J348

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>J348</h1><td>(<a href="https://adarsha.dharma-treasure.org/kdbs/jiangkangyur" target="new2">e-text produced by ADARSHA</a>)<br><br><a href="verif2.php?id=J348&coll=lithang">see text in Tibetan script</a></table>83.303a<br><font size=+1>

'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u bzhi bcu rtsa dgu pa ste 'phags pa drang srong rgyas pas zhus pa/ / bam po dang po/ rgya gar skad du/ Ar+ya ri Shi byA sa pa ri pr-its+tsha nA ma ma hA yA na sU tra/ bod skad du/ 'phags pa drang srong rgyas pas zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das gang gA'i klung gi 'gram rgal bar bya ba ma yin pa/ khu byug dang / ne tso dang / bung ba dang / ngang pa'i rgyal po dang / bya'i tshogs du ma sgra snyan pa 'byin pa/ shing p+lag sha dang / n+ya gro d+ha dang / tsan dan dang / mya ngan 'tshang dang / sa la ki'i yal gas bskyabs pa/ rtag tu me tog dri zhim po sil mar bkram pa de na dge slong gi dge 'dun chen po thams cad kyang bya ba byas pa/ byed pa byas pa/ zag pa zad pa/ rdul zad pa/ chos las mi zlogs pa/ bsam gtan dang kha ton la gnas pa/ 'chag sa dang khri'i steng na 'dug na ngang pa'i rgyal po ltar</font><hr>83.303b<br><font size=+1>

sa phyogs de mdzes par byed pa sha stag la/ kha cig ni nang du yang dag 'jog la gnas pa/ kha cig ni shing drung na gnas pa/ de bzhin gshegs pa'i bka' kun bgro bar byed pa/ cha byad dul zhing brtan pa/ spyod lam rab tu zhi ba/ 'dod pa la 'dod pa dang / gnod sems dang / snyom pa dang / gnyid dang / le lo dang bral ba sha stag dang thabs gcig tu bzhugs te/ de nas bcom ldan 'das kyis dge slong rnams la bka' stsal pa/ dge slong dag sbyin pa byin cig /bya ba gang yin pa gyis shig /tshul khrims kyi sdom pas bsdams shing dbang po sras la yid zhi bar gnas par gyis shig /de nas bcom ldan 'das dge slong rab tu mang po la 'di lta ste/ tshe dang ldan pa kun dga' bo dang / 'od srung chen po dang / shA ri'i bu dang / bak+ku la dang / nam gru dang / tshe dang ldan pa kun shes kau di n+ya dang / de dag la sogs pa nyan thos chen po sha stag dang thabs gcig ste/ yang dag par dga' ba dang / yang dag par mgu bar 'gyur ba'i gtam mdzad do/ /de'i tshe nub phyogs logs na nyi ma'i dkyil 'khor ltar snang ba zhig tshe dang ldan pa kun dga' bos mthong ngo / /mthong nas kyang bcom ldan 'das la 'di skad ces gsol to/ /bcom ldan 'das nub phyogs logs na 'bar zhing snang ba zhugs kyi 'od zer lta bur gda' ba 'di ci lags/ de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo 'di ni dri nag ma'i bu drang srong 'jig rten pa'i mngon par shes pa lnga dang ldan pa drang srong rnams kyi mchog drang srong rgyas pa zhes bya ba ste/ drang srong dka' thub drag po la gnas pa/ bsnyen par gnas pa brgya stong gis dub pa/ lus kyi mdzes pa med pa lnga brgya tsam phyi bzhin du 'brang ba la drang srong dkar min gzhon nu dang / mi lha dang / rnam par bde srung gi bu dang / ri dgas mo'i bu dang / sgra byed kyi bu dang / phur bu rna dang / me'i bu dang / rnam par rko'i bu dang / bsnyen par dga' dang / de dag la sogs pas yongs su bskor nas rjes su 'chag pa'o/ /de nas de'i bar skabs su rgyas pas bcom ldan 'das dge slong gi tshogs kyis yongs su bskor cing dbang po zhi ba/ thugs zhi ba</font><hr>83.304a<br><font size=+1>

bsam gtan gyi dben pa la dgyes pa/ shing ljon pa stug po'i nang na bzhugs pa mthong ngo / /mthong nas kyang rgyas pa 'di snyam du sems/ kye ma'o ma la ngo mtshar te/ 'di bcom ldan 'das thams cad mkhyen pa phyin ci ma log pa gsung pa zhes 'jig rten du grags pa ni gnas yin no/ /ji ltar 'di kha dog rgyas pa mchog dang ldan zhing rmad du byung ba'i gzugs rgya chen po phun sum tshogs pa las na 'di gdon mi za bar de bzhin gshegs par 'gyur ro/ /'di ltar bcom ldan 'das gzugs rgya chen po 'di lta bu dang ldan pas 'khor los sgyur ba'i dbang phyug gi bdag po dug dang bcas pa bzhin du spangs te bud med rin po che sa 'tsho ma la sogs pa bud med drug stong yang spangs nas dka' thub kyi nags tshal gyi nang du gshegs te bzhugs pa 'di ni kye ma'o 'jig rten na ngo mtshar rmad du byung ba'o/ /snyam du sems so/ /de nas drang srong mes sbyin gyi bus kyang rgyang ring po nas bcom ldan 'das mthong ngo / /mthong nas kyang tshim zhing mgu la yi rangs shing rab tu dga' ste/ dga' ba dang yid bde ba skyes nas tshul dang 'dra ba'i tshigs su bcad pa 'di dag gis bcom ldan 'das la mngon par bstod do/ /shing sngon dag gi khrod 'dug cing / /btso ma'i gser ltar ser bar snang / /gzugs ni shin tu 'bar bas na/ /skye bo kun kyi dga' ba skyed/ /bai dUr+ya ni dri med brag /stug nang ri rab rtse gcig 'phags/ /ston gyi nyi ma rab lhan ltar/ /dpal gzugs 'bar ba 'di su zhig /de nas drang srong chen po de dag thams cad dga' ste mig phye thal mo sbyar nas bcom ldan 'das ga la ba der dong ngo / /de nas bcom ldan 'das kyis dge slong rnams la bka' stsal pa/ dge slong dag 'dzam bu'i gling pa'i drang srong me'i phung po ltar 'bar ba/ ral pa'i cod pan can/ rgas pa/ rab tu rke ba/ zas mi za zhing bsnyen par gnas pa/ shing shun dang / g.yang gzhi gyon pa/ thal bas byugs pa/ thang dang brag khrod na gnas pa/ bkres bkres ltar 'dug pa/ rlung 'gam pa/ zla ba phyed bsnyen gnas byas pa/ yan lag skem pa gcer bu ba shing shun gyon pa/ ag tshom dang / </font><hr>83.304b<br><font size=+1>

sen mo dang / spu ring ba/ bung ba'i kha dog lta bu/ dka' thub kyi nor can/ bzlas brjod dang / sbyin sreg dang / bsrung ba dang / bkra shis pa byas pa sa dang / bla gab med pa dang / shing drung na gnas pa/ rkang pa gyen du sgreng gtsog tsog por 'dug pa/ chu'i nang du 'jug pa/ me mdag 'bar ba dang / sreg me rab tu 'bar ba dang / nyi mas lus shin tu gdungs pa/ dka' thub drag pos yongs su bskor ba/ bab bab tu gnas pa/ rigs tsam gyis yongs su dga' ba/ bla na med pa'i ye shes dang bral ba de dag la ltos/ dge slong dag drang srong chen po 'di dag ni 'khor ba las 'byung ba mi shes pa dag ste/ 'di dag ni 'dod pa dang rgyags pas myos pa/ yang srid par skye ba yongs su 'dzin pa/ lta ba'i rgyu ba yongs su ma dag pa sha stag go /de nas dge slong de dag bcom ldan 'das la sems thag pa nas skyabs su dong nas 'di skad ces gsol to/ /bcom ldan 'das bdag cag ni tshangs par spyod pa'i tshogs sgrub pa ste/ de'i slad du bdag cag srid par skye ba mi 'dzin to/ /de nas drang srong chen po rgyas pas drang srong chen po de dag gi sems dang mi 'jigs pa dman zhing lta ba dman par khad kyis brtags nas gus pa skyes te/ rjes dang bcas pa drang srong gi tshogs kyis yongs su bskor nas ral pa mang po brdzes te/ mchod phyir thogs thogs pa/ sngo sangs po/ mig gnyis ser ba/ skra rtsub cing grugs pa/ lag na dbyug gu gsum thogs pa/ gzugs rab tu mi sdug pa dang ldan pa/ nam mkha'i ngos las 'gro ba/ gtam sna tshogs kyi gtan tshigs dang ldan pa de bcom ldan 'das ga la ba der song ste phyin nas bcom ldan 'das la 'di skad ces gsol to/ /'khor 'di ni kun tu rmongs pa ste/ 'di na gnas lags na bdag 'dir mchis par bcom ldan 'das mkhyen par mdzad du gsol/ bcom ldan 'das kyis bka' stsal pa/ drang srong chen po srid par skye ba thams cad kyang ngas shes te dngos po de yang rig go /de nas tshe dang ldan pa kun dga' bos bcom ldan 'das la 'di skad ces gsol to/ /bcom ldan 'das drang srong gi tshogs kyis yongs su bskor ba gsal ba zur phyin pa/ zhib pa mkhas pa/ blo dang shes pa dang / mi 'jigs pa dang / ral pa'i zar bu'i cod pan can 'di su lags/ bcom ldan 'das kyis bka' stsal pa/ kun dga'</font><hr>83.305a<br><font size=+1>

bo 'di ni drang srong chen po rgyas pa zhes bya ste/ rig byed rnams byed pa/ nus can bu'i bstan bcos kyis 'tsho ba/ yi ge sna tshogs sdud pa'o/ /de nas dgra bcom pa de dag thams cad kyis rgyas pa mthong nas bcom ldan 'das la 'di skad ces gsol to/ /bcom ldan 'das 'di ni 'khor ba'i sdug bsngal las yongs su ma grol ba lags na/ dka' thub drag pos yongs su nyon mongs pa rnyed pa 'dis ci zhig thog dgra bcom pa de dag yang 'di snyam du sems te/ rgyas pa 'dis bcom ldan 'das la gtam gang bdag med pa'i gtam 'am/ sbyin pa dang / tshul khrims dang rab tu ldan pa'i gtam 'am/ ci'i rgyu dang rkyen gyi gtam zhig zhu snyam mo/ /de nas drang srong chen po rgyas pas bcom ldan 'das la 'di skad ces gsol to/ /bcom ldan 'das 'byung ba dang / da ltar drang srong chen po tshogs pa 'di shin tu rnyed par dka' ba lags so/ /gal te zhu nas zhu ba lung bstan pa'i slad du bcom ldan 'das kyis bdag la skabs phye na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu'o/ /de skad ces gsol pa dang / bcom ldan 'das kyis drang srong chen po rgyas pa la 'di skad ces bka' stsal to/ /drang srong chen po khyod ci dang ci 'dod pa dris shig dang / dris pa de dang de de lta de ltar lung bstan par bya'o/ /de nas bcom ldan 'das la drang srong chen po rgyas pas 'di skad ces gsol to/ /bcom ldan 'das ji ltar sbyin pa sbyin par bgyi/ sbyin pa ma lags pa'i don gang lags/ sbyin pa zhes bgyi ba'i don gang lags/ sbyin bdag ji ltar rab tu 'tshal bar bgyi/ ji ltar na gtong ba por 'gyur/ ji ltar na sbyin bdag lags la gtong ba po ma lags/ ji ltar na sbyin bdag sbyin pa'i mthar 'gro ba zhes bgyi/ spungs par gnas pa 'am/ brtsegs par gnas pa 'am/ ji ltar blta bar bgyi/ ji ltar na sbyin bdag len pa la mi gnas par sbyin pa sbyin pa lags/ sbyin pa'i rnam par smin pa ji ltar blta bar bgyi/ ji ltar na bcom ldan 'das mya ngan las 'das pa'i mchod rten la mchod pa lags/ bsod nams de'i rnam par smin pa ji ltar blta bar</font><hr>83.305b<br><font size=+1>

bgyi/ bcom ldan 'das khyod yongs su mya ngan las 'das nas yongs su 'dzin par 'gyur ba gang lags/ de nas bcom ldan 'das kyis drang srong chen po rgyas pa la 'di skad ces bka' stsal to/ /drang srong chen po sems dang po bskyed pa'i gtam khyod kyis dris pa 'di ni rtsing ngo / /de na gnas brtan shA ra dwa ti'i bu smin ma ring ba/ gnyer ma can/ mgo skya bos lag pa g.yas pas smin ma gzar nas mig lpags bteg ste bltas nas 'di skad ces smras so/ /drang srong chen po rgyas pa 'di 'jig rten na grags pa yin na gtan tshigs kyi rig pa mi shes pa'i byis pa rogs rgod lta bur mkhas pa'i blo med de/ rgyu dang rkyen gyi gtam spangs shing bdag med pa'i gtam bor la lha yul pa'i rgyu'i gtam btang ste/ ci'i phyir sbyin pa'i gtam nyid zhus par gyur/ de nas tshe dang ldan pa kun dga' bos bcom ldan 'das kyi zhabs gnyis la phyag 'tshal te/ bcom ldan 'das la 'di skad ces gsol to/ /bcom ldan 'das bdag gis drang srong chen po 'di la sbyin pa'i 'bras bu sbyin pa'i bka' mchid bgyi'o/ /bcom ldan 'das kyis bka' stsal pa/ kun dga' bo de bzhin gshegs pa la dris la/ nyan thos kyis bshad pa ni de bzhin gshegs pa rnams kyi tshul ma yin te mi dgos kyis/ kun dga' bo de skad ma zer cig 'di ni gnas ma yin no/ /de nas bcom ldan 'das la tshe dang ldan pa shA ra dwa ti'i bus 'di skad ces gsol to/ /bcom ldan 'das bdag gis drang srong chen po rgyas pa ci dang ci 'tshal ba dris pa'i lan gdab par bgyi'o/ /bcom ldan 'das kyis bka' stsal pa/ shA ri'i bu khyod kyang de skad mi 'tsham par ma zer/ nga'i mdun na nyan thos kyis the tshom bcad pa 'di ni mi rigs te/ nga la sems can gyi sems ma rangs par 'gyur ro/ /sems ma rangs nas 'di skad du gang gi phyir rgyas pas dris nyan thos 'chad du bcug pa las na de bzhin gshegs pa ni thams cad mkhyen pa ma yin du nges so/ /yang na ni sangs rgyas la ngar 'dzin pa yod do zhes zer bar 'gyur te/ sems can dmyal bar 'gro bar 'gyur ro/ /de nas dge slong de dag bcom ldan 'das la dga' ba</font><hr>83.306a<br><font size=+1>

