! // rgya gar skad du/ shrI tat+t+wa pra dI pam nA ma ma hA yo gi nI tan+t+ra rA dzA/ bod skad du/ dpal de kho na nyid kyi sgron ma zhes bya ba'i rnal 'byor chen mo'i rgyud kyi rgyal po/ dpal rdo rje sems dpa' la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang / gsung dang thugs rdo rje dpa' bo chen po dang / dpa' mo'i dbang phyug mas yang dag par bskor nas/ shes rab kyi b+ha ga la bzhugs so/ /der bcom ldan 'das ma rdo rje dbyings kyi dbang phyug mas legs dgyes chen po'i rol pa sgeg pas nye bar longs spyod pa dang / ma mchu'i bdud rtsi'i btung bas bcom ldan 'das mnyes par byas te/ kha sbyor gyi thabs kyi sbyor ba las langs nas ri rab kyi nyi rdul gyi grangs gyi rnal 'byor ma dang lhan cig pas lan 85.48b gsum du bskor ba byas nas bcom ldan 'das kyis zhabs la mgo bos phyag 'tshal te/ 'di skad ces gsol to/ /bcom ldan ye shes zla bar grags/ /lte ba'i ku mud kha 'byed pa/ /gang zhig bdag gi zhu ba kun/ /mnga' bdag chen pos bdag la gsungs/ /dpal ldan bla na med pa'i rgyud/ /rnal 'byor ma zhes rab grags pa/ /e ba~M ma yA la sogs sgra'i/ /don ni ji lta bur ni brjod/ /bcom ldan 'das kyis bka' stsal pa/ /nyon cig lha mo spyan bzang ring / /khyod kyis nga la gang zhus pa/ /e ba~M ma ya sogs sgra yis/ /khams gsum 'gro dang mi 'gro bcas/ /shes rab thabs kyi rang bzhin gyis/ /thams cad rgyas btab gzhan gyis min/ /de kho na nyid sgron mar grags/ /dri med rdzogs pa'i 'bras bu'i gzugs/ /e ba~M ma ya de nyid gsum/ /thog mar bdag bcas pa dang ni/ /rang bzhin bzhi yi bye brag tu/ /don dam par ni shes par bya/ /thos pa'i don ni zla ba bde/ /de ni nam mkha' bzhin du mchog /gcig ces bya ba gzhan mchog rab/ /srid dang mya ngan 'das pa spangs/ /dus ni phyag rgya chen po ste/ /bskyed pa dang ni rdzogs dang bral/ /bcom ldan 'das ni mtha' zhes bya/ /rang dga' nyams su myong ba'i dngos/ /thams cad ye shes gsum stong nyid/ /de nyid de nyid kyis ni spangs/ /de bzhin gshegs pa rnam 'byed grags/ /dang po'i gnas ni rab grub byed/ /sku ni dga' ba'i gzugs su grags/ /dbang po gnyis byung dang bral ba/ /gsung ni mngon par dga' zhes bya/ /dam tshig las byung gis ni spangs/ /thugs ni dga' bral dga' zhes bya/ /ye shes las byung bde dang bral/ /rdo rje lhan skyes zhes su bstan/ /rang bzhin gyis ni spangs pa'o/ /lha mo dpal chen nyi ma skyes/ /zhu ba dga' bral dang bral lo/ /dpa' mo'i dbang phyug ma bde rten/ /dang po'i bdud rtsi las 85.49a skyes so/ /yan lag kun gyi yang dag bskor/ /khyab pa srog gi pad ma bzhin/ /shes rab tshangs pa'i sgo lnga'i khyim/ /tshangs pa'i ye shes 'dzin phyir ro/ /b+ha ga dngos po 'jig pa yis/ /yang na longs spyod myong bas so/ /bzhugs pa rang gi ngo bo la/ /gnas pa yang na gshegs pa'o/ /de lta bu ni don dam par/ /'di skad bdag la sogs par bshad/ /thams cad rnal 'byor rgyud du sbas/ /de bzhin rnal 'byor bla mar yang / /nges dang