@#/ /rgya gar skad du/ DA ki nI sarba tsit+ta a dwa ya a tsin+ta dz+nyA na badzra bA rA hi a b+hi b+ha ba tan+t+ra rA dza nA ma/ bod skad du/ mkha' 'gro ma thams cad kyi thugs gnyis su med pa bsam gyis mi khyab pa'i ye shes rdo rje phag mo mngon par 'byung ba'i rgyud kyi rgyal po zhes bya ba/ mgon po dpa' bo 'jigs byed dpal he ru ka la phyag 'tshal lo/ /'di skad bdag gis thos pa dus gcig na/ phyi dang nang dang gsang ba'i dur khrod chen po'i gnas mchog tu gyur pa na/ bcom ldan 'das zhe sdang 'joms pa'i he ru ka dang / gti mug 'joms pa'i he ru ka dang / nga rgyal 'joms pa'i he ru ka dang / 'dod chags 'joms pa'i he ru ka dang / phrag dog 'joms pa'i he ru ka dang / yum sangs rgyas spyan dang / yum mA ma kI dang / yum gos dkar mo dang / yum dam tshig sgrol ma dang / yum kun du bzang mo dang / de rnams kyi b+ha ga la lhan cig skyes pa'i ye shes bsam gyis mi khyab pa'i tshul du bzhugs so/ /de'i tshe de'i dus na ye shes kyi mkha' 'gro ma dur khrod kyi bdag mo dang / khros ma nag mo dang / bde chen dkar mo dang / ser mo don 87.82b grub ma dang / dmar mo sgra sgrog ma dang / sna tshogs mthar phyin ma dang / las kyi gtso mo la sogs pa'i ye shes dang / las la grub pa'i mkha' 'gro ma'i tshogs dpag tu med pa dang / gzhan yang badzra DA ki nI dang / rat+na DA ki nI dang / pad+ma DA ki nI dang / karma DA ki nI dang / sa ma ya DA ki nI dang / bi Sha DA ki nI dang / sarba DA ki nI dang / lo ka DA ki nI la sogs te dur khrod brgyad kyi mkha' 'gro ma dang / dpa' bo dang dpa' mo'i tshogs dpag tu med pa dang / gzhan yang 'jig rten pa'i mes po changs pa dang / brgya byin la sogs pa'i lha'i tshogs dpag tu med pa dang / gzhan yang rgyal po chen po bzhi po rang gi 'khor dang bcas pa dang / phyogs skyong ba bcu dang / lha ma srin sde brgyad dang / 'khor dpag tu med pa dang thabs gcig pa'i tshul gyis gnas so/ /yang de'i tshe na ye shes kyi mkha' 'gro ma dur khrod kyi bdag mo zhes bya ba rang gi stan las langs nas mgon po dpa' bo 'jigs byed he ru ka la 'di skad ces gsol to/ /kye kye mgon po bdag la gson/ /khyed kyi 'khor du 'dus pa yi/ /skal dang ldan pa 'di rnams la/ /lam log mu stegs ma lags pa'i/ /dman pa nyan thos ma lags pa'i/ /ma smin mtshan nyid ma lags pa'i/ /bsam gyis mi khyab chos cig zhu/ /phyogs ris med pa lta ba'i mchog /bsam gyis mi khyab bshad du gsol/ /dgag sgrub med pa spyod pa'i mchog /bsam gyis mi khyab bshad du gsol/ /bar chod sel ba bde yi mchog /bsam gyis mi khyab bshad du gsol/ /smin par byed pa dbang gi mchog /bsam gyis mi khyab bshad du gsol/ /sangs rgyas thob byed 'bras bu'i mchog /ye shes lnga yi gzugs brnyan te/ /bsam gyis mi khyab bshad du gsol/ /rnam rtog sel byed rnam rgyal lnga/ /bsam gyis mi khyab bshad du gsol/ /mkha' 'gro ma thams cad kyi thugs gnyis su med pa'i ye shes bsam gyis 87.83a mi khyab pa phag mo mngon par 'byung ba zhes bya ba las/ gleng gzhi'i le'u ste dang po'o// // de nas mgon po des spyan phyogs mtshams kun la gzigs nas zhal rdo rje'i mgur 'dzum pa mdzad nas bka' stsal pa ni/ e ma ho/ nyon gcig dur khrod bdag mo khyod/ /dus 'dir tshogs pa'i 'khor rnams la/ /mngon par 'byung ba'i rgyud bshad kyis/ /kha sbub zhabs rdol dri ma can/ /snod skyon gsum po spang byas la/ /rtse gcig sems kyis mnyan par gyis/ /phyogs ris med pa'i lta ba de/ /gnyug ma'i sems kyis blta bar gyis/ /dmigs gtad med pa'i sgom pa ni/ /gnyug ma'i yid kyis bsgom par bya/ /dgag sgrub med pa spyod pa'i mchog /gnyug ma'i yid kyis spyad par bya/ /bar chod sel ba brda yi chos/ /gnyug ma'i yid kyis bsal bar bya/ /smin par byed pa dbang gi mchog /gnyug ma'i sems kyis bskur bar bya/ /tshe gcig 'bras bu sangs rgyas de/ /gnyug ma'i sems kyis bsgrub par bya/ /ye shes lnga yi gzugs brnyan de/ /ma bcos sems kyis bsgrub par bya/ /rnam rtog sel byed rnam rgyal lnga/ /ma bcos sems kyis gcad par bya/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa las phag mo mngon par 'byung ba'i rgyud las ston pas zhal gyis bzhes pa'i le'u ste gnyis pa'o// // de nas ston pas bka' stsal pa/ /tshe gcig sangs rgyas thob 'dod pas/ /dang po gdeng chen lta ba gces/ /des na lta ba dang por bstan/ /phyogs ris med pa lta ba'i mchog /nam mkha' lta bu shes par gyis/ /thams cad 'degs pa lta ba'i mchog /sa gzhi lta bur shes par gyis/ /thams cad bsdud pa lta ba'i mchog /'byung ba chu ltar shes par gyis/ /nyon mongs bsreg pa lta ba'i mchog /'byung ba me ltar shes par gyis/ /ngos gzung med pa lta 87.83b ba'i mchog /'byung ba rlung ltar shes par gyis/ /de nas yang ston pas gsungs pa/ 'pho 'gyur med pa lta ba'i mchog /ri bo lta bur shes par gyis/ /g.yo 'gul med pa lta ba'i mchog /rgya mtsho lta bur shes par bya/ /gsal la ma 'dres lta ba'i mchog /'ja' tshon lta bur shes par gyis/ /gnyis su med pa lta ba'i mchog /ga bur lta bur shes par bya/ /de