skyes nas 'di skad ces gsol to/ /bcom ldan 'das drang srong chen po rgyas pa'i the tshom bsal ba'i slad du bshad du gsol/ de nas bcom ldan 'das kyis drang srong chen po rgyas pa la 'di skad ces bka' stsal to/ /drang srong chen po sbyin pa'i rnam par smin pa dang / sbyin pa'i bya ba dang / sbyin pa'i rnam par dbye ba dang / sbyin pa zhes bya ba'i don gang yin pa dang / sbyin pa bdag gis yongs su spyad na ji ltar sbyin pa sbyong ba dang / de dag la byin na bsod nams kyi rnam par smin pa ji ltar rab tu 'phel ba de nyon cig gang gi phyir sbyin pa zhes bya ba dang / sbyin pa zhes bya ba'i don gang yin zhes bya ba ni drang srong chen po 'di la gtong ba pos sbyin pa'i dngos po yongs su btang ste/ dad pa bskyed nas gzhan byed du bcug ste yul gzhan du song nas byed du bcug pa des kyang nor rnams rnam par gtong bar byed na nor gang gi yin pa de ni sbyin bdag yin no/ /byed du bcug pas byin pa ni gtong ba po yin gyi sbyin bdag ma yin no/ /gang rang gi dngos po bdag nyid kyis sbyin pa de ni gtong pa po yang yin la sbyin bdag kyang yin no/ /drang srong chen po rnam pa sum bcu rtsa gnyis kyis sbyin pa yongs su ma dag par blta'o/ /rnam pa sum bcu rtsa gnyis gang zhe na/ 'di lta ste/ drang srong chen po 'di la gtong ba po phyin ci log tu lta bar gyur cing ma dad pa dang ma dang ba mang la des sbyin pa byin na de'i sbyin pa de yongs su ma dag pa yin no/ /drang srong chen po gzhan yang phan btags pa'i lan du phan 'dogs par bya ba'i phyir sbyin pa byin na de yongs su ma dag pa yin no/ /des dman pa dang / 'dod pa'i rgyu'i phyir gang 'di lta bu'i sems kyi me la sbyin pa sbyin no zhe 'am/ me lce la sbyin pa sbyin no zhes 'am/ chu la sbyin pa sbyin no zhe 'am/ des bdag yongs su shes par bya ba'i phyir rgyal po la sbyin pa byin na sbyin pa de yongs su ma dag pa yin no/ /gang mi 'jigs pa'i phyir chom po la sogs pa sbyin pa byin te/ thun mong ma yin pa lnga byin na sbyin pa</font><hr>83.306b<br><font size=+1>

yongs su ma dag pa yin no/ /dug sbyin pa dang / mtshon cha sbyin pa dang / srog chags bsad de sha sbyin pa dang / bag med pa rnams la chang sbyin pa dang / 'di dag ni bdag gir 'gyur te bdag gi rim gro dang / mchod par 'gyur ro snyam nas sems can bsdu ba dang 'thob pa'i phyir bsdu ba'i sbyin pa dang / gang brjod pa dang / sgra dang / tshigs su bcad pa'i phyir sbyin pa sbyin pa dang / gang gar dang glu dang / bzhad gad dang / rtsed mo dang / gtam dang / dga' bar bya ba'i phyir rol mo mkhan rnams la sbyin pa byin na sbyin pa de yongs su ma dag pa yin no/ /gang bza'i mtshan ma'i phyir skar mkhan la sbyin pa gtong bar byed pa dang / gang gzhan gyi nor mdza' bo la sbyin pa dang / gang gi khyim 'am zhing la gzhan gyi 'bru'i phung po 'am/ nas dang gro'i phung po la ri dgas dang bya za ba la de de la dga' ba dang mgu ba skyed na de yang sbyin pa yongs su ma dag pa yin no/ /gang bzo'i phyir sbyin pa byin pa dang / gang yang lus mi bde bas 'jigs pa'i phyir sman pa la sbyin pa dang / gang yang slong ba rnams la spyos brgyad de tshig pa za bar byas nas sbyin pa byin na de yang yongs su ma dag pa yin no/ /gang yang sbyin pa byin pa 'di'i rnam par smin pa yod dam med ces the tshom za na de yang yongs su ma dag pa yin no/ /gang yang sbyin pa byin nas gdung ba dang 'gyod pas gdungs na de yang yongs su ma dag pa yin no/ /gang yang sbyin pa byin nas gang bdag las khyer ba thams cad kyis tshe phyi ma la slar sbyin par 'gyur ro/ /snyam du 'di lta bu'i sems bskyed na de yang yongs su ma dag pa yin no/ /gang bsod nams kyi rnam par smyin pa 'di ni bdag nyid kyis spyad kyi/ sems can gzhan gang la yang ma gyur cig snyam du de ltar sems bskyed na de yang yongs su ma dag pa yin no/ /gang lang tsho la bab pas sbyin pa byin pa dang / phyis dar phyid pa dang rga ba'i gnas dang / na pas gzir ba dang / 'chi ba'i dus kyi tshe dang / gnad du phog pa'i sdug bsngal ba dang / snang ba dang / 'chi ba'i mya ngan du gyur pa na sangs rgyas pa la dga' ba dang dad pa med par rtsa lag rnams kyis byed du bcug ste sbyin gnas rnams la sbyin pa byin na de yang yongs su</font><hr>83.307a<br><font size=+1>

ma dag pa yin no/ /gang yul gzhan na gnas na yang yul dang gnas che ge mo zhes bya ba na bdag sbyin bdag tu grags par 'gyur ro snyam ste grag pa'i rgyur sbyin pa byin na de yang yongs su ma dag pa yin no/ /gang yang kha zas gtong mi phod pa la 'jig rten pa mi dga' bar mthong nas sbyin phod pa'i nyes pa ni 'jig rten gyis bzod do snyam ste sbyin pa byin na de yang yongs su ma dag pa yin no/ /gang yang bud med snying du sdug ste chung mar blang bar bya ba'i don du bud med kyi gzhi las mdza' bshes dang gnyen mdab dang 'brel ba'i phyogs la nor bu dang / gser dang / dngul dang / rdo rje dang / bai dUr+ya dang / dar dang / byi ru dang / du ku la'i ras la sogs pas mgu bar byed na de yang yongs su ma dag pa yin no/ /gang yang 'di ltar bdag la nor ni mang du yod la bdag la bu med de/ bdag gis gang rigs pa la gtang bar bya'o snyam ste sbyin pa sbyin na de yang yongs su ma dag pa yin no/ /gang yang tshe 'di la byin pas 'jig rten pha rol tu rnyed par 'gyur ro snyam pa'i sems kyis sbyin pa byin na de yang yongs su dag pa yin no/ /gang me tog dang / 'bras bu dang / zang zing 'dod pas dbul ba dang / bkren pa dang / sdug phongs pa gos dengs shing dri ma can rnam bkol te bor la phyug pa rgya chen po thob pa dag la sbyin pa byin na de yang sbyin pa yongs su ma dag pa yin te/ drang srong chen po rnam pa sum bcu rtsa gnyis po de dag ni sbyin pa byin yang yongs su dag pa ma yin par blta'o/ /drang srong chen po de dag gi rnam par sbyin pa ni tshwa sgo can gyi zhing la sa bon ngan pa btab pa'i myu gu skye ba bzhin du blta ste/ sbyin pa de'i rnam par smin pa ni med pa ma yin mod kyi/ 'on kyang zhing dang sa bon gyi nyes pas me tog dang 'bras bur mi 'gyur ro/ /drang srong chen po 'di lta ste/ dper na skyes bu la la zhig gang 'dod pa'i sa bon khyer te ma rmos ma bsal ba'i zhing la btab na/ de'i sa bon sa la gnas pa de la char pa bab nas bangs na gdon mi za bar myu gu skye nus par 'gyur te/ 'on kyang me tog dang 'bras bur ni mi 'gyur ro/ /drang srong chen po de bzhin du sbyin pa de'i rnam par dbye ba de yang bsam pa dang sbyor ba kun nas nyon mongs pa can du</font><hr>83.307b<br><font size=+1>

gyur pas 'bras bu rnam par smin pa grung por mi 'gyur ro/ /de nas drang srong chen po rgyas pas thal mo sbyar te/ bcom ldan 'das la 'di skad ces gsol to/ /bcom ldan 'das kyis thams cad mkhyen pa dang 'thun pa'i rnam par smin pa skye dgu rnams la phan pa dang bde ba bgyid pa ni bstan lags so/ /bcom ldan 'das ji ltar tshul khrims 'chal ba dang / tshul khrims dang ldan pa la stsal na sbyin pa'i rnam par smin pa chab mi 'tshal ba lags/ bcom ldan 'das kyis bka' stsal pa/ drang srong chen po khyod sbyin pa'i rnam par smin pa la 'jug pa nyon cig /drang srong chen po dad pas gang cung zad ci byin pa de dag thams cad ni sbyin pa zhes bya'o/ /drang srong chen po gang yang 'jig rten pha rol gyis 'jigs par snod mi rtog par ma bslang par yang tshul khrims dang ldan pa 'am/ ngan pa'i tshul khrims 'chal ba la dad pa bskyed nas mig phye ste sems can thams cad la mnyam pa'i sems kyis sbyin pa byin na/ drang srong chen po de ni sbyin bdag yin no/ /drang srong chen po gzhan yang sbyin pa lnga yongs su rdzogs par bya'o/ /lnga gang zhe na/ 'dron po dang / nad pa dang / nad g.yog dang / chos smra ba dang / yul gzhan du 'gro ba la dus su sbyin pa ste lnga po de dag go /gzhan yang lnga ste/ chos sbyin pa dang / zang zing sbyin pa dang / gnas sbyin pa dang / mar me sbyin pa dang / spos dang phreng ba sbyin pa'o/ /drang srong chen po rgyas pas gsol pa/ bcom ldan 'das sbyin pa yongs su dag pa gang lags/ bcom ldan 'das kyis bka' stsal pa/ gang dad pa bskyed de sems can thams cad la dmigs shing byams pa dang ldan pa'i sems kyis gus par byas te dul bas sbyin pa byin pa de thams cad ni yongs su dag pa yin no/ /thar par bsngos te sbyin pa byin pa ni yongs su dag pa zhes bya'o/ /gzhan yang sbyin pa bla na med par blta ba lnga ste/ lnga gang zhe na de bzhin gshegs pa la sbyin pa byin pa ni bla na med pa yin no/ /dge 'dun la sbyin pa byin pa ni bla na med pa yin no/ /chos smra ba la sbyin pa byin pa ni bla na med pa yin no/ /nad pa la sbyin pa byin pa ni bla na med pa yin no/ /pha ma la sbyin pa byin pa ni bla na med pa yin no/ /</font><hr>83.308a<br><font size=+1>

gzhan yang sbyin pa chen por 'gyur ba ni rgyal po rgyal srid kyi dbang phyug las nyams pa la sbyin pa byin na sbyin pa chen po yin no/ /rgyal pos mnar ba dang / mgon med pa dang / nad pa la sbyin pa byin na sbyin pa chen po yin no/ /rgyal pos spangs nas gzhan na yang nyam nga zhing srog chad la khad pa 'chi la thug pa las gsos na sbyin pa chen po yin no/ /na pa la sman byin na sbyin pa chen po yin no/ /tshul khrims phun sum tshogs pa'i 'phags pa'i dge 'dun la dus su sbyin pa byin na 'bras bu chen po yin no/ /ting nge 'dzin la snyoms par zhugs pa dang / shes rab phun sum tshogs pa dang / rnam par grol ba phun sum tshogs pa dang / rnam par grol ba'i ye shes mthong ba phun sum tshogs pa la sbyin pa byin na sbyin pa chen po yin no/ /dud 'gro'i skye gnas su song ba bya rog dang / 'ug pa dang / ri dgas la sogs pa la mi 'jigs pa byin na sbyin pa chen po yin no/ /gang la gang dgos pa dang / mi bdog pa de'i bsam pa yongs su rdzogs par byed pa ni sbyin pa chen po yin te/ drang srong chen po de ltar na/ sbyin pa byin pa yongs su dag pa dang sbyin pa chen po yin no/ /sbyin pa yongs su dag pa 'di dag 'dod pas de ltar sbyin pa yongs su dag pa bsgom par bya'o/ /sems can gang dag gzhan dag gis de ltar bskul nas dad pa dang dang ba bskyed de sbyin pa yongs su dag pa 'di la rjes su yi rang bar 'gyur ba de dag mtshungs par bsod nams skyed pa po dang sbyin bdag tu 'gyur te/ de ltar na gang rjes su yi rang ba dang / gang skul ba de dag thams cad bsod nams skyed pa por mtshungs par 'gyur ro/ /drang srong chen po gang sangs rgyas bcom ldan 'das yongs su mya ngan las 'das pa na bsod nams kyi rnam par smin pa ji ltar 'gyur/ ji ltar sbyin pa'i bsod nams zad par 'gyur zhes khyod kyis smras pa/ </font><hr>83.308b<br><font size=+1>