drang don bye brag tu/ /e ba~M ma yA la sogs gnas/ /rgyud shes pa yi don phyir te/ /gnyis su dbye ba'i rgyud rab bstan/ /'bras bu ye shes chen po ro/ /rang gis nyams myong ngo bo nyid/ /rang rig dag gis mi rnyed pas/ /rtog pa thams cad rnam par spangs/ /lha mos gsol pa/ bcom ldan ye shes rgyal po nyid/ /log pa'i ye shes mun 'joms pa/ /de nyid nyi shu gnyis bdag nyid/ /gang zhig ye shes thig ler gsungs/ /de la yang ni nges pa'i don/ /mchog gi dbang phyug bdag la gsungs/ /bcom ldan 'das kyis bka' stsal pa/ /gang zhig de nyid nges don du/ /zhal bzang de ni gsang ba'o/ /khyod kyi ngor byas bdag gis bshad/ /de lta min na sbas pa'o/ /e ba~M rnam pa'i dbus su ni gang zhig drug bcu rtsa bzhi'i 'dab ma'i dbyibs kyi rtsa'i 'khor lo de ni rnam pa dang bcas pa'i rnam par shes pa'o/ /de'i nang du gang du rtsa sum bcu rtsa gnyis kyi bdag nyid ut+pa la'i rnam pa'i 'khor lo de ni mtha' ste/ de la gang zhig zur brgyad pa'i rnam pa'i lte ba de ni snang ba'o/ /gang zhig lte ba'i dbus yangs pa de ni nam mkha'o/ /der ni lnga gnyis nas bzung ste/ bco lnga'i bar gyi sa'am/ dbang phyug gi mnga' bdag bzhugs so/ /der gang zhig de kho na nyid gsum gyi bdag nyid de ni lan gsum 'bab pa'i phung po'i rnam par shes pa sems dang sems las byung ba dang ma rig pa'i gzugs kyis gsum du dbye ba zur dang po la thun tshod gcig gi bar 85.49b du 'bar ba'o/ /gang zhig srog gi dbyig pa de ni lu gu rgyud kyi rnam pa'i mdud pa sum bcu rtsa gnyis su sbom pa dang phra ba'i thig le ro gcig pa'i gzugs kyis dbyig pa'i bdud rtsi zur gnyis pa la thun tshod gnyis kyi bar du zhu ba'o/ /drug po de ni bskyed pa dang rdzogs pa'i grags pa dga' ba drug zur gsum pa la thun tshod gsum gyi bar du 'dzag pa'o/ /gang zhig thig le shar ba dang nub pa de ni thim pa dang longs spyod du grags pa'i srog de ni zur bzhi sa la thun tshod bzhi'i bar du 'bar ba'o/ /gang zhig 'pho ba'i sbyor ba de ni steng dang 'og gi 'dab ma yod par byang chub kyi sems 'dus pa'i dbang ni zur lnga pa la thun tshod lnga'i bar du zhu ba'o/ /gang zhig rtsa'i 'khor lo 'byung ba de ni yan lag thams cad la bdud rtsi rgyas pa zur drug pa la thun tshod drug gi bar du 'dzag pa'o/ /gang zhig dbang gi rim pa de ni gcig nyid srog gi kha ru srog la 'bab pa dang / 'phur ba dang khyab pa de yang zur bdun pa la thun tshod bdun pa'i bar du 'bar ba'o/ /gang zhig bsrung ba'i 'khor lo de ni mthe'u chung gi mdud pa'i nang du bdud rtsi la skor ba zur brgyad pa la thun tshod brgyad kyi bar du zhu ba'o/ /de dag ni g.yon du bskor ba'i srog gi rlung la zhon pa nyi ma skye ba la mtshan mo dang nyin mo'i bar du sum bcu rtsa gnyis kyi cha rgyas par 'gyur ro/ /sum bcu rtsa gnyis kyi nang na bcu drug bral ba'i mtshan nyid mi gsal ba dang / dga' ba'i mtshan nyid bcu drug gsal ba de'i don gyi phyir dga' bral gyi dga' ba'i mtshan nyid A l-i'i rang