nas yang gsang bas tshig 'di gsungs te/ zil gyis gnon pa lta ba'i mchog /seng ge lta bur shes par bya/ /nyam nga med pa lta ba'i mchog /glang chen lta bur shes par bya/ /stobs dang ldan pa lta ba'i mchog /rta mchog lta bur shes par bya/ /kun du rgyug pa lta ba'i mchog /stag mo lta bur shes par bya/ /'jigs pe med pa lta ba'i mchog /dom bu lta bur shes par bya/ /de nas yang gsang ba'i tshig 'di gsungs te/ skyon gyis ma gos lta ba'i mchog /byang chub sems de dkar por snang / /dus gsum mi 'gyur lta ba'i mchog /byang chub sems de nag por snang / /yon tan rgyas pa lta ba'i mchog /byang chub sems de ser por snang / /kun la khyab pa lta ba'i mchog /byang chub sems de dmar por snang / /phrin las rdzogs pa lta ba'i mchog /byang chub sems de ljang khur shar/ /de nas yang gsang ba'i tshig gsungs te/ dus gsum snang ba lta ba'i mchog /rnam par snang mdzad lta bur shar/ /chos nyid don la rtag sems pas/ /rdo rje sems dpa' lta bur shar/ /thams cad mnyam pa nyid rtogs pas/ /rin chen 'byung ldan lta bur shar/ /chos can so sor ma 'dres pas/ /snang ba mtha' yas lta bur shar/ /sna tshogs snang la ma 'dres pas/ /don yod grub pa lta bur shar/ /zhes pa gsungs so/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las lta ba bstan pa'i le'u ste gsum 87.84a pa'o// // de nas dur khrod bdag mo des/ /ston pa la ni 'di skad zhus/ /rtogs pa lta ba'i rjes thogs la/ /bsgom pa'i go rims ji lta bu/ /zhes zhus pas/ de nas ston pas bka' stsal pa/ /sangs rgyas thob par 'dod pa yis/ /rtogs pa'i don go bsgoms las byung / /gzhan du 'bras bu 'byung mi 'gyur/ /sna tshogs snang ba'i chos rnams kun/ /ye nas spros dang bral ba la/ /rtag par 'dzin pa bsgom pa'i skyon/ /phyi dang nang gi chos nyid la/ /chad par 'dzin pa bsgom pa'i skyon/ /'o na ji ltar bsgom zhes na/ /lam med lam gol dman pa'i lam/ /'di rnams spangs te bsgom par bya/ /dang po byang chub sems bskyed de/ /smon 'jug gnyis po sngon du gces/ /gzung ba yul med sgom pa'i mchog /chos kyi bdag med rtogs par bya/ /'dzin pa'i sems med sgom pa'i mchog /gang zag bdag med rtogs par bya/ /chos rnams gang yin mi 'gegs pas/ /thabs kyi lam du shes par bya/ /ngo bo ci yang ma grub pas/ /shes rab lam du shes par bya/ /chos rnams rgyu med sgom pa'i mchog /stong pa nyid kyi rnam thar yin/ /'bras bu stong pa sgom pa'i mchog /mtshan med pa'i rnam thar yin/ /rgyu 'bras dbyer med sgom pa'i mchog /smon pa med pa'i rnam thar yin/ /kun la byams pa sgom pa'i mchog /byams pa tshad med rang bzhin yin/ /kun la brtse ba sgom pa'i mchog /snying rje tshad med ngo bo nyid/ /kun la phan pa sgom pa'i mchog /dga' ba tshad med ngo bo nyid/ /kun la khyab pa sgom pa'i mchog /btang snyoms tshad med ngo bo nyid/ /bsod nams tshogs sog sgom pa'i mchog /bzhi gsum bcu gnyis bdag nyid can/ /lam la bsgoms pa sgom pa'i mchog /nges 'byed bzhi'i bdag nyid can/ /ye shes mthong ba sgom pa'i mchog /byang chub yan lag rnam bdun yin/ /goms par byed pa sgom pa'i lam/ /'phags lam brgyad kyi bdag 87.84b nyid can/ /goms pa mthar phyin sgom pa'i mchog /bcu pa la ni yongs su grol/ /sangs rgyas pa'i rnam thar yin/ /chags sems bral ba sgom pa'i mchog /sbyin pa'i pha rol phyin pa yin/ /rang sems dag pa sgom pa'i mchog /tshul khrims pha rol phyin pa yin/ /ji mi snyam pa sgom pa'i mchog /bzod pa'i pha rol phyin pa yin/ /go cha sbyor ba sgom pa'i mchog /brtson 'grus pha rol phyin pa yin/ /g.yeng ba med pa sgom pa'i mchog /bsam gtan pha rol phyin pa yin/ /'khor 'das shes pa sgom pa'i mchog /shes rab pha rol phyin pa yin/ /nyon mongs mi spong sgom pa'i mchog /thabs kyi pha rol phyin pa yin/ /mi mthun zil gnon sgom pa'i mchog /stobs kyi pha rol phyin pa yin/ /ci bsams 'grub pa sgom pa'i mchog /smon lam pha rol phyin pa yin/ /ji snyed mkhyen bya sgom pa'i mchog /ye shes pha rol phyin pa yin/ /chos dbyings ye shes sgom pa'i mchog /spros pa med pa'i rang bzhin yin/ /me long ye shes bsgom pa'i mchog /thams cad gzugs brnyan ltar shes yin/ /mnyam nyid ye shes bsgom pa'i mchog /kun la snyoms pa'i bdag nyid yin/ /kun rtog ye shes sgom pa'i mchog /ma 'dres gsal ba'i ngo bo nyid/ /bya grub ye shes sgom pa'i mchog /phrin las thams cad dus gcig rdzogs/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud ces bya ba las sgom pa'i le'u ste bzhi pa'o// // de nas dur khrod bdag mo des/ /he ru ka la 'di skad gsol/ /goms par bya ba'i rjes thob la/ /spyod pa'i go rims ji ltar bgyi/ /de nas ston pas gsang ba'i tshig 'di skad ces bka' stsal to/ /cung zad drod ni thob pa dang / /de tshe spyod pa spyad par bya/ /dang po gsang ba'i spyod pa bya/ /byang chub sems ni drod thob nas/ /rig pa rtul zhugs spyod par bya/ /lhan 87.85a cig skyes pa'i drod thob nas/ /ma dad zlog pa'i spyod pa bya/ /chu tshod lta bu'i drod thob nas/ /tshogs kyi spyod pa ci bder spyad/ /smyon pa lta bu'i sems thob nas/ /phyogs med rnam rgyal spyod pa bya/ /de yi dbye ba gzhan na gsal/ /gnas dang grogs dang dus dang zas/ /le'u gzhan nas shes par bya/ /kun gyis bkur ba spyod pa'i mchog /rgyal po lta bu'i spyod pa bya/ /ngo tsha shes pa spyod pa'i mchog /rje rigs lta bu'i spyod pa bya/ /chags sdang 'khru ba spyod pa'i mchog /bram ze lta bu'i spyod pa bya/ /srid dang bral ba spyod pa'i mchog /dmangs rigs lta bu'i spyod pa bya/ /dmas sa 'dzin pa spyod pa'i mchog /gdol pa lta bu'i spyod pa bya/ /de nas gzhan yang bshad bya ste/ /mtho sa 'dzin pa spyod pa'i mchog /seng ge lta bu'i spyod pa bya/ /nyam nga med pa spyod pa'i mchog /glang chen lta bu'i spyod pa bya/ /shugs dang ldan pa spyod pa'i mchog /rta mchog lta bu'i spyod pa bya/ /rnam rtog gsod pa spyod pa'i mchog /spyang ki lta bu'i spyod pa bya/ /drag shul lta byed spyod pa'i mchog /dred mo lta bu'i spyod pa bya/ /de nas gzhan yang bshad bya ste/ /gza' gtad med pa spyod pa'i mchog /ri dgas lta bu'i spyod pa bya/ /ngo tsha bral ba spyod pa'i mchog /ro langs lta bu'i spyod pa bya/ /ro dang 'grogs pa spyod pa'i mchog /rigs ngan lta bu'i spyod pa bya/ /dur khrod gnas pa spyod pa'i mchog /lce spyang lta bu'i spyod pa bya/ /bag yod rngam pa spyod pa'i mchog /wa mo lta bu'i spyod pa bya/ /de las gzhan yang bshad par bya/ /zung du 'brel ba spyod pa'i mchog /ngur ba lta bu'i spyod pa bya/ /gzhan gyis mi mthong sbyod pa'i mchog /khwa ta lta bu'i spyod pa bya/ /dug lnga spyod pa spyod pa'i mchog /rma bya lta bu'i spyod pa bya/ /dus tshod 'dzin pa spyod pa'i mchog /khu byug lta bu'i spyod pa bya/ /nyes pas ma gos spyod pa'i mchog /bya rgod lta bu'i spyod pa bya/ /de nas gzhan yang bshad bya ste/ /rim gyis 87.85b 'dzeg pa'i spyod pa'i mchog /spre'u lta bu'i spyod pa bya/ /'jigs pa med pa spyod pa'i mchog /dom bu lta bu'i spyod pa bya/ /mtshan mo rgyu ba spyod pa'i mchog /zhag mig can gyi spyod pa bya/ /gang la mi gnas spyod pa'i mchog /bung ba lta bu'i spyod pa bya/ /snang ba lta ba spyod pa'i mchog /'phar ba lta bu'i spyod pa bya/ /de las gzhan yang bshad bya ste/ /dgos 'dod 'byung ba spyod pa'i mchog /nor bu lta bu'i spyod pa bya/ /sman dug gnyis med spyod pa'i mchog /ga bur lta bur shes par bya/ /cis kyang mi tshugs spyod pa'i mchog /rdo rje lta bur shes par bya/ /mi mthun gcod pa spyod pa'i mchog /ral gri lta bur shes par bya/ /de nas gzhan yang bshad bya ste/ /thabs dang shes rab spyod pa'i mchog /mda' gzhu lta bur shes par bya/ /stong pa'i kha 'byed spyod pa'i mchog /shaka ti lta bur shes par bya/ /'bigs par byed pa spyod pa'i mchog /mdung thung lta bur shes par bya/ /nga bdag gsod pa spyod pa'i mchog /sta ri lta bur shes par bya/ /gdul bya 'dren pa spyod pa'i mchog /lcags kyu lta bur shes par bya/ /dgon pa'i gnas dang dur khrod dang / /grong khyer dag tu rnal 'byor rgyu ba'i tshe/ /de 'dra'i skyes bu'i phyag rgya cher rtogs byed/ /de nyid sems kyi khyad par mthong gyur na/ /brtul zhugs med kyang sangs rgyas sa la 'gro/ /sems nyid gnyis kyi gnad dang ma bral na/ /brtul zhugs spyad kyang sdug bsngal sna tshogs skye/ /bsam gyis mi khyab brtul zhugs rab ldan na/ /rgyal po rgyal rigs spyi bor dbang bskur ltar/ /thogs pa med pa phyag rgya chen po de/ /skye ba 'di la sangs rgyas sa la reg ces gsungs so/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las spyod pa'i rab tu dbye ba'i le'u ste lnga pa'o// // de nas dur khrod bdag mo des/ /ston pa la ni 'di skad gsol/ /yang dag brda ni brda chen 87.86a po/ /kun gyis mi rtog sbas pa'i don/ /bar chad sel ba brda'i chos/ /bsam gyis mi khyab bshad du gsol/ /de nas ston pas bka' stsal pa/ /snang ba thams cad las kyi brda/ /tshig ni ji snyed ngag gi brda/ /de la bsam gyis mi khyab gnas/ /don gyi brda ru shes par bya/ /de nas dur khrod bdag mos yang zhus pa/ gang zag 'jug pa'i rim pa dang / /dpa' bo brtag pa'i rim pa dang / /phyag rgya mo yi brtag pa dang / /mchog dang thun mong dngos grub dang / /tshogs kyi 'khor lo'i dus dag dang / /rnal 'byor phag mo rdzogs byed dang / /brda yi bye brag ji snyed pa/ /'gro mgon khyed kyis bshad du gsol/ /mgon po dpa' bos bka' stsal pa/ /thams cad kun gyi brda chen po/ /sbas pa'i brda ni bshad bya ba/ /g.yas pa thabs kyi rang bzhin dang / /g.yon pa shes rab rang bzhin dang / /lus kyi brda rnams rdzogs par bya/ /mi rtog sgom pa ston pa la/ /lag pa g.yon pa bstan pa ni/ /sa ro zhes ni brjod par bya/ /rkang pa grong khyer sa bgrod pas/ /spyod pa nyams myong gis 'gro ba/ /go ba'i phyir nas rkang bstan te/ /a g+hu la zhes brjod par bya/ /srin lag mkha' 'gro ma yi rtsa/ /de yi phyir na de bstan te/ /shes rab chen por go bya'i phyir/ /b+ha ta ri zhes brjod par bya/ /lce yis zas kyi ro myong ltar/ /stong pas bde ba myong bstan phyir/ /lce bstan tsar+ya g+ha zhes