drang srong chen po de'i phyir legs par rab tu nyon la yid la zung shig dang ngas bshad do/ /drang srong chen po gang la la zhig bcom ldan 'das yongs su mya ngan las 'das pa dang / da ltar bzhugs pa la mchod pa byed pa de'i rnam par smin pa ni mtshungs mnyam zhing 'dra'o zhes nga 'chad do/ /de ci'i phyir zhe na/ de bzhin gshegs pa rnams ni chos kyi skus rab tu phye ba yin gyi/ gzugs kyi skus rab tu phye ba ma yin pa'i phyir ro/ /gang la la zhig nga 'dug pa 'am/ yongs su mya ngan las 'das pa la mchod na sems mtshungs pa'i phyir 'di gnyis la bsod nams kyi khyad par cung zad kyang med do/ /drang srong chen po 'di lta ste dper na 'khor los sgyur ba'i rgyal pos ris su gtogs pa rnams la bsgo ba/ nga'i gang gis kyang deng phyin chad srog gcad pa dang / ma byin pa len pa dang / 'dod pas log par g.yem pa dang / brdzun gyi tshig 'byin pa dang / phra ma dang / ngag rtsub po dang / tshig kyal ba 'byin pa mi bya'o/ /brnab sems dang / gnod sems dang / log par lta ba'i sems bskyed par mi bya'o zhes bsgo la/ de la mi la las rgyal pos bsgo ba de thos nas bsgo ba rnams rjes su srung na rgyal po de'i lus la mchod pa byed pa ma yin mod kyi rgyal po ngas bsgo ba bzhin du de dag gis byas so snyam ste dga' bar 'gyur ro/ /de dag rgyal po des bstan cing bsgo ba rab tu srung zhing srog gcod pa la sogs pa kun tu srung ba de'i las kyi rnam par smin pas mtho ris kyi 'jig rten du skye ba yongs su 'dzin par 'gyur ro/ /gang dag rgyal po des bstan cing bsgo ba mi srung zhing mi dge ba'i las la sbyor ba de dag mi dge ba'i las byed pas tshe 'di la rgyal po de las sdug bsngal rjes su 'thob par 'gyur/ de 'di nas shi ba'i dus byas nas kyang / </font><hr>83.309a<br><font size=+1>

log par ltung bar 'gro bar 'gyur ro/ /drang srong chen po de bzhin du gang dag gis nga la gzugs kyi skur mthong la bslab pa rnams rjes su mi srung ba de dag gis ci 'thob par 'gyur zhe na/ de dag gis log par lta ba bskyed nas lha byin bzhin du sems can dmyal bar 'gro bar 'gyur ro/ /gang dag nga yongs su mya ngan las 'das pa na bslab pa rnams srung ba dang / mchod pa yang byed par 'gyur ba de dag ni ngas mchog dam par shes so/ /drang srong chen po da ltar nga mchog tu phyin te sems can thams cad las khyad par du 'phags shing thams cad mkhyen pa'i ye shes thob pas ma nges pa'i sems can rnams la ming bsgrags kyang bslab pa phun sum tshogs par bya'o/ /drang srong chen po gang la la zhig nga yongs su mya ngan las 'das te 'das pa'i 'og tu mchod pa byed pa de 'dug pa la mchod pa bzhin du 'gyur ro/ /drang srong chen po sems cad de dag bsod nams lhag par bya ba gang byed pa thams cad ni bsod nams chen po'i 'phen pa byang chub tu 'gyur ba byas pa yin no/ /drang srong chen po 'di lta ste dper na chu ngogs kyi 'dam bu stug po'i nang du me btang na char ba'i rgyun 'bab pa'i chus de zhi bar 'gyur ro/ /drang srong chen po de bzhin du sbyin bdag sbyin pa'i bsod nams kyi tshogs chen po sdud par 'gyur ro/ /sbyin pa'i tshogs de yang sbyin pa po de nyid kyi rgyud la dad pa'i char pa bab na sbyin pa po nyid kyi rgyud la sogs par 'gyur mod kyi/ sbyin pa byin pa de yang phung por gnas pa 'am/ spungs par gnas pa 'am/ phyogs na gnas par mi 'gyur ro/ /gang yang 'di ltar sbyin pa byin pa de ni sbyin pa po de la grib ma bzhin du rjes su 'brang bar 'gyur te/ des na sbyin pa po des bsod nams kyi rnam par smin pa de mthong yang bsod nams de khong du mi chud do/ /drang srong</font><hr>83.309b<br><font size=+1>

chen po 'di lta ste dper na rgun 'bru dang / bu ram shing ma btsir ba de la khu ba mi dmigs kyi btsir nas dmigs te/ rgun 'bru dang / bu ram shing de'i khu ba de yang phung por gnas pa 'am/ spungs par gnas pa 'am/ phyogs na gnas par mi snang ngo / /khu ba de ni rgun 'bru re re dang / bu ram shing gi dum bu re re'i nang du 'dus pa yang ma yin no/ /drang srong chen po de bzhin du sbyin pa de yang sbyin pa po'i lag pa'i rtse mo dang / snying dang bral na rnam par mi gnas te/ sbyin pa de rnam par smin pa mi 'byin pa yang ma yin la sbyin bdag 'dor ba yang ma yin no/ /ji ltar rgun 'bru dang / bu ram shing bor na khu ba de dmigs par mi 'gyur ba de bzhin du sbyin bdag med na sbyin pa'i rnam par smin par mi 'gyur te/ tshe'i 'du byed ma btang bar yang sbyin pa'i rnam par smin pa snang ba ma yin no/ /drang srong chen po 'di lta ste dper na shing n+ya gro d+ha sa bon kha ma 'bus par shing du snang bar mi 'gyur ro/ /de bzhin du sbyin pa 'phel ba las 'bras bu grung por 'gyu ro/ /drang srong chen po 'di lta ste dper na tshong pa la la zhig rdzas kyi tshogs nyung ngu zhig khyer te yul gzhan gyi grong khyer du song nas tshong 'dus khyad par can du rang gi rdzas nor chen por rgyas par bsgyur te/ de'i nor de nyung ngu las mang por gyur pa dang / sbrang rtsi'i sbrang mas me tog ma rung bar byas pa ltar sbyin bdag gi rnam par smin pa yang cher sogs par 'gyur ro/ /dper na sprin ni ma 'ongs pa'i char pa'i chu rab tu 'dzin to/ /de bzhin du sbyin bdag kyang rnam par smin pa 'phen par byed de/ drang srong po de ltar sbyin bdag bsod nams 'phen par byed cing sbyin pa sbyin no/ /de'i 'bras bu la yang spyod do/ /de bas na len pas sbyin pa shes par byed do/ /drang srong chen po bsod nams zhes bya ba ni 'jig rten pha rol tu rdzogs par byed pa 'am/ </font><hr>83.310a<br><font size=+1>

mthu rtsal thob pas srung ba ste/ de bas na bsod nams zhes bya'o/ /'jig rten pha rol nas gcig nas gcig tu lus dang longs spyod skyed par byed pa de'i phyir 'jig rten pha rol gyi zhes bya'o/ /de nas bcom ldan 'das la drang srong chen po rgyas pas 'di skad ces gsol to/ /bcom ldan 'das kyis bdag gi sbyin pa'i rnam par smin pa ni bka' stsal to/ /bcom ldan 'das rnam par shes pa lus su ji ltar 'jug /rnam par shes pa 'di ji ltar na lus la chags pa skyed/ bcom ldan 'das kyis bka' stsal pa/ drang srong chen po 'di lta ste/ dper na/ rgyal po grong khyer gyi dbus na 'dug na pha rol gyi dmag tshogs kyis 'jigs pas thog ma nyid du 'obs rko zhing rdzas dang / sman dang / 'phong gi slob dpon dang / skyes bu dpa' bo sdud par byed cing rgyal mtshan bsgrengs nas gzhon nu rnams la smra'o/ /glang po che dang bal glang mo chang gis ra ro bar byed do/ /ri dang nags na gnas pa thams cad dang / zhang blon la sogs pa thams cad sdud do/ /dmag mi rnams kyang nor gyis bsdus nas 'di skad du thams cad kyang 'thab 'dod par gyis te/ so so'i lag cha thogs la ral gri phyung ste nyin mtshan ma nyal bar 'dug shig ces bsgo nas pha rol gyi dmag rta dang / glang po che dang mir 'dres pa 'ongs pa dang / 'di ltar rgyal po des bdag gi dmag dbugs 'byin cing pha rol gyi dpung rang gi bsod nams zad pa dang / mthu rtsal zad pa dang / mtshon gyis rmas pa dang / pham par ma gyur gyi bar du 'khor la glags mi rnyed par srung bar byed do/ /drang srong chen po de bzhin du rnam par shes pa'i rgyal po lus kyi grong khyer du song nas skye mched kyi grong khyer la mi rtag pa'i ngo bor gnas par mthong nas de'i tshe dang ba'i 'obs rko bar byed/ brtson</font><hr>83.310b<br><font size=+1>

'grus la gnas te 'dug bzod pa'i go cha gyon/ brtsam pa chen po rtsom/ chos kyi glang po che rgyags par byed/ ye shes kyi rta la zhon zhing rgyug ste/ skye mched kyi grong khyer la 'di skad ces bag yod par ci bya ba dus su gyis shig /pha rol gyi dmag tshogs kyi dpung thub par dka' ba mi rtag pa'i dmag dpag tu med pa 'ong gis/ da myur du sbyin pa'i go cha gyon cig /ye shes kyi mtshon thogs shig /ngo tsha shes pa dang khrel yod pa'i rgyogs sbyor cig /tshul khrims dang / ting nge 'dzin dang / gtong ba'i srungs ma zhog shig ces skul lo/ /de dag kyang pha rol gyi dmag nye bar gnas pa de dang phan tshun mi mthun pas 'bros so/ /de dag dang mi mthun pas skye mched kyi grong khyer de zhig nas rnam par shes pa'i rgyal po de lus kyi grong khyer bor te de yul la phyogs nas 'bros so rnam par shes pa bros nas lus dang dbang po'i tshogs khams kyi sprul gyis gang bas skye mched drug zhig nas bdag po med pa yid brtan du mi rung ba'i lus kyi grong khyer 'jig par 'gyur ro/ /drang srong chen po de bzhin du rnam par shes pa'i rgyal pos lus kyi grong khyer bor nas lus gzhan yongs su 'dzin par byed de/ de ltar na rnam par shes pa 'di rgyal po ltar blta'o/ /de nas bcom ldan 'das la drang srong chen po rgyas pas 'di skad ces gsol to/ /bcom ldan 'das rnam par shes pas bsod nams su nye bar mchi ba 'am/ bsod nams ma lags par nye bar mchi ba 'am/ mi g.yo bar nye bar mchis pa'i lus ji ltar rab tu 'tshal/ rnam par shes pa 'di nyid kyis bdag gi lus 'di yongs su btang ngam ma btang snyam du ji ltar rab tu 'tshal/ bcom ldan 'das kyis bka' stsal pa/ drang srong chen po 'di lta ste/ dper na skyes bu rgya mtsho chen po rgal bar 'dod pas gzings chen po'i steng du 'dug nas chu'i nang du zhugs pa dang / rgya mtsho chen po'i</font><hr>83.311a<br><font size=+1>

chu rlabs brgyud mar 'byung bas dkrugs pa/ mtho dma' can/ kum b+hi ra ma rungs pa dang / 'dzin khri dang / chu srin byis pa gsod dang / sbrul yod pa'i chu de'i tshu rol gyi 'gram nas rlung gis phul nas 'bad mi dgos shing gnod pa med la bde bar gnas te pha rol gyi 'gram du phyin par gyur ro/ /chu bo'i rlung rab tu 'jigs pa de las thar pas gzings de la dga' ba bskyed nas gzings 'dis bdag mtsho chen po 'di las rgal to snyam bsams nas gzings de la lan gsum bskor ba byas te gzings de la rab tu mchod pa byas so/ /drang srong chen po de bzhin du gang bsod nams byas pa'i sems can 'di nas shi 'phos pa de'i rnam par shes pa de 'di snyam du sems te/ lus 'dis bdag bde 'gro lha dang mir skye ba yongs su bzung ba dang ldan pas bdag don yod par mi'i lus thob par gyur te/ lus 'dis bdag ngan song du 'gro ba'i rgya mtsho las rgal te/ 'dis lhar skye ba'i gnas yongs su bzung ngo zhes 'di ltar lus de la dga' ba bskyed nas bdag gis 'di la mchod pa legs par bya'o snyam mo/ /phyis lus de gzings bzhin du bor nas 'jig rten pha rol tu 'gro'o/ /gang rang gi lus kyis bsod nams ma byas pa de'i rnam par shes pa de ni ji ltar skyes bu gzings rul bas mtsho chen po'i nang du 'bying zhing zhig ste ma rung par gyur nas skyes bu de yang nyam thag ste/ gzings zhig pa des 'jigs bzhin du 'gram du phyin nas kyang seng ge dang stag yod pa'i 'jigs sar phyin par gyur nas de 'di skad ces zer ro/ /gzings rul bas nyon mongs kyi steng du log par song nas mtsho chen po chu'i rlabs kyis dkrugs pa sbrul gyi sa glongs par zhugs so zhes gzings de la de skad smra'o/ /de bzhin du rnam par shes pa 'di bsod nams ma yin pa byas pa'i lus la brten nas ngan song gi sar song nas lus de</font><hr>83.311b<br><font size=+1>

la 'di skad zer ro/ /sdig pa'i lus 'dis ci zhig rnyed na sdig pa can gyi lus mngon par grub nas bdag khur lta bus non par gyur/ bdag lus rul pa 'di'i rgyus ngan song du mngon par phyogs shing zhugs te/ mchil pas nya zin pa bzhin no snyam mo/ /de ltar rnam par shes pa de legs par byas pa'i bsod nams kyis gzings bzang po bzhin du 'khor ba las rgal bar byed do/ /bsod nams ma yin pas ni log par ltung bar byed do/ /de ltar na rnam par shes pas bsod nams su nye bar 'gro ba dang / bsod nams ma yin par nye bar 'gro ba'i lus rnam pa 'di gnyis rab tu shes so/ /yang rnam par shes pas lus 'di yongs su btang nas gzhan lus gnyis par 'gro zhing nye bar 'gro'o/ /de mngal na gnas pa'i tshe zhag bdun gyi bar du rnam par shes pas bdag 'di nas shi 'phos nas 'dir 'ongs so/ /las 'di byas so/ /bdag gis las 'di byas so zhes de dran nas de legs par byas pa'i las kyis dga' bzhin du 'gro'o/ /de rum na gnas pa na de'i ma la mtshan ma gsum 'byung ngo / /gsum gang zhe na/ bzhin 'dzum zhing de'i bzhin rnyi rnyi po ma yin pa dang / bzhin lha'i kha dog lta bur 'gyur zhing rkang pa g.yas pa la rab tu gnon la sku g.yas pa la lan du mar nyug pa dang / de gos dkar po dang rab tu mdzes pa ste/ bsod nams su nye bar 'gro ba'i rnam par shes pa ma'i mngal na gnas pa'i tshe ma'i gzugs de lta bur blta'o/ /drang srong chen po gang bsod nams ma yin pa'i rnam par shes pas skyes par gyur pa de zhag bdun gyi bar du bdag de nas shi 'phos nas 'dir skyes so/ /sdig pa'i las ni 'di byas so zhes de lta bu dran par 'gyur ro/ /de de lta bu dran nas yid mi bde ba skye'o/ /yid bde ba skyes pa de'i ma la ltas mang du 'byung bar blta ste/ lus dri mi zhim par 'gyur ba dang / lus rid par 'gyur ba dang / lus la</font><hr>83.312a<br><font size=+1>

