rgya gar skad/ shrI rA ga rA dza tan+t+ra rA dza/ bod skad du/ dpal chags pa'i rgyal po'i rgyud kyi rgyal po/ dpal rdo rje mkha' 'gro la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'-i b+ha ga la bzhugs so/ /de nas byang chub sems dpa' sems dpa' chen po rdo rje snying pos spos dang me tog la sogs pa'i mchod pas mchod nas/ he he dpa' bo 'jigs pa che/ /sems can sangs rgyas rang bzhin nas/ /mtshan dang dpe byad gang dang gang / /stong dang de bzhin rnam thar dang / /brdzus skyes mngal skyes rgong skyes dang / /drod gsher gnyis gsum bzhi char ci/ /bcom ldan 'das kyis bka' stsal pa/ /a ni dbu yi gtsug tor te/ /a ni dbu skra g.yas su 'khyil/ /i ni dpral ba'i dbyes mnyam pa/ /I ni smin mtshams mdzod spu ste/ /u ni spyan smig mthon mthing la/ /ba yi rdzi ma lta bu'o/ /U tshems bzhi bcu mnga' ba ste/ /ri r-I tshems mnyam tshems thags bzang / /li lI tshems dkar ro bro mchog /e ni 'gram pa seng ge 'dra/ /ai ljags shin du srab pa ste/ /o ni tshangs pa'i dbyangs dang ldan/ /au n-i dpung mgo shin du zlum/ /a~M ni bdun mtho ba ru gsungs/ /aHni thal gong rgyas pa ste/ /'di dag bcu drug g.yas skor ro/ /de nas g.yon skor mtshams nas kyang / /a ni lpags srab mdog gser 'dra/ /A ni bzhengs bzhin ma btud par/ /phyag gnyis pus mo sleb pa'o/ /i ni ro stod seng ge 'dra/ /i ni shin+ya gro lta bur/ /chu dang zheng ni gab pa'o/ /u ni mdzod spu g.yas su 'khyil/ /U ni spu rnams gyen du phyogs/ /ri 'doms 87.60b sba ba sbubs su nub/ /rI brla legs par zlum pa'o/ /l-i ni zhabs long tshigs mi mngon/ /l-I Ni phyag zhabs 'jam zhing gzhon/ /l-I ni phyag mthil zhabs kyi mthil/ /'jam zhing gzhon sha rgyas pa'o/ /e ni phyag zhabs dra bas 'brel/ /ai ni sen mo ring ba ste/ /o ni phyag dang zhabs mthil la/ /'khor lo dang ni ldan pa yin/ /au n-i zhabs ni shin du gnas/ /a~M zhabs rting pa yangs pa ste/ /aHni byin pa ri dgas ni/ /e na ya yi lta bu ste/ /spyi bo'-i mi shigs snying po ha~M/ /ston pa sum bcu rtsa gnyis mtshan/ /ka ni sen mo zangs mdog 'dra/ /kha ni sen mo mdog snum pa/ /ga ni sen mo mtho ba ste/ /g+ha ni sor mo rnams zlum pa/ /nga ni sor mo rnams rgyas pa/ /tsa ni sor rnams byin gyis phra/ /tsha ni rtsa rnams mi mngon pa/ /dza ni rtsa mdud med pa yin/ /dz+ha ni long bu mi mngon pa/ /nya ni zhabs mi mnyam pa med/ /Ta ni seng ge'i stabs su gshegs/ /Tha ni glang po'i stabs su gshegs/ /Da ni ngang pa'i stabs su gshegs/ /D+ha ni khyu mchog stabs su gshegs/ /Na ni g.yon phyogs ldog cing gshegs/ /ta ni mdzes par gshegs pa ste/ /tha ni mi g.yo bar gshegs pa/ /da ni sku la 'khril bag chags/ /d+ha sku byi dor byas pa 'dra/ /na sku rim par 'tsham pa'o/ /pa ni sku gtsang pha sku 'jam/ /ba sku rnam par dag pa'o/ /b+ha ni mtshan rdzogs ngo bo nyid/ /ma sku kho lags yangs shing bzang / /ya ni gom pa snyoms pa'o/ /ra sku shin du gzhon mdog can/ /la ni sku la 'khrul pa