'phags pa mkhar sil gyi mdo/ sangs rgyas dang / byang chub sems dpa' thams cad la phyag 'tshal lo/ /de nas bcom ldan 'das kyis dge slong rnams la bka' stsal pa/ khyod kyis 'khor sil 'di yongs su bcang bar bya ste/ de ci'i phyir zhe na/ 'das pa'i sangs rgyas rnams kyis kyang mkhar sil 'di bsnams so/ /ma byon pa'i sangs rgyas rnams kyis kyang mkhar sil 'di bsnams so/ /da ltar gyi sangs rgyas rnams kyis kyang 'khar sil 'di bsnams pa yin te/ nga da ltar mngon par sangs rgyas nas 'khar sil bsnams pa de bzhin du 'das pa dang / ma byon pa dang / de ltar bzhugs pa'i sangs rgyas rnams kyis kyang nyan thos rnams la la mkhar sil bcang bar bya'o zhes ston par mdzad pas deng nga mngon par rdzogs par sangs rgyas nas kyang sangs rgyas rnams kyi chos ji lta ba bzhin du khyed la bstan pa yin gyis/ khyed kyis kyang mkhar sil bcang bar bya'o/ /de ci'i phyir zhe na/ mkhar sil zhes bya ba ni ye shes kyi mkhar ba zhes kyang bya'o/ /yon tan gyi mkhar ba zhes kyang bya ste/ 'phags pa'i ye shes rab tu ston pa'i phyir ye shes kyi mkhar ba zhes bya'o/ /yon tan gyi gzhi sgrub pa'i phyir yon tan gyi mkhar ba zhes bya ste/ mkhar sil 'di ni 'phags pa'i gang zag gi rigs can skyes bu dam par mtshon pa'i lam gyi chos la phyogs pa'i rgyal mtshan 67.289a rjes su dran pa rnam par gzhag pa'i don gyi spyod pa yin pas de'i phyir khyod kyis chos bzhin du bcang bar bya'o/ /de nas tshe dang ldan pa 'od srung chen po stan las langs te/ gos tshags bcos nas bla gos phrag pa gcig tu gzar te thal mo sbyar nas pus mo sa la btsugs te/ bcom ldan 'das la 'di skad ces gsol to/ /bcom ldan 'das ci'i slad du mkhar sil zhes bgyi/ ji ltar na bcang bar bgyi/ bcom ldan 'das kyis bshad du gsol/ bdag cag rnams kyis kyang bka' bzhin du spyod par 'tshal lo zhes gsol pa dang / bcom ldan 'das kyis 'od srungs la bka' stsal pa/ legs par nyon la yid la zung shig dang ngas bshad par bya'o/ /de la mkhar sil zhes bya ba ni yang ba yin te/ gang gis mkhar ba 'di la brten pa 'di dag nyon mongs pa bsal nas khams gsum las nges par 'byung ba'i phyir yang zhes bya'o/ /mkhar sil zhes bya ba ni snang bar byed pa yin te/ mkhar sil 'dzin pa'i gang zag gang yin pa de dag shes rab kyi snang ba thob par 'gyur ba'i phyir snang bar byed pa zhes bya'o/ /mkhar sil zhes bya ba ni phyir mi ldog par byed pa yin te/ mkhar sil 'dzin pa'i gang zag gang yin pa de dag srid pa gsum las nges par 'byung zhing yang mngon par zhen pa nyid du mi 'gyur ba'i phyir phyir mi ldog par byed pa zhes bya'o/ /mkhar sil zhes bya ba ni khong du chud par byed pa yin te/ gang mkhar sil 'dzin par byed pa yin zhe na sdug bsngal dang / stong pa dang / khams gsum gyi nyon mongs pa'i kun nas bkris par khong du chud pa dang / bden pa bzhi dang / rten cing 'brel par 'byung ba bcu gnyis po 'di dag gsal bar rtogs par 'gyur ba'i phyir khong du chud par byed pa zhes bya'o/ /mkhar sil zhes bya ba ni nga rgyal med par byed pa yin te/ gang 67.289b mkhar sil 'dzin pa de dag nga rgyal gyi las rab tu spong bar 'gyur ba'i phyir nga rgyal med par byed pa zhes bya'o/ /mkhar sil zhes bya ba ni rgyang bsrings pa yin te/ gang mkhar sil 'di 'dzin pa'i gang zag gang yin pa de dag 'dod pa lnga thag ring du byed pas de dag 'dod pas sred pa'i kun nas bkris pa spong ba dang / phung po lnga po rnams rnam par 'thor ba dang / srid pa lnga po dag yongs su spong ba dang / mya ngan las 'das pa la phyogs shing 'du byed kyi las kyang thag ring du spong ba'i phyir rgyang bsrings pa zhes bya'o/ /mkhar sil zhes bya ba ni len par byed pa yin te/ gang mkhar sil 'dzin par byed pa de dag sangs rgyas rnams kyi tshul khrims dang / ting nge 'dzin dang / shes rab rin po che blangs pas rnam par grol ba thob par 'gyur ba'i phyir len par byed pa zhes