sems pas khyab par 'gyur ba dang / yang dang yang du bzhin khro gnyer sdud par 'gyur ba dang / gang tshun chad sems can de mngal du skyes par gyur pa de tshun chad khyim der nyon mongs pa dang / gnod pa dang / nad mang por 'gyur ro/ /sems can de btsas pa'i tshe yang na ni ma 'chi ba'i dus byed pa dang ldan par 'gyur/ yang na ni bdag nyid mngal na gnas pa'i tshe ma rung bar 'gyur te/ drang srong chen po de lta bu ni bsod nams ma yin pas nye bar 'gro ba'i sems can du can du blta'o/ /de nas bcom ldan 'das la drang srong chen po rgyas pas 'di skad ces gsol to/ /bcom ldan 'das 'di la rnam par shes pa de thog ma mngal du skyes pa'i tshe ci dran/ ci rnam par shes par 'gyur/ bcom ldan 'das kyis bka' stsal pa/ drang srong chen po 'di la rnam par shes pa thog ma skyes pa'i tshe 'di lta bu dran par 'gyur te/ kun dga' ra ba dang / bskyed mos tshal dang / nags tshal dang / rdzing dang lu ma dang / gser gyi gzhal med khang mthong zhing 'dzam bu'i gling 'dir skye bo mdza' ba 'du bas gang ba dang / mchog tu yid du 'ong ba'i bsod nams byed pa'i sems can gyis gang bar mthong ngo / /lha'i shes pa'i snang bas tshe rabs brgya stong du ma rjes su dran no/ /rjes su dran zhing rjes su dran nas kyang dga' ba skyed de/ 'di ni skye ba lnga brgyar bdag gi mar gyur to zhes de ltar rab tu shes te/ de ltar rjes su dran nas ma de la chags par mi byed cing 'dod chags dang bral ba skyed de/ kye ma'o 'di ltar yang skye ba dang 'byung ba ni sdug bsngal te 'khor bas ni chog go /yongs su 'dzin pa 'dis kyang chog go snyam mo/ /de skad ces bka' stsal pa dang / drang srong chen po rgyas pas bcom ldan 'das la 'di skad ces gsol to/ /bcom ldan 'das sems can de mi chags na 'khor ba las</font><hr>83.312b<br><font size=+1>

'byung bar 'gyur ram/ bcom ldan 'das kyis bka' stsal pa/ drang srong chen po thams cad de lta bu ni ma yin te/ rnam par shes pa de ni gzugs med pa/ bstan tu med pa/ snang ba med pa'o/ /rnam par shes pa'i khams chags pa med par ma gyur par 'khor bar mi skye ba de lta bu'i gnas med do/ /bsod nams su nye bar 'gro ba dang / mi g.yo bar nye bar 'gro ba dang / mya ngan las 'da' bar nye bar 'gro ba thams cad ni de ltar 'gyur ro/ /drang srong chen po de dag ni 'di ltar blta ste/ rnam par shes pa gang de ltar sems pa de ni rnam par shes pa'i shas che bar lta ste/ lus kyi shas che bas ni mi nus so/ /rnam par shes pa ni tshor bar byed pa/ rnam par shes pa ni sems par byed pa ste/ de'i phyir rnam par shes pa zhes bya'o/ /drang srong chen po khyod kyis rnam par shes pa de de ltar khong du chud par bya'o/ /de nas de'i tshe bcom ldan 'das kyis tshigs su bcad pa 'di dag bka' stsal to/ /dgra rnams thams cad shin tu bsrung / /nyon mongs sogs par byed pa'o/ /shes dang mi shes shes pa po/ /shes rab dang ni gti mug ldan/ /lta dang nga rgyal ma rig pa dang / /rnam par shes pa kun la yod/ /rnam par shes pa med par ni/ /gang yang 'byung bar mi 'gyur ro/ /rnam par shes pa med par ni/ /de dag 'du bar mi 'gyur te/ /gcig char gyur na 'du bar 'gyur/ /gcig min 'khor lo shing rta bzhin/ /skyes bu mnyam du 'du ba ni/ /nyid dang gzhan dang gnyis gas min/ /gcig gis ma yin gzhan gyis min/ /glang gnyis ji lta bzhin du'o/ /shing rta sna sgyur gnyis dang ni/ /'khor lo gnyis su ldan pa dang / /thag pa dag gis bcings byas pa/ /shing rta zhes ni yongs su grags/ /de ltar lus kyi shing rta yang / /khams kyi 'du 'phrod rnams las 'byung / /de las dbang po ldan gyur te/ /</font><hr>83.313a<br><font size=+1>

rnam par shes pas rab tu bstan/ /gnad dang mtshams su sbyor ba dang / /de ltar rtsa dang 'dzing chu dang / /skra dang rus pa so dang mgo /sen mo lpags pas mdog byas dang / /rgyu ma glo ba mkhal ma dang / /snying dang mtsher ba tshil bu dag /thams cad mnyam du 'dus pa las/ /lus ni shin du gnas pa yin/ /de la khams ni lus chen te/ /sems las dngos po kun 'byung bas/ /de phyir rnam par shes kyir 'dod/ /de ni kha lo sgyur bar 'dod/ /drang srong chen po gzhan yang rnam par shes pa 'di ni phra ba/ gzugs med pa/ bstan du med pa/ mi mngon pa ste/ de ni kha dog dang / dbyibs dang / gzugs kyi dbang po ma yin no/ /dbang po rags pa bor ba'i phyi na rnam par shes par blta ba gzhan med de/ mi'i snying 'phar ba dang / 'jigs pa gang las byung ba dang / rnam par rtog pa dang / rnam par dpyod pa gang yin pa de thams cad ni rnam par shes pa'i shas che ba yin gyi/ lus kyi shas che ba ma yin no/ /de nas bcom ldan 'das la drang srong chen po rgyas pas 'di skad ces gsol to/ /bcom ldan 'das sems can rnams kyi sngon gyi rang bzhin ji ltar blta bar bgyi/ sems can dmyal bar nye bar mchi ba dang / yi dgas su nye bar mchi ba dang / dud 'gro'i skye gnas su nye bar mchi ba'i rang bzhin ji ltar blta bar bgyi/ ji ltar lhar nye bar mchi ba dang / ji ltar mir nye bar mchi ba dang / dge ba'i rtsa ba rnams dang / mi dge ba'i rtsa ba rnams gang lags par blta bar bgyi/ dge ba'i rtsa ba gang dag gis lha dang mir skye bar 'gyur/ mi dge ba'i rtsa ba gang dag gis sems can dmyal ba dang / dud 'gro dang / yi dgas su skye bar 'gyur ba 'di dag bcom ldan 'das kyis lung bstan du gsol/ bcom ldan 'das kyis bka' stsal pa/ drang srong chen po khyod sems</font><hr>83.313b<br><font size=+1>

can rnams kyi rang bzhin dang / dge ba'i rtsa ba rnams dang / 'chi 'pho dang skye ba nyon cig /yang thams cad mkhyen pa'i yul 'di ni mngon par shes pa lnga'i yul ma yin no/ /'di ni lha rnams dang / tshangs pa la sogs pa 'og min la thug pa rnams kyi ma yin te/ 'di ni nyan thos rnams kyi skabs kyang ma yin na sems can gzhan rnams kyi lta ga la yin/ drang srong chen po gang dri ma gsum spangs pa/ chos nyid dang po thob pa/ nga'i bstan pa la rgyun du zhugs pa'i rnam par shes pa'i yul ni 'di yin te/ de lha dang drang srong thams cad kyi ni ma yin no/ /de skad ces bka' stsal pa dang / drang srong chen po rgyas pas bcom ldan 'das la 'di skad ces gsol to/ /bcom ldan 'das bdag ni nga rgas 'khogs gtugs pas 'bras bu rnams la brtsal ba'i rngo mi thog go /bdag da khur chen po bskur ba'i rngo mi thog go /bdag da bcom ldan 'das dang / chos dang / tha ba thams cad spangs pa'i 'phags pa'i dge 'dun la skyabs su mchi'o/ /bdag dang slan chad slob ma dang bcas/ g.yog dang bcas te gsum la skyabs su mchi'o/ /bcom ldan 'das lha'i 'jig rten nas shi 'phos nas 'gro ba gang du 'gyur ba da bshad du gsol/ bcom ldan 'das kyis bka' stsal pa/ drang srong chen po de'i phyir legs par rab tu nyon la yid la zung shig dang / lha'i 'jig rten du skye ba'i rang bzhin gang yin pa dang / ltas gang yin pa ngas bshad do/ /drang srong chen po 'di la me tog dang / spos dang / phreng ba sbyin pa dang / bsten pa dang / bsgoms pa dang / mang du byas pa dang / dad pa dang ldan pa'i skyes bu ni 'chi ba'i dus byas na phreng thogs kyi lha'i nang du skye'o/ /drang srong chen po de 'chi ba'i dus kyi tshe de'i lus dri rab tu zhim pa'i spos kyis bsgos pa'i me tog bzhin du snang ngo / /drang srong chen po de la me tog gi char mang po rab tu bab nas 'chi</font><hr>83.314a<br><font size=+1>

ba'i dus byed par 'gyur/ de'i lus la me tog kha dog sna tshogs rab tu 'thor bar 'gyur ro/ /de'i rtsa lag snying du sdug pa gang yin pa de dag kyang me tog thogs shing mya ngan byed par 'gyur/ de'i bzhin gyi mdog snum par 'gyur/ de'i mig ha cang btsums pa yang ma yin/ ha cang phye ba yang ma yin par 'gyur/ rkang lag legs par snyad nas 'chi ba'i dus byed par 'gyur te/ de 'chi ba'i dus kyi tshe 'di lta bu'i rtags 'di dag 'byung / 'di lta bu'i ltas kyang mthong bar 'gyur te/ khang pa brtsegs pa me tog sna tshogs rab tu sbyangs pa/ me tog tha dad pas mdzes par byas pa/ bud med brgya stong gis bskor ba mthong nas rtsa lag rnams la 'di skad smra ste/ bdag gis rmi lam na khang pa brtsegs pa lha'i me tog rnam pa sna tshogs dang / me tog gi lda ldi sbyangs pa/ lha'i me tog bkram pa/ bud med brgya stong gis bskor ba de lta bu mthong ngo zhes bdag gis rtsa lag de dag la smras nas/ de dag gis kyang phreng thogs kyi lha'i nang du skye bar rig go /de 'chi ba'i dus byas nas phreng thogs kyi lha'i nang du skye ba na pha dang ma 'dus pa mthong nas skye ba yongs su 'dzin to/ /phreng ba thogs pa de dag kyang gnyis kyi dbang po gnyis sprod par 'gyur te/ 'di lta ste dper na 'dzam bu'i gling pa'i mi bzhin no/ /de la de dag gi rnam par shes pa phan tshun 'dres shing dga' ba tsam gyis non pas 'jug par 'gyur gyi de dag khu ba 'byung ba ni ma yin no/ /drang srong chen po lha de dag ni lha mos mngal na zhag bdun du 'dzin to/ /zhag bdun 'das nas dku g.yas pa nas 'byung ngo / /drang srong chen po de de'i mngal nas byung nas lha'i me tog dri rab tu zhim pa mchog tu yid du 'ong ba sna tshogs pa brgyus pa'i phreng ba brang las 'byung bar 'gyur ro/ /drang srong chen po de'i phreng ba dri rab tu zhim pa'i dang rlung gis bdas nas phyogs kun du</font><hr>83.314b<br><font size=+1>

dpag tshad tsam du 'gro'o/ /phreng ba de la kha dog bdun yod pa 'di lta ste/ dkar po dang / dmar po dang / ser po dang / sngon po dang / bai dUr+ya dang rma dang pad ma rA ga las lhag pa ste/ blta na sdug pa sna tshogs kyi phreng ba de dag de ma shi bar du ma rnyis par thogs par 'gyur te/ de'i phyir de phreng thogs zhes bya'o/ /drang srong chen po phreng thogs kyi lha de dag gi gnas de na shing ljon pa ha cang yang mi ring / ha cang yang mi thung ba 'bras bu sna tshogs ha cang yang mi skyur/ ha cang yang mi mngar la bdud rtsi dang 'dra ba'i ro bro ba mang po bzang po lha'i ro bro ba yan lag brgyad dang ldan pa dag yod do/ /drang srong chen po shing de dag gi 'bras bu de dag gi tshad ni shing tog bil ba tsam mo/ /de dag gi nang nas lha rnams gang dang gang za bar 'dod pa'i zas de dang de de dag la nye bar gnas te/ lha de dag ni 'bras bu za bar lta'i/ kham gyis za ba'i zas can ni ma yin no/ /drang srong chen po lha de dag gi sa phyogs ni rab tu rno ba'i tsher ma'i bag med pa/ me tog gis mdzes par byas pa ni'u gsing gis khebs pa/ gser dang dngul gyi phreng ba sna tshogs kyis mdzes par byas pa/ yid tsam ser ba lta bur snang ba'o/ /drang srong chen po gnas de na phreng ba thogs pa'i lha de dag lha'i bu mo lha'i bu mchog tu 'bar ba'i gos dang rgyan can/ skar khung dang / kha khyer dang / bu shu'i ngos la rgyu ba/ bde ba dang yid bde ba mchog dang ldan pa dag dang gnas so/ /de na de dag gi tshe'i tshad ni lo nyis stong thub bo/ /de na tshe zad pa'i ltas 'byung ba ni shing gang gi drung na 'dug 'dug pa'i shing de/ lo ma rnyis/ yal ga 'phyang / me tog dang dri yang med par 'gyur te/ sems can de yang shing drung de na mi dga' ba rnyed par 'gyur/ de'i phreng ba sngon ma rnyis pa de yang rnyis par 'gyur/ lha'i 'jig rten gyi rlung bsil zhing bde bar ldang ba de yang dro bar 'gyur ba ste/ de'i gnas de dag mthong nas</font><hr>83.315a<br><font size=+1>