med/ /wa ni sku lus rgyas pa ste/ /sha ni shin du grims pa'o/ /Sha ni yan lag thams cad mdzes/ /sa gzigs rab rib med cing dag /ha dku zlum pa nyid yin te/ /k+Sha ni sku skabs phyed pa'o/ /ya ni sku snyoms pa yin te/ /ra ni phyal phyam med pa yin/ / 87.61a la ni lte ba zab pa ste/ /wa ni lte ba g.yas su 'khyil/ /d+ha ni kun nas mdzes pa ste/ /d+ha ni kun spyod gtsang ma yin/ /'di dag thabs kyi rang bzhin gyis/ /g.yas nas bskor ba bzhi bcu yin/ /de nas g.yon gy-is bzhi bcu ni/ /ka ni sku sme gnag bag med/ /kha ni shing bal ltar 'jam phyag /ga phyag ri mo mdangs yod pa/ /g+ha phyag ri mo zab pa dang / /nga phyag ri mo ring ba'o/ /ca zhal ha cang mi ring ba/ /tsha zhal gzugs kyi gzugs brnyan snang / /dza dz+ha ljags mnyen ljags srab pa/ /nya ni ljags dmar ngo bo ste/ /glang po'-i nga ro 'brug sgra Ta/ /Tha ni gsung snyan mnyen 'jam pa/ /Da D+ha mche ba zlum dang rno/ /Na Ni mche dkar ta tshems mnyam/ /tha ni mche ba byin gyis phra/ /da shangs shin du tho ba dang / /d+ha shangs shin du gtsang ba'o/ /na ni spyan 'od rnam par dag /pa pha spyan bzang rdzi ma stug /ba ni dkar nag phyed pad ma'i/ /'dab ma'i mdangs 'dra pad ma'i spyan/ /b+ha ni de bzhin smin mtshams ring / /ma ya smin mtshams smin spu mnyam/ /ra ni de bzhin smin ma snum/ /la ni phyag ring rgyas pa'o/ /de bzhin wa ni snyan shal mnyam/ /snyan gyi dbang po ma nyams sha /dpral ba legs par 'byes pa Sha/ /sa ni dpral ba'i dbyes che ba/ /ha ni dbu dag shin du rgyas/ /dbu skra bung ba ltar gnag k+Sha/ /dbu skra stug pa ya yin te/ /de bzhin dbu skra 'jam ba ra/ /dbu skra mi 'dzing ba ni la/ /dbu skra mi gshor ba ni wa/ /dbu skra dri zhim d+ha yin te/ /phyag la dpal gyi be'u dang ni/ /bkra shis g.yung drung 'khyil bas brgyan/ /ldong ros lta bu d+ha yin te/ /lte ba sprul pa'i snying po a~M/ /gtso bo dpe byad brgyad bcur ldan/ /a ni phyi nang stong pa nyid/ /A ni stong pa nyid stong 87.61b pa/ /i ni chen po stong pa nyid/ /I ni don dam stong pa nyid/ /u ni 'dus byas stong pa nyid/ /U ni 'dus ma byas stong pa/ /rI ni mtha' las 'das stong pa/ /rI ni thog mtha' stong pa nyid/ /li ni dor ba med pa stong / /l-I ni rang bzhin stong pa nyid/ /e ni chos rnams thams cad stong / /ai n-i rang gi mtshan nyid stong / /o ni mi dmigs stong pa nyid/ /au ni dngos po med stong nyid/ /a~M ni ngo bo stong pa nyid/ /dngos med ngo bo stong nyid aH/ /mgrin pa longs spyod snying po o~M/ /shes rab stong pa bcu drug rtsa/ /gzugs can gzugs rnams la lta ba/ /rnam par thar pa dang po a/ /nang gzugs med par 'du shes pas/ /phyi rol gzugs rnams la lta ba/ /rnam thar gnyis pa ka yin no/ /sdug pa rnam par thar pa'i lus/ /mngon sum byas nas rdzogs pa ni/ /de dag rnam thar gsum pa tsa/ /gzugs kyi 'du shes las 'das pa/ /sna tshogs 'du shes yid mi byed/ /nam mkha' mtha' yas la gnas Ta/ /nam mkha' mtha' yas las 'das te/ /rnam