gi ngo bo zla ba'o/ /phyi dang phyi'i don rnams kyis ni nang dang nang gi don gnas par shes par bya'o/ /de yang phyi'i tshes kyi grangs kyis so/ /nang srog gi rlung gi grangs kyis so/ /lha mos gsol pa/ sum bcu rtsa gnyis kyi chu skyes kyi ut+pa la'i rnam pa la bde ba chen po'i kun du spyod pa nges pa'i don kyis gnas pa de mchog gi dbang phyug gi bka' drin bskyab du gsol/ /bcom ldan 'das kyis bka' stsal pa/ /nyon cig lha mo skal ldan mo/ /gsang ba chen po ye shes 85.50a mchog /gang zhig shes pa tsam gyis ni/ /thams cad sa yi dbang phyug 'gyur/ /gang zhig snying po'i sngags ni nyid/ /de ni bdag nyid bcu drug bde/ /kun rdzob ri bong can gyi 'od/ /don dam par ni nam mkha' bzhin/ /gang zhig sku brgyad mchog sbyin ni/ /de ni mtshan mo brgyad mchog go/ /lha mo yang na ye shes brgyad/ /mtshan mo nyin mo gnyis las 'byung / /gang zhig thim dang longs spyod dbang / /de ni nges par bskyed rims so/ /lha mo bskyed rim gsal ba ste/ /rim las byung ba'i bde ba che/ /skal ldan mo gang ye shes sku/ /de ni rim sogs yan lag spangs/ /yan lag bzhir dbye drug dbye 'am/ /bskyed dang rdzogs pa'i rim pa'o/ /lha mo gang zhig gsang ba'i sgra/ /de ni ye shes gsum dang bral/ /yang na gzhan min bdag nyid gsum/ /mtshams kyi ye shes yod pa'i phyir/ /lha mo gang zhig dam tshig ni/ /bsrung ba la sogs nges par ro/ /de ni bde ba dbus gnas su/ /gzung bya yang na gang nang du/ /gang zhig sbyin sreg don dam par/ /de ni ha zhes glo bur te/ /char yang dbus yod thig le ni/ /gang du skad cig gis thim po/ /gang zhig bsrub dang bsrub thabs ni/ /de ni thog ma'i dga' ba spangs/ /lha mo de bzhin tha ma 'ang min/ /thog ma tha ma gnyis dang bral/ /skal ldan mo gang sngags kyi bzlas/ /de ni srid pa 'das pa'i yid/ /mya ngan 'das pa'i gnas kyang min/ /gnyis kyi ngo bo gnyis dang bral/ /gang zhig gnas ni brgyad du bstan/ /de ni nyi skyes ma rgyas pa/ /gnas kyi dbang gis shar ba la/ /nye bas myur du rgyas pa'o/ /gang zhig dga' ba la sogs rim/ /de ni rim pa gnyis su dbye/ /rnam bcas las ni dang po pa/ /rnam bral bcu yi dbang phyug go/ /gang zhig dur khrod rnam rtog bral/ /dbugs dbyung la sogs rnam par spangs/ /byang chub kyi ni sems ro la/ /rnam par zhu ba dam tshig phyir/ /lha mo gang zhig chu'i ngogs/ /de ni rtog med ma yi mthar/ / 85.50b yang na de ru srog gi rtsa/ /bde ba'i chu bo 'bab pa'i phyir/ /gang zhig snang ba sogs ye shes/ /de ni dga' ba dang ldan yid/ /sa dang chu dang 'od kyi gzugs/ /de bzhin rlung gi ngo bo dang / /gang zhig dngos po rten la sogs/ /de ni bde ba'i dang por rig /rang gi rnam pa'i bye brag gam/ /rnam par dpyod pas nges par dpyod/ /lha mo gang zhig dur khrod brgyad/ /de ni bde ba la thim zhes/ /rnam par rtog pa 'dzin pa'i sku/ /de la thim zhing thig pa'o/ /gang zhig shing la sogs pa'i don/ /de ni dang po'i bdud rtsi rgyu/ /rtsa de brten pa'i gzugs su