brjod/ /skal bar ldan pa'i bdag nyid ni/ /yul la rig par bya ba'i phyir/ /lto ba zas kyi snod bstan pa/ /an d+ha li zhes brjod par bya/ /lto ba zas kyi snod yin phyir/ /de bzhin snod ni bstan par bya/ /bla ma'i brgyud pa go cha'i phyir/ /pa~M ka ta zhes brjod par bya/ /sor mo lnga'i ni rgyud gcig ltar/ /lnga yi rtsa ba e ba~M du/ /bsdus phyir sor mo lnga bstan la/ /tshan d+ho ha zhes brjod par bya/ /so'i stobs kyis zas 'dul ltar/ /e ba~M ji bzhin rtogs par byed/ /gang gis so ni bstan byas pas/ /tsa la ni zhes brjod par bya/ /byin pas 87.86b lus kyi stobs skyed ltar/ /goms pas 'bras bu skyed pa'i phyir/ /go phyin pa ni bstan byas la/ /me ga ba zhes brjod par bya/ /sa gzhi 'gro ba kun 'degs ltar/ /'bras bu dam tshig gis bsten ltar/ /sa gzhi gru bzhir bstan byas la/ /maN Dal zhes su brjod par bya/ /sor mo lnga ni rgyu mthun phyir/ /phung lnga rigs lngar rgyas btab pas/ /g.yas pa'i sor mo lnga bstan pa/ /sba ra na zhes brjod par bya/ /mi bskyod pa dang rdo rje 'chang / /rgyas gdab gnyis ni go bya'i phyir/ /dbugs ni la ni dbyung bar bya/ /dpal kun sham zhes brjod par bya/ /so 'cha' ba'i zhe sdang gis/ /'bras bu'i rtags ni yin pa'i phyir/ /gnyis snang gcod phyir so 'cha' bas/ /ma ta khra zhes brjod par bya/ /sha ni srog chags thams cad las/ /'byung zhing chos rnams thams cad ni/ /sems yin phyir nas sha bstan pas/ /ra tsa na zhes brjod par bya/ /khro gnyer khros pa'i rtags yin pas/ /bya ba thams cad sdug bsngal gyi/ /rtags yin phyir na khro gnyer bstan/ /ni ri ha zhes brjod par bya/ /bsdums pas dbye ba med pa ltar/ /'khor 'das dbyer mi phyed pa ltar/ /b+ha ga ni zhes brjod par bya/ /dpe yis mtshon pa'i don du ni/ /dri ma kun las grol ba'i phyir/ /bsdams pa bkrol nas gre nan brjod/ /byin gyis brlabs pa'i gtor ma yin/ /thams cad tshim par byed pa ltar/ /sna tshogs snang ba'i chos kun la/ /bde ba chen po'i ros tshim phyir/ /gtor ma btang la hika ka brjod/ /lto ba zas kyi snod yin ltar/ /sems can sangs rgyas snod yin pas/ /don du lto ba bstan nas ni/ /ni gar ma zhes brjod par bya/ /de rnams phan yon dpag med pas/ /snying po rgyud du gsal bar bstan/ /brda dang ldan pa'i rnal 'byor pas/ /bdud rtsi rnam pa lnga po la/ /longs spyod pa ni thabs kyi mchog /byin gyis brlabs dang sa bon dang / /rang bzhin bdud rtsi la 'bad pas/ /dpag med rims kyis phan yon 87.87a 'byung / /de nas gzhan yang bshad bya ste/ /lnga bsdus rtse mo mnan pa ni/ /bum pa'i dbang ste lus kyi brda/ /mtheb srin e'i drang ro gcig /gsang ba'i dbang ste lus kyi brda/ /byang chub mchog gi phyag rgya ni/ /gsum pa shes rab ye shes yin/ /skyes dang ma skyes gnyis med pas/ /bzhi pa yin ste lus kyi brda/ /de yi ngag gi brda smras pa/ /ka la sha ya bum pa'i dbang / /ya ra la wa gsang ba'i brda'o/ /e ba~M ma ya gsum pa'i brda'o/ /e hU~M o~M A bzhi pa'o/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las brda'i le'u ste drug pa'o// // de nas dur khrod bdag mo des/ ston pa mtshan nyid bzhi dang ldan pa de la phyi'i mchod pa'i tshogs dpag tu med pa dang / nang gi mchod pa'i tshogs dpag tu med pa dang / gsang ba'i mchod pa'i tshogs dpag tu med pa dang / de kho na nyid kyi mchod pa phul nas 'di skad zhus so/ /bla med ston pa he ru ka / 'khor ba'i sems can 'dren mdzad pa/ /thugs rje che dang ldan pa khyod/ /nad pa lta bu'i sems can la/ /chos kyi sman mchog bstan du gsol/ /long ba lta bu'i sems can la/ /chos kyi sgron me sbar du gsol/ /rgyal po lta bu'i ston pa khyod/ /kun la byams pa mdzad du gsol/ /blon po lta bu'i ston pa khyod/ /kun la phan pa mdzad du gsol/ /zhes zhus so/ /de nas ston pa 'jigs byed he ru ka de thugs rab tu dgyes te/ sku'i sgo nas mdzes gar rnam pa gsum mdzad/ gsung gi sgo nas rdo rje'i tshig rnam pa gsum mdzad/ thugs kyi sgo nas khyad par kyi ye shes rnam pa gsum bskyed nas/ 'khor rnams la spyan gzigs nas tshangs pa'i gsung gis rdo rje'i tshig 'di bka' stsal to/ /nyon cig dur khrod bdag mo khyod/ /'khor ba'i sems can thams cad la/ / 87.87b ma rig pa'i mun pas bsgribs/ /'khor ba'i rgya mtsho chen por ltung / /nyon mongs 'dam du bying ba yis/ /dus gsum sangs rgyas thams cad kyis/ /chos kyi sgo mo brgyad khri dang / /bzhi stong gi ni grangs snyed kun/ /nyon mongs pa'i gnyen por bstan/ /dbang po rab 'bring dang sbyar nas/ /thun mong theg pa rim gyis bstan/ /mdo sde 'dul ba mngon pa gsum/ /bstan pa kun gyi rtsa ba yin/ /bder gshegs thugs rje bsam mi khyab/ /sems can rnams la de ltar bstan/ /de nas dur khrod bdag mo des yang 'di skad ces gsol to/ /bla med ston pa he ru ka / thun mong theg pa de ltar bstan/ /khyad par gsang sngags ji ltar lags/ /rgyud sde rnams kyi dbye ba zhu/ /smin pa'i lam ni ji ltar lags/ /grol ba'i lam ni gang la bgyi/ /dpa' bo chen pos bshad du gsol/ /zhes zhus so/ /de nas ston pa he ru kas/ /nyon cig dur khrod