rig pa dang / khams bzhi la myur du gdug pa'i dug tu 'du shes pa dang / skye mched drug la grong stong ltar mos pa dang / rten cing 'brel par 'byung bar 'jug par mkhas pa dang / rtag pa dang / chad par lta ba yongs su spang ba dang / sems can med pa dang / srog med pa dang / gso ba med pa dang / gang zag med par rnam par spyod pa dang / stong pa nyid la mos pa dang / mtshan ma med pa spyod yul ba dang / smon pa med pa'i sems spel ba dang / khams gsum la rtag tu 'jigs pa'i yid dang ldan pa dang / rtag tu mgo dang / gos la me 'bar pa 285a @#/ /bzhin du brtson 'grus rtsom pa dang / brtson pa mi 'dor ba dang / lus kyi skyon la yang dag pa ji lta ba bzhin du so sor rtog pa dang / sems kyi skye ba dang 'jig pa la lta ba dang / sdug bsngal yongs su shes pa la mngon par brtson pa dang / kun 'byung ba thams cad kyi sred pa spang ba dang / 'gog pa mngon sum du bya ba la zhugs pa dang / lam bsgom pa'i rnal 'byor la brtson pa dang / phyi'i spyod yul dran pa nye bar bzhag pa la rab tu gnas pa dang / mi dge ba'i chos dang bral ba dang / dge ba'i chos la mngon du phyogs pa dang / yang dag pa'i spong ba la shin tu gnas pa dang / rdzu 'phrul gyi rkang pa mngon du gyur pa dang / dbang po lnga dang ldan pa dang / stobs lnga'i shugs dang ldan pa dang / byang chub kyi yan lag bdun la bsam gtan pa dang / 'phags pa'i lam yan lag brgyad pa la mngon par brtson pa dang / zhi gnas la gnas pa dang / lhag mthong gis blta bar bya ste/ 'od srung / de lta bu'i go cha 'di dag bgos nas/ nam gyi cha stod dang / nam gyi cha smad la mi nyal zhing rnal 'byor la brtson pa dang / rtag tu khyad par du 'gro bar dgon pa'i gnas de la gnas par bya'o/ /de dgon pa'i gnas de na gnas pa na/ lus brgyan par sbyor ba la brtson par mi bya'o/ /mal chas brgyan pa la brtson bar mi bya'o/ /chos gos 285b kyis brgyan pa la brtson par mi bya'o/ /des rtswa rnying pa skams pa blangs la 'chag sa dang / 'dug sar legs par bting ste/ bdag 'dug pa dang / dge 'dun gyi dang / phyogs bzhi'i dge 'dun gyi dang / ma spags pa dang / bdag gi gos kyis chog shes par dgon pa'i gnas der gnas par bya'o/ /'od srung / dge slong dgon pa gang gi tshe/ lus gso ba dang / 'phags pa'i lam nye bar brtan pa'i phyir grong ngam/ grong khyer ram/ grong rdal du bsod snyoms kyi phyir 'jug pa na/ des sems 'di lta bus dgon pa'i gnas de nas 'gro bar bya ste/ ma rnyed kyang yongs su yi chad par mi bya/ rnyed kyang dga' ba bskyed par mi bya/ las kyi rnam par smin pa yid la bya/ bsod nams nye bar brtan par bya/ de bzhin gshegs pa yid la bya ba bsam zhing des grong dang / grong khyer dang / grong rdal du bsod snyoms kyi phyir 'jug par bya'o/ /de grong dang / grong khyer dang / grong rdal du bsod snyoms spyod pa na/ chos kyi go cha bgos la| bsod snyoms spyad par bya'o/ /de la chos kyi go cha gang zhe na/ mig gis yid du 'ong ba'i gzugs rnams mthong na/ rjes su chags par mi bya'o/ /yid du mi 'ong ba'i gzugs rnams mthong yang khong khro bar mi bya'o/ /de bzhin du sgra dang / dri dang / ro dang / reg yid du 'ong ba dang / yid du mi 'ong ba rnams la rjes su chags pa dang / khong khro bar mi bya'o/ / 286a @#/ /dbang po shin tu bsdams pa dang / mig mi g.yeng ba dang / gnya' shing gang tsam du lta ba dang / dul ba dang / cang shes kyi sems dang / sngon yid la byed pa'i chos mi 'dor ba dang / zang zing gis ma spags pa'i rgyud kyis bsod snyoms spyad par bya'o/ /mtha' chags su bsod snyoms blang bar bya'o/ /gang nas bsod snyoms rnyed pa der rjes su chags par mi bya'o/ /gang nas ma rnyed pa der yang khong khro bar mi bya'o/ /khyim bcur bslangs pa las/ khyim bcu gcig pa las bsod snyoms ma rnyed na yang yongs su yi chad par mi bya'o/ de 'di snyam du bram ze dang / khyim bdag 'di dag ni bya ba mang ba dag yin pas/ de dag gis bdag la sbyin par nges pa med de/ de dag bdag la sems pa yang ngo mtshar chen| bsod snyoms sbyin pa lta smos kyang ci dgos snyam pa'i 'du shes bskyed par bya ste/ des de ltar yongs su yi chad pa med par bsod snyoms spyad par bya'o/ /sems can gang dag de'i mig lam du snang bar 'gyur ba skyes pa dang bud med dang khye'u dang bu mo dang tha na dud 'gro'i skye gnas su song ba de dag la yang byams pa dang / snying rje'i sems bskyed par bya'o| |ci nas kyang sems can gang dag bdag gi mig lam du snang bar gyur pa'am/ bsod snyoms sbyin pa de dag mtho ris su 'gro bar 'gyur ba de ltar bya'o/ /de ltar brtson 286b par bya'o/ /des bsod snyoms ngan nam/ bzang yang rung blangs te/ grong ngam/ grong khyer ram/ grong rdal 'di na bdag gi bsod snyoms 'di las bgo bsha' bya dgos pa'i sems can dbul po su yod snyam du phyogs bzhir kun du blta bar bya'o/ /gal te sems can dbul po zhig mthong na des bsod snyoms de las bgo bsha' bya'o/ /gal te sems can dbul po ma mthong na| des 'di ltar gang dag bdag gi mig lam du snang bar ma gyur te/ mi snang ba'i sems can de dag la bsod snyoms kyi thog ma'i cha skal sbyin gyi/ byin nas len pa dag yongs su spyod cig snyam du sems bskyed la des bsod snyoms de khyer la/ dgon pa'i gnas der song la lhung bzed dang lag pa bkrus te/ dge sbyong gi spyod pa dang cho ga dang ldan pa'i spyod pa bzang pos byin gyis brlabs la de skyil mo krung bcas te bsod snyoms de bza' bar bya'o/ /ma chags pa dang / gnod sems med pa dang / mi brkam pa dang / ma zhen pas zas zos nas 'di snyam du lus 'di la srin bu'i rigs brgyad khri yod pa de dag 'di'i mthus bde bar gnas par gyur cig/ da lta ni 'di dag zang zing gis bsdu bar bya'o/ /byang chub thob nas ni chos kyis bsdu bar bya'o snyam du sems bskyed do| |gal te yang de'i bsod snyoms ngan par gyur na de 'di snyam du sems bskyed par bya ste/ kha zas ngan pas ni bdag gi lus yang bar 'gyur/ spong pa bzang bar 'gyur/ bdag gi 287a @#/ /bshad gci 'byung ba nyung bar 'gyur/ bdag la dad pas byin pa chung bar 'gyur/ bdag gi lus yang ba dang sems yang bar 'gyur/ bdag rmugs pa dang gnyid chung bar 'gyur/ bdag 'dod chags kyi sems kyis kun dkris par mi 'gyur ro snyam du yid la bya ba 'di lta bu 'di dag bskyed par bya'o/ /gal te des bsod snyoms mang zhig rnyed na de yang ran pa bza' bar bya'o/ /dor ba'i chos nyid du yang bya ste/ bsod snyoms de las rdo leb gang yang rung ba'i steng du gtor la/ 'di snyam du gcan zan dang / bya'i tshogs gang la la zang zing gi zas 'dod pa byin nas len pa de dag/ 'di la zo zhig/ snyam du sems bskyed par bya'o/ /des zas zos nas lhung bzed dang lag pa bkrus te| dgon pa la brten nas gnas par bya'o/ /sngon yid la byed pa'i chos de nyid kyang mi 'dor bar bya'o/ /'od srung / gal te dge slong dgon pa pa 'bras bu ma thob pa so so'i skye bo'i drung du sbrul dang / gcan zan gtum po dag 'ongs na des de la 'jigs pa dang / skrag par mi bya'i/ des 'di snyam du bdag thog ma nyid nas lus dang srog bor te dgon pa'i gnas su 'ongs kyi/ 'di la bdag gis 'jigs par mi bya/ skrag par mi bya'i/ byams pa'i sems bskyed par bya/ zhe sdang rnam par spang bar bya/ 'jigs pa spang bar 287b bya'o snyam du sems bskyed par bya'o/ /gal te de ltar byas nas sbrul dang / gcan zan de dag gis srog gcod cing zan yang des 'di snyam du gcan zan 'di dag la bdag gis zang zing tsam gyis tshim par byed mi nus kyi/ de dag gis bdag gi sha zos nas bde ba la reg par gnas par 'gyur la/ bdag gis kyang snying po med pa'i lus la snying po blangs par 'gyur ba ni bdag gis rnyed pa legs par rnyed do/ /da ni 'di dag zang zing gis bsdu bar bya'o/ /byang chub thob nas ni chos kyis bsdu bar bya'o snyam du sems bskyed par bya ste/ 'od srung / dgon pa la gnas pa'i dge slong gis de ltar lus dang srog la mi lta bar dgon pa la gnas par bya'o/ /gal te dgon pa'i gnas pa de na gnas pa na mi ma yin pa 'ongs na mdog sdug kyang rung mi sdug kyang rung de la chags par mi bya/ khong khro bar mi bya'o/ /gal te sngon sangs rgyas mthong ba'i lha dag dge slong dgon pa pa'i gan du 'ongs te dri ba yongs su 'dri na/ de la dge slong dgon pa pa des ji ltar thos pa bzhin du lha de dag la chos bshad par bya'o/ /ji ste lha de dag zab mo'i dri ba yongs su 'dri ste/ dge slong dgon pa pa des lan mi thebs pa lta na des nga rgyal med par byas la/ 'di skad ces ma bslabs pa la brnyas par mi bya ste/ sangs rgyas kyi bstan pa la lung mnos nas 'bad de khong du ma chud pa'i chos rnams khong du chud par gyur pa de'i tshe de'i dus na dris 288a @#/ /pa thams cad kyi lan gdab par bya'o/ /bdag ni chos nyan pa yin gyi/ khyed spobs par gyis shig ces brjod par bya