@#/ /rgya gar skad du/ a mr-i ta kuN+Da li na ma: bod skad du/ bdud rtsi 'khyil pa la phyag 'tshal lo/ /bdud rtsi rgyal la phyag 'tshal nas/ /bdud rtsi sbyor ba'i thabs bstan te/ /de bzhin gshegs pa kun gyis bdud rtsi bsgrub pa'i dgongs pa la zhugs te/ de nas bdud rtsi rgyal po yis/ /bdud rtsi sbyor ba'i thabs 'di bstan te bka' stsal to/ /dang por phun sum tshogs pa'i yul/ /dga' zhing bar chad med pa'i gnas/ /btsal nas nyid kyi dbang du bya'o/ /de nas rang lus bsrung ba'i phyir/ /lag cha phun sum tshogs pa yis/ /bar chad byed pa'i dgra bgegs bzlog /de nas bsgrub pa'i 104.197b yo byad rnams/ /'tsho ba zas kyi yo byad rnams/ /bsgrub pa dam rdzas yo byad dang / /rkyen zlog sman gyi yo byad dang / /de ltar phun sum tshogs ldan nas/ /ji bzhin bde bar 'dug nas ni/ /sa gzhi rab tu sbyang byas te/ /tshes grangs yar gyi brgyad la brtsam/ /snga dro'i dus nas dkyil 'khor bya/ /maN Dal 'dom gang pa lnga bri/ /bsgrub pa chen po bya ba'i phyir/ /dri chen dri chu'i brkyang nul bya'o/ /dur khrod thod pa lnga nang du/ /tshil chen me mar re re yang / /me mar sdong bu lnga brgya bya'o/ /me mar lnga brgya gtams nas ni/ /de nas bsgrub pa brtsam bya zhing / /rdzogs pa'i las ni rnam bzhi bya/ /zhi ba'i tshe na byang du blta'o/ /gA na'i tshe na nub tu blta'o/ /sta na chen po lho ru blta'o/ /rgyas pa'i tshe na shar du blta'o/ /yang na phrin las rnam pa bzhi/ /so so'i phyogs phyogs dag nas blta'o/ /de ltar 'dug stangs bstan nas ni/ /shar gyi dkyil 'khor steng du ni/ /bsgrub rdzas thams cad bzhag par bya'o/ /lho yi dkyil 'khor steng du ni/ /me mar lnga brgya smos pa bzhag /nub gyi dkyil 'khor steng du ni/ /bsgrub pa yab yum gnas par bya/ /byang gi dkyil 'khor steng du ni/ /rgyu mchog chen po gzhag par bya/ /dbus kyi dkyil 'khor steng du ni/ /bram ze bkra shis gtsang ma'i rigs/ /bkra shis thod pa gzhag par bya'o/ /yang na b+han+d+ha dpal ldan rdzogs/ /zlum zhing 'khyil pa pad+ma 'dra/ /dbus na bu ga gcig yod pa/ /de yi nang du hrI zhes bri'o/ /de yi nang du blugs pa ni/ /snying po tshim byed bcud kyi mchog /gtso bo lnga dang 'bras bu lnga/ /dri zhim bcud ldan thams cad kun/ /'di dag rab tu bskyab pa'i phyir/ /mang po 'dus pa mthu byin che/ /yang na rtsa ba brgyad dang sbyar/ /go tsi hwa dang leng leng hwa/ /'gi'u wang tsi'u hwang rA sa yAn/ /ga pur mu tig lan tshwa rnams/ /'di rnams rtsa ba brgyad dang sbyar/ /yang na gtso bo lngar sbyar ba/ /a 'bras rgun 'brum pa na se/ /ger rgya a ru ra dang lnga/ /'di ni nang gi 'bras bu lnga'o/ /sha lnga dag dang sbyar ba yang / /dbang po lnga yi gzugs dang sbyar/ /de yi phrad du dgos pa yang / /mig dang rna ba sna dang lce/ /gtso bo tsit+ta nyid dang lnga'o/ /shing tog rgun 'brum ka ko la/ /a 'bras pa na bum sha lnga'o/ /dri ni chen po sna lnga dang / /cha yi grangs dang mnyam ste 104.198a sbyar/ /nA ga ge sar shing tsha dang / /sug smel gan+d+ha pa tra dang / /kun tu ra dang dri sna lnga'o/ /yang na dri yi rgyal po