bya'o/ /mkhar sil zhes bya ba ni yongs su grub par 'gyur ba yin te/ gang mkhar sil 'dzin pa dag sangs rgyas kyi chos kyi sde snod mngon par grub pa dang / ji ltar bsten pa bzhin du bsgrubs pas ma nyams par phun sum tshogs par 'gyur ba'i phyir mngon par 'grub par 'gyur ba zhes bya'o/ /bcom ldan 'das kyis bka' stsal pa/ 'od srung mkhar sil zhes bya ba'i yi ge'i don rgya che zhing mang bas yongs su rdzogs par rjod mi nus kyang khyed kyis re shig de bzhin du yongs su gzung bar bya'o/ /bcom ldan 'das la 'od srung gis 'di skad ces gsol to/ /bcom ldan 'das mkhar sil zhes bya ba'i don ni de lta bu lags na/ ci'i slad du ye shes kyi mkhar ba zhes bgyi ba nas dran pa nye bar gzhag pa'i don gyi spyod pa zhes bgyi ba'i bar gyi don gang lags pa bcom ldan 'das kyis bkas bshad du gsol/ bcom ldan 'das kyis bka' stsal pa/ mkhar sil zhes bya ba ni ye shes kyi spyod 67.290a pa sgrub pa dang / mang du thos pa rgya cher sgrub pa dang / 'jig rten dang 'jig rten las 'das pa'i shes rab dang / dge ba dang / mi dge ba dang / 'dus byas dang / 'dus ma byas dang / zag pa dang bcas pa dang / zag pa med pa rnam par thogs pa med par khong du chud cing shes rab mngon par 'grub par byed pa'i phyir ye shes kyi mkhar ba zhes kyang bya'o/ /tshul khrims dam por srung ba dang / bzod pa dang / bsam gtan la sems rtse gcig tu g.yeng ba med par sgom pa dang / rtag tu bsod nams kyi las bsgrubs pas mgo 'am thod la me 'bar ba bzhin du skad cig tsam du yang mi gtong ba'i phyir yon tan gyi mkhar ba zhes bya'o/ /mkhar sil 'di yongs su 'di 'dzin pa gang yin pa de dag ni gang gi spyod pa rnam pa bcu drug po 'di lta ste/ bden pa bzhi po sdug bsngal dang / kun 'byung ba dang / 'gog pa dang / lam dang / tshad med pa bzhi po byams pa dang / snying rje dang / dga' ba dang / btang snyoms dang / bsam gtan bzhi po bsam gtan dang po dang / bsam gtan gnyis pa dang / bsam gtan gsum pa dang / bsam gtan bzhi pa dang / gzugs med pa'i snyoms par 'jug pa bzhi po nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min gyi skye mched kyi phun sum tshogs pa dang / gzhan yang spyod pa sum bcu rtsa bdun po 'di lta ste/ byang chub kyi phyogs kyi chos sum bcu rtsa bdun phun sum tshogs shing chos de dag gsal bar rnam par byed pa dang / bdag nyid kyi lus kyis mngon sum du byas pas sgra'i rjes su mi 'brang ba dang / chos de dag la bdag nyid rnam par rtsen pa dang / stong pa nyid dang / mtshan ma med pa dang / smon pa med pa'i rnam par thar pa'i sgor 'jug pa la 67.290b rang dbang du gyur cing dga' ba med pa gang yin pa de ni 'phags pa zhes bya ste/ nang yon tan de lta bu dang ldan pas phyi rol mkhar sil 'dzin pa yin te/ 'dis ni gang zag gdon mi za bar 'phags pa'i yon tan tshul khrims dang / bzod pa dang / bsam gtan dang / shes rab dang / rig pa gsum dang / mngon par shes pa drug dang / rnam par thar pa brgyad po rnams phun sum tshogs pa yin te/ gang zag de 'phags pa yin par mtshon pa nyid kyis gus pa skyed par 'gyur ba'i phyir 'phags pa'i gang zag gi rtags zhes bya'o/ /skyes bu dam par mtshon pa zhes bya ba ni nang na ye shes kyi ngo bo nyid dang ldan pas dam pa zhes bya ste/ gang zag de 'phags pa yin par mtshon pa nyid kyis gus pa skyed par 'gyur ba'i phyir 'phags pa'i nang na ye shes kyi ngo bo nyid dang ldan pas yon tan gyi gzhi sgrub pa dang / chos gong nas gong du rtsol zhing legs par sgrub par byed do zhes ston par byed pa'i phyir skyes bu dam par mtshon pa zhes bya'o/ /gang zag gsal ba de ring por mi thogs par shes rab kyis mngon par grub nas 'dus ma byas kyi gnas rab tu zhi zhing dben pa mya ngan las 'das pa'i bde ba don dam pa'i gnas kyi lam du 'jug par 'gyur ro zhes shes par byed pa'i phyir lam gyi chos la phyogs pa'i rgyal mtshan zhes bya'o/ /rjes