@#/ /rgya gar skad du/ Ar+ya ba su d+ha ra nA ma d+hA ra Ni/ bod skad du/ 'phags pa nor gyi rgyun ces bya ba'i gzungs/ sangs rgyas dang / byang chub sems dpa' tha~Md la phyag 'tshal lo/ /'di skad bdag gis thos pa dus gcig na/ bac+doMs kau sham ba ni tsher ma can zhes bya ba'i nags mchog chen po na/ dge slong lnga brgya tsam gyi dge slong gi dge 'dun chen po dang / byang chub sems dpa' sems dpa' chen po sangs rgyas kyi yon tan tha~Md dang ldan pa rab tu mang po dang thabs cig tu bzhugs te/ de'i tshe ko'u sham bi'i grong khyer chen po na khyim bdag zla ba bzang po zhes bya ba/ dbang po nye bar zhi ba yid nye bar zhi ba/ bu pho dang / bu mo dang / bza' mi mang po dang ldan pa/ dad cing cher dad pa zhig gnas pa de/ bac+doMs ga la ba der song ste phyin nas/ bac+doMs kyi zhabs la mgo bos phyag 'tshal te/ lan 'bum phrag du ma bskor ba byas nas phyogs gcig tu 'dug go /phyogs gcig tu 'dug nas khyim bdag zla ba bzang pos bac+doMs la 98.218a 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na/ bac+doMs de bzhin gshegs pa dgra bcom pa yang dag par rdzogs pa'i sangs rgyas la bdag phyog 'ga' zhig zhu lagaso/ /de skad ces gsol pa dang / bcom ldan 'das kyis khyim bdag zla ba bzang po la 'di skad ces bka' stsal to/ /khyim bdag ci dang ci 'dod pa dris shig dang / khyod kyis ji skad dris pa'i dri ba lung bstan pas ngas khyod kyi sems rangs par bya'o/ /de skad ces bka' stsal pa dang / /khyim bdag zla ba bzang pos bac+doMs legs so zhes gsol te/ bcom ldan 'das kyi ltar mnyan nas bac+doMs la 'di skad ces gsol to/ /bcom ldan 'das rigs kyi bu 'am/ rigs kyi bu mo dbul por gyur pa las ji ltar dbul ba ma mchis par 'gyur zhing / bro nad kyis thebs na yang bro nad ma mchis par 'gyur ba lags/ de nas bac+doMs kyis mkhyen bzhin du khyim bdag zla ba bzang po la 'di skad ces bka' stsal to/ /khyim bdag khyod ci'i phyir dbul po'i don du 'dri/ de skad ces bka' stsal pa dang / bcom ldan 'das la khyim bdag zla ba bzang pos 'di skad ces gsol to/ /bcom ldan 'das bdag ni dbul ba mang ba dang / gso ba mang ba dang / bu pho dang / bu mo mang ba/ gza' mi mang po dang ldan pa lags te/ de'i slad du gang gis sems can dbul po rnam kyi dbul ba ma mchis par 'gyur ba dang / bro nad kyis thebs pa rnams bro nad ma mchis par 'gyur ba dang / nor dang / 'bru dang / mdzod dang / bang mdzod mang po dang ldan par 'gyur ba dang / sdug pa dang / yid du mchi ba dang / mthong na yid du 'thad pa dang / 98.218b dbang phyug du 'gyur ba dang / sbyin bdag mdzod pas mi 'tshal zhing / dbyigs dang / gser dang / nor dang / 'bru'i mdzod dang / bang mdzod rnams dang / nor bu dang / mu tig dang / rdo rje dang / bai dUr+ya dang / dung dang / man shel dang / byi ru dang / sa le sbram dang / dbul bas ma 'tshal cing 'byor par 'gyur ba dang / khyim gyi bu smad dang / bza' mi rnams brtan par 'gyur ba'i chos kyi rnams grangs de bac+doMs kyis legs par bshad du gsol/ de skad ces gsol pa dang / bac+doMs kyis khyim bdag zla ba bzang po la 'di skad ces bka' stsal to/ /khyim bdag 'das pa'i dus bskal pa grangs med pa 'das par gyur pa de'i tshe de'i dus na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba/ kha lo sgyur ba/ bla na med pa/ lha dang mi rnams kyi ston pa/ sangs rgyas bac+doMn 'das rdo rje 'chang rgya mtsho'i dbyangs zhes bya ba 'jig rten du byung ste/ rigs kyi bu ngas de bzhin gshegs pa de las nor gyi rgyun ces bya ba'i gzungs 'di thos te bzung zhing bcangs bklags/ kun chub par byas/ rjesu yi rang bar byas shing / gzhan dag la yang rgya cher yang dag par rab tu bstan te/ rigs kyi bu da yang ngas de bshad pa'o/ /rigs kyi bu bzung sngags 'di'i mthus mi rnams rnam par tho 'tsham par mi byed do/ /mi ma yin pa rnams rnam par tho 'tsham par mi byed do/ /gnod sbyin rnams rnam par tho 'tsham par mi byed do/ /srin po rnams rnam par tho 'tsham par mi byed do/ /yi dgas rnaMs rnaM par tho 'tsham par mi byed do/ / 98.219a sha za rnams rnam par tho 'tsham par mi byed do/ /'byung po rnams rnam par tho 'tsham par mi byed do/ /grul 'bum rnams rnam par tho 'tsham par mi byed do/ /brjed byed rnams rnam par tho 'tsham par mi byed do/ /gnon po rnams rnam par tho 'tsham par mi byed do/ /lus srul po rnams rnam par tho 'tsham par mi byed do/ /lha ma yin rnams rnam par tho 'tsham par mi byed do/ /zas su mi gtsang ba za ba rnams dang / zas su gcin 'thung ba rnams dang / zasu khrag 'thung ba rnams dang / zasu sha za ba rnams dang / zasu rnag 'thung ba rnams dang / zasu zhag za ba rnams dang / zasu rkang za ba rnams dang / zasu ngar snabs za ba rnams dang / zasu stor khung nas 'bab pa za ba rnams dang / zasu dbugs rngub pa dang / 'byung ba za ba'i bar rnams rnam par 'tshe bar mi 'gyur ro/ /rigs kyi bu nor gyi rgyun gyi gzungs 'di rigs kyi bu 'am/ rigs kyi bu mo gang gi khyim na yod dam/ snying la yod dam/ lag na yod dam/ glegs bam du chud dam/ thos par gyur tam/ kun chub par byas sam/ glags sam/ bzung ngam/ rjesu yi rang bar byas sam/ gzhan dag la rgya cher rab tu bstan pa'i rigs kyi bu 'am/ rigs kyi bu mo de la yun ring po'i don dang / phan pa dang / dge ba dang / grub pa dang / bde ba dang / lo legs par 'gyur ro/ /su zhig de bzhin gshegs pa rnams la mchod pa byas te/ nor gyi rgyun gyi gzungs 'di nam phyed na lan gnyis sam/ lan gsum 'am/ lan bzhi bton na de'i lha yid rangs te/ de bzhin gshegs pa'i bstan pa la dga' ba dang / 98.219b chos gdags pa byas pas dga' ba dang / dge 'dun gdags pa byas pas dga' ba dang / chos smra ba la dga' ba dang / lhag pa'i bsam pas bdag nyid 'ongs te/ 'bru char 'bebaso/ /na mo badzra d+ha ra sA ga ni ra g+ho ShA ya/ ta thA ga tA ya/ tad+ya thA/ o~M sU ru pe/ b+ha drA+e/ b+ha drA ba ti/ ang ga le/ mang ga le/ mang ga la ba ti/ a le/ a tsa le/ a tsa la ba le/ ud g+ha ta ni/ ud b+he da na/ ba s+ya ba ti/ dA na pa ti/ d+ha myi pra ti/ shri ma ti/ pra b+ha ba ti/ a ma le bi ma le nir ma le/ ru ru/ su ru be/ su ru pa ma le/ bi ma le/ tsa le/ a tsa na ste/ a na na ste/ bi shwa ke shi/ bi sha ni shi/ ang ku re/ mang ku re/ pra bang ku re/ bi ra me/ bi d+ha me/ ri ri me/ di di me/ du du me/ kha kha me/ ta ta re/ ta ra ta ra/ ta ra ta ra/ badzre badzre badzre ba me/ Ta ke Ta ke /Tha ke Tha ke /ug ke /bug ke /Tha ke Tha ke /a brta ni ba ra sha na/ Sha da ni badzra d+ha ra sA ga ra ni ra go ShA na/ ta thA ga ta ma nu smar/ smra ra smra ra/ sarba ta thA ga tA sat+ya ma nu smra ra/ d+harma sat+ya ma nu smra ra/ sang g+ha sat+ya ma nu smra ra/ da ta da ta/ pU ra pU ra ya/ pU ra ya/ pu ra Ni/ b+ha ra b+ha ra ni/ a ma le/ su mang ga le/ shAn ta ma ti/ shu bA ma ti/ mang ga la b+ha ni/ ma hA ma ti/ ma hA ma ti/ b+ha dra ba ti/ b+ha ba ti/ su tsan dra