@#/ /rgya gar skad du/ sarba pany+tsa a mr-i ta/ sa ra sid+d+hi ma hA du ka /hri da yA na pa ra bid twan aSh+Ta/ bod skad du/ thams cad bdud rtsi lnga'i rang bzhin/ dngos grub chen po nye ba'i snying po mchog /bam po chen po brgyad pa/ dpal kun du bzang po la phyag 'tshal lo/ /bcom ldan gsang ba mchog gi dkyil 'khor na/ /shin du rnal 'byor dbang phyug tshogs/ /rgyal ba rgya mtsho 'khor dang bcas/ /skal ldan rnams dang thabs gcig bzhugs/ /gnas mchog yum gyi dkyil 'khor na/ /gnyis myed lhun gyis gnas pa'i tshe/ /de tshe nyan thos dge 'dun dang / /rang rgyal theg chen mdo sde dang / /byang chub sems dpa'i dge 'dun dang / /nyan thos dge 'dun chen po dang / /dgra bcom ming yang med nang du/ /kun bzang thugs kyi dkyil 'khor nas/ /dgongs ste 'di skad bstan pa'i lung / /bshad cing 'grol ba'i dus gcig dang / / 104.187b 'di skad bstan pa'i dus gcig na/ /srid gsum ye nas bdud rtsi lnga/ /ma bcos ye nas rdzogs sangs rgyas/ /kun tu bzang po'i thugs dkyil nas/ /dus gsum srid gsum sku gsung thugs/ /ye nas bdud rtsi yin pa'i phyir/ /nges pa'i klong nas bka' stsal pa/ /zab mo'i klong nas phyung ste bstan/ /de nas bder gshegs thams cad dang / /thabs gcig bzhugs te dgongs pa ni/ /bla na med pa'i byang chub tu/ /ye shes mnyam nyid nyams rnyed nas/ /rdo rje gsang ba'i gral bkod de/ /kun gyi dam par 'di gsungs so/ /bka' yi dam pa mchog gi lung / /nges par phyung ste gsungs pa 'di'o/ /sgrub dang sgrub par bya ba dang / /'bras bu thob par bya ba'i phyir/ /gsang sngags gsang ba'i man ngag 'di/ /bdud rtsi dam pa mchog gi lung / /snying por bsdus pa'i nges par 'di/ /byang chub 'byung ba snying po mchog /lta ba dang ni spyod pa dang / /dam tshig bsgrub pa phrin las dang / /nges par sgrub dang bsgrub bya'i phyir/ /zab mo bsdus pa'i lung 'di gsungs/ /bsam gyis mi khyab bstan pa dang / /brgyad khri bzhi stong rnam grangs kyang / /theg pa'i sgo ni gsum du gsungs/ /gsang nyid theg par bsdus dang bzhi/ /ldem por dgongs dang don dam yang / /bkri ba'i don de sangs rgyas yin/ /rna brgyud bstan pas thugs brtol te/ /thig le chos skus khyab pa'i phyir/ /nges pa'i lung yang sangs rgyas so/ /sangs rgyas mnyam dang dbyings su 'gro/ /nges pa'i lung yang rnam gcig tu/ /gsang sngags gsang bas sangs rgyas te/ /byang chub sems 'di kun du dag / rdzogs pa'i ye shes bde chen nyid/ /ma lus mtha' dag nyid kyi rgya/ /ye nas bya med bya mi dgos/ /rgyu dang 'bras bu 'khrul pa'i sgra/ /mi rtog sbyong ba'i yul min no/ /de lta'i yul du rtog 'dzin gyis/ /'khor ba'i rgya mtshor gyur pa yin/ /nges 'byung chos sku chen po la/ /b+ha gar ji bzhin bzhag pas na/ /byang chub nyid de ltung gnas med/ /bu gcig ma rtsol bde bar gnos/ /rgyud dang lung dang man ngag kyang / /rmangs dang rje'u dang rgyal po'i tshul/ /khyad par rtsal 'phang thag ring yang / /gcig la gcig rten gcig gi ngang / /dbyer med tshul gcig rang bzhin bas/ /cig ste ma grangs yongs kyi med/ /dbyer med 104.188a ngang du rtogs pa la/ /bdud rtsi zhes ni de la bya'o/ /de las sku gsung thugs kyi bdag /sku dang rgyan dang 'khor lo yang / /lung chen zab mo'i nang na gsal/ /lnga bzhi nang du 'khor ba yang / /ye shes sangs rgyas de las med/ /dbyings su gyur pas mnyam gnas pas/ /ye nas sangs rgyas bde chen nyid/ /bdud rtsi zhes ni de la brjod/ /skye shi med pa'i dbyings su gyur/ /dbyings 'gyur dag mnyam lhun grub pas/ /lta ba 'di la gnas pa yi/ /rnal 'byor 'di ni skal ba bzang / /ci spyad ci bsgoms ci bsgrub kyang / /bdud rtsi nyid te sman gyi mchog /bder gshegs nyid kyi thugs dam nyid/ /byin brlabs ngo mtshar rgya cher 'byung / /rgyal ba rgya mtsho rnams kyi gsos/ /sangs rgyas bde chen nyid las byung / /thams cad ma lus bdud rtsi 'di/ /spros med thig ler gnas pa las/ /mtha' yas sems can don gyi phyir/ /rang la mchod cing rang gis bza'/ /bsgrub pa pos ni nan tan byos/ /zhes bcom ldan 'das dpal kun tu bzang pos/ ye shes chen po'i thugs nas dgongs te bka' stsal pa'o/ /bdud rtsi chen po mchog gi lung las byang chub sems de kho na nyid lta bar bstan pa'i man ngag chen po gsang ba'i don dang po ste/ thugs kyi rgya mtsho'i nang nas gsang ba'i mdzod chen po las bam po chen po brgyad pa'i dang po// // |