su dran pa'i rnam par gzhag pa'i don gyi spyod pa zhes bya ba ni mkhar ba 'di rim pa gsum dang ldan par dum bu gsum gyi rim pa mthong ba nyid kyis ngan song gsum gyi sdug bsngal rjes su dran nas tshul khrims dang / rting nge 'dzin dang / shes rab sgom par byed pa dang / gnod pa gsum po rga ba dang / na ba dang / 'chi ba rjes su dran na dug gsum po 'dod chags dang / zhe sdang dang / gti mug yongs su sil bar byed pa dang / khams gsum po dag mi rtags pa yin pa 67.291a nyid du rjes su dran nas dkon mchog gsum la mngon par yid ches shing gus pa dang / srid pa gsum bsal ba dang / dag pa gtsang ba dang / las rnam gsum rnam par sbyang ba dang / rig pa gsum dang ldan par 'dod pa dang / rnam par thar pa gsum la 'jug pa dang / rjes su dran pa drug gi gnas gsum thob pa dang / ye shes thag ring du byed pa gsum rtogs par 'gyur ba'i phyir dum bu gsum rim par rnam par gzhag pa yin no/ /gzhan yang bzhi sgril du byas pa ni skye ba rnam pa bzhi yongs su bcad pa dang / bden pa bzhi rjes su dran par bya ba dang / tshad med pa bzhi sgom pa dang / bsam gtan bzhi la 'jug par bya ba dang / snyoms par 'jug pa bzhi yongs su dag par bya ba dang / dran pa nye bar gzhag pa bzhi rab tu bstan pa dang / yang dag pa'i spong ba bzhi bstan par bya ba dang / ting nge 'dzin gyi rkang pa bzhi thob par bya ba'i phyir bzhi sgril du rnam par gzhag pa yin no/ /dbus kyi shing gtogs par rnam pa lngar gzhag pa ni lta ba lnga po dag spang ba dang / 'gro ba lnga po dag gi 'khor ba'i sdug bsngal gyi 'khrug pa yongs su song ba dang / dbang po lnga sgom pa dang / stobs lnga dang ldan par bya ba dang / sgrib pa lnga po dag bsal ba dang / phung po lnga po dag rnam par gshig pa dang / cha lnga dang ldan pa'i chos kyi sku thob par bya ba'i phyir rnam pa lngar gzhag pa yin no/ /sil sgril bcu gnyis su bstan pa ni rten cing 'brel par 'byung ba yan lag bcu gnyis su dran par bya zhing thogs pa med par bya ba dang / sgo bcu gnyis pa'i bsam gtan bsgom par bya ba dang / sems la skyon med par rjes su dran par bya'o/ /rim pa gsum dang bzhi sgril du bsdus te/ grangs bdun du bstan pa ni de bzhin gshegs pa'i byang chub kyi yan lag bdun gyi chos rjes su dran par bya ba dang / 'phags pa'i nor bdun mngon par bsgrub par bya'o/ /mar rtse gtogs par brgyad tu bstan pa ni lam yan 67.291b lag brgyad pa rjes su bstan par bya ba dang / rnam par thar pa brgyad thob par bya ba dang / mi khom pa brgyad yongs su bsal ba'i phyir rnam pa brgyad bstan pa yin no/ /mkhar sil gyi don mdor bstan pa de lta bu yin pas khyed kyis legs par yongs su gzung bar bya'o/ /bcom ldan 'das la 'od srung gis gsol pa/ bcom ldan 'das 'phags pa'i gsung rab la ji skad bstan pa bzhin du 'tshal lo zhes gsol to/ /de nas 'od srung chen pos yang bcom ldan 'das la 'di skad ces gsol to/ /bcom ldan 'das dus gsum gyi de bzhin gshegs pa rnams kyi chos kun mtshungs pa zhig lags sam/ bcom ldan 'das kyis bka' stsal pa/ kha cig mkhar ba mtshungs kyang spyod pa mi mtshungs pas kha cig gi tshe na ni bzhi sgril du byas pa'o/ /kha cig gi tshe na ni gnyis sgril du byas pa ste/ sil sgril gyi grangs la ni bye brag du gyur pa med do/ nga ni deng 'dir bzhi sgril sil sgril bcu gnyis su byas pa'i bstan pa de spyod do/ /gnyis sgril du byas pa ni de bzhin gshegs pa 'od srung gis rnam par gzhag pa yin te/ sems can rnams bden pa gnyis po kun rdzob gyi bden pa dang / don dam pa'i bden pa rjes su dran par bya ba'i ched du don 'di rnam par gzhag pa yin no/ /de'i tshe bcom ldan 'das kyis de skad ces bka' stsal nas tshe dang ldan pa 'od srung chen po 'khor stong nyis brgya dang / 'khor 'dus pa chen po rnams shin tu dga' zhing gus pas mngon par bstod do/ /'phags pa mkhar sil zhes bya ba theg pa chen po'i mdo/ rdzogs so// // |