bdag mo khyod/ /skal bar ldan pa'i gang zag la/ /gsang sngags rgyud sde ngas bshad kyis/ /snod skyon gsum po spongs la nyon/ /bya ba gtso bor byed pa la/ /kri ma'i rgyud sde rnam lnga bstan/ /sbyor ba gtso bor byed pa la/ /gnyis pa'i rgyud sde rnam lnga bstan/ /sems nyid gtso bor byed pa la/ /rnal 'byor rgyud sde rnam lnga bstan/ /bde stong gtso bor byed pa la/ /bla na med pa'i rgyud lnga bstan/ /yid la byed pa med rnams la/ /gong na med pa'i rgyud lnga bstan/ /de'i phyir rgyud sde rnam pa lnga/ /gsang sngags rgyud ces bya bar grags/ /re re la yang lnga lnga ste/ /rgyud chen nyi shu rtsa lnga ni/ /ma byung 'byung bar mi 'gyur ro/ /zhes gsungs so/ /de nas yang dur khrod bdag mo des yang zhus pa/ rgyud kyi dbye ba de ltar na/ /smin zhes bgyi ba ji ltar lags/ /lam zhes bgyi ba gang la bgyi/ /de yi dbye ba bshad du gsol zhes zhus so/ /de nas ston pas bka' stsal pa/ /nyon cig dur khrod bdag mo khyod/ /'khor ba'i sems can thams cad la/ /de 87.88a nyid yod de smin lam med/ /des na 'bras bu thob mi 'gyur/ /lam log mu stegs byed rnams la/ /de nyid yod de smin lam med/ /des na 'bras bu thob mi 'gyur/ /dman pa nyan thos rang rgyal la/ /de nyid yod de smin lam med/ /de phyir bskal pa grangs med du/ /dka' thub spyod pa nyon re mongs/ /ma smin mdo sder zhugs rnams la/ /de nyid yod de smin lam med/ /des na tshe gcig sangs rgyas dka'/ /zhes so/ /de nas dur khrod bdag mo des yang zhus pa/ smin zhes bya ba gang la bgyi/ /lam zhes bya ba ji ltar lags/ /dpa' bo chen pos bshad du gsol/ /nyon cig dur khrod bdag mo khyod/ /smin zhes bya ba ni sang d+ha'i sgra las shes par bya'o/ /lam zhes bya ba'i sgra ni a tha mi tha'i sgra las shes par bya/ 'jig rten pa'i lam dang sbyar ro/ /lus dang ngag dang sems dang gsum/ /ma smin smin par byed pa'i thabs/ /dbang bkur cho ga ji snyed bstan/ /dang po bsnyen pa bya ba gces/ /grangs dang dus dang mtshan ma yi/ /bsnyen pa rnam gsum rdzogs byas nas/ /sa chog sta gon tshul bzhin bya/ /dang po sa gzhi yongs su gzung / /gnyis pa sta gon gnas pa ste/ /nub gsum pa la 'jug par bya/ /rgyud rnams gzhan du shes par bya/ /de nas dkyil 'khor shar gyi sgor/ /ba'i rnam lnga'i man Dal bri/ /skal ldan slob ma der bzhag la/ /bum pa'i dbang rnams rdzogs par bskur/ /dkyil 'khor de yi lho'i sgo ru/ /bdud rtsi lnga yi man Dal bya/ /skal ldan slob ma der bzhag la/ /gsang ba'i dbang rnams rdzogs par bskur/ /dkyil 'khor de yi nub sgo ru/ /dal gyi chos 'byung e dbyibs bri/ /skal ldan slob ma der bzhag la/ /shes rab ye shes dbang bskur te/ /gsum pa'i dbang rnams rdzogs par bskur/ /dkyil 'khor de yi byang sgo ru/ /phrin las rnam bzhi'i man Dal bri/ /skal ldan slob ma der bzhag la/ /bzhi ba'i 87.88b dbang rnams rdzogs par bskur/ /dkyil 'khor de yi pho brang du/ /seng chen bsnol ba'i khri stengs su/ /skal ldan slob ma der bzhag la/ /rdo rje slob dpon byed pa'i dbang / /cho ga thams cad rdzogs par bskur/ /sku gsung thugs kyi dbang gsum po/ /thog ma nyid du bskur bar bya/ /de nas dur khrod brgyad rnams kyis/ /dbang ni rnam pa brgyad po bskur/ /de nas zas rnams bdud rtsi'i dbang / /ji lta bar ni bskur bar bya/ /de nas phyag mtshan rnams kyi dbang / /go rims bzhin du bskur bar bya/ /de nas nyan pa'i dbang rnams bskur/ /de nas bshad pa'i dbang rnams bskur/ /de nas skal ldan gang zag la/ /mnga' gsol sum bcu rtsa lnga bya/ /de nas bkra shis rdzas brgyad kyis/ /dbang rnams ma lus rdzogs par bskur/ /de nas dbang rdzogs gang zag de/ /bder gshegs rnams kyi sras yin te/ /mkhyen rab bde gshegs rnams dang mnyam/ /mthu stobs khro rgyal rnams dang mnyam/ /tshe tshad nyi zla gnyis dang mnyam/ /dang po las can sbyor ba yis/ /sa brgyad pa la rab tu gnas/ /dbang bskur gnang ba ma thob na/ /rig pa shes rab rtsal rdzogs kyang / /slob dpon bya ba yong mi nus/ /dbang bskur gnang ba ma mthong na/ /gzhan gyi yon tan kun 'chang yang / /'khor lo srog shing med pa 'dra/ /dbang ma thob par las rtsom dang / /sgyid ma ma rtas khal 'gel ba/ /'di dag phung po'i rgyu yin no/ /slob dpon mnyes par ma byas shing / /dbang rnams thob par ma byas na/ /nyan pa la sogs rtsom pa ni/ /'bras bu med cing brlag par 'gyur/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las dbang bskur ba'i le'u ste bdun pa'o// //de nas dur khrod phag mo des/ /he ru ka la 'di skad zhus/ /sangs rgyas thob byed 'bras bu'i chos/ /bsam gyis mi khyab bshad du gsol/ /dbang po rab 'bring tha ma gsum/ /gang dang gang gis grol ba lags/ /dug lnga 87.89a spyod pa'i gang zag lnga/ /gang dang gang gis 'joms par byed/ /de nas ston pas bka' stsal te/ /nyon cig dur khrod bdag mo khyod/ /dbang po rab kyi gang zag la/ /rang bzhin rnam dag phag mo bstan/ /dbang po 'bring gi gang zag la/ /brjod pa sgra yi phag mo bstan/ /dbang po tha ma'i gang zag la/ /mtshon pa brda yi phag mo