lnga/ /rgya spos 'dza' ti pha la dang / /ga pur tsan dan li shi lnga'o/ /de bzhin spos lnga'i dam pa yang / /a ka ru dang du ru ska/ /pog dang sbrang rtsi lce bog dang / /gser dngul zangs lcags g.yu dang lnga/ /bdar ram zhib tu btags te blugs/ /'di dag rab tu mnyam zhing bsog /'di dag sbyar zhing btag pa'i sngags/ /o~M a mr-i ta mu sa la/ gra he ha na ha na hU~M phaT/ 'di rnams sbyar ba'i bdud rtsi mchog /dngos grub 'bras bu nges thob bo/ /'bras bu rnam lnga bsgral ba'i phyir/ /byang gi phyogs kyi dkyil 'khor du/ /me lce gla gli snying la sogs/ /gsang ba'i brda tshig dag gis ni/ /de dag rab tu sba zhing bsgrub/ /phyogs bzhi dbus dang lnga ru gzhag /rgyu mchog chen po khrus byas nas/ /mngon spyod mngon spyod ya mtshan gyi/ /'jig byed 'jigs byed chen po yi/ /e yi dkyil 'khor sum brtseg gi/ /steng du bzhag nas dbang bskur ro/ /de nas dpal chen he ru ka /dur khrod bdag po chen po ni/ /che mchog shin du mi bzad pa/ /dbu mangs phyag cha rtsub pa bsnams/ /smug nag sku ni 'bar ba can/ /zhal ni nyi shu rtsa gcig ste/ /phyag kyang bzhi bcu rtsa gnyis so/ /o~M badzra ma hA shrI he ru ka /ra~M dz+wa la hU~M/ gsang ba'i yum yang yab dang 'thun/ /ma hA kro d+hI shwa ri/ o~M sarba ta thA ga ta mu drA a b+hi shiny+tsa hU~M/ zhes yum dbang bskur nas/ gzhan yang rigs dang mthun pa ru/ /phyogs bzhi dag tu dgod par bya'o/ /de yang tshul bzhin byin gyis brlab/ /e h+ye hi ma hA ru tra hU~M phaT/ sarbed a a zhes brjod pas/ tsit+ta drang ngo / /yang nas yang du spar byas te/ /dug gsum rtsa ba der gcad do/ /rgyu 'bras 'thun zhing sbyar ba yang / /yangs shing rgyud la goms pa dang / /chos sku zhi ba'i ting 'dzin yod/ /yon tan brgyad dang ldan pa la/ /nges pa'i don dbang thos par bya'o/ /'byung ba bzhi las skyed pa'i yum/ /tshul bzhi dag dang ldan pa 'am/ /yang na mtshan bzangs sum bcu ni/ /lus la rdzogs par yod pa la/ /zla gsang dkar dmar rlung dkar lci/ /de bzhin sring mo rnal 'byor ma/ /btsal nas bsgrub pa chen po bya'o/ /'o ma spos chus mgo lus bkru/ /dkyil 104.198b 'khor nang du gzhag par bya/ /'dzag pa'i dus su sbyar ba yi/ /khrag chen po ni sems dang bcas/ /rA sa yA na'i gtso bor bya'o/ /bdud rtsi dam pa'i snod bstan pa/ /kun byed thams cad za ba yi/ /slob ma dpa' brtul gtsang sgra can/ /skyon drug rnam par spangs pa yi/ /mi phyed pa ni dgu dang ldan/ /dam tshig thams cad ma nyams shing / /srog lus bu dang chung ma dang / /rin chen sna tshogs 'bul byed pa/ /sring mo shin tu brgyan pa yang / /slob dpon bla ma de la dbul/ /de ltar 'bul ba'i slob ma'i mchog /yud yang pany+tsa yan chad kyis/ /rab tu 'bru ni gdams pas bya'o/ /thugs kyi dngos grub dam pa 'di/ /rang byung nga yis bstan pa'i phyir/ /re ba med pas blang bar bya/ /ma dag pa ni 'tshams gcad do/ /las kyi gtsor ni bkang ba dang / /sbyang dang 'tshams dang bsal bar bya'o/ /nyi zla pad+ma yang dag gnas/ /bdag nyid dpa' bo 'bru lnga yis/ /gnas lnga dag tu bsam par bya'o/ /dngos grub rab 'bring tha ma