rgya gar skad du/ shrI de bi kA lI nA ma aSh+Ta sha ta ka / bod skad du/ dpal lha mo nag mo'i mtshan brgya rtsa brgyad pa/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bya rgod kyi phung po'i ri la bzhugs te/ rgyu dang 'bras bu'i byang chub sems dpa' thams cad la bden pa'i mtshan rnams ston par mdzad do/ /de'i tshe dpal lha mo nag mo chen mo yang bcom ldan 'das kyi thad du song ste/ lan gsum bskor ba byas nas bcom ldan 'das kyi spyan sngar phyogs gcig tu 'dug go /de nas byang chub sems dpa' seng ge brtson 'grus kyis bcom ldan 'das la 'di skad ces gsol to/ /bcom ldan 'das byang chub sems dpa' srin mo'i cha lugs kyis 'jig rten pa'i don mdzad pa'i mtshan gyi rnam grangs ji lta bu lags zhes gsol pa dang / bcom ldan 'das kyis byang chub sems dpa' seng ge brtson 'grus la 107.228b dgongs nas dpal lha mo nag mo la gzigs te 'di skad ces gsungs so/ /thos bsam bsgom la cher gnas pa'i/ /rgyu 'bras rkyen gyi bdag nyid can/ /'gro la phan mdzad mkhas pa'i mchog /dpal ldan lha mo nag mo 'phags/ /byang chub sems dpa' sprul pa ste/ /sa ltar rten pa'i gzhir gyur pa/ /yon tan sdud byed chu dang 'dra/ /byang chub smin byed me lta bu/ /dge ba'i 'du byed rlung ltar g.yo/ /shes rab rnam dag nam mkha' ste/ /khyod ni 'byung ba chen po 'dra/ /'byung po phal chen rnams kyis bstod/ /bsod nams ye shes rab bsags pa'i/ /las dang rnam smin dag la mkhas/ /nga rgyal gzugs kyis 'dul ba goms/ /shes rab snying rje'i lam du 'gro/ /khyod ni bum pa bzang lta bu/ /dper na yid bzhin nor bu'i chu/ /kun la phan pa'i dpag bsam shing / /nyi ma 'dra bar khyod la gsal/ /zla ltar gsal ba'i thugs mnga' zhing / /ming ni ri bong rwa dang 'dra/ /rang gi rgyud ni 'khor lo 'dra/ /u dum ba ltar khyod dkon yang / /bdud rtsi lta bur yongs tshim mdzad/ /'gro ba kun gyi bdag mo lags/ /rang bzhin med pa'i chos kyang ston/ /chu dang nam mkha'i tshub ma ltar/ /gdul bya'i srid gsum cis kyang 'dul/ /dus gsum rgyal ba'i bstan pa skyong / /dam pa rnams dang yang dag gcig /dam pa rnams kyi lam du 'gro/ /lha mo ma mo gnod sbyin mo/ /srin mo klu mo sha za mo/ /gdug mo 'byung mo grul bum mo/ /drag mo rngam tshul glog 'gyu ma/ /rlung mo nag mo 'jigs byed ma/ /mkha' 'gro gtum mo zhing sgrol ma/ /zhi rgyas dbang dang drag pos 'dul/ /dkar ser ljang nag dmar yang ston/ /rnam pa brgyad kyi dbyibs kyang 'byung / /'gro ba drug po'i tshul yang ston/ /phung po lnga yang brjod par nus/ /dbang po tshim byed yul lnga 'ang ston/ /rten cing 'brel pa'i spyod pa mkhas/ /yul can rnams ni gsod la mkhas/ /de bzhin ngag rnams gsod pa dang / /lus can rnams ni gsod la brtson/ / 107.229a sems ni gsod pa med la mkhas/ /'khor ba las ni ring du song / /de bzhin gshegs pas lung bstan te/ /byang chub sems dpa'i mtshan rnams dang / /'jig rten skyong mdzad dpal ldan ma/ /dam chos 'dzin pa rnams la byams/ /o~M` AHhU~M/ shrI de bi kA li sa ma ya dza/ DA kI nI DA ya sa ma ya swA hA/ ming brgya rtsa brgyad gang 'dzin pa/ /yon tan brgya rtsa brgyad kyang thob/ /dmyal ba'i sdug bsngal myong mi 'gyur/ /yi dgas gnas su mi skye zhing / /byol song skye bas thogs med 'gyur/ /lus 'phags gnas su skyes pa na/ /thog la sogs pa mi 'bab cing / /sgra mi snyan du rlung gis min/ /de bzhin ban glang spyod du yang / /chu dang rlabs kyis khyer mi nus/ /'dzam bu'i gling du gang skyes pa/ /sna tshogs gnod pas nyen mi 'gyur/ /'dod pa'i lha rnams gnas su yang / /skyes nas chos la dga' bar 'gyur/ /bsam gtan bzhi yi skye gnas su/ /tshad med bzhi ni 'phel bar 'gyur/ /gzugs med gnas ni bzhi por yang / /don med na ni mi skye ste/ /'du shes med par nam yang min/ /'phags pa bzhugs pa'i gnas rnams su/ /khams gsum tshul gyis bdag don spyod/ /rtag tu yul la chags mi 'gyur/ /sems la 'dzin par mi byed de/ /nyon mongs rtsa ba drug po dang / /de bzhin nye ba nyi shu dang / /mtshams med lnga yang byang bar 'gyur/ /bskal pa grangs med mang por yang / /mi khom brgyad du skye mi 'gyur/ /mu stegs rtsod pa bzlog pa dang / /mthu stobs phun sum tshogs ldan zhing / /tshe ring nad med dpal dang ldan/ /sdug med bskal pa mang por yang / /nam yang 'khor bar mi ltung zhing / /mya ngan 'das pa thob bya'i phyir/ /nyan thos sa rnams non pa dang / /rten 'brel bcu gnyis shes par bya/ /byang chub sems dpa'i sa rnams ni/ /rab dga' dri med 'od ces 'phro/ /sbyang dka' mngon gyur ring du song / /mi g.yo legs pa chos kyi sprin/ /sangs rgyas 107.229b sa chen bla na med/ /bcu gnyis po yang thob 'gyur te/ /kun tu 'od dang bdud rtsi 'od/ /nam mkha'i 'od dang rdo rje'i 'od/ /rin chen 'od dang pad ma'i 'od/ /las kyi 'od dang dpe med sa/ /dpal ldan sa dang shes rab 'od/ /thams cad mkhyen dang rang rig ste/ /bcu gnyis sangs rgyas sa rnams kyang / /'di tshe byung na myur du thob/ /sa rnams ma thob bar du yang / /'gro ba rnams la phan pa dang / /shes rab snying rje ldan gyur cing / /chos la dga' ba rnams kyis srungs/ /dngos grub thob ste de bzhin gshegs/ /rin chen las byung thob par 'gyur/ /dpal ldan byang chub sems dpa' dang / /dpal ldan lha mo nag mo yi/ /ming brgya rtsa brgyad gang 'dzin pa/ /yon tan brgya rtsa brgyad thob ste/ /sku gsung thugs ni grub nas kyang / /khams gsum chos kyi rgyal por 'gyur zhes gsungs pa dang / byang chub sems dpa'i 'khor de dag dang / dpal lha mo nag mo chen mo rnams ngo mtshar du gyur te/ bcom ldan 'das kyis gsungs pa la rjes su yi rang zhing mngon par bstod do/ /dpal lha mo nag mo chen mo'i mtshan brgya rtsa brgyad pa yon tan dang bcas pa/ rdzogs s+ho// |