ste/ 'od srung / dge slong dgon pa pas de ltar lha de dag la go bar bya'o/ /'od srung / gzhan yang dge slong dgon pa pa dgon pa la gnas pas/ dgon pa'i 'du shes shin tu bsgom par bya ste/ des lus 'di ni rtswa dang / shing dang / rtsig pa dang / bong ba dang / mig yor lta bu ste/ bdag po med pa/ bdag gi med pa/ yongs su 'dzin pa med pa'o/ /lus 'di la ni bdag dang / sems can dang / srog dang / gang zag med kyi/ chos 'di dag ni rten cing 'brel par 'byung ba ste/ rgyu dang rkyen las 'byung zhing byed rgyu tshogs pa las byung ba ste/ ci nas kyang bdag gi lta bar gyur pa thams cad nye bar 'gyur ba de ltar bdag gis tshul bzhin so sor brtag par bya'o/ /stong pa nyid dang / mtshan ma med pa dang / smon pa med pa'i chos kyang rgyun mi 'chad par yid la bya'o snyam du de ltar bslab par bya'o/ /dgon pa'i gnas de na gnas pa des rtswa dang / shing gel pa dang / sman dang / nags tshal de dag ji ltar 'byung ba dang / ji ltar 'jig par 'gyur ba dang / ji ltar phyi rol gyi dngos po 'di dag bdag po med pa/ bdag gi med pa/ yongs su 'dzin pa med pa de ltar g.yo ba med cing byed pa med de/ 288b stong bzhin du skye zhing 'jig la/ su yang de dag skye bar mi byed/ 'gog par mi byed pa'i mtshan ma bzung la/ de bzhin du lus 'di yang rtswa dang / rtsig pa dang / shing dang / bong ba dang / mig yor lta bu ste/ bdag po med pa/ bdag gi med pa/ yongs su 'dzin pa med pa/ g.yo ba med pa/ byed pa med pa/ rgyu dang rkyen tshogs pa las 'byung gi/ rgyu dang rkyen ma tshang na mi 'byung ba ste| 'di la don dam par skye ba dang 'gag pa'i chos gang yang med do snyam du mtshan ma gzung bar bya'o/ /'od srung / de ltar dge slong dgon pa pas chos kyi yi dam kyi spyod pa 'di lta bus dgon pa la gnas par bya'o/ /de lta bu'i chos la gnas pa de nyan thos kyi theg pa pa'am/ rang sangs rgyas kyi theg pa pa'am/ byang chub sems dpa'i theg pa pa zhig tu myur du khyad par du 'gyur ro/ /gal te nyan thos kyi theg pa par gyur na ni de myur du 'bras bu thob par 'gyur ro/ /ji ste de las kyi sgrib pas bsgribs te 'bras bu thob par ma gyur na yang de zag pa rnams la sems rnam par grol gyi bar du de bzhin gshegs pa gnyis sam/ gsum las mi 'da'o/ /gal te rang sangs rgyas kyi theg pa par gyur na ni de myur ba nyid du rang byang chub thob par 'gyur ro/ /gal te byang chub sems dpa'i theg pa par gyur na ni/ de tshe 'di nyid la mi skye ba'i chos la bzod pa thob par 'gyur te/ de sgrib pa med par sangs rgyas mthong bar 'gyur 289a @#/ /ro| |sgrib pa med par sangs rgyas mthong nas myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ / dgon pa pa'i le'u 'di bshad pa na/ dge slong lnga brgya len pa med par zag pa rnams las sems rnam par grol lo/ /dgon pa pa'i le'u ste lnga pa'o// //'od srung / de la ji ltar na dge slong bsod snyoms spyod pa ma yin zhe na/ 'od srung / 'di la dge slong bsod snyoms spyod pas 'di ltar bdag bsod snyoms kyi kha zas la gnas te legs par gsungs pa'i chos 'dul ba la rab tu byung la/ bdag sngon gyi smon lam dang dam bcas pa la gnas par bya'o snyam du bslab par bya'o/ /dge slong bsod snyoms spyod pa lhag pa'i bsam pa dang ldan pa des mi brkam pa dang / tshul 'chos pa med pa dang / kha gsag med pa dang / mgron du 'bod pa thams cad kyi sems med pa dang / dge 'dun gyi rnyed pa dang ma 'bags pa dang / yid dam la brtan par bya'o/ /des kha zas bzang po rnams la ro bro ba'i 'du shes thams cad kyi thams cad du bskyed par mi bya'o/ /des 'di ltar bdag gis gdol pa lta bu dang / lus dang sems gtsang mar bya'i/ kha zas kyis lus gtsang mar ni mi bya'o/ /de ci'i phyir zhe na/ zas bzang po ji snyed cig zos kyang de thams cad ni 289b tha mar rnag tu zag go/ tha mar mi mthun no/ /tha mar dri nga ba'o/ /de lta bas na bdag gis bzang po 'dod par mi bya'o snyam du bslab par bya'o/ /de der shin tu nges par sems pa'i sems kyis grong ngam/ grong khyer ram/ grong rdal du bsod snyoms kyi phyir 'jug pa na mthar chags su bslang bar bya'o/ /des 'di ltar sems bskyed par bya ste/ bdag la skyes pa bsod snyoms ster gyi/ bud med ni ma yin no zhe'am/ bdag la bud med bsod snyoms ster gyi skyes pa ni ma yin no zhe'am/ bdag la khye'u bsod snyoms ster gyi bu mo ni ma yin no zhe'am /bdag la bu mo bsod snyoms ster gyi khye'u ni ma yin no zhe'am/ bdag gis bzang po rnyed kyi ngan pa ni ma yin no zhe'am/ bdag gis bsti stang du byas nas rnyed kyi bsti stang du ma byas par ni ma yin no zhe'am/ bdag gis bde blag tu rnyed kyi sha thang par ma yin no zhe'am/ bdag la skyes pa dang / bud med dang / khye'u dang / bu mo bsu bar 'gyur ro zhe'am/ phyin ma thag tu sems par 'gyur ram/ bdag bstod dgos par 'gyur ram/ shin tu bsdogs \ BSNGOGS?