grags/ /thams cad rnam pa'i bde sbyin ma/ /gang rlung de nyid snying po'i don/ /de ni rin chen gdu bu'i bde/ /'dzums pa yis ni yang dag par/ /pad ma'i zhal de myong ba'o/ /lha mo gang zhig mdzub la sogs/ /de ni gyen du gzung ba'i rlung / /yang na rtsa yi kun spyod las/ /'gro ba'i bdud rtsi 'dzin pa'o/ /gang zhig nye 'gro'i bsam gtan sbyor/ /de ni zla ba gyen du byed/ /yang na tshangs bzhi rnam dbye byas/ /rnam par shes pa la gshegs gsol/ /gang nyid ye shes thig le ni/ /de ni drug phyed gsum dang bral/ /bcu dang lnga yi sa rnams ni/ /dbang phyug 'pho med skye med do/ /gang zhig bdag gis rang ngo mchog /de ni nges par bzhi pa'i 'bras/ /yang na hor ya nyams su myong / /'bras bu'i sgras ni brjod pa'o/ /gang zhig sa yi dbang byed pa/ /de ni de nyid drug rang bzhin/ /de nyid drug las de nyid gsum/ /de nyid gsum las rang bzhin gcig /gang zhig de bzhin gshegs pa'i sku/ /de ni mya ngan 'das mtshan nyid/ /yang na dga' ba dang ni bral/ /dga' bral dga' min rang ngo bo/ /lha mo gang zhig rgyud bstan pa/ /de ni bde ba shin du 'phel/ /bde dang bral ba'i bde ba ni/ /yang na de nyid rnyed pa'o/ /gang zhig phyag rgya che rang bzhin/ /de ni thim sogs yid las 'das/ /rang gis nyams myong rang ngo bo/ /bsam gtan 'dzin pa spangs pa'o/ /gang zhig gsang 85.51a ba don dam par/ /de ni dga' ba dga' dang bral/ /yang na nang gi reg bya ste/ /reg bya dang bral rtog pa med/ /gang zhig bskul ba'i mchod pa'i don/ /de ni dri med bde ba 'byung / /'das pa las ni yang skye ba/ /skye ba de la 'phel ba'o/ /lha mo shes rab ye shes gang / /de ni kha la snying kar bde/ /kha ni rtag tu shes rab yin/ /snying ka ye shes brjod pa'o/ /gang zhig gsang ba'i dkyil 'khor 'khor/ /de ni khu ba 'pho med dge/ /yang na bde chen rang ngo bo/ /bde ba'i rnam par rtog dang bral/ /lha mo tshigs rgyas gang zhig ni/ /bya gdong ma de khong du chud/ /yang ni tshigs ni zhu med khu/ /dga' mo rgyas pa mchog yin no/ /'byung ba bsrung don gtor ma gang / /de ni srog chags bsad pa'o/ /bcad pa de ni mchog gi gnas/ /'gro ba 'gog par byed pa'o/ /de dag ni mchog gi gsang ba chen po'i gsang chen bcom ldan 'das ma bzhi bcu'i bdag nyid kyi de kho na nyid bde ba chen po'i rgyal po'i bdud rtsi'i gter la nges pa'i don to/ /lha mos gsol pa/ bzhi bcu'i bdag nyid de nyid ni/ /shin du reg med gzung bar dka'/ /sa yi dbang phyug du tsam zhig /mchog gi dbang phyug gis mkhyen lags/ /bcom ldan 'das kyis bka' stsal pa/ /sna tshogs rnyed pa sum bcu drug /bcu gcig sa yi bdag po'o/ /dga' ba rnyed pa sum bcu bdun/ /bcu gnyis sa yi bdag por brjod/ /mchog dga' rnyed pa sum bcu brgyad/ /de ni bcu gsum pa yi sa/ /sum bcu dgu lhag mthar thug pa/ /sa ni bcu bzhi rnyed pa'o/ /bzhi bcu de ni lhan skyes so/ /bcwa lnga rnyed pa'i mnga' bdag go/ /gang zhig bcu drug pa yi sa/ /brjod du med pa nam mkha' bzhin/ /de la dbang phyug mchog