lha'i bu mo de dag nga ro gcig tu snying rje rje skad smre sngags 'don te/ sems can de yang mtho ris kyi grong khyer lha'i shing dang / me tog dang / 'bras bus mdzes par byas pa dang / lha'i bu mo'i tshogs dang 'dre ba yongs su btang nas bsod nams zad par 'gyur ba 'di ni mtho ris kyi nyes pa'o/ /drang srong chen po de nas lha'i bu mo de dag gis de'i mtha' skor nas nyam thag pa chen po'i sgrar du ste/ kyi hud mi rtag pa 'di ni snying rje med pa'o/ /'di ltar snying la dga' ba skyes shing 'khod 'khod pa las mi 'dod bzhin du dbang med par mtho ris nas ltung ngam/ e ma'o lha gzhon nu nga myur du mi'i 'jig rten du mir skye bar gyur cig /ces mya ngan byed pa na rims drag pos btab nas de rims drag pos non te/ de'i lus gcig tu 'bar bar 'gyur ro/ /lus 'bar bas gnas de nas 'chi 'pho bar 'gyur te/ de'i 'bar ba de khar zhi bar 'gyur ro/ /de nas shi 'phos nas pha dang ma 'dus pa mthong bas skye ba yongs su 'dzin to/ /drang srong chen po phreng thogs su nye bar 'gro ba'i lha'i bu de 'di ltar skye bar blta ste/ ma'i mngal na gnas pa'i tshe ltas 'byung ba ni mngal na gnas pa na me tog pa dang / spos dang / phreng ba 'dod pa dang / 'bras bu sna tshogs 'dod pa dang / nags tshal sna tshogs stug po nyams dga' ba 'dod par 'gyur/ bde ba thams cad dang ldan par 'gyur/ lus la na pa med par mngal na 'dzin par 'gyur/ rmi lam na bsod nams sna tshogs kyi tshong 'dus me tog gi phreng ba sbyangs pa'i grong khyer mthong ste/ 'di dag ni de'i mas ltas mthong ba'o/ /drang srong chen po gzhan yang lha gzhon nu de bcas nas phreng ba thogs pa'i lha las shi 'phos pas shin du dga' ba chen po skye'o/ /gos dkar po la dga' bar 'gyur/ mdzes pa dang ldan par 'gyur/ shes pa dang</font><hr>83.315b<br><font size=+1>

ldan par 'gyur/ 'dod pa la rab tu chags shing 'gro ba dang / rgyu ba 'phyar bag can dang / dus ston dang / ltad mo dang / phra ba'i gos la mngon par dga' bar 'gyur/ kun dga'i ra ba la dga' ba dang / pha rol 'byor pa mthong na 'dod pa ste/ drang srong chen po 'di dag ni phreng thogs kyi lha las mir skye ba'i ltas su blta ba dag go/ // bam mo gnyis pa ste tha ma drang srong chen po gzhan yang rgyal chen bzhi'i ris kyi lhar skye ba'i ltas dang / 'chi 'pho'i ltas su lta ba ni drang srong chen po 'di la dman pa 'am/ mgon med pa la zas bzang po dang / na pa'i gsos sman dang / kun 'thung ba'i chu grang mo dang / chu mig dang / 'tshe'u dang / lteng ka dang / lu ma dang / rdzing bu dang / khron chu byin nas/ dad pa dang / yid rab tu dga' zhing 'chi ba'i dus kyi tshe nyon mongs pa'i 'bar ba med pa'i lus su 'gyur/ de'i lus ring par mi 'gyur/ mdog ngan par mi 'gyur rdul dang dri ma chags par mi 'gyur/ de'i lus la nyam nga ba'i tshor ba mi 'byung / skad dman pa dang / rtsa lag dang bral zhing gdung ba dang ldan par mi 'gyur/ de bkres pa dang / skom pas nyen par mi 'gyur/ de'i lus bskum pa dang / snyang ba la sogs pas sdug bsngal bar mi 'gyur/ bshang gci 'byung bar mi 'gyur/ yul las yongs su nyams pas sgyid lug par mi 'gyur/ de'i dbang po zhum par mi 'gyur ba ste/ de lta bu de ni mtho ris kyi bde ba dang ldan zhing 'chi ba'i dus byed par 'gyur ro/ /de'i lus yongs su btang nas rnam par shes pa de rab tu dga' bar rgyal chen bzhi'i ris kyi lha'i nang du bskyed mos tshal dang / nags tshal stug po'i nang du gnas par 'gyur ro/ /de 'chi khar lha'i ris de mthong nas bzhin me tog pad ma lta bur 'gyur/ de'i kha nas dri zhim po 'byung bar 'gyur de la</font><hr>83.316a<br><font size=+1>

me tog sna tshogs dri dang ldan pa'i rlung rjes su 'thun pa ldang bar 'gyur/ de shi nas kyang rgyal chen bzhi'i ris kyi lha'i nang na pha ma 'dus nas bskyed mos tshal na rtse zhing 'dod pa myong pas rgyags dregs nas lag pa g.yas pas lha mo'i lte ba la reg par mthong nas/ de'i rkyen gyis rnam par shes pa lha mo de'i pang par skye ba yongs su 'dzin to/ /de zhag bdun 'das nas dri ma med pa'i rna cha 'gul ba'i mgo dang ldan pa'i gzhon nur mngon par 'grub ste/ gong pa dang / gar byed pa dang / glu len pa dang / 'dod pa'i longs spyod skyed nus so/ /drang srong chen po de la rgyal chen bzhi'i lha'i ris kyi sa phyogs ni dngul dang ldong ros rnam par bkra ba sna tshogs kyis spras shing mdzes par byas pa/ lha mo brgya stong gis legs par brgyan pa/ lha'i gnas mtho ba/ rang bzhin gyis mdzes pa/ reg na bde ba'i rlung ldang ba'o/ /drang srong chen po rgyal chen bzhi'i ris kyi lha de dag gi bskyed mos tshal ni dpag tshad brgyad khri bzhi stong gru bzhi ltam pa/ nor bu'i sgron mas snang bar byas pa/ shing gi yal ga dang rtse mo la dpag bsam kyi shing gi ras bcos bu dang / rgya dar la'i lda ldi spyangs pa/ nags tshal gyi bar 'jam zhing yid du 'ong pa/ khyim gyi bar na rtag tu pi bang dang / gling bu dang / rdza rnga dang / khar rnga'i sgra 'byung ba'o/ /drang srong chen po lha'i gnas na gnas pa de dag zas kham gyi za ba can te/ dri rab tu zhim pa'i dri dang / kha dog dang / ro dang / reg pa dang / yon tan phun sum tshogs par reg par bya'o/ /de dag re re la yang gser gzhong gnyis gnyis yod de de na gang zas gang 'dod pa de ni de'i phun sum tshogs par gzhong pa de las 'grub par 'gyur ro/ /lha'i me tog gi khu ba ro dang ldan pa mngon par 'grub ste/ de ni me tog gi chang zhes bya'o/ /drang srong chen po</font><hr>83.316b<br><font size=+1>

chang de ni dri rab tu zhim pa/ mchog tu bde ba bsil ba/ dris kyang ra ro ba mngon par 'grub na 'thungs pas lta ci smos te/ de na lha gzhon nu ra ro bar 'gyur ro/ /drang srong chen po rgyal chen bzhi'i ris kyi lha de dag gi gzhal med khang ni mdzes byed ces bya ste/ rtag tu me tog rgyas pa 'khri shing gis mdzes par byas pa/ gser dang / dngul dang / rdo rje 'bar ba'i ka ba brgya stong gis phyogs phyogs shin du brtan pa/ lha'i mal cha dang / gding ba bting bas sa phyogs shin du rnam par phye ba/ lha mo bzor byas pa sna tshogs kyis brgyan pa'i khyad par dang ldan pa/ steg cing 'jo ba'i rjes su chags pa/ lha'i gos 'bar zhing rnam par mdzes pas spung spung pa/ ka la ping ka dang / bung ba'i tshogs kyi sgra lta bu dang ldan pa/ gzugs rab tu che zhing shin du gzhon sha chags pa/ glu dang / gar dang / sil snyan dang / 'dzum zhing rtse bas rgyags pa'i shas che la rab tu sgeg pa sha stag gis bskor cing gang ba ste/ gnas de'i ka ba ni gser chu dang / dngul chus rnam par bris pa/ dar gyi rgyal mtshan sbyangs pa/ rgyal mtshan dang ba dan bsgreng ba'o/ /gzhal med khang de dag na 'di lta ste/ yul 'khor srung dang / /'phags skyes po dang / mig mi bzang dang / lus ngan po dang rgyal po chen po bzhi po de dag lha'i 'dod pa dang / bde ba dang / rtse ba myong zhing rab tu dga' ste/ dga' ba dang bde ba dang ldan la/ glu dang / gar dang / sil snyan dang / lha'i kha zas za bas dbang po tshim zhing bde ba thams cad dang ldan par gnas so/ /drang srong chen po rgyal chen bzhi'i ris kyi lha'i ris de na lha gzhon nu de dag lag pa ring zhing sha rgyas pa/ glang po rgyags pa'i tshul du 'gro ba/ skyes bu stong gi stobs dang rtsal yod pa/ lha'i lus shin du 'jam pa sha stag go /de dag gi dri chang gi shas che bas dpag tshad khor</font><hr>83.317a<br><font size=+1>

yug chang drir phyogs par byed do/ /lha de dag gi tshe'i tshad ni lo bzhi stong thub ste/ bar ma dor 'chi ba'i dus mi byed de/ de dag thams cad bde ba dang / yid bde ba dang / dga' bar gnas so/ /lha'i ris de na skal pa bzang po can gser dri ma med pa'i 'od kyis brgyan pa dag nags kyi phreng bas mdzes par brgyan pa/ dga' ba skyed pa la sogs pa'i bskyed mos tshal bzang po dri nga ba med pa rnams ni snying dga' ba dang ldan par gnas so/ /de dag de na gnas pa na me tog sil ma bkram zhing nor bu dang gser gyis mdzes par byas pa/ shin du rnam par phye ba/ gru bzhi pa/ nor bu'i them skas kyis brgyan pa/ lha'i bu mo brgya stong glu snyan pa len pa/ nor bu'i snod rnams bdag nyid sgra 'byin pa'i rjes su chags pa na de dag gnas gnas pa las de dag bsod nams zad pas tshe zad par 'gyur ba'i ltas gnyis 'byung ste/ de thog mar grib ma mi snang bar 'gyur zhing me tog las dri mi 'byung ba dang / lha'i bu mo dang kun smra ba'i sgra snyan pa mi thos pa'o/ /yang lha gzhon nu de lha yul ba'i lha'i gnas rnams su 'du zhing mi 'gro ste/ lha'i gnas lha'i bu mo brgya stong gis gang ba/ yal ga'i rtse mo la do shal dang / se mo do dang me tog gi phreng ba spyangs pa/ nags tshal gyi bar gyi bya khu byug rgyags pa'i sgra 'byin pa de dag na lha'i bu mo'i tshogs ngu zhing gos dri ma can gyon nas sa'i steng na 'gre ldog cing snying rje rje ltar lta ste/ sa'i steng na 'gre ldog pas me tog gi bla res brgyan pa'i sa phyogs dag na yang dga' ba mi rnyed de/ de dag gi lus las rdul 'byung zhing de dag mig mi 'dzums pa las mig 'dzum par 'gyur te/ nya chu'i gnas nas byung nas nyi ma'i 'od zer gyis gdungs pa bzhin du phan tshun du 'gre ldog cing gcig pu sa la gnas par mthong nas lha'i bu mo de dag gis bskor te/ </font><hr>83.317b<br><font size=+1>

snying rje rje ltar lta zhing skad 'thun par ngu ste/ 'di skad ces kyi hud re sdug /kyi hud re sdug /kyi hud gzhon nu'i mchog de phyogs gang du song / lus che la rgyan sna tshogs kyis brgyan pa/ 'gram pa che la mdzes pa brang shin du rgyas pa/ bskyed mos tshal sna tshogs kyi bar na rgyu ba des bdag cag bor zhing lha yul ba'i lha'i gnas yid du 'ong ba yang bor te dgar 'gro zhes 'dzer to/ /de nas lha'i bu mo de dag gis tshigs su bcad pa 'di dag smras so/ /rnam pa sna tshogs legs par bkod/ /lha yi nags kyis shin tu brgyan/ /zas dang dus ston gang gyur pa/ /rgyal po chen pos gnas byas pa/ /ka ba bzhi dang rab ldan pa/ /bsod nams kyi ni tshong 'dus mchog /lha yi bud med gang bas dga'/ /me tog 'byor pa yid 'phrog pa/ /bor nas mi rtag pa 'di yis/ /sdug pa dag ni zin te song / de ltar lha'i bu bu mo de dag gis bskor te/ mchi ma zag skad 'gags shing thag ring po nyid nas lag pa g.yas pa brkyang ste me tog gtor nas 'di skad ces kye ma'o sdug pa/ legs par byed pa'i 'jig rten mi'i 'jig rten du song ste/ dad pa'i gshol gyis bsod nams kyi zhing rmed par gyur cig ces 'dzer to/ /de ltar sems pas kun du khyab pa'i lus yongs su btang bar bdag gis rig nas de rims drag po bzad pas btab bo/ /rims drag po des lus bshig nas de'i lus mar gyi thigs pa rdo tshan la thim pa bzhin no/ /de'i lus yongs su rnyis nas 'drud pa zhes bya ba'i rlung gis rab tu bdas te/ rlung des de'i lus stong du gtor nas phye ma zhib mo bzhin du nam mkha'i dkyil nas lhung ngo / /de ltar lhung nas mi'i srid par skye ba yongs su len te/ pha ma 'dus pa mthong nas rab tu dga' ba'i yid kyis ma'i mngal du skye'o/ /de thog mar skyes shing ma'i mngal</font><hr>83.318a<br><font size=+1>