bstan/ /zhes bka' stsal to/ /de nas dur khrod bdag mo des/ /ston pa la ni tshig 'di gsol/ /rang bzhin rnam par dag pa yi/ /rdo rje phag mo ji lta bu/ /sgra yi phag mo ji lta bu/ /dbyibs kyi phag mo ji lta bu/ /zhes pa la sogs pa zhus so/ /nyon cig dur khrod bdag mo khyod/ /rang bzhin nyid nas dag pa de/ /chos kyi sku yi ngo bo nyid/ /skad cig drug gis rdzogs sangs rgyas/ /grol 'gyur 'di la the tshom med/ /brjod pa sgra yi phag mo de/ /longs spyod sgra yi ngo bo nyid/ /longs spyod rdzogs sku'i ngo bo nyid/ /zla drug goms pa'i sbyor ba yis/ /'grub 'gyur 'di la the tshom med/ /mtshon pa brda yi phag mo de/ /sprul pa sku yi ngo bo nyid/ /zla drug goms pa'i sbyor ba yis/ /'grub 'grur 'di la the tshom med/ /ces bka' stsal to/ /de nas dur khrod bdag mo des/ /dpa' bo che la yang zhus pa/ /gang zag rigs la lnga yod de/ /gti mug can gyi gang zag dang / /zhe sdang can gyi gang zag dang / /'dod pa gtsor byed gang zag dang / /nga rgyal can gyi gang zag dang / /phrag dog can gyi gang zag lnga/ /de rnams gang dang gang gis grol zhes zhus so/ /de nas ston pas bka' stsal te/ /gti mug can gyi gang zag la/ /sku yi phag mo dkar mo bstan/ /gti mug tshul gyis gti mug 'joms/ /'dod pa gtsor byed skyes bu la/ /gsung gi phag mo dmar mo bstan/ /'dod chags tshul gyis 'dod chags 'joms/ /zhe sdang can gyi gang zag la/ /thugs kyi phag mo nag mo bstan/ /zhe sdang tshul gyis zhe sdang 'joms/ / 87.89b nga rgyal can gyi gang zag la/ /yon tan can gyi phag mo bstan/ /nga rgyal tshul gyis nga rgyal 'joms/ /phrag dog can gyi gang zag la/ /phrin las phag mo ljang khu bstan/ /phrag dog tshul gyis phrag dog 'joms/ /de nas dur khrod bdag mo des/ /he ru ka la tshig 'di gsol/ /dug lnga shas che gang zag lnga/ /'bras bu sku lnga ji ltar thob/ /ye shes lnga ni ji ltar snang / /rigs lnga zhes ni gang la bgyi/ /khro mo lnga ni ji ltar bsgom/ /'khor lo lnga ni ji ltar gnas/ /snying po lnga ni ji ltar bzlas/ /dam tshig lnga ni ji ltar bsrung / /nyams myong lnga ni ji ltar 'byung / /nyon mongs lnga ni ji ltar 'byung / /ye shes lnga ni ji ltar 'phel/ /grangs kyi tshad ni ji ltar bzlas/ /mtshan ma'i rtags ni ji ltar 'byung / /dus kyi tshad ni ji ltar lags/ /las tshogs rnams ni ji ltar 'grub ces zhus so/ /de nas dpa' bo he ru kas/ thugs rab tu dgyes te brda'i tshig 'di bka' stsal to/ /nyon cig dur khrod bdag mo khyod/ /dug lnga spyod pa'i gang zag lnga/ /'bras bu rnam pa lnga thob ste/ /kun la khyab pa chos sku dang / /theg chen spyod pa longs sku dang / /gang la gang 'dul sprul sku dang / /cis kyang mi shigs rdo rje'i sku/ /ngo bo nyid kyi sku mchog dang / /skye ba gcig gis thob par 'gyur/ /rtogs pa'i don la goms par byed/ /tshe 'di nyid la sangs rgyas 'thob/ /rdzogs sangs rgyas kyis rgyud du bshad/ /thob bya'i ye shes rnam lnga yang / /spros bral chos dbyings ye shes dang / /me long ye shes gzugs brnyan ltar/ /bdag gzhan gnyis med mnyam pa nyid/ /gsal la ma 'dres so sor rtog /phrin las mthar phyin bya ba grub/ /ye shes lnga ni de ltar skye/ /gzhan nas ma yin rang nyid la'o/ /dug lnga spyod pa'i gang zag lnga/ /rigs ni rnam pa lnga thob ste/ /spros med de bzhin gshegs pa'i rigs/ /dgos 'dod 'byung ba rin chen rigs/ /skyon gyis ma gos pad+ma'i rigs/ /sems 87.90a can don grub las kyi rigs/ /gzhan nas ma yin rang nyid la/ /dug lnga spyod pa'i gang zag de/ /ye shes khro mo lnga bsgoms nas/ /bde ba skye ba sku yin pas/ /bde chen dkar mo bsgom par bya/ /nus pa 'byung ba gsung yin pas/ /dmar mo sgra sgrogs bsgom par bya/ /rtogs tshad 'char ba thugs yin pas/ /khros ma nag mo bsgom par bya/ /brtan par byed pa yon tan te/ /ser mo don grub bsgom par bya/ /bar chad sel ba phrin las te/ /sna tshogs mthar phyin bsgom par bya/ /rims kyis ma yin cig car yin/ /rgya dang 'bur gyi tshul du bya/ /yig 'bru rnams kyi gnas lugs ni/ /spyi gtsug bde chen 'khor lo na/ /bde byed sku'i ge bzhi/ /rang bzhin rtsa'i gzugs can no/ /mgrin pa longs spyod 'khor lo na/ /gsung mchog yi ge rnam bzhi ni/ /rang bzhin rtsa'i tshul du gnas/ /snying ka chos kyi 'khor lo na/ /thugs mchog yi ge rnam bzhi ni/ /rtsa yi dbyibs dang 'thun par gnas/ /lte ba sprul pa'i 'khor lo na/ /rten byed yon tan yi ge bzhi/ /de yi rang bzhin rtsa yi dbyibs/ /phrin las yi ge rnam bzhi ni/ /zhi rgyas dbang drag yi ge bzhi/ /las dang rjes 'thun gzugs su gnas/ /snying po lnga'i bzlas thabs ni/ /phyi dang nang dang gsang ba dang / /phrin las bzhi yi tshul du bzlas/ /dam tshig lnga'i bsrung tshul ni/ /bde chen dkar mo'i dam tshig tu/ /sems can kun la byams pa bsgoms/ /khros ma nag mo'i dam tshig tu/ /drag cing rtsub pa'i spyod pa bya/ /ser mo don grub dam tshig tu/ /dngos po kun la chags med bya/ /dmar mo sgra sgrogs dam tshig tu/ /smra zhing bud med brten par bya/ /sna tshogs mthar phyin dam tshig tu/ /rgyud