\ pa rnyed par 'gyur ram/ bdag gis kha zas bzang po ro sna tshogs dang ldan pa rnyed par 'gyur gyi/ dbul po'i zas lta bu ngan pa ni rnyed pa ma yin no snyam du des mi dge ba'i yid la byed pa thams cad bskyed par mi bya'o/ /'di lta bu'i go cha ba go par yang bya ste/ 290a @#/ /rnyed pa ma rnyed kyang yongs su yi chad par mi bya ba dang / ngan pa dang bzang po'i 'du shes bskyed par mi bya ba 'di ni dge slong bsod snyoms spyod pa dag gi chos nyid do// de ci'i phyir zhe na/ sems can phal cher ni rol brkam ste/ zas kyi phyir sdig pa'i las rnams byas nas sems can dmyal ba rnams su skye'o/ /gang dag chog shes pa dang / mi brkam pa/ ma zhen pa/ ro la mi gdung ba/ lce'i dbang po chog shes pa/ zas ngan don ci tsam gyis kyang 'tsho ba de dag shi 'phos te shi ba'i dus byas nas mtho ris su skye bar 'gyur/ lha dang mi rnams kyi nang du bde 'gror 'gro bar 'gyur/ lhar skyes nas bdud rtsi za bar 'gyur ro/ /'od srung / de ltar na bsod snyoms spyod pa'i dge slong gis rol srid pa bzlog ste| sems nges par sems pas lhag zan zhag bdun lon pa za yang yi chad par mi bya'o/ /de ci'i phyir zhe na/ lus gso ba dang / 'phags pa'i lam gyi tshogs gsag pa'i don du bdag gis zas bza'o snyam pa'i phyir ro/ /'od srung / bsod snyoms spyod pa'i dge slong gis lhung bzed du 'ongs pa/ lhung bzed du chud pa/ chos dang ldan pa/ chos kyis rnyed pa tshangs pa mtshungs par spyod pa'i dge slong dag dang thun mong du byas la bza' bar bya'o/ /'od srung / gal te dge slong bsod snyoms spyod par gyur te/ nad g.yog 290b med la bsod snyoms la 'jug kyang mi nus na/ des 'di snyam du bdag ni grogs med pa/ bdag ni gcig pu gnyis su med pa/ bdag ni rab tu byung ba'o/ /bdag gi grogs ni chos yin te/ bdag ni chos la brten pa yin la/ bdag ni mi bde zhing sdug bsngal te/ rab tu na bas de bzhin gshegs pas chos kyi sman gsungs pa gang yin pa de ji ltar thos pa bzhin du chos de dag bdag gis tshul bzhin brtag par bya'o snyam du sems bskyed par bya'o/ /'od srung / de la gang lus 'di la yang dag pa ji lta ba bzhin du so sor rtog pa 'di ni tshul bzhin la sbyor ba'o/ /de lus 'di la skyon du yang dag pa ji lta ba bzhin du so sor rtog pa na tshul bzhin la zhugs pa de sems rtse gcig tu 'gyur zhing / dran pa dang ldan la shes bzhin dang ldan pas bsam gtan dang po bskyed pa'i gnas gang yin pa de yod par 'gyur te/ des bsam gtan thob nas bsam gtan gyi bde ba 'dod pa na nyi ma gcig gam/ nyi ma gnyis sam/ nyi ma gsum nas nyi ma bdun gyi bar du bsam gtan gyi bde ba'i zas kyis gnas so/ /gal te 'di ltar rnal 'byor la zhugs pa bsam gtan bskyed par mi nus na de ltar brtson zhing rnal 'byor spyod pa'i dge slong chos la gnas pa de la/ mngon par shes pa mngon par shes pa'i lha dang klu dang gnod sbyin dag kha zas 'bul bar 'gyur ro/ /de ci'i phyir zhe 291a @#/ /na| 'di ni rnal 'byor spyod pa rnams kyi rgyu mthun pa ste/ des lhas yongs su bzung ba rnyed pa'i phyir ro/ /'od srung / gal te sprin 'dus shing char bab ste/ bsod snyoms spyod pa'i dge slong bsod snyoms la 'jug mi nus pa'i dus kyi tshe byams pa'i zas kyi go bgos te/ chos sems pa yid la byed pa la gnas nas zhag gnyis sam/ zhag gsum zhig zan chad na/ 'di ltar yi dwags gshin rje'i 'jig rten pa nyes par byed pa'i las byas pa gang dag lo brgyar yang mchil ma'i thal ba 'ga' tsam yang bzar mi rnyed pa dag kyang yod de/ de lta bas na bdag tshul bzhin du chos sems pa la gnas pas lus nyam chung ba'am/ sems nyam chung ba bskyed par mi bya ste/ bkres pa dang skom pas ji mi snyam par bya'o/ /'phags pa'i lam bsgom pa la brtson 'grus rgyun mi 'chad par bya'o snyam du 'du shes bskyed par bya'o/ /'od srung / dge slong bsod snyoms spyod pas khyim 'dris pa dang / skyes pa 'dris pa dang / bud med 'dris pa dang / khye'u 'dris pa dang / bu