gi mkha'/ /thams cad mkhyen pa rnyed dka' ba/ /zad med 'pho med zhi ba ste/ /skye med rmad byung bas rmad byung / / 85.51b kyai bcom ldan 'das sum bcu rtsa gnyis kyi bdag nyid bde ba chen po'i bdud rtsi'i rgyal po'i bdud rtsi'i gter de kho na nyid de la kun du spyod pa'i dus ni gang lags/ 'dus pa ni ci zhig lags/ nyams su myong ba de ni gang lags/ bcom ldan 'das kyis bka' stsal pa/ sum bcu rtsa gnyis kyi bdag nyid la sum bcu rtsa gnyis kyi chu tshod kyi bar du srog dang rtsol ba'i rlung gnyis shar ba ni kun du spyod pa'o/ /rtsol ba'i rlung 'byung ba'i dus su gang zhig yan lag thams cad la khyab pa'i srog de ni g.yon skor du 'byung ba yis ut+pa la'i rnam pa 'dzums shing nang gi lte ba'i snying po rtsa ba'i sdong bus 'jug pa'o/ /'jug pa tsam gyis zur brgyad pa'i nang na yod pa'i bde ba chen po'i srog gi rgyal po la gang zhig ro gcig pa'i mtshan nyid de ni 'dus pa'o/ /de'i dus su gang zhig bdag dang gzhan gyis bye brag med pa gnyis su med pa'i spros pa dang bral ba'i ye shes kyis thams cad gzigs pa de ni nyams su myong ba'o/ /lha mos gsol pa/ gang zhig nyams myong las rnyed de/ /mnga' bdag de ni ji ltar lags/ /nyams su myong bas gang rnyed pa/ /de nyid mdor bsdus bka' stsol cig /bcom ldan 'das kyis bka' stsal pa/ /dris pa de ni rmad byung mchog /nyon cig lha mo spyan bzang ring / /nyams su myong bas gang rnyed pa/ /dga' ba'i dbang mo de brjod med/ /bla ma'i zhal nas nyams su myong / /dbang bskur las ni rnyed pa'o/ /lha mos gsol pa/ dbang bskur ba ni du ma zhig /rgyud rgyud nang du rab tu gsal/ /'di ru bye brag ci 'dra ba/ /su la sbyin par bgyi ba lags/ /bcom ldan 'das kyis bka' stsal pa/ /dga' ba'i 'bras bu bye brag tu/ /dbang ni re shig bzhi ru dbye/ /dang po dga' ba dang ldan pa/ /las dang po la sbyin par bya/ /gnyis pa mchog dga' dang ldan pa/ /snang ba gsum ni thob pa la/ /dga' ba gsum pa dang ldan pa/ /chos kyi sprin rnyed nges pas so/ / 85.52a kun du 'od sa zhes bya ba/ /rnyed pa bzhi la sbyin par bya/ /lha mos gsol pa/ kye bcom ldan 'das snang ba la sogs pa dang chos kyi sprin dang kun du 'od rnyed pa la de lta bu'i dbang gi rim pa lags na/ sa la sogs pa rnyed pa la ji ltar lags/ bcom ldan 'das kyis bka' stsal pa/ sa la sogs pa ma rnyed pa rnams la thog mar rang gi ngo bos so/ /sa la sogs pa rnyed pa rnams la mthar thug pa'i rang gi ngo bos so/ /gang gi phyir zhe na/ de rnams la brtson 'grus kyi stobs kyis shin du bsod nams kyi byin gyis brlabs kyi bya ba la sogs pa dang bral ba'i ye shes chen po mthong ba tsam gyis thob bo/ /ji ltar pad ma yongs su smin pa nyi ma'i 'od kyis reg pa tsam gyis rgyas so/ /ma smin pa de bzhin du ma yin no/ /lha mos gsol pa/ ma smin pa rnams la yongs su smin pa'i dus gang lags/ bcom ldan 'das kyis bka' stsal pa/ /sbyin sogs bsod nams bsags pa yin/ /mchog gi bla mas gtan la phab/ /skal ldan