gsum/ /ma thob bar du mi gtang zhing / /gtang na bar chad chen po 'gyur/ /gsang sngags bdud rtsi yon tan 'di/ /sad pa'i phyir yang bsgrub dgos na/ /mkhas pas bden pa'i don shes nas/ /don la the tshom ci ste za/ /zhes the tshom bcad la/ dngos grub blang ba'i sngags 'di'o/ /a hoH su kha d+harma gA ya ni/ a mr-i ta sid+d+hi hrI:zhes dngos grub blang ngo / /gnas lnga dag tu bsam pa yang / /spyi gtsug dbus su zla ba ste/ /der ni o~M dkar 'od ldan pa/ /'od zer lnga ni 'phros pa las/ /slar 'dus snang mdzad gtso bo ste/ /rtag pa'i phyag rgya bcings pa'o/ /lce la hri dmar 'od 'phros pas/ /slar 'dus mtha' yas chos kyi gsung / /mnyam pa'i phyag rgyar gnas pa'o/ /snying gar yi ge hU~M mthing ga /'od zer lnga ni 'phro ba'o/ /slar 'dus mi 'khrugs sems pa ste/ /phyag gnyis rdo rje dril bu bsnams/ /yang na bdud 'dul sa gnon no/ /lte bar yi ge swA ser po/ /'od zer lnga ni 'phro ba las/ /slar 'dus rin chen dam pa'i gtso/ /phyag rgya yid bzhin sbyin pa'o/ /gsang bar yi ge hA ljang gu /'od zer sna lnga 'phro pa las/ /slar 'dus don yod grub pa ste/ /zhi ba'i phyag rgyar mnyam rdzogs pa'o/ /rigs 104.199a lnga gtogs pa 'di kun yang / /rang 'byung gi ni dkyil 'khor yin/ /de ltar 'od zer lnga lnga yis/ /nyi shu rtsa lnga'i 'phro 'du las/ /khams gsum 'gro ba'i don byas nas/ /slar 'dus sman lnga nyid la bsdu/ /sman nyid phyag rgyar gsal 'bar nas/ /'od zer sna lnga slar 'dus nas/ /phyag mtshan so sor gsal 'gyur te/ /gser gyi 'khor lo zur brgyad las/ /dri chen bdud rtsi zhu ba'o/ /hU~M las rdo rje rtse lnga pa/ /'bar nas byang chub sems su zhu/ /swA las rin chen 'od 'bar te/ /ma hA moM sa bdud rtsir zhu'o/ /hriHlas 'od zer sna tshogs pa'o/ /pad+ma rak+ta thig ler zhu'o/ /hA ljang 'od 'phro sna tshogs pas/ /dag pa'i dri chu bdud rtsir zhu'o/ /de ltar 'phro 'du bya ba yang / /goms pas yang nas yang du bya'o/ /de nas bdud rtsi rnam lnga la/ /bsam pa'i yi ge dam pa lnga/ /o~M hU~M swA hrIHA/ rtsa ba'i yi ge lnga po yang / /'od zer 'phro ba snga ma bzhi/ /de nas 'dzab bsgom bzlas pa'i sngags/ /dgu pa 'di ni 'dzab du drang / /o~M badzra tsit+ta sa ma ya hU~M tha/ de la bdud rtsi'i phyag rgya ni/ /lag pa g.yon pa'i dpung pa brkyang / /mthe bong srin lag mthil du dgug /rdo rje mtshon gang bcas pa dang / /mdzub mo gung mo mthe'u chung brkyang / /sbyar te lag pa'i mthil gyis ni/ /bdud rtsi snod gyi steng du gnon/ /de nas bdud rtsi byin gyis brlab/ /ting 'dzin me dang 'dra ba las/ /bzlas brjod rlung dang 'dra ba yis/ /glal dang lud pas bar mi gcad/ /de nas bdud rtsi byin gyis brlab/ /badzra a mr-i ta o~M A:hU~M hri thA/ 'di ni rtsa ba'i dkyil 'khor lnga'o/ /dzaHhU~M ba~M hoH/ ma hA a mr-i ta A be sha hoH/ zhes bcom ldan 'das bdud rtsi rgyal pos bka' stsal to/ /bdud rtsi dam pa mchog gi lung las/ 'bras bu chen po lnga bsgral ba'i lung nges pa dang / de bsgral nas de sman du sbyar ba'i thabs bstan pa'i bdud rtsi chen po sa ma ya 'bum sde las/ bam po chen po drug pa// // |