na gnas pa na mtshan ma 'byung ba ni de'i ma de kha zas la rab tu dga' bar 'gyur/ gos dmar po 'tsher ba la mngon par dga' bar 'gyur/ skye bo sna tshogs phal po che la lta 'dod cing rtsa lag dang mdza' ba tsam du 'du shes skyed par 'gyur/ de de'i mngal du zhugs nas mngal na tshor ba skye bar mi 'gyur/ kha chu zag pa dang / chu ser 'byung bar mi 'gyur/ de'i lus na par mi 'gyur/ de de'i mngal na lag pa dang / rkang pa dang / mgo shin du yongs su rdzogs par grub nas/ de btsas pa dang gzi brjid dang ldan zhing mthong na dga' ba rab tu 'phel bar 'gyur/ rgyal chen bzhi'i ris kyi lha'i gtam thos na dga' ba skye bar 'gyur/ sbyin pa la dga' ba dang / chang la sred pa dang / shin du dri zhim pa'i cha byada'adzin cing bskyed mos tshal la dga' bar 'gyur/ bud med la dbang po mngon par rab tu chags par 'gyur/ yang dang yang zas 'dod par 'gyur/ glu dang / gar dang / sil snyan gyi rjes su 'jug par 'gyur/ mdog snum zhing sngo sangs por 'gyur/ mig lha'i bai dUr+ya sngon po ltar 'gyur ro/ /drang srong chen po 'di dag ni lus dang sems kyi rgyud kyi bag chags kyis bsgos pas rgyal chen bzhi'i ris nas shi 'pho ba'i ltas su blta'o/ /drang srong chen po gang la la srog gcod pa spangs nas dad cing dang bas sbyin pa sbyin zhing / ma byin par len pa dang / bza' ba dang / bca' ba dang / bldag pa dang / gzhib pa dang / yo byad kyi khyad par spangs nas nor bu dang / gser dang / dngul dang / rdo rje dang / bai dUr+ya la sogs pa rdzas thams cad rab tu sbyin pa la bsten pa dang / bsgoms pa dang / mang du byas nas dad pa dang / rab tu dga' ba'i yid kyis me tog gi lda ldi 'bul ba dang / mchod rten</font><hr>83.318b<br><font size=+1>

la mngon par phyag 'tshal ba la sogs pa'i rnam par smin pas tshe yongs su zad pa'i dus na lus la nyon mongs pa chung bar 'gyur/ snum pa'i dri ma dang / dri nga ba rnam par spangs nas rang gi dge ba'i rtsa ba rjes su dran zhing 'chi ba'i dus kyi tshe rab tu dang ba'i ltas mthong bar 'gyur ro/ /'di ni de'i ltas yin te/ bzhin gser gyi kha dog lta bur 'gyur/ de'i sna yon por mi 'gyur/ de'i snying 'phar bar mi 'gyur/ mid pa nas sgra ngar ngar po 'byung bar mi 'gyur/ de'i lus la dbugs rgod par 'gyur/ de'i lus gdung bar mi 'gyur/ dbang po 'gyur ba ma yin/ yan lag dang nying lag kun du chad par mi 'gyur/ gshis kyi mtshams 'jig par mi 'gyur/ mal gyi steng na 'greng zhing ldog par dman pa'i tshig lta bu smra bar mi 'gyur/ rims nad kyis 'chi ba'i dus byed par mi 'gyur/ pha rol pos dug byin pas gnod par mi 'gyur/ me tog dang 'bras bu la brkam pa'i phyir shing la 'dzegs nas lhung bas 'chi ba'i dus byed par mi 'gyur/ yid du mi 'ong ba'i kha zas zos te kha zas ma zhu bas 'chi ba'i dus byed par mi 'gyur ro/ /gal te mi'i phung po yongs su btang nas kyang lha'i nang gi rnam par shes pas sum bcu rtsa gsum ris kyi lha rnams mthong ste/ khang pa brtsegs pa nor bu dang / gser dang / bai dUr+ya dang / dngul stong gis rnam par brgyan cing shin du rnam par phye bas spras pa/ gser gyi nya dang / chu srin gyi rgyal mtshan dang / rta babs dang / ba dan gyis mdzes par byas pa/ rol mo'i dbyangs sgra dang / sil snyan sna tshogs kyi sgra snyan pa 'byung ba dang / gnas sna tshogs kyis bskor ba/ shing 'dab chags pas brgyan pa'i nags tshal gyi nang na 'dug pa/ tsan dan sbrul gyi snying po'i chus chag chag btab pas 'dam</font><hr>83.319a<br><font size=+1>

du gyur pa/ lha'i rol mo'i sgra dang sgron ma'i phreng bas brgyan cing mdzes par byas pa/ bud med 'bar ba sna tshogs rnam par rtse bas mdzes par byas pa/ dpung rgyan dang / gdu bu dang / sor gdub dang / se mo do dang / do shal sna tshogs kyis brgyan cing mdzes par byas pa'i sum bcu rtsa gsum ris kyi lha rnams mthong ngo / /drang srong chen po sum bcu rtsa gsum gyi lha'i ris de na lha'i bu de dag mchog gi bskyed mos tshal du song ste rtse dga' la dga' mgur spyod cing 'dod pas rgyags myos nas de dag bskyed mos tshal dang / nags tshal gyi bar du 'gro zhing dga' ba bskyed do/ /sems can de'i rnam par shes pa de bsod nams su nye bar 'gro ba yin pas sems can des lha dang lha mo khri gcig gi steng na 'dug pa mthong nas rab tu dga' ba'i yid kyis myur ba myur bar nor bu skud pa la brgyus pa 'chugs pa bzhin du song ste skye'o/ /sems can de 'jug pa'i tshe lha mo de'i lag mthil gnyis nas me tog 'byung ngo / /sems can des me tog de mthong nas 'jug ste lha mo de lha la dga' ba dang bde ba'i yid kyis lta zhing lag pa gnyis kyis me tog de nyes nas de'i lag pa phrad pa'i rkyen gyis lha'i nang du skye bar 'gyur ro/ /de skyes pa'i tshe lha mo de lha la lta zhing gzhon nu skyes kyis khyod dga' ba skyed cig ces zer te pha ma de gnyis yid dga'o/ /gzhon nu de zhag bdun 'das nas rna cha sna tshogs 'gul ba 'phyang ba mngon par 'grub bo/ /de zhag bdun 'das nas 'di lta bu dran par 'gyur te/ bdag che ge mo zhig nas 'dir 'ongs te 'di gnyis ni bdag gi pha ma yin no/ /bdag gis dge ba'i las ni 'di byas so snyam du de ltar sems shing nye bar rtog pa na dga' ba chen po skye'o/ /de dga' bas myos nas rgyags pas 'dod pa la sred par 'gyur/ rgyang ring po nyid nas</font><hr>83.319b<br><font size=+1>

lha'i gnas yangs pa nye bar gnas pa de des mthong nas de la mngon par dga' ba'i sems skye bar 'gyur ro/ /de lha'i 'gros kyi tshul gyis glang po rgyags pa'i 'gros ltar 'gro ba/ brang che ba/ lag pa ring zhing rab tu 'phyang ba/  ro stod seng ge 'dra ba/ lte ba zab pa/ rked pa gzhu'i chang zungs ltar phra ba/ sgal tshigs rim bzhin 'dug pa/ brla chu shing gi sdong po ltar mkhrigs pa/ lha'i smra ba/ ag tsom dang spu thung ba/ dri nga ba med pa/ lha'i dri yongs su bzung ba/ lus lhab lhub kyis spud pa/ lha'i gos 'bar ba bgos pa/ yid gcig tu brtags kyang lus mdzes pa ste/ de lha'i gnas de na lha'i bu mo kha cig gis ni kun nas bskor cing gnas/ kha cig ni rtse dga' la dga' mgur spyod cing 'di skad ces 'dzer te/ jo co lha'i gnas 'dir snyan mi mnga' zhing legs par byon tam/ khyod bdag cag gi mgon du gyur cig /bdag cag lang tsho la bab pa/ gzugs phun sum tshogs pa/ nu ma gser gyi bum pa ltar 'bur ba/ mchu pad ma 'dra ba gzugs sprin gyi nang nas glog 'byung ba 'dra ba dag dang / gzhal med khang chen po dang / shing yongs 'du sa brtol myu gu dang yal ga chags pas mdzes par byas pa/ bud med drug khri lang long du gyur pa 'di dag la jo co dgyes par mdzod cig ces 'dzer to/ /lha'i gnas pi bang dang / gling bu dang / rdza rnga dang / cang te'u dang / glu dbyangs 'byung ba de dag na lha'i gding bas mdzes par byas pa'i seng ge'i khri mthong ngo / /des de mthong nas rgyal bu dar mang pos bcings te spyi bo nas dbang bskur ba bzhin du de seng ge'i khri la 'dzegs nas 'dug go /de de na gnas pa na rtag tu yid du 'ong ba'i sgra 'byung ngo / /lha'i rol mo'i sgra 'byung ngo / /phyogs kun nas kyang 'di lta bu'i sgra grag ste/ 'di ni bsod nams su nye bar 'gro ba'i sems can te/ 'dzam bu'i gling nas</font><hr>83.320a<br><font size=+1>

shi 'phos nas bsod nams kyis yongs su bzung bas lha'i gnas 'dir skyes kyis bdag cag de'i gan du 'dong ngo / /nye bar gnas nas dga' mgur spyad par bya'o/ /rol mo'i dbyangs sgra dang gar gyis rtse bar bya'o zhes sgrogs so/ /de bud med drug khri dang dga' mgur spyod de/ de dag thams cad kyang lag na me tog thogs pa/ shin du dri zhim pa'i cha byad can/ du ku la'i ras kyi bla gos bgos pa/ rgyan dam pa dang / rkang gdub sgra snyan pa/ bzhin pad ma lta bu la zla gam lta bus mdzes par byas pa dag sbrang rtsi dang / sbrang chang mngar ba dang / me tog gi chang gis rgyags shing myos pas 'khyud nas 'dug ste de dag thams cad 'di skad ces bdag cag thams cad jo co 'di'i g.yog dang bsnyen bkur bya'o/ /khyod 'di nas bsod nams kyi stobs kyis bsgrubs pa'i mtho ris kyi 'jig rten gyi dri zhim zhing bde ba'i lha'i 'dod pa'i longs spyod shes pa 'di la kun du spyod cig ces 'dzer to/ /drang srong chen po lha'i bu de dang / lha'i bu mo de dag lhan cig tu dga' tshal dang / 'dres tshal dang / ar mo nig lta bu'i rdo leb dang / rnam par mnyam 'phrul dang / rab 'bab dang / seng seng po dang / me tog gi 'phral thabs dang / shing yongs 'du sa brtol la sogs pa'i bskyed mos tshal dam pa mchog tu bde zhing bsil ba/ gnod pa'i rlung med pa/ lha'i bya nam mkha' 'gro zhes bya ba'i sgra snyan pas mdzes par byas pa/ lha'i me tog dang / 'bras bu dang / spos kyis kun du gang ba/ bai dUr+ya dang / nor bu dang / sbug dang / rdo'i snying po rnam pa sna tshogs kyi sgron ma can/ bung ba dang / khu byug rgyags pa dang / bya sgra snyan pa 'byin pa/ rma bya 'dab gshog rtse mo gser can yod pa/ nor bu dang / rin po che'i thig les rnam par bkra zhing bkra</font><hr>83.320b<br><font size=+1>

shis pa yod pa/ sna mtho zhing ring ba/ bai dUr+ya mchu las sgra skad snyan pa sna tshogs 'thun par sgrogs pa/ me tog bkram pa rnam par phye bas brgyan pa'i phyogs na lha'i bu 'di dag 'dod pas ngoms pas rgyun du longs spyod par gyur te gnas so/ /sum bcu rtsa gsum lha'i gnas de na rdzing bu gru bzhi pa zab pa/ chu dang ba/ ha cang grang ba yang ma yin/ ha cang dro ba yang ma yin pa/ yid du 'ong ba/ chu dri ma med pa/ pad ma 'dab ma brgya pa kha bye ba yod pa/ ngogs shing gis mdzes par byas pa/ me tog bkram pas chu yid du 'ong ba'i rdzing bu de dag na lha'i bu de dag lha'i bu de dag lha'i bu mo brgya stong gis bskor nas chu la rtse ba rjes su myong zhing bde bar gnas so/ /drang srong chen po de dag na de dag gi bskyed mos tshal dang / nags tshal gyi gam yo na rnam pa sna tshogs kyi thig les rnams par bkra ba'i snod mngon par 'grub ste/ lha'i bu de dag snod de dag 'dod pa na me tog kun da dang / ku mu da dang / kha ba lta bu dang / dngul gyi kha dog lta bu'i kha zas mngon par 'grub bo/ /drang srong chen po rin po che'i snod gcig la za ba na/ gang gis kha cig gi kham blangs pa ni rin po che'i kha dog lta bur gyur/ kha cig gi kham blangs pa ni kha dog ser po dang / sngon po dang / dkar por gyur te/ kha dog gcig tu 'dra bar kha dog rgyas pa mchog dang ldan pa gcig pa de dag gi rin po che'i snod de dag las kha zas kyi khyad par so so tha dad par 'byung ste/ de ni de dag gi sbyin pa nye ba'i nyon mongs pa can gyi rnam par smin par blta ste/ gang gis sngar sbyin pa byin la phyis 'gyod par gyur pa'i las de'i rnam par smin pas de'i zas kha dog ngan par 'grub bo/ /gang gis sngar sbyin pa byin la phyis byams pa dang ldan pa'i sems kyis snying rje bskyed de dga'</font><hr>83.321a<br><font size=+1>

ba bskyed par gyur pa'i las de'i rnam par smin pas de'i zas kyi bye brag kha dog bzang po rin po che lta bur snang ba 'grub ste/ drang srong chen po khyod kyis de ltar las kyi 'bras bu rnam par smin pa shes par bya'o/ /drang srong chen po gzhan yang sum bcu rtsa gsum pa'i gnas kyi lha'i ris de na shi ri sha ka zhes bya ba'i bskyed mos tshal yal ga dang / me tog dang / 'bras bu sna tshogs kyis rab tu brgyan pa/ shing brgya stong sna tshogs stug pa/ stug po'i mthongs na shel ltar dri ma med pa'i rdo leb shin du phyi bdar byas pa phun sum tshogs pa zhi zhing dbang po rab tu zhi ba'i thub pa 'dod chags dang bral bas bsten pa yod de/ de na 'dod pa'i longs spyod can gyi lha'i bu dang / lha'i bu mo'i tshogs mi gnas so/ /drang srong chen po bskyed mos tshal dam pa shi ri sha ka de na me tog dang 'bras bu'i shing ljon pa mang po las rtag tu lha'i gtam brjod pa'i sgra 'byung ngo / /drang srong chen po de na nyan thos kyi dge 'dun 'dus pa'i gnas brtan pa lang bdag bram ze'i rigs su skyes pa/ bsam gtan la gnas pa/ snying rje dang / dga' ba dang / btang snyoms la gnas pa/ byams pa'i ting nge 'dzin la snyoms par zhugs te 'dug go /drang srong chen po de zhag bdun gyi bar du dbugs phyi nang du mi rgyu'o/ /drang srong chen po de byams pa'i ting nge 'dzin la snyoms par zhugs pa'i tshe 'dod na rlung mi ldang ngo / /drang srong chen po de sreg pa'i bskal pa'i tshes me lce gcig tu gyur pa na yang de'i lus yungs 'bru tsam yang tshig par mi 'gyur ro/ /de'i tshigs kyis ri'i rgyal po ri rab kyang phigs so/ /klu'i rgyal po dga' bo dang / nye dga' stobs che ba/ cher gdug pa'i shugs can rdzu 'phrul che ba/ dbugs kyis kyang ri'i</font><hr>83.321b<br><font size=+1>