mo de smin pa'i dus/ /de las bla med byang chub ni/ /bla med gnas ni thob pa gang / /phyi nas ci yang bslab mi dgos/ /bla med ye shes chen po'i gnas/ /'bad min de ni mthong ba'o/ /ji ltar nyi ma shar tsam gyis/ /sna tshogs gzugs ni mthong bar 'gyur/ /de bzhin bla med 'od kyis ni/ /ye shes chen po mthong bar 'gyur/ /ye shes chen po sku dang bral/ /gnyis su med pa nam mkha' bzhin/ /lus dang ngag dang yid gzugs min/ /sgra la sogs pa rnam par spangs/ /dpe med nam mkha' dang bral ba/ /srid dang mya ngan 'das pa spangs/ /sbom dang phra la sogs las 'das/ /char yang thig le dang bral ba/ /tshul dang tshul tsam ma yin te/ /mchog dang gzhan mchog gnas las grol/ /skye ba med dang 'chi med pa/ /rmad byung chen po'i 'du shes so/ /lha mos gsol pa/ 85.52b kye bcom ldan 'das ye shes chen po'i dbang phyug bla na med pa yang dag pa'i byang chub rnyed pa la ye shes chen po brjod du med pa'i gnas gzhan rnyed pa yod dam ci/ bcom ldan 'das kyis bka' stsal pa/ grangs med pa'i sangs rgyas rnams kyi yum khyod ci la de lta bur 'dri/ brjod du med pa'i ye shes chen po khyod kyis ci'i phyir mi shes/ de ltar yin na bdag gi rang gi ngo bo yang dag par khyod kyis mi shes so/ /lha mos gsol pa/ khyod kyi ngo bo bdag gis shes/ /'on kyang bdag gis gzhan zhig zhus/ /sems can byang chub las gzhan ci/ /mchog gi dbang phyug rnyed pa 'am/ /bcom ldan 'das kyis bka' stsal pa/ /byang chub rnyed las gzhan ci zhig /zhal bzang mo de rnyed yod dam/ /'on kyang de la mthong ba yod/ /tshil la bdud rtsi ji bzhin no/ /lha mos gsol pa/ bcom ldan dpa' bo'i dpa' dbang phyug /rang bzhin ye shes sbyin pa po/ /bdag gis gzhan zhig zhu ba bgyid/ /de la bka' drin bdag la stsol/ /dbang gi rim pa'i ye shes gang / /bzhi pa de ltar de bzhin no/ /de la re shig ji bzhin don/ /rdo rje 'dzin pa bdag la gsungs/ /bcom ldan 'das kyis bka' stsal pa/ /bzhi pa de nyid ngo bor grags/ /de ltar ye shes 'du shes so/ /de bzhin ye shes las byung shes/ /ye shes las byung lte bar bde/ /lha mo ye shes kha la yod/ /ye shes las byung ske ru ste/ /ske ru longs spyod ngo bor grags/ /snying ga ru ni dbang zhes bya/ /thim pa kha ru shes bya ste/ /bskyed pa'i rim pa yi ni phyogs/ /yang na de bzhin gyi ni sgra/ /ji bzhin shes rab la sngar thal/ /de ltar ye shes lta ba yis/ /bkug nas rang gi kha la bkod/ /rang gi 85.53a snying ga'i bad gnas su/ /byas nas nyid kyis nyams su myong / /de yi skad cig ye shes bde/ /spros pa dang bral rtog med pa/ /sems kyis thams cad mthong nas su/ /nam mkha' bzhin du bsam par bya/ /de yang bsam pa bor nas su/ /phyi nas bsam pa ci yang med/ /nyid ni bde chen ye shes te/ /nam mkha' zla ba bzhin du mthong / /lha mo de ni rdzogs pa'i rim/ /don dam par ni shes par bya/ /lha mos gsol pa/ bcom ldan ye shes rin chen nyi/ /'dod pa thams cad rab grub pa/ /snang ba bzhi la go rims gnas/ /mnga' bdag