ma ti/ A gats+tsha/ A gats+tsha/ sa ma ya ma nu smra ra swA hA/ a ba ra Ni ma nu smra ra swA hA/ pra b+ha ba ma nu smra ra swA hA/ dI dI ma nu smra ra swA hA/ te dza ma nu smra ra swA hA/ bi dza ya ma nu smra ra swA hA/ hr-i da ya ma nu smra ra swA hA/ sarba satwa bi na ya ma nu smra ra swA hA/ o~M ba su d+hA re swA hA/ o~M ba su shrI ye swA hA/ o~M shri ba su swA hA/ o~M ba su swA hA/ rigs kyi bu 'di ni 98.220a nor gyi rgyun ces bya ba'i gzungs gzungs sngags 'di'i mthus mu ge dang / nad dang / 'chi ngas 'byung bar mi 'gyur ro/ /rigs kyi bu su zhig de bzhin gshegs pa dgra bcom pa yang dag par rdzogs pa'i sangs rgyas la mchod pa byas te/ nor gyi rgyun gyi gzungs kyi gsang sngags kyi tshig 'di dag nub gcig bton na/ de nas dngos grub du 'gyur ro/ /rgyas pa'i don du bdag gi khyim 'am/ gzhan gyi khyim 'am/ gnas gtsang ma bang mdzod dam/ gnas gang du yang rung bar de bzhin gshegs pa spyan ras gzigs dbang phyug dang / sangs rgyas dang / byang chub sems dpa' thaMd dang / gsang sngags kyi lha'i phyir tsan dan gyis dkyil 'khor gru bzhir byas te/ nub gcig bton na/ rigs kyi bu de'i khyim nor bu dang / 'bru dang / gser dngul dang / yo byad thaMd kyi rgyun mi chen po'i mtshan tsam gyis gang bar 'gyur ro/ /'jigs pa dang / gnod pa thaMd kyang med par 'gyur ro/ /rigs kyi bu de'i phyir khyod rab tu bsgribs la nor gyi rgyun gyi gzungs 'di zung zhing / chong shig /lhog shig /ston cig /gzhan dag la yang dag par rab tu ston cig dang / de khyod kyi yun ring po'i don dang / phan pa dang / bde bar 'gyur ro/ /bcom ldan 'das legs so zhes gsol te/ khyim bdag zla ba bzang pos bac+doMs las nor gyi rgyun gyi gzungs 'di thos nas tshim zhing dga' la mgu zhing yi rangs te rab tu dga' nas/ dga' ba dang / yid bde ba skyes te/ bac+doMs kyi zhabs la mgo bos phyag 'tshal nas/ bac+doMs la 'di skad ces gsol to/ /bac+doMs bdag gis nor gyi rgyun ces bgyi ba blangs lags/ 98.220b gzungasu zin lags/ bzung lags/ klags lags/ kun chub par bgyis lags/ rjesu yi bar bgyis lags te/ gzhan dag la yang rgya cher yang dag par rab tu bstan par bgyi lags so/ /de'i skad cig tsam la khyim bdag zla ba bzang po'i bang mdzod rnams yongasu gang bar gyur to/ /de nas khyim bdag zla ba bzang pos bcom ldan 'das la lan 'bum phrag du mar bskor ba byas te/ bcom ldan 'das kyi zhabs la phyag 'tshal nas/ bcom ldan 'das kyi thad nas song ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod song la khyim bdag zla ba bzang po'i khyim nor dang / 'brus yongs su gang ba phun sum tshogs pa dang / mdzod chen po dang / bang mdzod yongs su gang ba rnams la ltos/ de nas tshe dang ldan pa kun dga' bos bcom ldan 'das kyi ltar mnyan nas ko'u sham bi'i grong khyer chen po ga la ba dang / khyim bdag zla ba bzang po'i khyim ga la ba der song te phyin nas nang du zhugs pa dang / nor dang / 'brus yongasu gang ba phun sum tshogs pa dang / rin po che phun sum tshogs pa dang / yo byad thams cad kyi mdzod chen po dang / bang mdzod rnams kyang yongasu gang bar mthong ngo / /mthong nas kyang tshim zhing dga' la mgu zhing yid rang te rab tu dga' ba dang / yid bde ba skyes te/ bcom ldan 'das ga la ba der song ngo / /de nas tshe dang ldan pa kun dga' bo ya mtshan du 'dzin cing / dga' ba dang yid bde ba skyes nas bcom ldan 'das la 'di skad ces gsol to/ /bcom ldan 'das gang gis khyim