rgyal po ri rab 'jig pa/ rgya mtsho chen po bzhi yang skam par byed pa/ gtum zhing cher gdug pa'i shugs can klu'i rgyal po de gnyis kyang dge slong ba lang bdag de'i ting nge 'dzin gyi mthus gdug pa med par 'gyur ro/ /drang srong chen po gnas brtan pa lang bdag bskyed mos tshal shi ri sha ka na gnas shing bsam gtan la gnas par lha gzhon nu de dag dang / lha'i bu mo de dag gis mthong nas gus pa dang bcas ri mo dang bcas pas gnas brtan de la dga' ba dang dad pa skyes nas lha'i me tog mAn dA ra ba dang / mAn dA ra ba chen po dang / man 'dzu Sha ka dang / man 'dzu Sha ka chen po dang / ud pa la dang / ku mud dang / dri mchog dang / pad ma dkar pos gtor nas thal mo sbyar ba byas te phyag 'tshal nas/ sum bcu rtsa gsum ris kyi lha'i bu de dag thams cad kyis gnas brtan pa lang bdag la yongs su bskor te mchod pa chen po byas nas mdun gyis bltas te gnas nas lha'i zas bdud rtsi'i ro dang ldan pas tshim par byed cing ci bder byed do/ /gnas brtan pa lang bdag de lha'i bu de dag la chos ston pa ni 'di lta ste mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / de lta bu byung ba'i sde dang / skyes pa rabs kyi sde dang / shin du rgyas pa'i sde dang / rmad du byung ba'i chos kyi sde dang / 'dul ba'i sde dang / mdo sde'i lung gi phyogs yang dag par rab tu ston te/ de dag dga' ba dang / dad pa skyed do/ /de lha'i bskyed mos tshal de na bsam gtan la gnas te thams cad bde ba dang ldan par bskyed mos tshal shi ri sha ka na rten cing gnas so/ /drang srong chen po gzhan yang sum bcu rtsa gsum lha'i ris de na lha'i mdun sa chos bzang zhes bya ba yod do/ /de'i ka ba brgyad khri bzhi stong gser dang / dngul dang / rdo rje dang / spug dang / rdo'i snying po las byas pa/ </font><hr>83.322a<br><font size=+1>

tsan dan mchog shing gi snying po la sogs pa'i dril bu g.yer ka sgra snyan pa'i dra bas khebs par byas pa/ sa phyogs gser gyi bye ma bdal ba'o/ /lha'i mdun sa chos bzang lha'i ras rab tu sbyangs pa/ rgyal mtshan dang / gdugs dang / ba dan bsgreng ba dang / lha'i rol mo khong hu dang / pi bang dang / gling bu dang / rdza rnga dang / rnga pa Ta ha dang / lcags kyi sil khrol dang / dung dang / pi bang rgyud gsum pa rab tu sgrogs pa/ ga zha dang / sil khrol dang / ca co'i sgra snyan pa 'byin pa dang ldan pa/ me tog dang / 'bras bu dang / yal ga dang / khu byug gnas shing phan tshun nas sgra 'byin pa de na lha dang / lha mo de dag dga' ba dang / bde ba skye ba'i bzhin gyis gnas so/ /drang srong chen po lha'i mdun sa chos bzang de'i sa'i ngos nor bu rin po ches rab tu spras pa/ ljang gus byugs pas mdog snum zhing bai dUr+ya ltar dri ma med de/ me long gi ngos lta bur byas pa rab tu 'jam pa na spos kyi phye ma dang / me tog rnam pa sna tshogs dang 'thor ba/ rlung dang / nyi ma dang / sha sbrang dang / sbrul gyi nyes pa yongs su spangs pa/ ngang gis gnyid dang / snyom pa dang / le lo rnam par spangs pa mthong khung dang / skar khung zla kham lha bu'i dra ba'i bu ga nas reg na bde ba'i rlung gtong ba/ rta babs dang / yang thog dang yang thog chung ngu nas bde ba'i rlung gtong ba/ rin po che'i phreng ba bres pa'i sgras rtag tu mdzes par byas pa/ dri rab tu zhim pa 'byung ba'i spos dang me tog gi sil ma 'thor ba yid du 'ong ba/ bzhin zla ba dang / nyi ma dang / me long gi dkyil 'khor lta bu/ lha'i khyad par gyis gzugs rab tu brgyan pa'i lha'i bu mo dag gnas te/ drang srong chen po lha'i mdun sa chos bzangs de na lha'i bu mo rol mo'i dbyangs sgra sgrogs so/ /lha'i mdun sa chos bzangs de ni gru bzhi lham pa/ shin du rnam par phye ba/ ngos yangs pa/ </font><hr>83.322b<br><font size=+1>

shing ljon pa dang / bskyed mos tshal dang / nags dang / nags tshal gzhan rnam pa sna tshogs kyis mdzes par byas pa/ rgyar kho ra khor yug tu dpag tshad brgya yod pa/ gser dang pad ma bkram pa/ me tog sil ma bkram pa/ glu dbyangs kyi sgra 'byung ba/ pad ma dang shing yongs 'du sa brtol gyis mdzes par byas pa'o/ /lha'i mdun sa chos bzangs de ni yo byad kyi khyad par thams cad gser dang / dngul dang / bai dUr+ya dang / spug dang / rdo'i snying pa las byas pa/ rin po che'i phung po yongs su bzung ba/ gser gyi snying pos kun du khyab pa/ ri rnam pa du mas nye bar bskor cing sna tshogs rnam par bkra bas mdzes par byas pa/ ngos bskyed mos tshal brgya stong gis mdzes par byas pa ste/ sum bcu rtsa gsum gyi lha mya ngan dang / nad kyi rnam pa'i nyes pa las grol ba dag bskyed mos tshal mchog tu dga' 'dun myong nas lha'i mdun sa chos bzangs der 'dus te rtse ba rjes su myong ngo / /drang srong chen po sum bcu rtsa gsum gyi lha'i ris de na blta na sdug ces bya ba'i gzhal med khang zla ba dang nyi ma dang / me long gi ngos ltar dri ma med pa/ dri rab tu zhim pa'i spos dang me tog gis mdzes par byas pa/ phreng ba dang byug pas bres pas mdzes par byas pa/ bud med brgya stong gis mdzes par byas pa/ 'jo zhing sgeg pa/ mig zur gyis lta zhing khro gnyer gyi rim pa g.yo ba'i cha byad can 'khod pa/ ngos me tog rnam pa sna tshogs phal po ches mdzes par byas pa/ nor bu'i brkyang nus byas pa/ dril bu g.yer ka'i dra ba bres pas mdzes par byas pa/ rta dang / glang po che dang / shing rta'i rmig pas reg na gser gyi rdul ldang ba dang / cod pan chags shing 'byor pas mdzes par byas pa yod do/ /drang srong chen po blta na sdug ces bya ba'i gzhal med khang de la ka ba drug khri yod de/ ka zhu lha'i gser dang / dngul dang / bai dUr+ya r+ya</font><hr>83.323a<br><font size=+1>

las byas pa sna tshogs kyi 'phras rnam par spras pa/ shing ta ma la'i lo ma dang / a ga ru dang / bdug pa'i phreng ba dri rab tu zhim par byas pa'i khyad par can no/ /gzhal med khang de na lha'i dbang po brgya byin gnas te/ lha'i bud med brgya stong gis bskor ba/ gser dang rdo rje'i mi gus lus mdzes par byas pa/ lha'i 'dod pa la rtse ba rjes su myong ba/ glang po che dgu khri'i stobs dang ldan pa/ lag pa glang po che'i sna lta bu/ mdog gser dri ma med pa ltar ser ba/ lus grims pa/ ro stod seng ge'i 'dra ba/ rna cha dri ma med pa 'gul bas lus snang bar byas pa/ gos mchog tu phra la ring zhing nar ba/ dbang po'i brda sprod pa 'don cing bstan bcos shes shing mkhas pa/ lha'i bu brgya stong du ma rjes su 'brang zhing lha'i gser gyi gzhal med khang gi gnas na rgyu ba/ gser gyi skud pa dang / se mo do dang / do shal gyis brang brgyan cing mdzes par byas pa/ ha cang tsho ba yang ma yin ha cang rid pa yang ma yin pa/ rkang pa shin du gnas pa/ bdud rtsi'i ro dang ldan pa'i kha zas za ba/ mkhur tsos bud med brgya stong gis zur gyis lta ba dang ldan pa/ glang po che sa srung gi bu rgyags pa'i rna ba'i rlung gis sgra phyung ba ste/ drang srong chen po lha'i dbang po rgyal po de'i lus la rus pa med do/ /de'i lus la nad thams cad med de/ dri rab tu zhim pa dang ldan la gdangs shin tu snyan cing 'jam pa'i dbyangs dang ldan no/ /lha'i rgyal po de'i lus kyi dris phog na spos kyi glang po che rab tu rgyags shing bdo ba yang rgyags pa yongs su 'bri bar 'gyur ro/ /drang srong chen po lha'i dbang po de'i lus kyi tshad ni de bzhin gshegs pa'i sku'i tshad tsam mo/ /de'i gzugs che ba gser gyi mdog lta bu de mthong nas 'phags pa nyan thos rnams kyang de'i gan du 'dong ste/ lha'i dbang po'i gzugs phun sum tshogs pa de bzhin gshegs pa dang 'dra'o zhes brjod do/ /</font><hr>83.323b<br><font size=+1>

de nas drang srong chen po rgyas pas lha'i dbang po'i lus kyi tshad thos nas ngo mtshar du gyur pa dang / bcom ldan 'das kyis bka' stsal pa/ drang srong chen po dbang chen po'i lus chung ngu mi rtag pa'i rjes su 'brang ba gar mkhan gyi cha byad lta bur shin du spras pa/ glegs shing gi las dang / shing gi las dang / 'khrul 'khor gyi las lta bur byas pa/ me tog gi las lta bur yud tsam zhig mdzes pa/ me long gi nang gi gzugs brnyan lta bu la khyod ci'i phyir ngo mtshar du byed/ drang srong chen po khyod dge slong ma 'gags pa'i lus pha dang ma las skyes pa'i tshigs tshigs mtshams mtshams re re la yang dbang po chen po 'dun par 'gyur ba la ltos/ drang srong chen po gzhan yang dge slong ma 'gags pa'i lus la rdzu 'phrul gyi sgyu ma la da ltos/ de nas dge slong ma 'gags pa bcom ldan 'das kyis bskul bar shes nas ting nge 'dzin la snyoms par zhugs pa dang / ting nge 'dzin de'i mthus dge slong ma 'gags pa lha'i gser 'bar ba dang / byi ru'i sdong po'i kha dog mchog dang ldan pa/ gtsug gi nor bu dang cod pan 'phyang ba'i gtsug pud dang ldan pa/ mkhur ba rgyas shing mdangs snum pa'i mdog can/ mig lha'i ud pa la sngon po 'dra la/ nor bu dang / spug dang / rdo'i snying po dang ldan pa'i klu'i rgyal po lta bur kun du snang ste/ de'i gzugs chen po mngon par grub pa'i lha'i dri dang gzugs kyis 'khor thams cad la snang bar byas pas ngo mtshar dang dga' bar gyur te dri rab tu zhim pa'i dri dang ldan par 'gyur to/ /de'i cho 'phrul de drang srong chen po rgyas pas mthong nas snying 'phar zhing stan las langs te thal mo sbyar nas rab tu ngo mtshar du gyur pas sgra cher kye a la la legs so/ /gang gi phyir bdag de bzhin gshegs pa dang phrad cing 'dus la/ thams cad mkhyen pa'i sgo nas 'di lta bu sngon ma mthong ba'i cho 'phrul mthong ba mi nyid thob pa bdag don mchis so/ /bcom ldan 'das kyis drang srong chen po</font><hr>83.324a<br><font size=+1>

rgyas pa la 'di skad ces bka' stsal to/ /drang srong chen po 'di ji snyam du sems/ dbang po chen po'i lus dang / gang 'di dge slong ma 'gags pa'i lus gser 'bar ba dang / nor bu mchog las grub pa 'di gnyis gang bzang / de skad ces bka' stsal pa dang / bcom ldan 'das la drang srong chen po rgyas pas 'di skad ces gsol to/ /bcom ldan 'das gang 'di dge slong ma 'gags pa'i lus de la dbang po chen po'i lus kyis brgya'i char yang nye bar mi mchis/ stong gi cha dang / brgya stong gi cha'am/ grangs sam/ char ram/ bgrang bar ram/ dper yang mi bzod do/ /drang srong chen po bsod nams las bsgrubs pa'i lus la dge ba'i rtsa ba bsngos pa'i khyad par ni de ltar blta'o/ /drang srong chen po sum bcu rtsa gsum gyi lha'i ris de na/ brgya byin gyi chung ma'i dam pa bde sogs shes bya ba lha'i bu mo brgya stong gis yongs su bskor cing dga' tshal na 'dug ste/ lus spos dang / phreng ba dang / me tog gis brgyan cing 'bar ba/ lha'i me tog pad ma dang / ud pa la dri rab tu zhim pa'i dri ngad ldan pa/ mchu gser dang bim pa 'dra ba/ mchog tu 'bar ba'i cha byad 'dzin pa/ gos mchog tu phral 'tsher ba/ bskyed mos tshal dang nags na rgyu ba/ lha'i rgyan dang / rkang gdub dang / gdu bu dang / gdu bu bskril ma dang / do shal dang / se mo dos lus dud pa/ 'phral ba dang mkhur ba che la shin du rnam par phye ba/ nor bu dang gser shin du rnam par phye ba'i ska rags kyis bcings pa/ 'jo zhing sgeg pa'i rjes su chags pa/ mig ring zhing phye la 'dzum pa/ lag pa'i nang ri mo ring pos khyab pa/ lte ba zab pa/ khro ba dang / ser sna dang / phrag dog dang / 'thab pa dang / rtsod pa'i nyes pa spangs pa/ bzhin khro gnyer gyi rim pa g.yo ba dang bral ba/ mngal 'dzin pa'i skyon rnam par spangs pa'i lus dang ldan pa'o/ /</font><hr>83.324b<br><font size=+1>