mo 'dris par mi bya'o/ /khyim gang na bsod snyoms gtsang ma byed pa'i khyim der stan la 'dug ste/ bsod snyoms gtsang ma byed pa zin gyi bar du chos kyi gtam brjod par bya'o/ /de nas bsod snyoms de blangs la stan las langs te 'gro bar bya'o/ /'od srung / bsod 291b snyoms spyod pa'i dge slong gis 'khod par mi bya'o/ /kha gsag mi bya'o/ /tshul bcos par mi bya'o/ /de la 'khod pa gang zhe na/ gang gzhan dag la tshig 'di skad ces smra ba ste/ bdag gi bsod snyoms ni ngan pa'o/ /bdag gi bsod snyoms ni rtsub pa'o/ /bdag gis sngon 'di lta bu dang / ma 'grangs par ma zos so/ /bdag gi bsod snyoms ni skye bo mang po dang thun mong du byas so| |bdag gis nyung zhig zos te/ bdag ma 'grangs pas lus nyam chung ngo zhes bya ba ste/ 'di ltar 'khod pa'i mtshan ma gang ci yang rung ba 'di lta bu 'di ni sems kyi tshul 'chos pa zhes bya ste/ dge slong bsod snyoms spyod pas de dag thams cad mi bya'o/ /gang lhung bzed du 'ongs pa ngan kyang rung bzang yang rung / nyung yang rung mang yang rung / gtsang yang rung mi gtsang yang rung ste/ de bza' bar bya'o/ /yongs su gdung ba med pa dang / bsam pa yongs su dag pa dang / chos nges par sems pa mang ba dang / lus gso ba dang / 'phags pa'i lam nye bar bstan pa'i phyir des bsod snyoms bza' bar bya'o/ /'od srung / gal te bsod snyoms spyod pas grong ngam/ grong khyer ram/ grong rdal du bsod snyoms bslangs te ma rnyed na| ji ltar lhung bzed bkrus pa bzhin du phyir byung na/ des de bzhin gshegs pa yid la bya ste/ de bzhin gshegs pa bsod nams kyi gzi brjid kyis brjid pa/ 'khor los 292a @#/ /bsgyur ba'i rgyal srid spangs nas rab tu byung ba/ lha dang klu dang gnod sbyin dang dri zas mchod pa/ mi dge ba'i chos thams cad spangs pa/ dge ba'i chos thams cad dang ldan pa/ nyon mongs pa thams cad dang bral ba/ de nyid grong du bsod snyoms kyi phyir gshegs na yang ji ltar lhung bzed bkrus pa bzhin du slar gshegs na/ bdag lta bu bsod nams chung ba/ dge ba'i rtsa ba bskyed pa ji ltar lhung bzed bkrus pa bzhin du phyir byung bas ci'i phyir yi chad par bya/ de ci'i phyir zhe na/ dge ba'i rtsa ba ma bskyed pas kha zas bzang po dag mi rnyed pa'i phyir ro/ /gal te bdud kyi las sam/ bdud kyi byin gyi rlabs kyis bram ze dang khyim bdag de dag bdag la bsod snyoms mi ster na/ ci nas bdud bzhi las yang dag par 'das pa dang / nyon mongs pa thams cad dang bral bar 'gyur ba de ltar bya'o snyam du bsam mo/ /de ltar nga'i nan tan la gnas pa de la bdud dang bdud kyi ris kyi lha rnams kyis glags rnyed par mi 'gyur te/ 'od srung / dge slong bsod snyoms spyod pas de ltar 'phags pa'i rigs rnams yongs su sbyang bar bya'o// bsod snyoms spyod pa'i le'u ste drug pa'o// //'od srung / de la dge sbyong phyag dar khrod pa pas ji lta bu'i sems kyis phyag dar khrod pa bsdu bar bya zhe na/ 292b ngo tsha shes pa dang / khrel yod pas g.yogs pa'i sems su bya'i/ chos gos kyis cha bar sbyor ba la brtson pa'i sems kyis ni ma yin no/ /rlung dang / nyi ma dang / sbrang bu dang / sha sbrang dang / sdig sbrul gyis reg par 'gyur ba yongs su bskyab pa'i phyir yin gyi/ lus brgyan pa'i phyir ma yin no/ /de bzhin gshegs pa'i gsung rab la nan tan gyis gnas pas gos gtsang ma la mngon par dga' ba med de/ des phyag dar gyi phung po las phyag dar khrod pa blangs la 'du shes gnyis bskyed par bya ste/ gnyis gang zhe na/ chog shes pa'i 'du shes dang / mgu sla ba'i 'du shes so/ /gzhan yang 'du shes gnyis bskyed par bya ste/ gnyis gang zhe na/ nga rgyal med pa'i 'du shes dang / 'phags pa'i rigs la gnas pa'i 'du shes so/ /gzhan yang 'du shes gnyis bskyed par bya ste/ gnyis gang zhe na/ lus brgyan pa dang / sems gtsang ba'o/ /'od srung / gal te dge slong phyag dar khrod pa pas phyag dar gyi phung po las phyag dar khrod len pa na/ sa phyogs de na sngon gnyen bshes su gyur pa'am/ sngon gtam 'dres pa'am/ phebs par smra ba de dag gis mthong na bdag la smod par 'gyur gyis dogs te/ phyag dar khrod pa de ma blangs na/ 'od srung / dge slong phyag dar khrod pa pa'i phyag dar khrod pa de lta bu ni yongs 293a @#/ /su dag pa ma yin no zhes ngas bshad do/ /de ci'i phyir zhe na/ dge slong phyag dar khrod pa pas rdo lta bu'i sems dang / rdo rje lta bu'i sems kyis dogs pa med