shes mtha' yas la gnas shing / /rnam shes mtha' yas rdzogs pa ste/ /rnam shes mtha' yas las 'das nas/ /ci yang med pa la gnas te/ /de nyid rdzogs pa pa yin no/ /ci yang med pa las 'das te/ /'du shes med min la gnas te/ /'du shes med min rdzogs pa yi/ /'du shes med min la 'das te/ /'du shes tshor ba 'gog pa'i lus/ /mngon sum byas nas rdzogs pa ni/ /rnam pa par thar pa brgyad pa sha / /snying ga chos kyi 'khor lo hU~M/ /gtso bo rnam thar brgyad dang ldan/ /'di dag rtsa yi rnam par gnas/ /'khor lo'i rgya ni sor gsum ste/ /sems can kun la rang bzhin 87.62a gnas/ /de phyir sems can sangs rgyas yin/ /sna tshogs bsdud pa'i mtshan nyid kyang / /ring du 'byung zhing thung du gnas/ /smin mtshams kyi ni mdzod spu bzhin/ /chos kyi 'byung gnas lte ba la/ /g.yas g.yon bu ga lnga lnga ste/ /steng 'og kha yi bar nas 'byung / /ro ma shar du mngon du phyogs/ /rkyang ma nub ste 'og gi char/ /ro mas rkyang ma la 'khyud cing / /g.yas pa'i cha ru zung 'jug nyid/ /rkyang mas ro ma la 'khyud cing / /g.yon gyi cha ru zung 'jug nyid/ /g.yas g.yon rtse mo sku gsung thugs/ /de sgra sngags su rab tu grags/ /sngags dang rgyud dang dngos grub sogs/ /de nyid las ni byung bas na/ /sems can sangs rgyas rang bzhin no/ /skye ba bzhi yi rim pa yang / /snod bcud yab yum la thim ste/ /yab yum nyi ma zla bar 'gyur/ /snang ba'i thig le yang dag bcas/ /'di dag nang gi mngal skyes tshul/ /A li kA li nyi zla ste/ /sems ni thig le'i ngo bor gnas/ /nang gi sgong skyes yin par 'dod/ /kA dang A las nyi zla ste/ /rang byung thig le drod gsher yin/ /de dag skad cig rkyen med las/ /rang bzhin 'byung ba rdzus skyes so/ /rkyen med sbyor ba sgong sogs las/ /bde ba skye dang bde ba'i rgyu/ /thams cad dran pa gsang ba yi/ /mngal nas skyes pa'i tshul yin te/ /yar la sreg dang mar la gso/ /gnas gsum nyi shu bzhir 'pho yin/ /phyi nang 'dod pa'i mtshan ma yis/ /rtsa rgyas bde ba ster ba dang / /rin po che yi pho brang du/ /sems 'dzin gsang ba'i sgong skyes yin/ /nang gi 'dod pa'i mtshon cha yis/ /bde ba skye ba drod gsher skyes/ /gang gi rkyen gyis ma skyes par/ /gdod nas bde ba'i rgyur skyes la/ /bde ba skyes pa rdzus skyes so/ /gtum mo go bzlog rkyen gyis 87.62b sbar/ /gtum mo rkyen gyis sbar ba dang / /gtum mo go bzlog sbar ba dang / /gtum mo rang bzhin sbar ba ni/ /mngal skyes sgong skyes drod gsher skyes/ /rdzus skyes rim par sbyar bar bya/ /du ma'i gzhi bcas gzhi bcas dang / /gzhi med shin du gzhi med de/ /mngal skyes gong skyes drod gsher skyes/ /rdzus skyes bzhi char rim par sbyar/ /rgyu dang lam ste 'bras bu kun/ /skye ba bzhi yi ngo bor gcig /de phyir sangs rgyas sems can gnyis/ /dngos po ro mnyam gyur pa la/ /log rtog sgyu mas gnyis su 'khrul/ /rdo rje snying po snying rje che/ /nang dang gsang ba'i dkyil 'khor yang / /nga yis bshad kyis legs par nyon/ /sku yi dkyil 'khor spyi