bdag zla ba bzang po nor mang ba mdzod chen po dang / 98.221a bang mdzod rnams kyang nor dang 'bru phun sum tshogs pa'i rgyu gang lags/ rkyen gang lags/ bcom ldan 'das kyis bka' stsal pa/ kun dga' bo rigs kyi bu khyim bdag zla ba bzang po dad cing mchog tu dad cing dge ba'i bsam pa can des nor gyi rgyun gyi gzungs 'di bzung zhing rab tu bton te/ blangs shing / klags/ kun chub par byas/ rjesu yi rang bar byas shing / gzhan dag la yang rgya cher yang dag par rab tu bstan pa'i phyir ro/ /kun dga' bo de'i phyir khyod kyis kyang nor gyi gzungs 'di long zhig / chongs shig lhogs shig ston zhig /zung zhig /kun chub par gyis shig /gzhan dag la yang rgya cher yang dag par rab tu ston zhig dang / de ni skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo phal po che dang / lha dang / mi rnams kyi don dang / phan pa dang / bde bar 'gyur ro/ /kun dga' bo su zhig rig sngags 'di las gzhan du smra ba ni lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa dang / lha dang / mi dang / lha ma yin du bcas pa'i 'jig rten na ngas ma mthong ngo / /lan gnyis su bton tam/ lan gsum du bton kyang 'gal bar byed pa de ni gnas med do/ /kun dga' bo gzungs kyi gsang sngags kyi tshig 'di dag ni mi phyed pa yin no/ /kun dga' bo 'di dag ni sems can dge ba'i rtsa ba zad pa rnams kyi rna lam du grags par mi 'gyur na glegs bam la yi ger bri ba dang / yid la gzung ba lta ci smos/ de ci'i phyir zhe na/ 'di ni de bzhin gshegs pa tha~Md kyis bka' 98.221b stsal te/ gzungs sngags 'di ni sems can dbul po dang / nad sna tshogs kyis gzir ba dang / 'jigs pa dang / sems can sdang bas gnod par byas pa tha~Md kyi don du de bzhin gshegs pa tha~Md kyis gsungs pa dang / bshad pa dang / rjesu yi rang ba dang / rab tu phye ba dang / bsngags pa dang / bkrol ba dang / gsal bar mdzad pa dang / bskyed pa dang / byin gyis brlabs pa dang / chos kyi phyag rgyas btab pa dang / bstod pa dang / snyan par brjod pa dang / go bar mdzad pa dang / bsnyad pa'i phyir ro/ /de nas tshe dang ldan pa kun dga' bo stan las langs te/ de'i tshe thal mo sbyar nas ched du brjod pa 'di ched du brjod cing tshigs su bcad pa 'di dag gsol to/ /sang+yas bac+doMs bsa~M gyis mi khyab ste/ /sang+yas chos kyang bsam gyis mi khyab lags/ /bsa~M gyis mi khyab pa la dad rnams kyis/ /rnam par smin pa 'ang bsa~M gyis mi khyab lags zhi ba ci yang mkhyen pa tha~Md mkhyen/ /chos kyi rgyal po rga shi mi mnga' ba/ /ye shes pha rol bgrod par phyin gyur pa/ /sangs rgyas dpa' bo khyod la phyag 'tshal lo/ /de nas tshe dang ldan pa kun dga' bo tshim zhing dga' la mgu zhing yi rangs nas rab tu dga' ste/ dga' ba dang yid bde ba skyes nas bac+doMs la 'di skad ces gsol to/ /bac+doMs chos kyi rnam grangs 'di'i ming ci lags/ 'di ji ltar gzung bar bgyi bac+doMs kyis bka' stsal pa/ kun dga' bo 'di ni khyim bdag zla ba bzang pos zhus pa zhes bya bar zung shig /nor dang / 'bru dang / rin po che tha~Md kyi gter zhes bya bar yang zung shig /de bzhin gshegs pa tha~Md kyis sngags pa nor gyi rgyun gyi 98.222a gzungs zhes bya bar yang zung zhig /bcom ldan 'das kyis de skad ces bka' stsal nas/ tshe dang ldan pa kun dga' bo dang / dge slong de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bac+doMs kyis gsungs pa la mngon par bstod do/ /'phags pa nor gyi rgyun ces bya ba'i gzungs/ rdzogs s+ho// |