par phyag dar khrod pa blang bar bya ba'i phyir ro/ /des phyag dar khrod pa de blangs nas legs par bkrus te/ shin tu gtsang zhing dri ma med par byas la/ tshon btsal te kha legs par bsgyur la/ chos gos snam sbyar la glan par bya'o/ /des phyis 'jig par mi 'gyur bar legs par glan/ legs par sbyar/ legs par btsems te bgo bar bya'o/ /'od srung / dge slong phyag dar khrod pa bas 'dod chags nye bar zhi bar bya ba'i phyir mi sdug pa yid la bya ba la gnas la phyag dar khrod pa dag lus la bgo bar bya'o/ /zhe sdang nye bar zhi bar bya ba'i phyir byams pa'i sems kyis phyag dar khrod pa dag lus la bgo bar bya'o/ /gti mug nye bar zhi bar bya ba'i phyir rten cing 'brel bar 'byung ba la gnas te phyag dar khrod pa dag lus la bgo bar bya'o/ /nyon mongs pa thams cad spang ba'i phyir tshul bzhin yid la byed pa la zhugs pas phyag dar khrod pa dag lus la bgo bar bya'o/ /skye mched drug yongs su shes par bya ba'i phyir dbang po legs par bsdams te phyag dar khrod pa dag lus la bgo bar bya'o/ /lha dang klu dang gnod sbyin dag mgu bar bya ba'i phyir 293b tshul 'chos pa med pa dang / kha gsag med par phyag dar khrod pa dag lus la bgo bar bya'o/ /'od srung / ci'i phyir phyag dar khrod pa zhes bya zhe na/ 'od srung / dper na/ phyag dar de la ni su yang 'dod pa mi bskyed/ su yang chags pa mi bskyed cing yongs su mi len te/ phyag dar ni dor ba'i cha'o/ /'od srung / de bzhin du phyag dar dang mtshungs par bdag gi med pa/ yongs su 'dzin pa med pa/ rnyed sla ba/ mod pa/ gzhan la gsol mi dgos pa/ gzhan gyi ngor blta mi dgos pa/ gzhan la rag ma las pa/ phyag dar lta bur bor ba ste/ de'i phyir phyag dar khrod pa| phyag dar khrod pa zhes bya'o/ /'di ni drang srong rnams kyi rigs so/ /'di ni 'phags pa rnams kyi rigs gtsang ma'o/ /'di ni 'phags pa'i rigs kyi gnas so/ /'di ni sbyangs pa'i yon tan rnams kyi ston pa'o/ /'di ni tshul khrims kyi phung po kun bsrung ba'o/ /'di ni ting nge 'dzin gyi phung po'i sgo'o/ /'di ni shes rab kyi phung po'i rten no/ /'di ni rnam par grol ba'i phung po 'byung ba'o/ /'di ni rnam par grol ba'i ye shes mthong ba'i phung po dang mthun pa ste/ 'od srung / de ltar phyag dar khrod pa ni yon tan mang ba/ skabs med pa/ go skabs med pa/ bla gab med pa ste/ dri ma med par 'gyur zhing / khur khyer bar 'gyur ba'o/ /'od srung / dge slong phyag dar khrod pa ni gang phyag dar khrod pa'i gos kyis chog par 'dzin pa de la lha rnams 294a @#/ /kyang dga' bar 'gyur ro/ /'od srung / 'di lta bu'i dus dang / 'di lta bu'i gnas yod de/ 'di ltar dge slong phyag dar khrod pa pa chos gos ngan pa 'chang ba bsam gtan gyi bde ba la snyoms par zhugs pa de la/ brgya byin dang / tshangs pa dang / 'jig rten skyong ba rnams kyis thal mo sbyor zhing rkang pa la gtugs te phyag 'tshal bar 'gyur na/ lha gzhan phyag 'tshal bar 'gyur ba lta ci smos/ 'od srung / dge slong dag chos gos kyis cha ba la mngon par brtson gyi rnal 'byor la mi brtson pa/ lus kyi rgyan lhur len pa/ phyi rol gtsang sbra spyod la/ nang 'dod chags dang zhe sdang dang gti mug gi dri mas yongs su gang ba dag ni gos bzang po ji tsam gyon kyang / 'od srung / de dag lha rnams dga' ba'i gzugs ma yin no/ /de ci'i phyir zhe na/ lha rnams kyis lus cha bar sbyor ba la brtson pa de dag gi sems dang sems las byung ba rnams shes te/ shes nas kyang de dag rgyang bsrings te yongs su spong bar 'gyur ro/ /'od srung / dge tshul skul byed mi gtsang bas sbags pa'i phyag dar khrod pa thogs nas bsod snyoms blangs te mtsho ma dros par song ba dang / de der song ba'i tshe mtsho mchog de na gnas pa'i lha de dag gis rgyang ring bo nas bsu ste/ rkang pa la mgo bos phyag 'tshal nas/ gtsang sbra spyod pa'i lha de dag gis 294b mi gtsang bas sbags pa'i phyag dar khrod pa de bdag nyid kyis bkrus te dri ma med par byas nas bkrus pa'i chu dri ma can des rang gi lus la skud de/ skul byed kyi tshul khrims kyi yon tan yang dag par blangs pa dang / snyoms par zhugs par shes nas mtsho de'i lha rnams yan lag lngas phyag 'tshal lo/ /kun tu rgyu rab tu bzang po zhes bya ba de gos gtsang ma bgos nas bsod snyoms blangs te mtsho ma dros par song ba dang / mtsho de na gnas pa'i lha de dag gis de mtsho mchog 'dir kha zas zos nas