chen pos bka' stsol cig /bcom ldan 'das kyis bka' stsal pa/ /snang ba bzhi la go rims gnas/ /sems dang sems byung 'du shes so/ /de dag las ni ma rig 'byung / /mtshams kyi 'du shes mtshan nyid can/ /nyin mo'i rang bzhin sems las 'byung / /sems ni mtshan mo'i ngo bo nyid/ /yang dag 'od ni gsum dang bral/ /lhan skyes ye shes mtshan nyid do/ /gang tshe tshangs pa'i tshigs su sems/ /lha mo de tshe nyin mor 'gyur/ /gang tshe de las srog 'pho ba/ /de tshe mtshan mo 'og na gnas/ /steng yang ma yin 'og yang min/ /de tshe mtshams shes dran par bya/ /de yang me yi rang bzhin grags/ /nyi ma la ni srog 'dzin ma/ /gang gis nyi ma yod pa ni/ /snang ba las ni shar du 'gyur/ /snang ba zla ba zhes par bstan/ /yongs su zhu ba'i bdud rtsi g.yo/ /lha mo chen mo g.yo ba'i phyir/ /dga' bral dga' bar rab tu grags/ /gang du chad pa las ni thim/ /mchog gis dga' ba shar ba'i dus/ /de ni snang ba dang po'i dga'/ /de las mchog ni gsal bar 'gyur/ /gsang phyir snang ba mched par grags/ /zhu med g.yo med ska ba'o/ /dka' ba la ni phra mo'i dngos/ /bde sbyin yang na kun spyod do/ /kun spyod las ni thob pa yin/ /zhal bzangs mo ni snang bas 85.53b so/ /de ni mtshams zhes grags pa ste/ /dbus kyi gnas su yod pa'i phyir/ /dbus kyi gnas na yod pa na/ /de phyir kun tu spyod byed pa'o/ /dbus ni dngos po thams cad la/ /'dus par byed pa dran pa'o/ /yang na gang du mtshan mo ni/ /ma byung nyi ma nub pa'o/ /de ni dbus kyi mtshams zhes grags/ /rang bzhin dga' ba sbyin byed ma/ /de nyid snang ba thob pa yin/ /thams cad skye ba'i rgyu yin no/ /gang du dbus mtshams skad cig gis/ /bde ba'i tshor ba ma shes na/ /skal ldan lha mo de ru ni/ /dga' bral gsal bar 'gyur ba'o/ /de yi nyams su myong shes pa/ /skyon ni cung zad mi byed do/ /mi shes pas ni skal ldan mo/ /rtsa ba dang bcas med par byed/ /rtsa ba snang ba zhes byar dran/ /khu ba'i gzugs ni zla ba'o/ /bde ba chen po'i bdud rtsi'i gter/ /bsrubs las skye ba yin pa'i phyir/ /lha mo me tog snang ba mched/ /dmar ba'i phyir ni nyi ma brjod/ /bde chen rnam par smin pa'i phyir/ /dmar ba'i gzugs ni sngar 'gyur ro/ /'bras bu thob pa'i grags pa ste/ /mtshan dang dpe byad dang ldan no/ /dngos dang dngos min bral ba'i phyir/ /zhal bzangs mtshams kyi ye shes so/ /nyin mo snang ba mched 'khor grags/ /mtshan mo snang ba mya ngan 'das/ /srid dang mya ngan 'das bral ba/ /mtshams ni snang ba thob pa'o/ /de lta bu yi gsang chen mchog /gang du yang ni gsal ma byas/ /skal ldan khyod kyi ngor byas pas/ /ye shes rin chen gsal byas so/ /lha mos gsol pa/ 'bras bu de nyid rin chen gang / /mnga' bdag de ni ji ltar rnyed/ /bcom ldan 'das kyis bka' stsal pa/ /'bras bu de ni rin chen gang / /de ni gnyis su dbye bar gnas/ /mchog gi 85.54a dga' ba'i ngo bo gcig /mchog gi dga' ba dang bral ba/ /mchog dga' ngo bor grags pa ni/ /nyams su myong ba'i rnyed