bor bsgom/ /gsung ni mgrin pa thugs ni snying / /yon tan lte ba phrin las n-i/ /sna rtse dag tu bsam par bya/ /'bar ba bzhi yi a la yang / /rdo rje phag mo rab tu grags/ /ha~M ni bde mchog he ru ka /dpa' bo gcig pa yin par 'dod/ /bdun pa dang ni dgu pa dag /gsum pa hU~M las rab tu grags/ /bcu gsum pa dang bcwa lnga pa/ /bcu dgu o~M las rab tu grags/ /nyi shu rtsa lnga nyi shu dgu/ /ha~M gi ngo bor yang dag gnas/ /sum bcu bdun dang drug bcu bzhi/ /a yi dkyil 'khor yin par nges/ /rtsa ni rdo rje phag mo ste/ /g.yas g.yon phyag la dbu ma zhal/ /dpa' bo byang chub sems yin te/ /skye mched bcu gnyis dngas ma yang / /bcu gnyis phyag tu rab tu grags/ /'byung bzhi'i dngas ma zhal bzhir nges/ /mdzes pa'i phyir na rgyan du bshad/ /gsung mchog bla ma'i zhal nas blang / /g.yas g.yon steng 'og sgo bzhi ste/ /mdom gang mnyam pa gru bzhi yin/ /bdud rtsi lnga ni tshon rtsi lnga/ /rtsa ni thig 87.63a gi rang bzhin te/ /ka ba brgyad ni rkang brgyad do/ /so sen ba spu twa ra sogs/ /mkhas pas brtag cing shes par bya/ /'di dag rang bzhin dkyil 'khor te/ /dper na rang byung gser dang 'dra/ /'di ni bcos ma ma yin te/ /rang rig ye shes gzugs brnyan ni/ /gzugs brnyan dkyil 'khor bsgom pa min/ /rdul tshon la sogs bri ba min/ /spos la sogs pas mchod pa min/ /rdo shing lha la phyag mi bya/ /rang bzhin gnas pa'i sangs rgyas la/ /rang bzhin mchod pas rtag tu mchod/ /sku ni dgun dus rang bzhin te/ /'byung ba'i sku gsum zla ba gsum/ /gsung ni dpyid dus ngo bo ste/ /'jug pa'-i sku gsum zla ba gsum/ /thugs ni dbyar dus ngo bo ste/ /gnas pa sku gsum zla ba gsum/ /ye shes ston gyi dus yin te/ /sku gsung thugs ni zla ba gsum/ /dang po rgyu yi sa pa yin/ /'khor lo chags pa dmar po la/ /yi ge rnams n-i dkar pos gnas/ /lam gyis sa ba rnam pa gnyis/ /ring ba dang ni nye ba'o/ /de nas 'bras bu'i sa ba yin/ /'khor lo yang dag gnas pa ste/ /'khor lo de rnams lha rnams kyang / /sku mdog phyag mtshan kun dang bral/ /rang bzhin gsal ba dri ma med/ /shel ltar gsal ba dri ma med/ /mi mthong mthong ba'i ngo bo can/ /zab cing phra ba'i rang bzhin can/ /phyi ru sku mdog phyag mtshan lha/ /nang gi shin du phra ba'i gzugs/ /gsang ba'i bde ba lha ru nges/ /de las bzlog pa bzhi pa'i lha/ /lus las byung phyir lha zhe 'am/ /rgyud rnams dag byed phyir na lha/ /chags pa'i phy-ir na lha yin te/ /rgyal po shes rab rang bzhin te/ /thabs dang shes rab rang bzhin gyi/ /chags pa chen po'i rgyud gsungs so/ /de nas sa chen po yang cher g.yos par gyur te/ 87.63b mchod pa'i sprin gyi char chen po yang babs par gyur to/ /de nas dpa' bo dang mkha' 'gro ma rnams kyang rgyud kyi don la dga' zhing mgu ste rjes su yi rang nas mi snang bar gyur to/ /dpal chags pa'i rgyal po'-i rgyud kyi rgyal po rdzogs s+ho// // rnal 'byor ma tsan+d+ra mA le dang / lots+tsha ba dge slong shAkya ye shes kyis bsgyur ba'o/ / |