cing mchod pa'i spyod pa bya/ /mkha' 'gro spyi'i dam tshig tu/ /bdud rtsi lnga dang sha lnga la/ /rtag tu longs spyod bya ba ni/ /bza' ba'i dam tshig rnam lnga ste/ /gsang sngags spyod pas bsten par 87.90b bya/ /de nas nyams dang byin brlabs ni/ /go rims skye tshul 'di lta ste/ /dmigs pa med pa'i snying rje skye/ /sangs rgyas mkha' 'gro'i nyams myong yin/ /chos rnams gzugs brnyan ltar mthong ba/ /rdo rje mkha' 'gro'i nyams myong yin/ /thams cad mnyam pa nyid skye ba/ /rin chen mkha' 'gro'i nyams myong yin/ /chos rnams ma 'dres so sor gsal/ /pad ma mkha' 'gro'i nyams myong yin/ /dngos po gang la'ang thogs med pa/ /las kyi mkha' 'gro'i nyams myong yin/ /nyon mongs lnga yi 'gyur lugs ni/ /gti mug chos kyi dbyings su 'gyur/ /zhe sdang me long ye shes 'gyur/ /nga rgyal mnyam pa nyid kyir 'gyur/ /'dod chags so sor rtog par 'gyur/ /phrag dog bya ba nan tan 'gyur/ /de nas 'gyur ba lam du byed/ /de nas gzhan yang bshad bya ste/ /sku yi yi ge rnam bzhi yis/ /chos kyi dbyings kyi ye shes 'phel/ /gsung gi yi ge rnam bzhi yis/ /so sor rtog pa'i ye shes 'phel/ /thugs kyi yi ge rnam bzhi yis/ /me long lta bu'i ye shes 'phel/ /yon tan yi ge rnam bzhi yis/ /mnyam pa nyid kyi ye shes 'phel/ /phrin las yi ge rnam bzhi yis/ /bya ba grub pa'i ye shes 'phel/ /A li dang ni kA li yis/ /sgra don dag gis rtogs par 'gyur/ /zhes so/ /de nas gsang ba bshad bya ste/ /grangs kyi tshad ni 'di lta ste/ /'bum phrag gcig gis bgegs rnams skrod/ /'bum phrag gnyis kyis grong khyer skrod/ /'bum phrag gsum gyis rgyal po 'joms/ /'bum phrag bzhi pas bud med 'gugs/ /'bum phrag lnga yis phyogs rnams bsreg /'bum phrag drug gis 'byung ba bzlog /'bum phrag bdun gyis gnas khang g.yo/ /'bum phrag brgyad kyis mngon shes 'char/ /'bum phrag dgu yis zas nor 'du/ /'bum phrag bcu yis gang 'dod 'grub/ /de nas 87.91a gsang ba bshad bya ste/ /mtshan ltas rab 'bring tha ma gsum/ /skal dang ldan pa'i gang zag la/ /ye shes khro mo rnam pa lnga/ /mngon sum dag du mthong bar 'gyur/ /dbang po rab kyi snang ba ste/ /las 'phro can gyi snang ba yin/ /skal pa 'bring gi gang zag la/ /ye shes khro mo rnam pa lnga/ /rang gi las dang gang 'thun par/ /rmyi lam dag tu mchog du gsal/ /skal ba 'bring gi mtshan ltas yin/ /skal ba dman pa'i gang zag la/ /tshul bzhin bris pa'i thang sku ste/ /'od dang sgra dang 'dzum pa dang / /mkha' 'gro'i lung bstan 'byung ba dang / /skye ba 'di la nges par 'grub/ /sbyor ba dman pa'i gang zag la/ /bar ma dor nas lam sna 'dren/ /mkhas spyod gnas su 'khrid par byed/ /dus kyi tshad ni rnam gsum ste/ /rab la skad cig rnam drug yin/ /'bring la zla ba drug gis grol/ /tha ma lo drug sbyar ba'o/ /phyi dang nang dang gsang ba gsum/ /rnam pa gsum du shes par bya/ /las tshogs rang bzhin dbye ba ni/ /rgyas dang bsdus pa shin du rgyas/ /rnam pa gsum du shes par bya/ /bsdus pa tshar gcad rjes gzung gnyis/ /rgyas pa phrin las rnam pa bzhi/ /shin du rgyas pa thun mong brgyad/ /de las 'phros pa nyi shu lnga/ /bde chen dkar mo'i ting 'dzin gyis/ /zhi ba'i las tshogs rnam lnga 'grub/ /ser mo don grub ting 'dzin gyis/ /rgyas pa'i las tshogs rnam lnga 'grub/ /dmar mo sgra sgrogs ting 'dzin gyis/ /dbang gi las tshogs rnam lnga 'grub/ /khros ma nag mo'i ting 'dzin gyis/ /drag po'i las tshogs rnam lnga 'grub/ /sna tshogs mthar phyin ting 'dzin gyis/ /phrin las bzhi yi las rnams 'grub/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa'i phag mo mngon par 'byung ba'i rgyud las 'bras bu'i le'u ste brgyad pa'o// // 87.91b de nas dur khrod bdag mo des/ /ston pa mtshan nyid bzhi ldan la/ /phyi nang gsang ba'i mchod pa 'di phul nas 'di skad zhus te/ skal bar ldan pa'i gang zag gis/ /bdag dang gzhan la phan gdags phyir/ /sku dang mchod rten ji ltar bgyi/ /de yi go rims bshad du gsol/ /zhes zhus pa'o/ /de nas ston pas bka' stsal te/ /nyon cig dur khrod bdag mo khyod/ /rigs can lnga'i gang zag des/ /bdag don gzhan don byed 'dod pas/ /sku lnga gdung lnga mchod rten lnga/ /rgyu lnga sngags lnga las rim lnga/ /lnga tshan lnga ru shes par bya/ /de yi bya ba'i rim pa ni/ /de nyid gsum dang ldan par bya/ /dang po bdag gi de nyid dang / /gnyis pa rgyu yi de nyid dang / /gsum pa 'bras bu'i de nyid do/ /dang po bdag gi de nyid ni/ /de bzhin rigs kyi gang zag de/ /dad dang brtson 'grus rab ldan pas/ /sku dang mchod rten 'debs dus su/ /'du shes gsum dang ldan par bya/ /gnyis pa rgyu yi de nyid ni/ /rnam pa lnga ru shes par bya/ /sa gzhi dkar zhing snum pa la/ /rin chen sna lnga la sogs pa'i/ /lnga tshan lnga ni legs sbyar te/ /lus ngag yid gsum sbyor ba yis/ /sku dang mchod rten ci rigs gdab/ /'og min gnas nas spyan drangs la/ /rab tu gnas pa gzhung bzhin bya/ /de nas mnga' gsol na bza' gsol/ /de la mchod dang bstod pa bya/ /bzhugs su gsol ba'i rim pa ni/ /dam chos