pa yin/ /mchog gi dga' ba dang bral ba/ /rang las rab tu gsal bar 'gyur/ /skal ldan mo gang nyams su myong / /de ni rdzogs pa'i rang bzhin no/ /nyams su myong min rdzogs pa ni/ /gang du sus kyang mi shes so/ /ji ltar bu mo lang tshor bab/ /skyes bu med na nam yang min/ /legs dgyes kyi ni bde myong ba/ /legs dgyes dbang mo mi shes so/ /gang zhig bsam pa la sogs kyis/ /de ni bskyed pa'i mtshan nyid do/ /bskyed pa dang ni rdzogs bral ba/ /de ni 'bras mchog rang bzhin no/ /de ru gang zhig sgom pa ni/ /phra mo'i phra mo yang dag mchog /gang gis bla na med pa rnyed/ /'gro ba'i ma de yod pa min/ /bla na med pa'i ye shes che/ /bzhi dang bral ba rtag tu shar/ /rtag tu shar ba las gzhan ci/ /gang du yang na bsgom yod dam/ /gal te gang gis bsgom pa de/ /khyad par can du yong mi skye/ /mi skye'i phyir na bsam gtan ngal/ /gal te khyad par 'ong 'gyur na/ /de ni de nyid rang bzhin min/ /de nyid min par the tshom med/ /de nyid mi sgom de nyid ni/ /su zhig de la rnyed par 'dod/ /de ni mkha' la ri mo ni/ /mchog gi dbang mo 'dri ba'o/ /lha mos gsol pa/ gsang ba chen po'i rgyud 'di ni/ /shes pa dang ni bshad pas su/ /bcom ldan 'das kyis bka' stsal pa/ byang phyogs su dpal rdo rje'i gnas au D+yan du rgyal po in+d+ra b+hU ti zhes bya bas shes pa dang bshad pa dang / sems can la gsal bar byed do/ /lha mos gsol pa/ kye bcom ldan 'das rgyal po chen po in+d+ra b+hU ti zhes bya ba de sa du'i 85.54b dbang phyug lags/ bka' stsol cig /bcom ldan 'das kyis bka' stsal pa/ dpal ye shes thig le'i rgyud kyi rgyal po las gang zhig ngas bstan pa'i phyag na rdo rje'i rgyal po de nyid in+d+ra b+hU ti sprul pa'i skus sa bcu'i dbang phyug ye shes kyi sku sa bcu bzhi'i dbang phyug go/ /bcom ldan 'das kyis de skad ces bka' stsal pa dang / ri rab kyi nyi rdul gyi grangs bcom ldan 'das ma dang lhan cig tu stan las langs te/ lan gsum du skor ba byas nas zhabs la mgo bos phyag 'tshal te/ rang rang gi rdzu 'phrul gyis sna tshogs pa'i mchod pas mchod sbyin byas nas bstod pa/ de kho na nyid bdud rtsi'i rgya mtsho'i snying po rab mchog rgyal gyur cig /ye shes nam mkha' skye med gzugs med brjod med sku rab rgyal gyur cig /dngos dang dngos min ro gcig ngo bo'i rmad byung de nyid rab gter rgyal gyur cig /stong nyid stong pa nyid min mchog dang gzhan mchog 'od kyis grub pa rgyal gyur cig / de lta bu'i bstod pa'i rgyal pos bstod nas/ 'khor thams cad bcom ldan 'das dang bcas par mi snang bar gyur to/ /dpal rnal 'byor ma chen po'i rgyud kyi rgyal po'i rgyal po mchog chen po rmad du byung zhing / rmad du byung ba de kho na nyid kyi sgron ma zhes bya ba rdzogs so// //rgya gar gyi mkhan po chen po pradz+nyA shrI gup+tas bsgyur cing zhus te gtan la phab pa/ dus phyis dpal sa skya'i dben gnas su bsgyur cing zhus te dag par byas so/ / 85.55a [This is a blank page with] [blank image] |