lha'i bu mo bde sogs shes bya ba de shin du 'dod pa la chags pa las byung ba'i sgeg pa/ ri rab la yod pa'i gzhal med khang dang / shing gel ba dang 'khri shing gi bla res khebs par byas pa las byung ba'i 'dod pa skyes pas byung ba/ me tog 'thor ba dang bcas pa'i rlung ldang ba/ ha cang ring ba yang ma yin/ ha cang thung ba yang ma yin/ dku ha cang sbom pa yang ma yin/ ha cang phra ba yang ma yin pa/ lus ha cang sbom pa yang ma yin/ ha cang phra ba yang ma yin pa/ bzhin mdangs can/ gtsang zhing mdzes pa/ pad ma 'dod pa/ dri rab tu zhim pa'i dri'i ngad rlung gis bdas pa rmad du byung bas mdzes par byas pa'o/ /drang srong chen po de ltar sum bcu rtsa gsum ris kyi lha de dag ni nad med pa/ bskyed mos tshal dang / nags tshal dang / gzhal med khang gi gnas kyi nang na gnas shing rgyu ba'o/ /de dag gi tshe ni lha'i lo stong thub bo/ /de dag lha'i gnas de na gnas pa las bsod nams za/ zad nas tshe zad par gyur ba'i tshe shi 'pho ba'i ltas sngon ma byung ba lnga 'byung ste/ rdzing bu shel rdo ltar gsal ba/ reg na bde ba'i rlung ldang ba/ rdzing bu'i 'gram khri shing gi bla re dang / shing gel ba phun sum tshogs pa dang ldan par zhugs pa na 'bru mar gyis gtor ba lta bu 'byung ngo / /des 'bru mar gyis gtor ba de mthong nas snying dngangs skrag ste/ rdzing bu de nas byung nas nags stug por rgyug cing bros so/ /de rings par 'gro ba'i bu mo de dag gi mthong nas phyi bzhin du 'brangs pa dang / de nags stug po de'i nang na shing drung zhig na gnas shing 'dug go /de nas lha'i bu mo de dag snying rje rje skad du ga chad par ngu zhing 'di skad ces jo bo bdag cag bor ta gcig pu shing drung 'di na ci dga' zhes 'dzer te de ngu zhing dman pa'i sgras slar 'di skad ces smras so/ /bdag 'di na sngon ma byung ba 'bru mar gyis gtor ba lta bu lus las byung nge zhes de skad smras pa dang / mchan khung gnyis nas rngul byung</font><hr>83.325a<br><font size=+1>

nas/ de dag gis rngul byung ba mthong ba dang / lha'i bu mo de dag ring du dong ste yongs su spangs so/ /des yongs su spangs par shes nas mya ngan gyis reg go /de mya ngan gyis reg pas dbugs drag tu rgyu'o/ /dbugs rgyu ba'i rgyus lus la gdung ba skyes so/ /de lus dang sems gdungs pas me tog gi thong sngon rnyis mi srid pa yang rnyis/ phreng ba yang yongs su rnyis/ sngon rnyis mi srid pa'i gos kyang rnyis/ lha'i gding ba bting pa'i mal cha la yang dga' ba mi rnyed do/ /de nas lha'i bu mo de dag gis 'chi 'pho ba'i ltas kyis nyen par shes nas de'i dri de mi bzod de ring du spangs nas snying rje rje skad ga chad par bdag dbang med par ngu'o/ /'bral ba'i sdug bsngal gyis nyen nas rab tu ngu zhing kyi hud lus mchog tu shin du 'jam pa/ lha'i bskyed mos tshal dang / nags tshal na rgyu ba/ sum bcu rtsa gsum gyi gling na dur ba dang 'dra ba/ lha'i mdun sa chos bzangs na ngang pa'i rgyal po dang 'dra ba/ dga' tshal na bya ka lan da pa lta bu/ rdzing bu na spos kyi glang po che 'dra ba/ shing yongs 'du sa brtol dang / bskyed mos tshal na bung ba lta bu/ 'dres pa'i tshal na me tog gi rna rgyan lta bu bdag cag bor te nga gar song / gang na gnas zhes 'dzer cing bdag la dbang med par ngu'o/ /de bdag la dbang med par rims nad kyis btab ste/ rims des lus dang sems dkrugs nas 'dron po 'dron pa mang po dang bral te 'brog 'tshol ba dang mtshungs/ lam grogs gru zhig pa dang 'dra/ rgyal po yid bzhin gyi nor bu stor ba dang mtshungs/ ri zhig pa dang 'dra bar mi rtag pa'i rlung gis gtor nas lus sa'i steng na 'gre ldog ste/ nam mkha' lding gi mchus klu gzhon nu zin pa dang 'dra bar 'dar bzhin du myur ba myur bar thal mo sbyar nas lha'i bu mo de dag la gsol ba btab pa tshur shog lag pa'i thal mos nga'i lus la</font><hr>83.325b<br><font size=+1>

reg par gyis shig ces snying 'dar la gdungs bzhin du de smre sngags 'don cing gsol ba btab pa dang / lha'i bu mo de dag gis bltas nas mi nye bar spangs te/ yan lag la reg par lta ga la byed kyi/ me tog can gyi yal ga thogs te 'chi 'pho bar 'gyur ba'i lha'i bu de'i snying kar bzhag nas 'di skad ces 'dzer te/ mtho ris kyi bsod nams yongs su nyams te da myur du 'dzam bu'i gling du skye bar 'gyur ro zhes de skad smras pa dang / lha'i bu de bdag lus kyis yongs su btang bar shes nas kyi hud kyi hud ces sgra cher snying rje rje skad du ngu zhing kye ma'o mtho ris lha'i gnas 'di'i gnas 'di'i lha'i yo byad dang / rgyan dang / bskyed mos tshal mchog na rtse ba rjes su myong zhing lha'i bu mo 'di dag la bdag gis sdug par bsams pa las da bdag 'chi ba'i dus la phyogs shing zhugs pa'i tshe de dag nye bar mi gnas shing 'di skad ces khyod 'dzam bu'i gling du skye bar 'gyur ro zhes 'dzer to snyam nas yang dang yang du bdag gi gnas la blta zhing sa la 'gyel nas snying rje rje skad du smre sngags 'don te/ kyi hud dga' tshal dang / 'dres tshal dang / ar mo nig ltar 'jam pa'i rdo leb dang / kyi hud lha'i mdun sa chos bzangs dang / shing yongs 'du dang / rnam par mdzes dang / dga' tshal dang / bskyed mos tshal dang / rdzing bu dang / gzhal med khang dam pa sgo mang po 'di dag dang / lha yul ba'i lha'i gnas 'di dag bor te/ nga ni mtho ris kyi g.yang sa nas gdon mi za bar lhung ngo zhes skrag pa skyes nas de rang gi gnas la lta zhing kyi hud bdag gi mdza' bo byams pa rnams nga 'chir nye na ci'i phyir mi smra/ 'di ltar da ni nga 'khor ba'i 'brog dgon pa dgongs mal ring por chas kyis tshur shog nga la 'khyud/ phyis ngas kyang khyed mi mthong / khyod kyis kyang nga mi mthong ngo / /kyi hud mtho ris 'di nas bsod nams kyi 'bras bu zad pas 'pho bar 'gyur ba'i tshe bdag la mun</font><hr>83.326a<br><font size=+1>

pa lta bur snang ngo / /ci mtho ris 'di stongs sam/ 'di na yang rol mo dang sil snyan kyang mi len nam/ de dag gi sgra yang mi grag go /las kyi nyes pas bdag ni 'dir nyams par gyur to zhes de skad smras nas yang smre sngags 'don to/ /kyi hud mtho ris lha dang dri zas mdzes par byas pa na gang mig stong pa'i lha'i 'khor du 'gro ba dang / phyis yang de mthong bar 'gyur ba ni bsod nams che'o/ /kun nas skyes pa'i me tog nga'i klad pa la 'dug pa ci'i phyir rnyis shes lha'i bu des smras pa dang / lha'i bu sems dman pa dri ma med pa'i rna cha'i gdu bu 'gul ba thogs pa de dag thams cad me tog khyer te/ lha'i dbang po brgya byin lha'i bu brgya stong gis yongs su bskor cing lha mo bde sogs dang / lha mo dag phyi bzhin 'brang ba mi sbyin gyi bu dang / smig rgyu dang / sna tshogs rgyan dang / gtsug pud lnga pa dang tum bu ru la sogs pa'i lha dang dri za rnams lha'i glu'i dbyangs len cing 'dod pa dag gis ltas lnga po ngas nyam thag par gyur pa mthong nas snying rje bskyed de/ nga ro gcig tu kyi hud mi rtag pa 'di ni rab tu drag cing mi bzang ngo zhes tshig smra'o/ /lha'i rgyal po brgya byin gyis kyang lha'i bu de la bltas nas tshangs pa'i dbyangs kyis 'di skad ces smras so/ /chog go lha'i bu bdag cag thams cad kyi 'gro ba yang 'di 'dras sred par ma byed/ ngan 'gror ma gnas shig /lha'i bu de dag gis dbyangs gcig tu smras pa grogs po dge ba byed pa'i 'jig rten mi'i 'jig rten du song shig ces byas pa dang / lha'i bu des bdag ni nges par 'chi yang dag snyam du bsams te/ thal mo sbyar nas lha mang po de dag la 'di skad ces gsol ba btab bo/ /bdag ni 'chi 'pho ba'i dus la nye bar gnas kyis lha'i bu thams cad bdag la bzod par mdzod cig /de'i tshe shugs ring du phyung nas ltas gnyis byung ste/ mig pad ma'i lo ma rnyes pa</font><hr>83.326b<br><font size=+1>

lta bur gyur pa dang / rgyan thams cad mi snang bar gyur ba'o/ /de nas lha'i bu de dag gis rgyan mi snang bar gyur pa mthong nas me tog man dA ra ba dang / pad ma la sogs pas mngon par gtor/ pi bang dang / gling bu dang / sil snyan gyi sgra yang byas nas rgyan de dag kyang lhas bsdus par mthong nas 'dzam bu'i gling la dga' ba bskyed de/ de mchi ma zag cing ga chad par ngu ste 'chi ba'i dus kyi chos rnams sbyor ro/ /lha'i bsod nams dang tshe yongs su zad nas rlung drag po langs so/ /rlung dri rab tu zhim pa dang ldan pa des de'i lus la phog nas gtor te lha'i bu de gnas de nas 'chi 'pho bar 'gyur ro/ /gnas de nas 'pho ba na lus kyi gnas mi shes so/ /de gnas de nas 'phos nas mir skye ba yongs su len to/ /mir skyes te ma'i mngal na gnas pa'i tshe ma la mtshan mar blta ba ni de nyid glu dang / gar dang / rtse ba dang / dgod pa la dga' ba'i dbang por 'gyur/ me tog dang / 'bras bu dang / dgon pa la dga' bar 'gyur/ kha dog sna tshogs 'tsher ba'i gos 'chang bar 'gyur/ lha'i kha zas shin du bzang po la sred par 'gyur ro/ /de ma'i mngal na gnas pa'i tshe ma 'dod pa'i 'dod chags kyis kun nas bskor bar mi 'gyur/ de dri rab tu zhim pa'i cha lugs la dga' bar 'gyur/ gnyid log na yang rmi lam na lha'i ngo na skul ba mthong bar 'gyur ro/ /drang srong chen po de mngal na gnas pa na phyin ci ma log pa'i rmi lam mthong ngo / /btsas pa'i dus na yang 'dod chags dang / zhe sdang dang / gti mug rnam par spangs nas btsas te/ de gzugs bzang ba/ blta na sdug pa/ mdzes pa/ rkang pa shin du gnas pa/ shes pa'i yan lag dang nying lag 'brel pa/ lag pa dang / rkang pa ring la sbom pa/ ro stod sing ge lta bu/ so thags bzang ba/ shin du 'jam pa'i lus so/ /de gcig tu 'dod pa'i 'dod chags la chags par 'gyur ro/ /'dod</font><hr>83.327a<br><font size=+1>

chags mi bzad pa/ gos phra ba la dga' ba/ bskyed mos tshal la dga' ba/ lha'i dri dang rol mo la dga' bar 'gyur ro/ /de gser dang / nor thams cad 'byor pa'i rigs chen por skye ste/ sbyin pa dang / dul ba dang / yang dag par sdom pa la dga' bar 'gyur ro/ /gal te 'dod pa la shin du chags nas sbyin pa dang / tshul khrims la dga' bar gyur na/ de phyir gcig nas gcig tu dbul po'i rigs su skye bar 'gyur te/ ser sna can dang / tshul khrims 'chal ba rnams la bstod pa dang / ha cang sngo ba yang ma yin pa dang / ha cang dkar ba yang ma yin pa dang / skye bo thams cad dga' ba dang / gzhan gyi chung ma la chags shing bdag gi chung ma la mi lta ba dang / rtsa lag gi skye bo la dga' bar 'gyur ro/ /drang srong chen po 'di ni sum bcu rtsa gsum lha'i ris nas shi 'pho ba'i ltas 'byung ba'o/ /bcom ldan 'das kyis de skad ces bka' stsal nas/ drang srong chen po rgyas pa dang / drang srong chen po de dag dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las drang srong rgyas pas zhus pa'i le'u zhes bya ste bzhi bcu rtsa dgu pa rdzogs so// // rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de ye shes sdes bsgyur cing zhus te skad gsar chad kyis kyang bcos nas gtan la phab pa/ /dge'o// // #</font><hr>

</table>