gzhan dang 'thun par bya/ /zhi ba'i las rnams 'grub par 'gyur/ /dang po bdag gi de nyid ni/ /rin chen rigs kyi gang zag des/ /dad dang brtson 'grus rab ldan pas/ /sku 'am mchod rten 'debs dus su/ /'du shes gsum dang ldan par bya/ /gnyis pa rgyu yi de nyid ni/ /rnam pa lnga ru shes par bya/ /sa bzhi ser la 'tsher ba la/ /gong du bstan pa ji lta bar/ /sku dang mchod 87.92a rten ci rigs gdab/ /'og min gnas nas spyan drangs nas/ /rab tu gnas pa gzhung bzhin bya/ /de la mnga' gsol na bza' gsol/ /mchod dang bstod pa bzhugs pa rnams/ /dam chos gzhan dang 'thun par bya/ /rgyas pa'i las rnams 'grub par 'gyur/ /dang po bdag gi de nyid ni/ /pad ma rigs kyi gang zag de/ /dad dang brtson 'grus rab ldan pas/ /sku dang mchod rten byed dus su/ /'du shes gsum dang ldan par bya/ /gnyis pa rgyu yi de nyid ni/ /rnam pa lnga ru shes par bya/ /sa gzhi dmar la gdang ba la/ /lnga tshan lnga dang legs sbyar te/ /lus ngag yid gsum sbyor ba yis/ /sku dang mchod rten ci rigs gdab/ /'og min gnas nas spyan drangs la/ /rab tu gnas pa gzhung bzhin bya/ /de la mnga' gsol na bza' gsol/ /mchod dang bstod dang gzhugs pa kun/ /dam chos gzhan dang 'thun par bya/ /dbang gi las rnams 'grub par 'gyur/ /dang po bdag gi de nyid ni/ /rdo rje rigs kyi gang zag de/ /dad dang brtson 'grus rab ldan pas/ /sku dang mchod rten 'debs dus su/ /'du shes gsum dang ldan par bya/ /gnyis pa rgyu yi de nyid ni/ /rnam pa lnga ru shes par bya/ /sa bzhi gnag cing rtsub pa la/ /khrag dang dug dang tsher ma dang / /yungs dkar yungs nag skye tshe dang / /lnga tshan lnga dang bcas pa la/ /lus ngag yid gsum sbyor ba yis/ /sku dang mchod rten ci rigs gdab/ /'og min gnas nas spyan drangs la/ /rab tu gnas pa gzhung bzhin bya/ /de la mnga' gsol na bza' gsol/ /mchod dang bstod pa bzhugs pa kun/ /dam chos gzhan dang 'thun par bya/ /drag po'i las rnams 'grub par byed/ /dang po bdag gi de nyid ni/ /las kyi rigs kyi gang zag de/ /dad dang brtson 'grus rab ldan pas/ /sku dang mchod rten 87.92b 'debs dus su/ /'du shes gsum dang ldan par bya/ /gnyis pa rgyu yi de nyid ni/ /rnam pa lnga ru shes par bya/ /sa bzhi ljang zhing kha dog ser/ /gong du lnga tshan lnga dang sbyar/ /de la sku dang mchod rten rnams/ /ji ltar nus pa bzhin du gdab/ /'og min gnas nas spyan drangs la/ /rab tu gnas pa gzhung bzhin bya/ /de la mnga' gsol na bza' gsol/ /mchod dang bstod pa bzhugs pa rnams/ /dam chos gzhan dang 'thun par bya/ /drag po'i las rnams 'grub par 'gyur/ /bstod pa lnga ni so sor bstod/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las sku dang mchod rten gdab pa'i le'u ste dgu pa'o// // de nas dur khrod bdag mo des ston pa mtshan nyid bzhi ldan la phyi nang gsang ba'i mchod pa gsum phul nas 'di skad zhus so/ /kye kye mgon po bdag la gson/ /khams gsum 'khor ba'i sems can rnams/ /nyon mongs brgyad khri bzhi stong dang / /rnam rtog brgyad khri bzhi stong gis/ /dus gsum kun tu sdug bsngal bskyed/ /de yi gnyen po bshad du gsol/ /khams gsum 'khor ba'i sems can rnams/ /rgyu ni ma rig pa yis bskyed/ /rkyen ni rnam par rtog pa ste/ /de rnams rnam rtog ji ltar bsal/ /phyogs ngan la sogs 'gro ba'i tshe/ /de yi rtog pa gcad par zhu/ /legs nyes kun gyi stangs gcod pa'i/ /mna' dang gal gyis 'jigs pa la/ /de yi rtog pa gcad par zhu/ /nyon mongs nad kyis nyen pa la/ /de las thar pa'i thabs gcig zhu/ /bdag gzhan gnyis po rtsod dus su/ /de las rgyal ba'i thabs gcig zhu/ /lus sems gnyis po 'bral dus der/ /de las thar pa'i thabs gcig zhu/ /de nas ston pas tshig 'di skad ces bka' stsal to/ /rgyu 'bras kun du sdug bsngal ba/ /ma lus dbyer 87.93a med shes gyur na/ /sdug bsngal ma lus bde bar 'gyur/ /gzhan yang thun mongs 'di lta ste/ /phyogs ngan la sogs 'gro ba'i tshe/ /phyogs las rnam par rgyal bar bya/ /nyes legs kun gyi stangs gcod pa/ /mna' 'am gal gyis 'jigs pa la/ /mna' las rnam par rgyal bar bya/ /nad dang gdon gyis nyen pa la/ /bgegs las rnam par rgyal bar bya/ /bdag gzhan gnyis po rtsod pa la/ /ngag las rnam par rgyal bar bya/ /lus sems gnyis po 'bral dus der/ /rlung las rnam par rgyal bar bya/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las rnam par rgyal ba rnam pa lnga'i le'u ste bcu pa'o// //de nas mgon po he ru kas 'khor rnams la de skad ces bka' stsal pa dang / gsang sngags kyi sdud pa mo rab tu dga' ste/ 'khor rnams 'dus pa'i tshogs kyis kyang de ltar dga' mgu yi rangs te/ phyi nang gsang ba'i mchod pa phul nas/ mgon po thugs rje dang ldan pas/ /bdag dang 'dus pa'i 'khor rnams dang / /'khor ba'i sems can thams cad la/ /thugs rjes gnang ba bka' drin lags/ /zhes dga' mgu yi rangs te/ bcom ldan 'das kyis gsungs pa la mngon par bstod do/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba rtsa ba'i rgyud bcom ldan 'das 'jigs byed he ru kas gsungs pa rdzogs s+ho// |