lhag ma bor na mtsho mchog mi gtsang bar byas su 'ong zhes rgyang grags gcig kho ra khor yug tsam gyi bar du nang du 'dar ma ster ba la ltos/ 'od srung / 'phags pa'i chos kyi yon tan sgrub pa'i khyad par dang / skul byed kyi phyag dar khrod pa bkrus pa'i chu dri ma can lha dag rang gi lus la skud pa dang / kun du rgyu rab tu bzang po ni 'gror yang ma ster ba la ltos/ 'od srung / de lta bas na dge slong phyag dar khrod pa pa yon tan gyi chos 'di lta bu 'di dag 'dod pa zhum zhum por ma gyur pa 'phags pa'i rigs la gnas pas mchod rten gyi 'du shes dang / ston pa'i 'du shes dang / bdag gi ba med cing yongs su 'dzin pa med pa'i 'du shes kyis lus la phyag dar khrod pa dag bgo bar bya'o/ /'di ltar yang sems kyis lus dag par 'gyur gyi/ lus kyis sems dag par ni mi 295a @#/ /'gyur ro/ /de bas na sems dag par 'gyur bar bya'i/ /lus cha bas dag pa ni ma yin te/ sems dag pa ni bcom ldan 'das kyis bstan pa la tshangs par spyod pa zhes gsungs so/ /snyam du sems nges par bsam par bya'o/ /'od srung / de ltar na dge slong phyag dar khrod pa pas khyod dang / nga'i rjes su bslab par bya'o/ /'od srung / 'di lta bu'i dus dang / 'di lta bu'i man yod de/ 'od srung / chos gos ngan pa gyon pa/ chos gos ngan don gyis chog par 'dzin pa khyod gang du chos gos snam sbyar khri'u 'am/ khri'i steng du bzhag ste/ khyod bla gos gyon nas 'chag sar 'chag pa'i tshe lha brgya stong phrag mang po dag der lhags nas/ 'di ni tshul khrims dang / ting nge 'dzin dang / shes rab kyis yongs su bsgos pa'i lus la bgo bgo ba'i chos gos so zhes khyod kyi chos gos snam sbyar de la phyag 'tshal bar 'gyur ro/ /'od srung ltos/ chos gos la yang phyag 'tshal bar 'gyur na lus la lta mi smos/ 'od srung / ji ltar na dge slong nga'i rjes su slob pa dag de bzhin du bsgrub par 'gyur snyam ste/ ngas 'khor los bsgyur ba'i rgyal srid spangs nas rab tu byung ste ka shi ba phra mo dang / du ku la'i ras dang / ko taM pa'i ras dang / ngang ris can gyi chos gos rnams spangs nas/ 'phags pa'i rigs la dga' 295b ba'i phyir sha na'i ras kyi gos rnams lus la bgos so/ /'od srung / ngas khyod las dar gos ngan pa blangs te ngas khyod la sha na'i ras byin pa gang yin pa de thams cad kyang khyod nyid la snying brtse ba'i phyir yin gyi/ chags pa'i phyir ma yin la/ lus brgyan pa'i phyir ma yin no/ /'od srung / 'di la mi gti mug pa kha cig khyod dang nga'i rjes su mi slob cing brkam pa chags pa'i zil gyis gnon pa/ chos gos gsog par byed pa dang / lhung bzed gsog par byed pa/ 'jig rten gyi zang zing gsog par byed pa/ 'gron bu dang / gser dang / nor bu dang / 'bru gsog par byed pa/ ba glang dang / lug dang / bya gag dang / phag dang / bong bu dang / rta dang / thong shol dang / shing rta 'dren pa dag nye bar 'jog par byed pa| khyim pa'i las kyi mtha' spyod pa dag pas ni/ 'od srung / khyim pa dag la khyad par du 'gyur ba yod mod kyi/ mi blun po rab tu byung ba'i mtshams las 'das pa de dag la ni khyad par 'gyur ba gang yang med do/ /'od srung / khyim pa rnams khyad par du 'gyur ba ni dge sbyong ma yin la dge sbyong du khas 'che ba/ tshangs par spyod pa ma yin la tshangs par spyod par khas 'che ba/ gos ngur smrig bgos shing bya ba mang ba/ sbags pa sna tshogs kyis spags pa zas dang gos lhur len pa de dag khyim pa dag gis gos ngur smrig 296a @#/ /gyon par rig nas zhes dang gus pa bskyed pa dang / chos gos dang bsod snyoms kyis sdud par byed pa dang / gus par smra zhing phyag 'tshal la/ ldang bar byed pa ste/ 'od srung / 'di ni khyim pa de dag gi khyad par du 'gyur ba yin gyi/ de dag rab tu byung ba de dag la ni med pa'o/ /de ci'i phyir zhe na/ 'di ltar de dag ni yongs su len pa la brtson pa ma yin zhing ci yang mi gsog pa'i phyir ro/ /'od srung / de'i tshe de'i dus na dge slong phal cher lhung bzed dang / chos gos mang zhing snod spyad mang ba dang / rnyed pa mang bar 'gyur te/ de dag la bsti stang byed par 'gyur/ btsun par byed par 'gyur/ ri mo byed cing mchod pa byed par 'gyur ro/ /de ci'i phyir zhe na/ 'di ltar de sbyin pa dang / phyir sbyin pa dus dus su byed cing bya ba ji lta ba bzhin du yongs su 'dzin pa'i phyir ro/ /dge slong gang dag tshul khrims dang ldan pa dge ba'i chos can zag pa rnams zad par byed pa la mngon par brtson pa dang / yid byung ba mgo dang gos la me 'bar ba bzhin du brtson pa/ don nyung ba/ byed pa nyung ba/ rang gi don la brtson pa 'dris par byed pa yongs su spangs pa dag 'byung ba de dag gi gan du ni/ de'i tshe de'i dus na su yang mi 'gro/ mi bsten cing bsnyen bkur mi byed par 'gyur ro/ /de ci'i phyir zhe na 296b 'di ltar khyim pa dag ni chags pa'i rang bzhin can tshe 'di lhur len gyi/ tshe rabs phyi ma lhur len pa ma yin pas de dag 'di snyam du dge slong de dag la ni bdag cag gi 'tsho ba med na| bdag cag gis ci'i phyir bsten/ ci'i phyir phyag bya/ ci'i phyir mchod/ ci'i phyir bsnyen bkur bya snyam du sems pa'i phyir ro/ /gzhan du na gang dag dge ba'i rtsa ba bskyed pa sngon gyi sbyor ba phun sum tshogs pa dag 'byung zhing / tshul khrims dang ldan pa dge ba'i chos can de lta bu de dag la bsten par byed/ bsnyen par byed cing bsnyen bkur byed pa ni ma gtogs te nyung ngo / /'od srung / chos 'di lta bu tshul dang mthun pa 'di lta bu 'di dag ni/ gang zag gnyis kyi yid du 'ong bar 'gyur te/ gnyis gang zhe na/ bden pa mthong zhing 'khor ba la 'jigs par lta ba dang / rnal 'byor spyod pa la brtson zhing 'bras bu thob par 'dod pa las kyi rnam par smin pa la rton pa/ chos don du gnyer zhing chos 'dod pa'o/ /'od srung / mngon par mi brtson pa chos ma yin pa la lta ba/ las kyi rnam par smin pa dang 'gal ba/ 'jig rten pha rol du kha na ma tho bas 'jigs par mi lta ba| tshe 'di lhur len pa/ tshe rabs phyi ma lhur mi len pa thams cad kyi sgo ngas bshad par bya'o/ /'od srung / gang dag tha na thar pa dang ldan pa'i sems gcig tsam yang 297a @#/ /mi bskyed pa'i mi gti mug pa de dag la ni ngas 'di lta bu'i chos 'di skabs mi 'byed kyi steng du 'di lta bu'i chos 'di dag thos na bdag sgrub pa las nyams par rig nas smad par bya bar sems te/ 'di dag ni sangs rgyas kyis gsungs pa ma yin gyi 'di dag ni rang bzor sbyar ba'am/ bdud kyis mtho btsams nas byas pa'o zhes smra zhing / de dag 'di lta skye bo mang po dag log par 'dzin du 'jug par 'gyur ro/ /de dag ni bdag nyid kyang phung la gzhan kyang phung bar byed par 'gyur/ bdag kyang nyon mongs pa can du gyur la gzhan yang nyon mongs pa can du byed par 'gyur te/ de ltar mi gti mug pa de dag ni bdag la phan pa dang / gzhan la phan pa'i phyir zhugs pa ma yin no/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis dkon mchog brtsegs pa'i chos kyi rnam grangs 'dir nan tan snying por bgyid pa'i gang zag chos kyi dbang phyug rnams la sangs rgyas bcom ldan 'das rnams kyi thugs rje chen po gang lags pa de rgya cher yang dag par rab tu bshad lags so/ /bcom ldan 'das/ sems can gang dag chos kyi rnam grangs 'di thos nas 297b gos shing de bzhin nyid du sgrub pa de dag ni sangs rgyas kyis yongs su bzung ba lags so/ /bcom ldan 'das kyis bka' stsal pa/ 'od srung / de de bzhin no/ /de de bzhin te/ gang dag chos kyi rnam grangs 'di thos nas mos shing de bzhin nyid du sgrub pa'i sems can de dag ni sangs rgyas kyis yongs su bzung ba yin no/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod kyis rigs kyi bu dang rigs kyi bu mo dge ba'i rtsa ba bskyed pa/ zhi ba 'dod pa/ grol bar 'dod pa de dag gi ched du chos kyi le'u 'di gzung zhig/ khyim pa dang / rab tu byung ba de dag kyang chos 'di la bslabs nas phung po thams cad rab tu spangs pa'i mya ngan las 'das pa thob par 'gyur ro/ /gsol pa/ bcom ldan 'das/ bdag gis chos kyi rnam grangs 'di bzung lags na/ bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo/ de'i phyir chos kyi rnam grangs 'di chos thams cad yang dag par bsdus pa zhes bya bar yang gzung zhig/ 'phags pa'i rigs sbyang pa'i yon tan gyi gnas dang / tshul khrims dang ldan pa yongs su 'dzin pa dang / tshul khrims 'chal ba spa 'gong ba dang / rin po che brtsegs pa dang / rin po che'i phung po dang / 298a @#/ /rin po che bsags pa dang / rin po che'i chos kyi sgo'i le'u zhes bya bar yang gzung zhig/ bcom ldan 'das kyis de skad ces bka' stsal nas/ tshe dang ldan pa 'od srung chen po dang / tshe dang ldan pa kun dga' bo dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las/ rin po che'i phung po'i le'u zhes bya ste/ 'dus pa bzhi bcu rtsa bzhi pa rdzogs so// |